احلى تعليق عراقي
تلقيت احلى تعليق , واعتبره وسام تقدير من الاخ العزيز ( Odisho Youkhana ) على مقالتي بعنون ( بغداد وعبعوب وعسف الزمان ) التي نشرت في العديد من المواقع والصحف العراقية , ولاهمية التعليق ( قصيدة شعبية ) التي جسدت وترجمت الروح العراقية الاصيلة , التي تنتمي الى الشعور والاحساس الوطني الصادق والنزيه , بما يعانيه الوطن وبغداد من عسف الزمان , من هذا المنطلق الوطني , ارجو من الاستاذ العزيز ان يسمح لي , بنشر قصيدته الشعبية الرائعة , التي رسمت بدقة الهموم والهواجس والعواطف , ما يدور ويغلي ويفور في صدور وعقول الشرفاء والغيارى على الوطن المطعون بخناجر عتاوي الفساد المالي والارهاب الدموي , وغياب الواجب والمسؤولية والوطنية من قادة القدر الاسود
اهدأ الى الأستاد جمعه عبدالله المحترم
الله واكبـَـر ياوَطـَـنْ
العين وَدرهَه البچي ـ والگلب عـطـّـب ملهوفْ
ياحلوه يا ام الوفه ـ والروح غيرچ مَـتـْـشـوف
ذبحوچْ يحبيبه ذبح ـ هالگطـّعَـتْ بـيچْ اسـيوفْ
مشتاق كلـّي الشوفتچ ـ گلبي الچ ضل ملهوف
صرتي حلم ما نوصَلچ ـ رواحنه إعليچ اتطوف
بـغـداد ياتـاج الوطن ـ بيـچ الـغـُرُب كلهـَـه اتـحـوف
***************
جرحچ كلف چبدي نزف ـ باترابج دم مَدْيوفْ
اطفال بيـچ اتيتمت ـ غسلو دمـعهـم بــگــْطوف
العيشه سوده امصخمّه ـ والموت ينهب لصفوف
بغداد : شوفيهَ الزلم ـ شابَـوْ اويبست لچْـفـوف
نسوان عاشت بالهضم ـ عيون تبچي اومتشوف
بـغـداد قـانون البشـر ـ بيـچ الـغـُرُب كلهـَـه اتـحـوف
**********
اسنين انگضت ماتنحسب ـ والبلد بـَـهـْـلـَه منسوف
اجروح جَرْحَتْ بالجرح ـ بشـگوگنه انـضـل انروف
صرنه شمع يشعـل جهـل ـ والعلم فوگْ الرفـوف
والحزن دايـر عَ البلد ـ امخالف يـِـواسي المخلوف
مهجوم صـاير هـَـالوطنْ ـ والموت يكرف لصفوف
بـغـداد ياأم العــلم ـ بيـچ الـغـُرُب كلهـَـه اتـحـوف
***************
بغداد يا عـيـني إلچْ ـ اسمچ الشامخ معروف
كافي بعد ما ضل صبر ـ والصبر أعْـمَه ميشوف
حيف اوالف وسفه اوالف - سولتنه صارت بس أوف
احلام كلهه اتـْبَـربـدَت ـ ماتت ابـْـتُــرْبَـتْـهَ احروف
بلوه ابتلينه ياشـعـب ـ نركض اوكاتلنه الخوف
بـغـداد يـاأم الـكـرم ـ بيـچ الـغـُرُب كلهـَـه اتـحـوف
فالف شكر وتقدير الى الاستاذ العزيز ( Odisho Youkhaa ) مع الف باقة ورد جوري
جمعة عبدالله
