السلام عليكم شلونكم اخوان واخوات ان شاء الله بخير وسلامه
راح احجيلكم اليوم رحلتي من بغداد الى نيويورك بالتفصيل حتى الكل يستفاد منهه بس ترة طويلة حتى الكل يستفاد
اول شي موعد الطيارة من مطار بغداد جان الساعه ١٠ باليل اتصلو بيه المنظمة كالو انت لازم بالساحة مال عباس ابن فرناس بال٦ العصر المهم رحت هناك وجان اكو كافتيريا بيه جماعه الاي او ام كولهم المهم اجة الموضف ووزع علينه التذاكر من بغداد الى عمان بس وكال ادخلو وانتظروني يم الكاونتر مال الخطوط الملكية الاردنيه طبعا صرنه مجاميع وكول مجموعه اخذت سياة مال المطار والنفر جان ١٠ الاف دينار طبعا الي مسافر قبل راح يعرف شنو التعب بالتفتيش موطبيعي المهم من وصلنه للكاونتر كالو روحو وزنو الجنط وتعالو وهنا اخر عملية رشوة للعراقيين =(( الي يوزن كلاوات اكو ناس عدهم ٢٥ كيلو واكو ناس ٢٨ كيلو كللهم انطوني على ٥٠٠٠ دينار وروحو الصراحة اني اتندمت على غراض عفتهه اشتريتهه جديدة بس عفته بالعراق لان عبر الوزن ولو ادري اكو فلوس جان جبتهن بس المهم انطينه الجنط ورحنه بالصاله مال الانتضار الى ان صار ساعه ١٠ الا ربع نادو على المسافرين الى عمان اتوجهنه الى البوابة طبعا مو بس جماعه اي او ام اكو هواي ناس هم مسافرة لعمان المهم دخلنه تفتيش اخير وبعدين وصلنه لاخر باب الي ورا الطيارة الباب جان مسدود واكو موضف واكف انتظرنه تقريبا ساعه كاملة يعني تاخير على موعد الطيران ساعه كاملة ليييييش الطيارة ناسين ينضفوهه طبعا احنه شنو على اعصابنه المهم الله سهلهه وصعدنه الطيارة واتكولنه الى عمان
هسه وصلنه الى عمان نزلنه من الطيارة وجان اكو موضفين ينتضرونه يصيحون اي او ام ولابسين ملابس المنضمة وعليه الشعار وكفونه على صفحة وقسمونه قسمين قسم ما اعرف وين راح اعتقد غير خط رحلة والقسم مالتنه اخذونه الى الصاله الموضف اجتمع بينه وانطانه اوراق انوقع عليهه مال الديون يعني تسديد الدين مال السفر وانطانه بطاقه مال اكل مال مطعم معين بالمطار كال كول واحد اله وجبة وانطانه علاكه مال المنضمة وبيهه الاوراق المهمه يعني خلي يولي الجواز بس هاي الاوراق حييييل مهمه لان هيه جوازك بالسفر وكال راح تنضرون٧ ساعات طبعا لا مبيت ولا شي اكو ناس نامت بالصاله واكو ناس راح نامت بالجامع واكو ناس واني منهم ضلينه كاعدين ونفتر وانسولف المهم ها ونسيت اخذ الجوازات كولهه ويا وثاني يوم الصبح اجانه وانطانه الجوازات وياهه تذاكر السفر من عمان الى القاهرة ومن القاهرة الى نيويورك صعدنه بالطيارة واتوجهنه الى القاهرة هناك طبعا ماكو اي احد ينتظرنه الصراحة اعتمدنه على نفسنه يعني موجود بالتذاكر الوقت والبوابة رحنه وكفنه يم البوابة الكل طبعا واكو ناس راحت للمطعم واكو ناس ضلت كاعدة طبعا والله اتعس ترانزيت شفته بحياتي اتخيلو حتى كراسي ماكو كاعدين بالكاع لمدة ٣ ساعات يعني اكو مطار ما بي نت لا اكو نت لا اكو كراسي مطار تعبان حيل المهم نادو على خط الرحلة مالتنه ورة ٣ ساعات جيكو اوراقنه وبعدين صعدنه الطيارة واتكولنه على نيويورك طبعا من القاهرة الى نيويورك الوقت ١١ ساعه والصراحة الطيارة جانت زينه ومريحه الخطوط المصريه ورة التعب وصلنه الحمد لله الى نيويورك مطار جي اف كنيدي وهنا هم لكينه الموضفين مال المنضمة ينتضرون ولمونه ورحنه لصاله خاصه بس النه طبعا هنا اني اتفاجئت من كالو منو يحجي انكليزي اني رفعت ايدي كالو انريد مترجم اني ضليت صافن مو لان ما اعرف بالعكس اني احجي انكليزي بطلاقه بس شلون هيج منضمة ماعدهم مترجم وياهم المهم هاي نقطه لتنسوهه لان بعدين راح اذكركم بيهه =)) المهم كمت اترجم واكو ناس جان الهم طيارة ثاني يوم لغير ولايات واكو نال بنفس اليوم عدهم سفر لغير ولاية واني ممن الناس الي جان عندي سفر طيران بس بنفس الولاية نيويورك المهم من خلصت ودا اطلع جان يجي واحد اني شفته ويانه من جنه بالعراق عبالي لاجئ طلع شنو موضف اي او ام وشغله يساعدنه بالطريق ومترجم هاي النقطة الي كتلكم اتذكروهه والله حاله من حالنه وماله علاقه بأحد ولا حجة اي حجاية ولا كال اني ترة موضف اخاف تحتاجون شي ابدددددد بس الحمد لله محد احتاجه لان جنه ايد بأيد
المهم وصلت اني لمدينتي والي هيه سيراكيزو استلمتني الموضفه من المطار ووصلتني لشقه مالتي طبعا وياية روميت شريك سكن اني بالطريق كالت انت عندك شريك سكن اني كلت ميخالف جان اتكول افغاني طبعا اني شنو رأسا اتخيلته طويل ولابس دشداشه وعنده لحية كلت خرب حضي المهم وصلت ونمت ثاني يوم الصبح شفته لا والله طلع الولد اكصر مني وطلع مثقف كولش وخريج وهم جان مترجم والصراحة اني لهسه ويا لان متفقين على كولشي
طبعا اكو شغله لازم اتعرفوهه
ميحتاج تاخذون اكل وياكم بالسفر لان الاكل موجود بس يجوز للاطفال
اخ الله تعبت متعبتو انتو اني بعد ما اشوف والله هاي تقريبا ال تفاصيل والي عنده سؤال اني بالخدمه
