سلام عليكم
مرحباً اخوتي الأعزاء ،،، حاب احچيلكم واشارككم تجربتي بمقابلة المحلف ( المقابلة الثانية ICMC )
بالنسبة للمقابلة مال محلف فال UN يخابرون عليها قبل تقريباً من ٣٠ الى ٤٠ يوم ويرجعون ال ICMC يأكدون عليها مرة ثانية قبل أسبوع او اقل ،،،، المهم طبعا الإجراءات الي راح تشوفوها بالاستقبال عند ال ICMC نفسها الي مريتوا بيها بالمقابلة الاولى وهم يستقبلوكم بلفة جبن او مرتديلا وعصير يسطروكم بيها ،،
طبعا راح ينطوكم باجات بيها رقم ،، عندما يصيحون الرقم مالتكم تتوجهون مباشرة للمترجم الي نادى رقمكم وراح يصعدكم للغرفة الي راح تصير بيها المقابلة مع المحلف ،،،، طبعاً المحلف راح يكون باستقبالكم بباب الغرفة ويناديكم باسمائكم ( لان هو استقبلنا وكان يعرف اسمائنا اني والعائلة ) ودخلنا الغرفة وجلسنا فكال المحلف ( اخذوا راحتكم ولا تتوترون هي مقابلة اعتيادية وعدنا بعض الاستفسارات عن قصتكم وقبل هذا راح تأدون القسم بأنه ما تقولوا الا الحق )
نهضنا لأداء القسم وبعدها بلش المحلف ( الي كان لطيف جداً ومبتسم وهااااادئ ) سئلنا أسألة عادية الي تكون إجابتها ( نعم ) او ( لا )
الي أتذكر منها :-
هل انتميت لفصائل مقاومة ؟
هل انتميت لعناصر ارهابية ؟
هل لديك بصمات الأصابع العشرة في العراق او اي مكان في العالم ؟ طبعاً لازم تذكرون البصمة الي بتركيا عند الأمنيات واذا كنتوا باصمين بالمقابلة الاولى لل ICMC
هل قدمت لجوء في غير دولة ؟
هل دفعت فدية لأي جماعات مسلحة ؟
هل خدمت العسكرية الإلزامية ؟
هل خرجت سابقاً خارج العراق ؟
وبعد أسئلة ما أتذكرها ( بس عادة هو يكولك المحلف الأسئلة القادمة تكون إجابتها بنعم او لا ) ،،،
بعدين بلش بأسئلة عن الخدمة العسكرية ( وين خدمت وشكد خدمت وهل دفعت بدل لو لا ويطلب منك دفتر الخدمة اذا عندك ويفضل انه يكون عندك دفتر الخدمة )
بعدها سألني عن عملي بعد عام ٢٠٠٣ وشنو اشتغلت ودقق وياي على شغلي شوية ( للعلم اني شغلي بشهادتي كمهندس مدني من عام ٢٠٠٣ ولغاية ما طلعت من العراق )
وشوية چان معصب لمن وصل وياي لهاي الأسئلة (( طبعاً العصبية مالته مفتعلة هو يفتعلها علمود يربك المقابل الي يحقق ويا ويخلي يتوتر علمود يشوف مدى مصداقيتك بعد ما يخليك توتر فلاااااااازم تتحكم باعصابك وتكون هاااااااادئ بدون ما تنفعل لان هو يريد يخليكم تنفعلون علمود يأخذ الإجابة الصحيحة منكم لان الانسان كشغلة نفسية عندما يرتبك يخرط الاول والتالي ))
طبعا مووووو شرط أبد انه ينفعل المحلف ،،، لان كل محلف ونفسيته فيعني الي مريت بي مووووو يصير ويا الكل أبد أبد لان اكو جماعة عوائل قابلوا ويانه عند غير محلف ابببببد ما مستفزهم وكان هاااادئ جداً فاني ما اخوفكم ولكن علمود يكون عندكم احتياط للاسواء وان شاء الله ماكو اي سيء ،،،،
بعدين بلش يسأل عن القصة مال تركنا للعراق وكلها اسألة استفسار وبس ،، وتأكيد لما قلناه بالمقابلات السابقة ،،، طبعا المقابلة طولت ساعة ونص ،،، ومن خلص المحلف من تحقيقه كال تكدرون هسة تتفضلون لقاعة الانتظار ،،، وودعنا ونزلنا مع المترجم للقاعة وكلي المترجم انتوا انتظروا بالقاعة اذا عندة شي المحلف وياكم راح يدز عليكم واذا ما عندكم شي راح يصيحون اسمكم للمغادرة ،،، تقريباً انتظرنا ساعة وربع بالقاعة وبعدها كالوا تكدرون تغادرون وتروحون للبيت ،،،
وهاي قصتي مع مقابلة المحلف حبيت انقلها الكم علمود تستفيدون منها ان شاء الله ،،،
وللعلم اني هسة فحصت وما نازلي قبول لا بصفحة ال UNHCR ولا اجاني ظرف للبيت يبلغونا بي بالموافقة ،،،، وان شاء الله خييييير يا رب
أتمنى الموفقية للجميع بمقابلتهم وتيسير أمورهم بأسرع وقت
