السلام عليكم و رحمة الله و بركاته
شفت موضوع اخ حسين الجبوري عن عودة و مشاركات اعضاء القدماء في المنتدى لمساعدة اعضاء الجدد ,طبعا اني كتبت موضوعين خلال 6 اشهر من وجودي بامريكا لو شي قليل بس والله العظيم ماكو مجال ان شاء الله تفتهمون لمن توصلون و تلتهون بحاة امريكا ,عالعموم حسيت بالمسوؤلية من كلام اخ حسين ...
نجي لموضوعنه الرئيسي معلومات عامة و تجربتي ..
طبعا اني اس اي في و صلت امريكا بتاريخ 15.5.2014 ولاية فيرمونت اقصى شمال شرقي , اني من السليمانية متعود وية البرد و الثلج بس البرد هنان غير شي يعني كواليتي مالته كلششششش زين (هههههه ثلج سليمانية (made in china) توصل درجات الحرارة ل 35 تحت الصفر فيتوقف الحياة نهائيا بس من البيت للشغل - و من الشغل للبيت يعني طلعات و ونسة و صور ماكوووووو .
بصراحة هاية الولايات مو مال عراقيين و مانصح اي واحد يجيهه موضوع المساعدات و المنظمات و تامينات كله نفس الشي بكل امريكا مع اختلاف كلش بسيط لان اكو اخوان مفتهمين الشغلة بالمقلوب يكولون ولايات الباردة تستمر بيهه مساعدات 5 سنوات لا عيني هاي تعتمد علا حالتك اذا سنكل او عدك عائلة و اطفال ...
ماكو صعوبات الحياة بامريكا اذا انت اصلا شخص ناجح بلعراق يعني كللي وضعك و شغلك و راتبك بالعراق و اكلك اشكد تكون ناجح او فاشل بامريكا بس هنان ماكو فساد و كلاوات هنا قانون و جديات , اكو شغل هووووواية بس ينراد تعب و تحمل و يعلموك شلون تحترم كل سنت و دولار مو مثل عراق تشتري موبايل ب 800 دولار و تخسر 40 ورقة بسيارتك .
تغيير الولاية كلش صعب هنا مانصح اي واحد ايغير ولايتة باول 6 اشهر او 8 اشهر الي تاميناتك عالمنظمة ,هسة اني ارد احول علا ولاية يوتاه يعني كافي صارلي 6 اشهر بهاي الولاية اتعلمت و افتهمت هواية شغلات و هسة صار وكت التغير مو مثل جماعة اول شهر او شهرين ايكولون هاي ولاية مو زينة و تريد احول .
تتذكرون (ابقي بعيدا 100 متر او سوف تتعرض لاطلاق النار
) ؟ حط هاية العلامة عالعراقيين حولك لان اختلاط بيهم مشكلة (احترامي للزينيين القليلين ) بس هذا واقع الحال ,عيش حياتك كامريكي لان محد يفيدك هنا انت و ربك
..
بعد شكو
اها دائما انصح بتعلم اللغة , للاجئين او اي واحد جديد بالبلد,خلي ببالك لغة احسن من شهادة اكو ناس يكولون يابة امريكا مو زين و حياة صعبة و ماكو شغل , يابة انت متحجي غير هلو و باي و تريد تشتغل بمكان زين ؟ لعد شنو مواصفاتك و خبراتك حتى ننطيك شغل زين ؟هنا تجي ورطة و سلبية الحياة و الامريكا..
اخيرا : هاي تجربتي و راي الشخصي و ليس تعميم ,الي عنده راي و تجربته يختلف على عيني و على راسي خليكتب هاي كله جذب ..
اي شي تحتاجون و اي سؤال اني بالخدمة
و تحياتي للكل
اخوكم كازه بيسري
