اضمن مستقبل اولادك في امريكا من 16 سنة الى 25 سنة نصيحة لوجه الله

[omaarvip]

السلام عليكم ورحمه الله وبركاته شلونكم شخباركم حبايب قلبي وياكم عمر العزاوي القديم مشاغب المنتدى والله مشتاق الكم طبعا اني اختفيت عن المنتدى صار اهوايه مداخل المهم  اليوم جاي وحاب ابلغكم انو اكو مدارس حكومية اسمهه (jobcorps)(جاب كوربس) ومن خلال هاي المدارسه تكدر تلتقي بأمريكان عمرهم من 16 سنه الى 25 سنه وتتعلم كل السوالف منهم وراح تتعلم بسرعه خرافيه مثل ما اني تعلمت هسه ولا جنت متوقع راح احجي انكليزي خلال هاي الفترة المهم حبايب قلبي طبعا هاي المادرسه هيه كلية او اكاديمية داخلية لازم تبقى وياهم لمدى سنة او سنتين وتحصل الهاي سكول مالتك وتضبط لغتك وتتخرج بشهادة محترمة واذا كملت كل البرنامج يدفعولك مصاريف الكلية مالتك كـ تدريب متطور ويلكولك شغل يعني يسووك فد شي محترم نصيحتي لكل واحد عنده شباب او بنات اعمارهم من ١٦ سنه الى ٢٥ سنة خلي يدزهم الله وكيلكم احلى مستقبل بلاش اكل شرب نوم وفوك هذه كله ينطوك كل سبوعين 35 دولار يعني فد شي .. وشوكت متريد بطل هههههههه

تحتاج يا اما
ورقة  (I 94)
او
تحتاج ( سوشال سكيورتي)
واذا ماعندك سوشال عادي سجل بالـ (I 94) 
ولا دكول ماعندي ورقة (I 94) لان مستحيل تدخل امريكا بدونهه واذا ماتعرف شنو معنى ورقة ( I 94) اسأل اي شخص تعرفه وشوفه اوراقكك وراح يكلك ياهيه  سهلة ^_^ 

راح يخلوك بغرفة جبيره ونظيفةويه 1 او 3 ولد وتحشيش للصبح واكو انترنت ولازم تكعد  الساعه ٧ الصبح تروح للدوام وترجع بـ 3:30الظهر المدرسة بصف  بناية السكن يابه خصم الحجي كلية داخلية يعني تنام بيهه وتاكل بيهه وتشرب بيهه وحتى العطله مالتك تكضييه بيهه واذا تريد تكدر تاخذ اجازة اي يوم يعجبكـ
....

اهم شي تسمع كلامهم وتكون محترم مالك دخل بالامريكان وأسلوبهم الي عليك سوي واتعلم من الامريكان بس اضبط لغتك وحصل شهادتك واطفر شعندك مدكلي اشو منامك راح يكون يمهم بلاش عدهم بناية جبيره لكل الطلاب ونظيفة جدا  والمدرسة مختلطة اكو بنات يعني تنسيق للستار هههههههههه  والله العظيم ما تخسر روح بيهه وشوف احسن مدرسة وهي  المركز الاول الي اني بي هسه هو بولاية رود ايلاند ها وشي ثاني بس تسجل وتكمل ويوافقون عليك همه يدفعولك تذكره السفر مالتك من اي ولاية يعجبك ولحد ما توصل لحد باب المدرسة يعني كلشي مراح تسوي بس تسجل وتنتظر اتصالهم ميهم اذا متعرف تحجي انكليزي وكلام الله اني رحت الهم اعرف بس اسمي وحتى ما الفضة عدل بالانكليزي وهمه علموني كلشي وحاليأ ويايه بالغرفه 3 شباب امريكان والله علموني فد تعليم مو طبيعي لتخاف ماكو مشاكل اصلا ونسه وتحشي مو طبيعي و اكو قوانين  بس تتعارك اكثر من مرة تنطرد لهذه ماكو مشاكل وكلشي حلو نصيحتي يا اخوان الله شاهد هذه البرنامج كلش مهم  واذكركم مره ثانية متحتاج انكليزي خلي اي واحد يخابرهم الك ويحجي وياهم ووراها راح يخابروك همه ويرتبولك كلشي مثل ما رتبولي اياه  واذا تريد بس انطيهم اسمي عمر العزاوي واني راح اترجملك .. طبعا من توصل كلهم انو انت مسلم ومتاكل خنزير وهل سوالف .راح يخصصون اكل الك طبعا هذه الي اني داشوفه بولاية رود ايلاند اما بغير ولايات ما اعرف بعد الله شاهد نصيحتي روحوا  للي بولاية رود ايلاند . ومالكم دخل بكلام الناس لان قبل لا اروح الهذه البرنامج كالولي هذه البرنامج مال سجناء ومدري شنو وبعد سوالف العراقيين من يسدوهه بوجهك الله وكيلكم رحت بي وتعلمت انجليزي وان شاء الله راح اتخرج هاي السنه بأذن الله سبحانه وتعالى ... ملاحظة (البرنامج للبنات والشباب)

الاقسام المتوفرة بهذه البرنامج

 صيانة الكمبيوتر  رخصة مايكروسوفت اوفس دولية

قسم الحماية والجيش ..

ممرض او ممرضة

قسم الطبخ والماكولات

نجارة وسوالف الخشب


حداد وسوالف الحدادة وبيهه خوش فلوس

او مساعد طيار يعني مو تسوق الطياره ههههههه لا تودي اكل للناس وتنطيهم مي وهالسوالف
 طبعا كـ متحدث عربي وانجليزي . ساعتك راح تكون اقل شي 25 دولار وراح تسافر لكل الدول لان تحجي لغات اثنين وهاي الي راح اروح بيهه اني هسه

واكو بعد قسم نسيت اسمه هههههههههه

>>>> ومن تخابرهم انطيهم اسمي كلهم عمر العزاوي  بلغنه بهذه البرنامج واي مساعده او ترجمة تحتاج بس كلهم اريد عمر العزاوي واني راح اترجملك واخليهم يفتهموك >>>

رابط موقعهم http://exeter.jobcorps.gov/home.aspx

للاتصال
You may contact us at:

Exeter Job Corps Center
162 Main Street
Exeter, RI 02822
Phone: (401) 268-6000
Fax: (401) 294-0471

هاي المدارس متوفرة بكل الولايات الامريكية
عنوانهم ولاية رود ايلاند .. قرب مساشوستس .قرب بوسطن ^_^

[عباس التميمي]

قادمون 
عاشت ايدك على الموظوع :*

[عباس التميمي]

الموقع ميشتغل 

[omaarvip]

قادمون 
عاشت ايدك على الموظوع :*

;Dالف هلا حبيبي الغالي  عوف الموقع خابرهم واحجي وياهم وشوف او شوف اي واحد يحجي انكليزي حتى يسجلك

[omaarvip]

يلا عبوسي ترة خوش حاتات اكو وداعتك هههههههههههههههههههههه بيني وبينك تره  

[alwaleed88]

زين واللي أكبر من 25 سنة؟

[*Ray]

شلوونك عموري شنو هالغيبه نورت المنتدى  خوش مدرسه والله بس ما يقبلوني اني اقل  من 16    

اختك راي
US

[iraqforme]

ولو انا غير معني بالموضوع بس حبيت أثني على جهدك وحرصك على إفادة أخوتك المعذبون في أرض العرب واللي رب العالمين بأذنه تعالى سيفرجها عنهم ويخرجون منها.
مودتي لك

[ابو الامراء]

مليون اهلا وسهلا بعوتك الى المنتدى والله يوفقك وتعيش حياة سعيده عندي سوال عليك الله 100$ بعده عنك لو صرفته وارجوا ان تكون محتفظ بيه ذكرى

[حكيم عيون]

سؤالي اذا واحد اكبر من 35 سنه ممكن ينقبل لان عندي اخويه هناك مواليد 79

[alwaleed88]

أخ عمر أتمنى تجاوبنا أكو هيج برامج للي أكبر من 25 سنة؟
وهل تنصحنا بالـ homestay ؟

[omaarvip]

زين واللي أكبر من 25 سنة؟

مع كل الاسف ميصير حبيبي لازم اكثر شي عمرك 25 سنه

[omaarvip]

شلوونك عموري شنو هالغيبه نورت المنتدى  خوش مدرسه والله بس ما يقبلوني اني اقل  من 16    

اختك راي
US

اهلا اخت ريوشه شلونج شخبارج يابه ع كيفج ويانه هههههههههه حرامات شوكت تصيرين 16 سنه حتى تجيين وياية للاكاديمية  خخخخخخخخخخ اشكرج غلاي تسلميلي على ترحيبج وردة .. بشريني وين انتي هسه وصلتي امريكا لو بعدج 

[omaarvip]

ولو انا غير معني بالموضوع بس حبيت أثني على جهدك وحرصك على إفادة أخوتك المعذبون في أرض العرب واللي رب العالمين بأذنه تعالى سيفرجها عنهم ويخرجون منها.
مودتي لك

نورت الموضوع واشكرك على مرورك اخوية العزيز ربي يحفضك ويخليكـ

[omaarvip]

مليون اهلا وسهلا بعوتك الى المنتدى والله يوفقك وتعيش حياة سعيده عندي سوال عليك الله 100$ بعده عنك لو صرفته وارجوا ان تكون محتفظ بيه ذكرى

  حبيب قلبي وتاج راسي عمي ابو ( .N R..) والله مشتاقلك . ادري مقصر وياك بس شسوي غير الدراسة غير جايين نبني مستقبل وداعتك الـ100$ صارت 1600$ هههههههههههه....[/size][/color]

[omaarvip]

سؤالي اذا واحد اكبر من 35 سنه ممكن ينقبل لان عندي اخويه هناك مواليد 79

والله يا اخوي ياريت ينقبل بس مع كل الاسف الحد الادنى هو 25 سنة لان 25 سنة يعتبروهـ كـ شاب ويكدر يكمل ويحصل شهادة الهاي سكول الامريكي حتى احسن من الجي اي دي بس مع الاسف ميصير

[omaarvip]

أخ عمر أتمنى تجاوبنا أكو هيج برامج للي أكبر من 25 سنة؟
وهل تنصحنا بالـ homestay ؟

والله يا اخوي اكبر من 25 سنه ما اعرف بس احتمال اكو هيج برامج اني الي اعرفه هذه البرنامج لكيته باليوتيوب  واني اول عراقي يلكف هيج سالفه وعيونكـ وحتى همه الاكاديمية كالو انت اول عربي يجي للاكاديمية وكلش حبابيين وياية  .. المهم دور باليوتيوب بلكي الله تلكه ... بالتوفيق اخوية

وما انصحك تبقى بالـ  Home

[اجونة]

 هلو عموري بالعافيه عليك اميركا والمدرسه وان شالله تتوفق بحياتك.
خالتك اجونه ...من اميركا .... وللعلم راي ايضا سافرت ﻻميركا قبلي...تحيااتي.

[omaarvip]

هلو عموري بالعافيه عليك اميركا والمدرسه وان شالله تتوفق بحياتك.
خالتك اجونه ...من اميركا .... وللعلم راي ايضا سافرت ﻻميركا قبلي...تحيااتي.

هلو عيني اهنا الحجي داشوف امريكا منوره يابه اثاري راي وجوانه وصلوا فديت خالتي اني حمدلله ع سلامتج والف مبروك  وصولج ,سعيد بسماع اخبارج مره ثانيه اييي واخيرأأأأأ راااااي ايباااه جانت بس تبجي هههههههههههه انتي وياهه

[Sound of Soul]

شكرا على المعلومات عاشت الايادي عمر
تحياتي .

[omaarvip]

شكرا على المعلومات عاشت الايادي عمر
تحياتي .

عفوأ اخت ساوند ولو .. هذه واجبي

[احمد البغدادي55]

نورت عموري من جداد
بارك الله بيك على المعلومات بس سؤال
شنو يعني
قسم الحماية والجيش شنو دورة يعني

[صبيه]

هلوووووووووو عموررررري مشتاقوووووووون اشلونك ان شاء الله بخير مشكور على الموضوع المفيد
اتمنالك الموفقيه ونورت المنتدى من جديد
تحياتي
صبيه

[omaarvip]

نورت عموري من جداد
بارك الله بيك على المعلومات بس سؤال
شنو يعني
قسم الحماية والجيش شنو دورة يعني

اهلا حبيبي تسلملي نورك اخوي.. قسم الحماية والجيش طبعا هذه صف تدخله وتكمله خلال 9 اشهر هو مو تدريب بدني انما تدريب ذهني يشوفوك شلون تتصرف وشلون تصير حارس شخصي للبنك او للنوادي او تروح للتدريب المتقدم الي هو الجيش الامريكي . من خلال هذه التدريب ..اذا كملت هاي الـ9 اشهر ورحت للجيش الامريكي لمدى سنتين وكملته تلقائي الجيش راح يدفعلك فلوس اي كلية تختارهه حتى تصير ضابط بالجيش الامريكي...

[omaarvip]

هلوووووووووو عموررررري مشتاقوووووووون اشلونك ان شاء الله بخير مشكور على الموضوع المفيد
اتمنالك الموفقيه ونورت المنتدى من جديد
تحياتي
صبيه

هلالالالالالالالالالالالالالالالالالالالا ملايين الهلاوات صبووو  شلونج شخبارج غلاي مشتاقلج والله وداعت جهالي الي بعدني ممخلفهم  شصار وياج شووو مختفيه وااشكرررج هذه نور عيونج عاكس عليه 

[احمد البغدادي55]

اهلا حبيبي تسلملي نورك اخوي.. قسم الحماية والجيش طبعا هذه صف تدخله وتكمله خلال 9 اشهر هو مو تدريب بدني انما تدريب ذهني يشوفوك شلون تتصرف وشلون تصير حارس شخصي للبنك او للنوادي او تروح للتدريب المتقدم الي هو الجيش الامريكي . من خلال هذه التدريب ..اذا كملت هاي الـ9 اشهر ورحت للجيش الامريكي لمدى سنتين وكملته تلقائي الجيش راح يدفعلك فلوس اي كلية تختارهه حتى تصير ضابط بالجيش الامريكي...

تسلملي يا ورده