هذا الموضوع تمت السرقة بنجاح 
من خيتي راي لان عجبني وجبته هنا للفائده تحياتي لخيتي راي وشكرا للمجهود الراقي السلام عليكم .... شلوون الكل
بما انوو المواضيع قليله او نادره بالاصح عن امريكا بكروبنا العزيز قررت ان اكتب شويه عنهه هنا وما اكتبهه بالمنتدى ... المهم
احنا اخر موضوع هو كان عن رحله السفر وهسه اكمل من لحظه الوصول والخروج من المطار
طبعا كان بانتظارنا الكيس ووركر مع الاصدقاء الي عدنا والاقارب ناس تاخذ صور وناس تسلم والبقيه تدور ع الجنط
ومن بعدها رحنا لبيت الكفيل الي بقى النه لمده شهر لكونه خارج امريكا ... احنا ما خلينا المنظمه اتاجر النه حتى ناخذ الولكم موني
واحنا براحتنه انأجر ونشتري اثاث جديد كله ...
المبلغ لكل شخص هو 1125 $ اخذنا 50 $ منهه عند الوصول لكل شخص والباقي اخذنا ع شكل شيكات 2 كل شهر شيك
( طبعا كل شخص ) وبهاي الحاله اخذناهه كامله ...
احنا ع منظمه اللوثرن بعد الاستراحه لمده يوم اجى الكيس ووركر والي هو صومالي صارله 10 سنين بامريكا طبعا من يصعد السياره الى ان ينزل بايده الموبايل ويحجي كله صومالي طبعا والله اتعلمت صومالي من وراه
المهم بدائره الفود ستامب طبعا هو ماخذ موعد مسبق اما بالنسبه لباقي الناس ف الكل واكف سره
المره الحامل والشاب وجماعه الاحتياجات الخاصه والشايب ماكو افضليه كل شخص واكف بدوره
راح يسالكم الموظف اسئله بسيطه لان هو عنده علم انو الي مقابيله لاجىء ومن ثم يكول ان كل شخص راح يستحق هالكد مبلغ
والي يختلف من ولايه لاخرى وتالي يصيحون الاسم من قبل موظف ثاني ياخذ صوره و توقيع ومن بعدهه ينطي كارت الفود
ستامب وبنفس اليوم واللحظه ...
هنا راح انصحكم ... كارت الفود ستامب يحتاج الى تفعيل ف لا تنسون خلي الكيس ووركر من تستلمو
بنفس اللحظه هو خلي يفعله الكم طبعا كل كارت يحتاج الى pin والي تعرفون انتو رقم ال pin يتكون من 4 ارقام ف لازم تختارون
4 ارقام تدخلوهه حتى من تستعلموو عند الشراء تدخلون هاي الارقام شي بديهي
هنا انصحكم ان تختارون 4 ارقام متشابهه مثلا 2222 او 3333
كل شخص مستحق بالعائله ياخذ فود ستامب مثلا شخصين او 3 بالعائله وكل كارت اله رقم مختلف عن الثاني لكن
بامكانكم ان تختارون نفس ارقام ال pin الاربعه لكل الكارتات يعني ...
الفود ستامب للاب مثلا 2222
الفود ستامب للام 2222
للابن 2222
او غيرهه حسب ما تحبون
هاي الطريقه جدا تسهل عليكم الامور ماراح تنسون الارقام واي شخص ياخذ كارت اي شخص ثاني من العائله
ويشتري بي هي نفس الارقام
ما يحفظ هوااايه وينسى
وبامكانكم ان تعرفون رصيد الفلوس الي عدكم ع الجهه الخلفيه للكارت اكو رقم تتصلون عليه وتدخلون رقم الكارت المكتوب
والي يتكون من 16 رقم وتعرفون الرصيد وكله آلي يعني ما تحجون
هاي تفاصيل صغيره لكن تفيد ...
ومن بعدها بايام ياخذكم الكيس ووركر الى دائره السوشيل سكيورتي ... نفس الشي راح تشوفون الناس واكفه سره
ايضا تدخلون ع الموظف وهمينه اسئله عن العمر والمواليد ومكان الولاده والشهاده ومن بعدهه يكلولكم احنا ندزه الكم من يطلع
بالنسبه النه اتاخر السوشيل سكيورتي وآثر علينا هوايه اتاخرت كل شغلاتنه من وراه هو يطلع من اسبوع ولغايه 6 اسابيع
واذا اتاخر اكثر لازم ترجعون لنفس الدائره ....
بعدها ترحون ع الفحوصات والتلقيحات مجرد اسئله عاديه شنو الامراض ومن شنو تشكي وشنو الادويه الي تستعلمهه
وياخذون الضغط وسحب دم و 4 ابر باليد وينطوكم دفتر اللقاحات ومكتوب بي شنو الي اخذتوو
اخواني هنا انصحكم ان يكون عدكم دفتر صغير وتسجلون بي تاريخ الفود ستامب وشكد المبلغ لكل شخص
اي يوم راجعتوو السوشيل سكيورتي اي يوم رحتو فحوصات ولقاحات
حتى دائما تكونون ع علم لان راح تنسون
هنا امريكا تحب السؤال وتحب الاوراق اسألوو عن كل شي حتى لو انتوو تعرفون الجواب ميخالف هم اسالوو
اولا انته تتقوى باللغه و2 جائز اكو معلومه احنا ما نعرفهه او شي متغير بالاجراءات ... ع سبيل المثال الفود ستامب راح يكول الموظف اذا عندكم سؤال اسالوو .... ف اسال اكوله اذا خلص الفود من حقي اجدد - اذا اجدد اجي هنا لنفس الدائره لو اقدم اون لاين
لو فورم امليهه واذا عندك الفورم ممكن اخذ نسخه منهه يعني مثل هيج اسئله هاي انطيتكم مثال
اي دائره تراجعه اذا عدكم اسئله معينه ابالكم اسالوهه ولا تترددون مثل ما كلت حتى لو تعرفون الجواب
هنا لازم تسال عن كل شي ما تعرفه لحد يخجل هنا الكل يجاوب وبصوره جدا محترمه وكل الناس اسلوبهم وتعاملهم لطيف
بالاضافه هنا نحتاج الى تركيز وانتباه وحركه سريعه
اني احجي عن نفسي صارلي 7 سنين تفكيري متوقف كله اركز ع المقابلات والمحلفين والمواعيد نسيت العالم الخارجي
اخذت فتره الى ان رجعت انتبه واركز وما انسى
بعدين المنظمه راح تسوي CV حتى تقدمه ع اساس لاصحاب العمل طبعا هو CV بدائي ههههه
والشغل هم يدرون من موقع كريكلست ... هنا ال CV انتوو شنو يعجبكم تكتبون اكتبوو بمجال عملكم طبعا يعني تكدرون تخلون اشياء
تحسون انهه تفيدكم اني بعدين كلولي والا جان كتبت بكيفي ههههه
بالمنظمه ينطون دروس تقويه بالانكليزي افضل ان ترحون بيها حتى تكونون متواجدين بالمنظمه ع طول وكدام العين وما ينسوكم
وحاولو ان تسوون علاقات مع الموظفين الي هناك يعني لا تتقيدون بالكيس ووركر
واذا اكو موظفين عراقيين اتعرفوو عليهم اسألوهم او طلبوو نصيحه منهم الي عدنا والله جدا محترمين ويساعدون
هسه احنا بعد ما خلصنا الشهر تحولنا في بيت ملك للعائله يعني ما ادفع ايجار لذلك ما اعرف شلون هااي الامور تقوم بيها
المنظمه في حاله هي اتاجر للاجىء فقط من خلال مواضيع المنتدى وشفت هنا الاشخاص الي المنظمه اجرت الهم
المكانات يكولون مو مريحه واثاث قديم
يعني تشووفون المجمعات جدا حلووه من بره ديكور وخضار وهوسه لكن السكن مو مريح مثلا يكون طوابق
اذا انتوو طابق ارضي الي فوك يكون مزعج كل الصوت ينسمع واذا كنتوو طابق ثاني نفس الحاله هنا البناء ما اعرف شلونه
كل الاصوات تنسمع من تلفزيون وحجي
اما الاثاث المنظمه ملزمه ان تجيب بعض الاشياء جديده وبعضهه مستعمله مثلا القنفات تكون مستعمله
عموما هو مو قياس اكو مكانات لطيفه ومنظمات تعرف شلوون تختار ...
المدارس ما اعرف عنهه اعذروني و هو ما يحتاج لان معروف مستوى التعليم العالي بامريكا
بالنسبه للنقل ....
الى ان يطلع السوشيل الي تحتاجه بالتقديم ع اجازه السياقه راح يحتاج الشخص ان يروح ويجي بالباص
هنا اجره النقل هي دولار و50 سنت تخليهه بجهاز موجود يم السايق الفلوس الورقيه من مكان والسنتات بمكان ثاني
او بكارت الباص والي المنظمه تسوي
اني بالبدايه ما سويت كلت ما حتاجه لكن من اتاخر عليا السوشيل اضطريت اسوي كارت اخذني كيس ووركر ثاني من المنظمه
لدائره النقل العام وبما انوو اني ما عندي رصيد بالمنظمه ماخذه كل الويلكم كال لازم اني ادفع
الكارت تخلي بي رصيد 15 $ و ودولارين للكارت ويكون صالح لمده اربع سنوات
كل شهر تخلي بالكارت 15 $ وشكد ما تطلع باصات حتى لو 100 باص بالشهر هي ضمن ال 15 $ يعني
مو ع عدد استعمالك للباص يخلص رصيدك الي هو 15 $
بالشهر الثاني المنظمه خلت الي رصيد اني ما دفعت شي وهذا يثبت انوو كارت الباص مجاني
حسب ما كنت اقرا بالمنتدى بمواضيع سابقه
انو تنطي المنظمه كارت باص مجاني لمده شهر يعني ما يقطعون من رصيد الويلكم
المهم الباص كانوو يخوفونه منه وانو سيء والناس الي تصعد بي مو مريحه وحتى اقاربنا نفس الحجي حجوو (جائز تختلف الامور لولايات ثانيه او مناطق ثانيه ما اعرف )
لكن اني شفته جدا طبيعي صح الي يصعد بالباص من الطبقات الفقيره لكن اناس بحالهم واخلاقهم حلووه يتركون مكانهم للبنيه والمره
الكبيره بالعمر وما بي اي مشكله ...
طبعا الباصات بيها تبريد رهيب بحيث اني كل ما اصعد بالباص اتمرض جربت كل الكراسي وين ما اكعد يجيني هواا بارد
بالنهايه كعدت اخر شي يم المحرك حتى يجيني هوااا حار
والكراسي الاماميه مخصصه لذوي الاحتياجات الخاصه الي ع Wheelchair
طبعا الباصات ملتزمين بمواعيد الوصول بحيث اذا كان قبل الموعد تجي فد اشاره حتى يتاخر شويه لذلك راح تشوفون بعض الاحيان يبقى واكف بالموقف حتى لو محد نزل من الباص
الى ان يصير وقت وصوله للموقف الي بعده
او من يتاخر الباص عن الوصول بالوقت لموقف باص معين يتصلون بي ( اكو تلفون يم السايق ) ويستفسرون عن سبب التاخير
وهاي تصير بعض الاحيان لان عده اشخاص ع Wheelchair يصعدون فيبقى السايق يرتب طريقه جلوسهم وربط الاحزمه بالكرسي
واكو طبعا كتاب تاخذوو من نفس الباص او من دائره النقل من ترحون تسوون الكارت بي اوقات الوصول واسماء المحطات والايام
لازم يكون عدكم يفيدكم جدا ...
والباص كل ما يوصل تقاطع اكو تسجيل آلي يذكر اسم التقاطع يعني اسماء الشارعين
ورقم الباص الثاني الي يمر من هذا التقاطع من الشارع الثاني
ولازم تنتبهون ع اسلوب وطرق الباص بمدينتكم وشنو الي مكتوب عليه
مثلا بالنسبه النه الباص الي يودينه مو نفسه الي يرجعنه لنفس المنطقه صحيح نفس الرقم لكن واحد مكتوب عليه N والثاني مكتوب S
يعني شمال وجنوب لان احنا مقسمه المناطق والباصات ع الاتجاهات
طبعا اني الى ان انتبهت كنت رايحه وراجعه لنفس المكان 3 مرات خلال ساعه ونص
بحيث وصلت منطقه معزوله وبعيده مال المكسيكان بنص الجبال واراضي فارغه كلت هاهيه اليوم اني ويه العصابات
الى ان اتعلمت وعرفت الفرق
يعني جائز اكو اختلافات بسيطه بين ولايه و ولايه لكن بالمجمل هي نفس الشي
تجربه الباص انصحكم بيها تجربه حلووه وممتعه وهي لفتره بسيطه راح تكون ويتعلم بيها الواحد ع الشوارع
الى ان يطلع اجازه السياقه ...
نجي هسه ع السوبر ماركت والاماكن الي تكدر بيها تستعمل الفود ستامب ...
اكيد الوولمارت والتاركت الي الكل يعرفهه ... بالنسبه الي اني ما احب الوولمارت التاركت افضل منه بدرجه
الوولمارت يفيد لبعض الاشياء المنزليه مثل اغراض للمطبخ اغراض للحمام واهم شي بي حليب النيدو الي ما شفته بتركيا
وهنا بالوولمارت موجود وارخص من المحلات العراقيه وعنده بعض الاشياء ما انصح بيها
اكو ستوارت باشتراك سنوي تفيد للعوائل الي عدده كبير لان عدهم الاشياء تنباع بالجمله وتكدر تستخدم بي الفود ستامب
وهاي الستورات هي سامز وكوسكو اشتراك سنوي يبدي تقريبا من 40$ وتكدرون تشترون منه باسعار مخفضه
بالنسبه الي اني ما يفيدني لان عددنا قليل ...
وبنفس المكان اكو بانزين خانه تابعه لهاي المحلات وبما انو عندك اشتراك معاهم راح يسوون تخفيض ع سعر البنزين
اكيد شي مفيد ...
بالنسبه الي افضل سوبر ماركت ثاني وهو فرايز ايضا عنده محطه بانزين ...
هاي المحلات موجوده طبعا باغلب الولايات ...
محل فرايز اشتراك بدون دفع فلوس فقط ورقه تملي بيها اسمك وعنوان السكن وتاخذ كارت منهم
تستعمله بتخفيض الاسعار و بمحطه البانزين التابعه للسوبر ماركت
في محلات ثانيه الي بيها المنتجات العضويه وتكون شويه اغلى لكن طبعا شي راقي ونظيف هاي المحلات ما تكدر
تستعمل بيها الفود ستامب ...
وايضا اكو صيدليات مشهوره وبيها بعض الاطعمه الصحيه مثل ولكرينز اني احبهه
ان شاء الله من تسافرون وتوصلون لامريكا شوفوو الاسماء واتذكروني
مي الشرب لازم تشتروو ما اعرف شنو مشكله الدول ويه مي الشرب يعني كنت بسوريا اشتري مي وبتركيا اشتري مي
ووصلت لامريكا همينه اشتري مي
حتى اسماك الزينه هم تموت بمي البوري العادي
اكو اشياء بسيطه لكن تسهل الامور مثلا اكو بانزين خانات بيها مكانات تنفخ تايرات السياره كلهه ب دولار
او اكو مكانات تغسل السياره بنفسك همينه ب دولار او تنظفهه من جووه كلهه بدولار ونفس المكان اذا تريد تملي مي صافي
همينه ب دولار
وبنفس المكان اكو جهاز يصرف الك الفلوس الورقيه الدولارات ويسويهه ( كوينز ) حتى تكدر تستعملهه بغسل السياره
السينمات انصحكم ان ترحون سينما من توصلون احلى شي بالسينما هي النص ساعه قبل عرض الفيلم الي تطلع بيها
دعايات عن االافلام الى راح تعرض بعدين
او البوب كورن وفوكاه الزبد طبعا يطلع سعره اغلى من بطاقه السينما
المحلات العراقيه والعربيه موجوده وكولشي متوفر بيها بهارات قوري شاي الي دائما ينكتب عنهه بالمنتدى
والله حتى قوري الشاي اخذته من محل امريكي ب 30 $ وشكله لطيف جدا يعني كولشي متوفر ...
انصحكم بس جيبوو استكانات من تركيا اكو اشكال جدا حلووه عدهم ... للجماعه الي يحبون يشربون الشاي بالاستكان
الشي الوحيد الي تندمت وما جبته ويايه كان الملابس الي اغلب اعضاء المنتدى يكتبون انو ملابس امريكا ارخص وبنوعيات افضل
والكل ينصح ان ما ناخذ شي معانا
لكن بالنسبه الي اني ما شفت هذا الشي ملابس تركيا افضل بهوايه مع العلم هنا ماركات معروفه لكن ما كو شي مفيد
مع العلم اني مو محجبه والدتي المحجبه ما لاقت صعوبه موجود الشي المناسب الهه وللشباب موجود ايضا الشي المناسب
الهم بكل مكان
بالنسبه للحياة احنا الي جايين من تركيا ما تختلف الامور عدنا هواايه او تصير عدنه صدمه حضاريه مو مثل الشخص الي جاي من
مباشره من العراق او الدول العربيه او الاشخاص الي سفراتهم قليله
يعني هي نفس الحياة لكن بنظام وترتيب اكثر ... العمل اكيد مهم وضروري ومن بعده الدراسه
احنا بولايتنه الدراسه الا بعد سنه اذا ادرس هسه لازم اني ادفع فلوس واقدم ع المنحه الي تجيني بعد سنه لكن ما تغطي كل تكاليف الدراسه وفلوس البنزين ابقى اني دافعه ب4 او 5 ورقات لكل درس
ولازم ع الاقل 3 دروس بكل سمستر واني حاليا بدون شغل لو اشتغل ادفع وادرس لكن للاسف
وهذا صار بسبب الاخوه الي قبلنا الله يسلمهم كانوو ياخذون منحه الدراسه ومن بعدهه يتركون ويغيرون الولايه او يشترون سيارات
وصارت مشاكل لذلك الكوميونتي كولج غيروو سستم عملهم
وانطوو وعود انوو ينطون منحه تغطي كل تكاليف الدراسه لكن ايضا انطوو جزء قليل وكملوو الطلاب من جيبهم
وهمينه صارت مشاكل السنه الماضيه وهذا الحجي من الموظفين الي بالكولج
شمعرفهم اني راح اجي ما ادري
لكن بغير ولايات ماكو هذا الشي بس موجود ب ولايات قليله لان اقرا دائما مواضيع الاخوه الي سافروو كلهم يدرسون بالكولج بعد وصولهم
بالنسبه لجهاز القنوات العربيه احنا نستعمل جهاز
Hd Media Box Arabic Channels يطلع كل القنوات الخليجيه والعراقيه والاجنبيه والرياضيه تبع الجزيره كلهه
ووحده منهم مشفره مهمه ولو اني ما اعرف بالقنوات الرياضيه
يعني كل القنوات الي تريدوها موجوده والي تنمسح هي ترجع من حالهه القنوات الي ماموجوده بس ... راح اكولهه الكم
للمسلسلات FX - FOX وقناه دجله والديار وهنا بغداد - TOP MOVIES - و Panorama هاي القنوات الي ما موجوده
واشتراك ويه شركه COX ب 40 $
اهم شي اخواني اللغه رجاءا حاوولو بقدر الامكان ان تتعلمون اللغه
قسم من الناس يعرفون انكليزي ويعرفون معاني الكلمات لكن ما يعرف شلون يخلي الكلمه بجمله
حاوولو ان تحفظون جمل كامله حتى تستخدموهه
او اكو ناس تعرف تحجي وتجاوب لكن من يجون هنا راح يشوفون انو الامريكان يحجون سريع ويمكن ما يفهم الكلمات لذلك ما يكدر يجاوب
بهاي الحاله اسمعوو افلام بدون ترجمه حتى تتعلم الاذن ع سرعه الحجي
وما شاء الله احنا الكل اذكياء ونتعلم بسرعه وهسه من توصلون لامريكا راح تشوفون شكد عراقيين ناجحين و يشتغلون باحسن الاماكن
وان شاء الله النجاح والموفقيه للجميع
الموضوع الثاني ان شاء الله اكولكم بي ع الاشياء الي تسووهه بعد اخذ السوشيل نمبر وطبيب العائله
تحياتي
