امريكا و الحياة هنا ( ملاحضاتي )

[kellercall]

السلام عليكم
اني قدمت اي او ام بتاريخ 10-2012
و سافرت بتاريخ 07-2014

بس الحقيقة من وصلت امريكا حييل انصدمت من نضرت للعراقيين العايشين بمنطقتي فورت وورث طبيعه الحياة هنا مو الس في بلاد العجائب مراح ينطووك فلوس عل حدود مراح تلكه الدولارات متشمره ب الشوارع
الناس عايشين سد بسد و سمعت نصايح من هواي عالم ( صارلهم 10 - 17 سنه هنا ) غلطه وحده بمريكا اضييع والله اضييع و تترحم للعراق الف مره ان شاء الله الكل تسافر و تشوف شقصد اني . هومليس هوااي . مكديين بالتقاطعات معلك كارتونه عل صدره . بائعوا المجلات ذوله ليش ميشتغلون لان دائما بالاورينتيشن يفشلوون ( العراقي دائما ينجح لان ميشرب مخدرات و هاي السوالف التعبانه )
اذا عندك وضيفه بالعراق لتتركهه علمود امريكا متسوه والله .
والي حاط اباله فكره مستقبل اولادي هذا حجي ليل لان هنا ينطون حريه مطلقه للمراهقين ( احتمال يضيعون) و مدارسهم العامه متنجرع ( مخدرات بالحمامات . دروس تعبانه و اصدقاء سوء ) والتدريس شبه اجباري ( تدفع غرامه اذا ابنك ميداوم مدرسه ) اني  داومت صف 11 و دا احجي عن تجربه لتخلون بناتكم يصادقن امريكيات

اشتغلت شفت ليلي بوول مارت ينطوني 9 دولارات بالساعه ( كلشي متشوف منهن )

عنصريه اكو . فساد و رشاوي اكو . تسمع رزايل من السوبرفايزر
واسطات اكو و بكل جداره .
من ادور عل شغل لتنتضر الكيس ووركر لان الكيس ووركر دائما ما يكون ( فاهي )

امان اكو ( مو دائما ) بس ما اعرف باليل ( ساعه 8 باليل ) المنطقه تنام ما اشوف احد بالشارع بس الجلاب تنبح

لتندك ويه السود لان حته مسدسات عدهم و اخر ميفكرون بي الشرطه

الشرطه هنا مينجرعوون جنت صاعد ويه صديقي بالسياره طك التاير و ضرب علامه مال مرور بس اتأذت السياره الشرطه طيحو حض حضنه مخلو فحص مسوو بينه مع ذالك الولد اجته ثاني يوم بالبريد غرامه 2500 دولار

اعيد و اقول العنده وضيفه بالعراق ليجي لمريكا تره لا جنسيه ولا مسلسلات ورديه تكضيهه عماله و عيشتك سد بسد و من الله التوفيق

والدتي محجبه الي حد هسه ادوور شغل ومحد يشغلهه

لو العراق امان بااااجر ارجع و اكسر الفوودستامب و المدكيد و الكرين كارد و السوشل و اجازة السوق

اسف لاطالتي بس حبيت اوضح للعالم شنو امريكا 

[مصرفي]

اخي الكريم نشكر لك رأيك والذي نقدره ونحترمه
ولكن اولا ان كلمة ( ملاحظاتي تكتب بهذه الطريقه وليست كما كتبتها حضرتكم )
ثانيا العالم جميعا يسكنه بشر والانسان بطبعه خير وشر وهذا معناه ان الخير والشر تراه في كل مكان وهذه معلومه يعلمها الجميع وليست اختراع او اكتشاف من قبلي  .
اما فيما يخص تجربتك فانت تنقل تجربه محدوده لا تعتبر قياس عام للجميع فانا اعلم جيدا ان هناك مدارس ممتازه تخلو من وصفك واعلم ايضا ان هناك مناطق امنه واعلم ان هناك وظائف جيده واعلم ان هناك امريكان غير عنصرين
قصدي يا اخي المحترم ان للكأس نظرتين اولهما نصفه الخالي والنظره الثانيه نصفه الممتلئ
اتمنى لك التوفيق وانصحك يا اخي الكريم ان تغيير مدينتك او منطقة سكنك فيبدو انها غير جيده
وشكرا واتمنى ان لا تزعل مني لاني احبك كما احب كل انسان على وجه الارض

[kellercall]

اخي الكريم نشكر لك رأيك والذي نقدره ونحترمه
ولكن اولا ان كلمة ( ملاحظاتي تكتب بهذه الطريقه وليست كما كتبتها حضرتكم )
ثانيا العالم جميعا يسكنه بشر والانسان بطبعه خير وشر وهذا معناه ان الخير والشر تراه في كل مكان وهذه معلومه يعلمها الجميع وليست اختراع او اكتشاف من قبلي  .
اما فيما يخص تجربتك فانت تنقل تجربه محدوده لا تعتبر قياس عام للجميع فانا اعلم جيدا ان هناك مدارس ممتازه تخلو من وصفك واعلم ايضا ان هناك مناطق امنه واعلم ان هناك وظائف جيده واعلم ان هناك امريكان غير عنصرين
قصدي يا اخي المحترم ان للكأس نظرتين اولهما نصفه الخالي والنظره الثانيه نصفه الممتلئ
اتمنى لك التوفيق وانصحك يا اخي الكريم ان تغيير مدينتك او منطقة سكنك فيبدو انها غير جيده
وشكرا واتمنى ان لا تزعل مني لاني احبك كما احب كل انسان على وجه الارض

اشكرك عل هذا الرد الجميل و الموضوع ينص عل " ملاحضاتي " و احتمال كبير ملاحضاتك تختلف كليا

[مصرفي]

اشكرك عل هذا الرد الجميل و الموضوع ينص عل " ملاحضاتي " و احتمال كبير ملاحضاتك تختلف كليا

بارك الله بيك ويارب التوفيق

[المهندس الزورائي]

مشكور على موضوعك وصرحاتك . اعتقد انه حضرتك مكان عندك فكرة واضحة عن الحياة بامريكا وسلبياتها ومعاناتها .. لذلك حدثت الصدمة ( مثل ما ذكرت حضرتك ) . الحقيقة اغلب الناس اللي ينتظرون سفر لامريكا يعرفون كثير مما ذكرته ويعرفون شلون يدبرون حالهم ويتجنبون السلبيات ومخططين لحياتهم هناك مع علمهم بوجود سلبيات .. لذلك مراح يعانون ولا ينصدمون مثل ما صار مع حضرتك . عموما .. رد فعل كل انسان واستيعابه للواقع الجديد يختلف من واحد لواحد .. لذلك تشوف اكو ناس راحوا لامريكا ويمدحون بيها ورتبوا حالهم وناس بالعكس .. واتمنى مع الوقت انت ايظا ترتب حالك وتستقر وتتغلب ع السلبيات .. تحياتي .

[kellercall]

مشكور على موضوعك وصرحاتك . اعتقد انه حضرتك مكان عندك فكرة واضحة عن الحياة بامريكا وسلبياتها ومعاناتها .. لذلك حدثت الصدمة ( مثل ما ذكرت حضرتك ) . الحقيقة اغلب الناس اللي ينتظرون سفر لامريكا يعرفون كثير مما ذكرته ويعرفون شلون يدبرون حالهم ويتجنبون السلبيات ومخططين لحياتهم هناك مع علمهم بوجود سلبيات .. لذلك مراح يعانون ولا ينصدمون مثل ما صار مع حضرتك . عموما .. رد فعل كل انسان واستيعابه للواقع الجديد يختلف من واحد لواحد .. لذلك تشوف اكو ناس راحوا لامريكا ويمدحون بيها ورتبوا حالهم وناس بالعكس .. واتمنى مع الوقت انت ايظا ترتب حالك وتستقر وتتغلب ع السلبيات .. تحياتي .

اشكر مرورك الجميل . بالفعل حدثت الصدمه لان مجانت عندي رؤيى فعليه للواقع الاميركي و اني اشجع كل شخص ان يرى اميركا قبل ان يفكر بالهجره و اللجوؤ .

[inter]

الواحد لازم يروح لامريكا ؟ ميصير كندا او استراليا او السويد ؟

[iraqforme]

تسلم اخي الكريم على الملاحظات القيٌمه هذه.
اكيد الكل يخلي في نظر الاعتبار هذه الاشياء ومن الممكن ان تحدث مع كثير من المسافرين الى ارض الاحلام لان تاريخ العراقيين بالعيش خارج العراق هو تاريخ حديث (يعني مومثل الفلسطيني او اللبناني) من سنة 48 هم في بلاد الغربه. بالمحصله اكيد رح تحدث هاذه الملاحظات اللي ذكرتها حضرتك مع قسم من عدهم.
مودتي لك

[ضياع]

شكرا الحضرتك بس انت ذكرت نقطة كلش مهمة

انهُ لو اكو امان بل عراق جان حضرتك باجر رجعت انت هيج كاتب

احنة هم اخي لو اكو امان بل عراق جان شبر مطلعنة بس الحال من بعضة

وكل السلبيات الي ذكرتها كلها موجودة بل عراق وبعد اكو اتعس هم

فيعني احنة مو مواطنين دنماركيين حتى ننصدم

احنة العراق عبارة عن فساد ورشوة وعنصرية وقتل وتحليل وتحريم بكيفم

ونفاق وحسد وتفجيرات ومحسوبيات واشكااال  والواااان ولذلك بلنسبة الية

متحضرة الكلشي ممكن يقابلني هناك

وشكراًعلى نقل تجربتك المريرة ربي يفتحها بوجهكم وترتاحون

وتقبل ردي ووجهة نظري

تحياتي اختك ضياع

[sara51067]

والله يا اخي ما اعتقد رح انشوف اكثر من الي دنشوفة بالعراق من قتل وتهجير وخطف وابتزاز وتفرقة
وعنصرية وكل الامور السلبية

احنة لو بلدنا امن جان محد فكر يطلع ويعوف بلده !!!!

تحياتي

[كلبة مشلوع]

اخاف انت كاعد بلعراق و متدري بنفسك ههههه ، زيين انت ليش معترض على تدريس الاجباري ،

زيين ممكن دكلي شغلات الايجابية ؟ رجائا اذكره ،
بصراحة انت كاعد بأسوء مكان ابمريكا حسب كلامك ،

و انصحك تغيير مكانك ،

تحياني الك

[عراقي مغترب]

شكرا على وجهه نظرك. اعتقد هاى السلبيات فقط في ولايتك. اخي. عندى اصدقاءباغلب الولايات  ما سمعت مثل هاى السلبيات

احنا بعدنا ما مسافرين. سوالى من نصدق الكلام. منك او من غيرك  لو انت بمكاننا الي منتظرين من تختار. والجواب لك اخي وياريت. من الاخوة الى ساكنين بالولايات يحدثونا عن حياتهم لنكون على بينه من امرنا

اذا الواحد ما عنده اهل ولا اصدقاء ولا حكومة تحميك ويحاربونك برزقك. فما هو الحل هل اقبل الحياه بامريكا  او

تحياتى لك اخي

[حـفيد الباشا]

كلامك واقعي جدا لكن خلي نعتبر امريكا جحيم ولا تطاق . . مجرد نتحمل الخمس سنوات مثل ما عايشين حاليا بالعراق بكل ماسيه وتحصل على الجنسية اعتقد هي اكبر مكسب لك ولعالتك . . انطيك مثال بالعراق في احد المشاريع اكو مهندس عراقي والثاني مهندس عراقي مجنس امريكي تدري شكد فرق الراتب بيناتهم مراح تصدك على العموم كلامك واقعي بس الطموح والمستقبل يخليك تتحمل . . احترامي

[awssss]

السلام عليكم اخوتي الافاضل
احب اشارك ولو باسطر ولو انا هنا مضى لي 5 اسابيع. انقل لكم كلام الامريكان نفسهم الذين يعيشون هنا ولايتي ايداهو الجرائم تقريبا معدومة مشاكل ماكو بين الامريكان لايوجد ناس من البشرة السوداء مع العلم مو كل الناس سوة بيهم تخليهم على الجرح يطيب.الشرطة عجبوني جدا يعني اني وجالس من يفوتون يسلمون علية وعلى رفيقي في السكن وليس مرة واحدة دائما العمل هنا لمن لديه لغة والذي لا يملكها يجد عمل متعب العوائل ملتزمين هنا واكثرهم كبار بالعمر.
نجي على شغلة والي كرهتني بالولاية صراحتا وضامهة بقلبي وهي الطائفيييييييية اجلكم الله ويبعدكم عنهم هنا الطائفية منتشرة وبكثرة واني بمطار اسطنبول عراقي من سالنة احنا بيا ولاية قرة الورقة كال نصيحة هاي الولاية طائفية واني وصديقي مصدكنا ومن وصلنا اي شخص يشوفنة يسالني انت مين وين ساكن ومن يا عمام.واكو البعض سالوني انت من ذولة لو من ذولة.واني انصدمت واني وصديقي هم صار ويا نفس الشي .واتذكرنة الشخص الي نصحنة.تحياتي

[عراقي مغترب]

حبيبي اوس. حاول تغير ولايتك. لان هذولة الطائفيين مثل الفايروس او الجرثومة تلقاها  باى وقت ومكان. تحياتى لك ويحميك الله من كل سوء

[kellercall]

شكرا لمروركم و تفاعلكم مع الموضوع

كلمن طبعا اله نضره للواقع بس الشفته حاليا انو الاغلبيه الي ديشاركون بعدهن منتضرين السفر ( يارب ينطيكم ما تريدون ) والي اني راح اعتبره مجرد نصيحه لان جنت تقريبا بنفس الموقف

اما بالنسبه للايجابيات الي طلبهه الاخ "كلبه مشلوع"
الايجابيات هنا كثيره اني من كتبت الموضوع كتبت الملاحضات و الملاحضات دائما ما تكون عل اشياء الغير طبيعيه يعني مو مثلا اكتب من ملاحضاتي امريكا بيهه حريه لان هذا شي معلوم و ميحتاج ان يتلاحض

عل كلا : الايجابيات

تمييز ماكو ( انته و الامريكي نفس المعامله من قبل السلطات )
حريه مطلقه تحت خط القانون
تقدير للانسانيه و احترام الانسان ( عل الرغم من شدة السوبرفايزر بس نعتبره شي استثنائي )
الاهتمام المطلق للاطفال دون سن ال 18
مستقبل مضمون لكبار السن ( 65 و فوك طول العمر ان شاء الله )
العيش بوطن يضمن امنك و امان عائلتك و يتحمل المسؤليه الكامله في حال تعرضت للاعتداء و الكل يخضع للقضاء
حقوقك مكفوله ضمن دستور ديموقراطي
حقوقك العامل مكفوله و محميه من قبل السلطات ( تامين عل حياتك + متشتغل اقل من 7.50 بالساعه )

تقبلوا مروري و اشكركم مرةاخرى على تفاعلكم

[★★★ AIRBORNE ★★★]

السلام عليكم اخوتي الافاضل
احب اشارك ولو باسطر ولو انا هنا مضى لي 5 اسابيع. انقل لكم كلام الامريكان نفسهم الذين يعيشون هنا ولايتي ايداهو الجرائم تقريبا معدومة مشاكل ماكو بين الامريكان لايوجد ناس من البشرة السوداء مع العلم مو كل الناس سوة بيهم تخليهم على الجرح يطيب.الشرطة عجبوني جدا يعني اني وجالس من يفوتون يسلمون علية وعلى رفيقي في السكن وليس مرة واحدة دائما العمل هنا لمن لديه لغة والذي لا يملكها يجد عمل متعب العوائل ملتزمين هنا واكثرهم كبار بالعمر.
نجي على شغلة والي كرهتني بالولاية صراحتا وضامهة بقلبي وهي الطائفيييييييية اجلكم الله ويبعدكم عنهم هنا الطائفية منتشرة وبكثرة واني بمطار اسطنبول عراقي من سالنة احنا بيا ولاية قرة الورقة كال نصيحة هاي الولاية طائفية واني وصديقي مصدكنا ومن وصلنا اي شخص يشوفنة يسالني انت مين وين ساكن ومن يا عمام.واكو البعض سالوني انت من ذولة لو من ذولة.واني انصدمت واني وصديقي هم صار ويا نفس الشي .واتذكرنة الشخص الي نصحنة.تحياتي

أخوية awssss ترا سهلة الشغلة صادقلك فد اربعه من اصحاب البشرة السوداء من هذولة الي خشومهم مفروشة تشبه الكباية ووياهم فد اثنين مكسيكان واشتغلهم للطائفيين على البارد ويوميا بليل سويلك باترول على بيت منهم وعرفهم بعمامك ( على الطريقة الامريكية) 

[ابو فرقان]

حبيت اشارك بالموضوع . تجربتك عزيزي صارت وي هواي ناس ولكن اللي يخلي ابالة طموح ربك يسهل عليه ويحققة واهم شي هوة اللغة والشهادة هي اللي تعدل وضعك بامريكا. واغلب اللي بتكساس هذا مو كلهم ها لحد يكول شملت الكل, عالعموم انا معروف للمنتدى وكنت في هيوستن وشبعت ضيم وقهر وانباك بيتي واشتغل سيكيورتي اب 9 دولارات وانتقلت الى منيسوتا واشكر ربي الوضع كلش زين الايجار اقل اطفالي مرتاحين ولو اجدي ما ارجع للعراق. وها اني كنت موضف بالنفط وعندي مصلحة اخرى وماديا كنت مرتاح.
وميري كرسمس مقدما والكيبورد مبي عربي واكتب عالحفظ وما اشتري لزكات عربي لان اللابتوب مال الشركة ههههه

[محارب]

اخي الله يعينك
انت وين ساكن بفوررت وورث بالصبط؟ هذا موضوعك تقريب نفس حالتي
ولو تقرا موضوعي عن مجمع لاديرا الذي كانت ثمرته الدعاء لي من أعضاء تجنبوا السكن فيه عند قرائتهم للموضوع
دزلي رقمك يمكن افيدك بالسكن بمناطق قريبه عليك مابيهه جريمه وحلوه وامينه
صارلي سنتين ما قافل باب السياره واكثر من مره انسى المحفظه
العيشه صعبه صحيح لكن اكو أماكن تشتغل بيهه ومحد يدوسلك على طرف

اذا تحب اني اكدر اساعدك على قدر معرفتي
احترامي

[عباس التميمي]

الله كريم
وبارك الله بيك على الموظوع

[AbooReem]

بالنسبة للطائفية...
اني مقرر اذا الله راد وسافرت امريكا ما افصح عن طائفتي ولو هي الشغلة تبين لا ارادي..بس احاول قدر الامكان
اني عراقي وبس

اريد ابني علاقات جديدة تعتمد على الثقافة والاخلاق مو على اساس الطائفة..كافي شبعنا طائفية اللي ما حصلنا من وراها غير خراب البيوت