السلام عليكم
اليوم راح احجيلكم عن الي صار وياي من بعد اكتمال الامنية في الموقع الى غاية وصولي الى امريكا
طبعا رحلتي جانت من مصر الى ايطاليا الى ميامي الي شيكاغو الى نيويورك
بعد اكتمال الامنية في الموقع كنت انتظر ينزل موعد السفر لكن بقت الامنية مكتملة والسفر انتظار وكنت متوقع السفر راح يكون اقل شي بعد اسبوعين من اكتمال الامنية لكن الي صار العكس بقت الامنية مكتملة لمدة 4 ايام وماكو شي اتصلت على عمان كلولي انت على جدولة السفر من ينزلك موعد نتصل بيك
قررت اروح على منظمة مصر وكتلهم امنيتي كملت صارلها اسبوع ومابين منكم شي وحسب معلوماتي من تكمل الامنية يبقى تحديد موعد السفر هاي شغلتكم مو شغلت امريكا
كالو اكو طيارتين بشهر 12 من مصر انتظر من عدنا اتصال نحددلك موعد سفر بس سالوني جوازك جاهز وجوازات عائلتك جاهز ماكو واحد بيكم عنده اقامة على اليو ان كتلهم لا جوازاتنا جاهزة
المهم اتصلوا بيه بعد يومين حددولي موعد سفر بعد يومين من تاريخ الاتصال كلولي باجر لازم تكون يمنا حتى توقع على اوراق بصراحة نصدمت اني بس مكتلهم لا او ماكدر كلت خلي نسافر ونخلص من هل عذاب كتلهم اوكي رحت ثاني يوم اني وعائلتي وصلنا ب 9 للمنظمة كالو موظف قسم السفر يوصل ب 11 انتظروا
اجه الموظف اخذ الجوازات سوالها نسخ انطانا اوراق توقع عليها وهاي الاوراق هي تعهد انه راح تسدد قرض الطيارة بعد 6 اشهر من وصولك الى امريكا
وقعنا على هذه الاوراق كال اليوم بالليل لازم تكونون بالمطار ساعة 12 وكان موعد الطيارة ساعة 4 كال اهم شي الوزن ميزيد عن 23 كيلو يعني كل شخص جنطتين كل جنطة 23 كيلو + الهاند باك 7 كيلو لكل شخص كال اذا زاد الوزن لو ينلغي السفر لو تتبهذلون بالمطار لازم تفرغون الجنط لكن اللاب توب لازم لاب توب واحد سالته ليش كلي كل صاحب ملف يحقله لاب توب واحد مو كل شخص بالملف ياخذ ويا لاب توب
وصلنا الى المطار ساعة 12 اجه الموظف ساعة 1 حطينا الجنط جانت كلها مضبوطة بس جنطة وحدة فرغنا منها الغراض وحطيناها بجنطة وزنها كان اقل من 23 كيلو
انطانا التذاكر وجانت الرحلة من مصر الى ايطاليا روما ومن ايطاليا الى ميامي انطانا تذاكر ايطاليا وميامي وكال بميامي راح تباتون بفندق
وصلنا الموظف الى بوابة الطيارة وكال هسه اكللكم الف مبروك وتوصلون بالسلامة وتكدرون تنتظرون بكافيه اذا تحبون الى ان يفتحون البوابة وكال راح اروح اني لان عندي عائلة ثانية هم لازم اكون وياهم اخلص الاجراءات بس راح اكون وياكم على التليفون اي شي يصير وياكم قبل مطيرون بلغوني
المهم كعدنا بكافيه الى ان نفتحت البوابة دخلنا على التفتيش الي هو قبل ما يجي الباص الي يوديك للطيارة حطينا الجنط وكل شي تمام
واحد من الي يفتشون جلب بالعلاليك مال IOM يريد يفتح الفايلات كلها فا صار شد كلام بيني وبينه وسولي هوسه وتعرفون بعد المصريين اني عاندت وياهم كتلهم هاي الاوراق من السفارة الامريكية وممنوع احد يفتحها تريدون حطوها بالسونار وشوفوا شبيها ليش تفتحوها ؟
حطوها بالسونار مابيها شي العلاليك
المهم صعدنا بالطيارة وطرنا الى روما وصلنا للمطار ونزلنا من الطيارة اخذنا الباص الى المطار بعدنا بالباص لمحت وحدة شايله علامة IOM عرفت هاي تنتظرنا رحت عليها رحبت بينه البنية اخذتنا الى التفتيش كالت راح انتظركم ورا التفتيش خلصنا التفتيش اخذتنا الى بوابة الطيارة الرايحة الى ميامي
كالت راح تنطوهم جوازات سفركم والورقة الي اخذتوها من المنظمة بمصر الى عليها صوركم واساميكم وهي صلاحية الدخول الى امريكا لمدة سنة
كالت اني من يفتحون البوابة بعد ساعة ارجعلكم كالت اكو هنا شواحن مال تليفونات شحنوا تليفوناتكم
كالت خلي بالكم هنا ميتعاملون بالدولار فا اذا تريدون تشترون شي لازم يكون عدكم يورو
واذا تحولون يورو بالمطار راح ينطوكم قليل جدا
المهم اجه موعد الطيارة فتحوا الباب هي راسا اجتنا كالت يلا تعالوا اوكفوا هنا بالسرة واني حباوع عليكم منا
انطينا الجوازات والورقة الي عليها صورنا للموظفة الي تفحص الجوازات قبل الصعود للطيارة
كل شي تمام انطتنا الجوازات ودعنا موظفة IOM لان جانت انسانة روعة
صعدنا للطيارة وهنا جانت الفرحة انه خلص راح نوصل الى امريكا
طبعا نسيت اكللكم انه الطيران من مصر الى روما وميامي كله على الطيران الايطالي
المهم طارت الطيارة وجانت مدة الوصول الى امريكا تقريبا 9 او 10 ساعات
دخلنا اجواء ميامي وهنا جانت الفرحة متنوصف
بس الطيار خرب هل فرحة والسبب دينزل على المدرج قبل ميطخ المدرج زود سرعة الطيارة ورتفع بشكل مفاجئ وهنا جانت المشكلة لان ويانا حجية تخربطت والاطفال تخربطوا واغلبية الناس تاذوا
افتر حوالي 10 دقايق بالجو بعدين يلا نزل على المدرج بس ضلت الحجية متخربطة بس الحمد لله ورا ربع ساعة شوية فكت وكدرت تمشي
المهم طلعنا من الطيارة باب الدخول للمطار جان اكو ولد ينتظرنا هم لاب لبس IOM رحب بينا طلع الولد من المغرب بس جان وردة مال الله
كال هسه حاخذكم تبصمون وتنتظرون بحدود 3 ساعات بين مينطوكم I 94 كال مو شرط 3 ساعات بس هي تعتمد على عدد الملفات يم الامن
فتح هو العلاليك مال الاي او ام طلع منها اوراق واخذها
المهم حضنا جان حلو الحمد لله رحنا بصمنا وخلال ربع ساعة اجه الضابط انطه I 94 لموظف IOM واجه الولد فرحان كال الحمد لله متاخرتوا كال هذه اهم وثيقة بالفترة الحالية تحافظون عليها الى ان تستلمون الكرين كارد
رحنا دنستلم الجنط وويانا الموظف لكينا حاطين كل الجنط على الكاع يم السير يعني مو تضل تفتر بالسير نفسه الحمد لله جانت كل الجنط موجودة اخذنا الجنط وطلعنا برة انتظرنا باص الفندق يوصل
صعدنا بالباص واخذنا الجنط هم بالباص ورحنا للفندق بميامي جان فندق حلو وفراش مرتب
كللنا الموظف طيارتكم لشيكاغو راح تكون ساعة 8 الصبح راح اجيلكم اني ب 5 الفجر تكونون جاهزين ويا الجنط
انطانا اوراق على عدد الاشخاص بالملف كال هاي وجبة عشاء تنزلون على المطعم مال الفندق وتنطوهم الوراقة ينطوكم عشاء على عدد الاشخاص تاخذوا وتصعدون تاكلون
المهم طبيت سبحت ونزلت شوية فتريت بالشارع يم الفندق بس مرحت بعيد كلت لا اروح اتيه
بعدين رحت على المطعم نطيتهم الاوراق انطوني الاكل وجان اكل طيب كله مسلوك مو مكله
تعشينا وراها نمنا كعدنا ب 4 حضرنا الجنط وجهزنا نفسنا اجه الموظف المغربي نفسه كال اني راح اكون ويا غير عائلة وانتوا راح يكون وياكم موظف ثاني
المهم طلعنا من الفندق ساعة 6 وصلنا للمطار وزنا الجنط ورحنا على التفتيش شوية هنا التفتيش جان مزعج لان لازم تنزع السترة وتكرمون الحذاء ومتبقي لا حزام ولا اي شي بجسمك غير الهدوم يعني حتى التليفونات المحطفة كلها تذبها بصندوك يفوت بالسونار وتروح اكو جهاز مال تفتيش توكف بي وترفع ايدك وتنسد الباب وتنفتح وراها يكلولك فوت
بالنسبة للمحجبات يستاذنون منهم الاول يكلولهم ممكن نحط ايدنا على راسكم بس نفتش ( طبعا بنية هي الي تفتش )
المهم خلصنا التفتيش اجه الموظف نطانا تذاكر السفر الى شيكاغو والى نيويورك على الطيران الامريكي سالته كتله اكو احد راح ينتظرنا بمطار شيكاغو كال لا بعد خلص ماكو اي موظف ينتظركم بمطار شيكاغو كال من توصل لمطار شيكاغو اسال موظفين الطيران الامريكي بداخل المطار وين البوابة مال نيويورك و كال بس من توصل لنيويورك تلكة المنظمة او الكيس وركر المسؤولة عنكم تنتظركم بالمطار
كال اكعدوا هنا بين ماجيبلكم اكل وجي راح رجع مرة ثانية جايب اكل لفات مال تونه وحليب وكيك كال هذا الاكل يكفيكم الى ان توصلون الى نيويورك وكال عادي تصعدوا وياكم للطيارة
وبالمناسبة جان هذا الموظف من الامريكان السود بس اخلاقه جدا عاليه
وهمه يحبون الواحد يحجي وياهم حتى لو بس يطكطك همه يساعدوا بس لا تضل ساكت مثل الاطرش بالزفة
المهم ورا تقريبا ساعة نفتحت البوابة ضل هو واكف يطمن علينا الى ان نصعد للطيارة
انطينا التذاكر جيكوها كل شي تمام ودعنا الموظف
صعدنا للطيارة وطرنا الى شيكاغو وصلنا لمطار شيكاغو ماذكر الوقت بالتحديد شكد من ميامي الى شيكاغو
وصلنا شيكاغو باوعنا مطار كبير جدا وجميل جدا جدا جدا رحت راسا على خدمة الطيران الامريكي كتلهم اريد اعرف بوابة الطيارة المتجهة الى نيويورك وهمزين رحت عليهم لان كلولي رقم البوابة الي بالتذكرة نغلق فا حولنا على غير بوابة وكتبولي الرقم بالتذكرة كلولي تمشي كبل قبل متوصل لبوابة الخروج تاخذ يمنا بس خلي بالك راح تمشي شوية مسافة طويلة
والله فعلا جانت مسافة طويلة وخاصة شايل جنط بايدي
وصلنا للبوابة مال نيويورك انتظرنا ساعتين ونفتحت البوابة صعدنا للطيارة جانت صغيرة كلش وحتى اكو كراسي فارغة طرنا الى نيويورك طبعا اكيد مو لنيويورك نفسها بمقاطعة معينة لكن اعتذر عن عدكم ذكر اسم المقاطعة ولاسباب خاصة
والله وصلنا للمطار ولكينا الكفيل والكيس وركر ينتظرونا الكيس وروكر بنية شابه محترمة جدا رحبت بينا
صعدنا ب 3 سيارات سيارة فان بس جنط وهاي مالت الكفيل مو من المنظمة وقسمنا نفسنا ناس ركبوا ويا الكفيل بسيارة ثانية غير مال الجنط وناس ركبوا ويا الكيس وركر
اخذونا للبيت الي مختاري النا
وطبعا البيت الكفيل هو الي راح دور عليه وخابر المنظمة كللهم تعالوا دفعوا الايجار والتامين
يعني لو باقين على المنظمة جان حطونا بمنطقة مال لاجئيين لان منطقتي الحالية مابيها ولا عراقي كلها امريكان
المهم هنا نظام البيوت طابقين طابق الفوك النا وطابق الجوة جيرانا امريكان عائلة زوج وزوجته واطفالهم
وصلنا للبيت لكينا المنظمة مشترين جرابي وادوات مطبخ واكل بسيط
والكفيل جاب قنفة وميز وكراسي من عنده حتى لا المنظمة تحسبها على فلوس الولكم
الكيس وركر كالت عكب باجر امرلكم نخلص باقي الاجراءات
وراح احجيلكم باقي التفاصيل وشنو الي صار ويانا بعد وصولنا على الجزء الثاني
واعتذر اذا اكو اخطاء املائية او نسيت شي لان بعدها الفلاونزا مفاكتني صار يومين فلاونزا بسبب تغير الجو وبعدنا مماخذين تلقيحات
