السلام عليكم
مثل ما وعدتكم راح احجيلكم عن باقي التفاصيل الي صارت وياي بعد وصولي الى امريكا
راح احجيلكم بشكل مبسط لان بالحقيقة لحد الان ماعندي هذيج المعلومات القوية بالفترة الحالية لان بعدني هسه يلا كملت اسبوع في امريكا
لذالك راح احجيلكم حاليا بشكل مبسط شنو الي كالوا النا المنظمة بعد الاجتماعات الي دارت وياهم
كلولنا الكلام التالي :
احنه صرفنا من فلوس الولكم تامين بيت + ايجار + بعض الاثاث + فلوس التكسيات + الي تجيبكم يمنا للمنظمة + الادوية لان كتلكم اني تمرضت وكذالك احد افراد عائلتي تمرض فا فلوس الادوية الي ديصرفوها ديحسبوها من فلوس الولكم
كتلهم زين يابه بالنسبة لهاي الادوية المفروض ولايتنا التامين الصحي يغطي كل شي
كالوا صحيح لكن بعدكم مطالعلكم التامين الصحي هستوكم واصلين جدد
كتلهم زين هاي فلوس الادوية من يطلع التامين الصحي متحاولون ترجعوها ؟
كالوا هو الموضوع معقد لكن نوعدك انه نحاول نرجعها من التامين الصحي لكن منوعدك بنسبة 100% انه نكدر
المهم نطونا شيك واحد بي مبلغ 400 دولار احنه عدد الاشخاص 5 كالو هذا المبلغ تحاولون تصرفون منه شوية شوية علكيفكم واذا صرفتوا فلوس اكثر على الاكل جيبولنا الايصال وندفعلكم
كالوا لان احنه دنحاول نبقي جزء من قلوس لولكم مالتكم حتى نكدر ندفعلكم ايجار شهر 1 بين مطلع المساعدات
نححجي عن فقرة المساعدات كالوا اكو برنامجين برنامج المساعدات الاجتماعية ( الولفير ) وبرنامج ثاني ( ماجك جراند )
كتلهم شنو الفرق بين هذا البرنامج وهذا البرنامجكالوا برنامج الولفير يقدملكم مساعدات شاملة فود ستامب + ايجار بيت لمدة توصل للسنة وتتجدد
لكن لازم تحظرون لغة لمدة 3 اشهر من الاثنين للجمعة من 8 ونص الصبح لغاية ساعة 3 ونص العصر
كتلهم زين والبرنامج ثاني ( ماجك جراند )كالوا يقدم مساعدات لمدة 3 اشهر ومو شرط يحظر كليومية لمدرسة اللغة راح يحظر مرتين بالاسبوع
لكن الي يقدم على هذا البرنامج نكدر نحصله شغل بسرعة عكس الي يقدم على الولفير
يعني اذا يتوفر عدنا شغل وعدنا شخصين واحد على الولفير والثاني على الماجيك الاولوية تكون للي مقدم على الماجيك
كالوا بس اذا نحصلك شغل وانت على الماجك لازم تروح مو تكول هذا معاجبني لو ماعرف شنو لان اذا متروح يتوقف البرنامج عليك
كلتهم زين لنفرض كلت شغل معاجبني وتوقف البرنامج عليه ميصير اروح احول على الولفير كالوا هو ملفك يروح على الولفير بس جماعة الماجيك جراند راح يكتبون بملفك للولفير انه هذا الشخص جبناله شغل ومقبل يشتغل فا تبقة عاد يم الولفير لو يقبلك لو لا
طبعا هذا كلام المنظمة اخوان مو كلامي اني بعدني جديد وماعرف ترة اذا كلامهم صح لو لا وللعلم منظمتي المسؤولة عني منظمة امريكية وكلهم امريكان فا المهم كتلهم لعد راح اختار الولفير كالوا اذا تريد من تقدم على الولفير تجي يمنا تسجل بمنتدى العمل وهم اذا سجلت بمنتدى العمل وتحظر كل اسبوع نحصلك شغل بسرعة
كتلهم اوكي ماكو مشكلة
المهم كالوا هم لازم تحظر يمنا بمدرسة المنظمة تتعلم لغة كل اسبوع كتلهم زين يابه غير ننتظر نقدم على الولفير وراها يلا نبدي نحظر لمدرسة اللغة
كالوا لا تحظر مدرستنا لان من راح تروح للولفير راح يكلولك انت رحت للمدرسة مال المنظمة لو لا كتلهم زين شنو نظام مدرستكم كالت هم من الاثنين للخميس تجي بالباص للمنظمة راح نطلعلك كارد مال باص تجي تحظر من ساعة 8 ونص لل 3 ونص
طبعا اني صرت اعصاب بيني وبينكم لان مداعرف همه الصح واني الغلط لو ديفيكون براسي لان من اكول للعراقين هنا يكلولي يابه وين اكو هل كلام كال احنه مو وصلنا جديد محد طلب من عدنا نحظر للغة من الاثنين للجمعة
كالوا فقط اذا تقدم على الولفير لازم اجباري تحظر للغة بس المنظمة الي استقبلتك مو اجباري
فا بعد مادري منو الي كلامه صح المنظمة لو العراقيين الي يمي
لان اذا راح احظر الاسبوع كله بس للغة مراح افتهم شي من الحياة هنا وحسب كلامهم مراح يعلمون انجليزي بمستوى متطور راح يبدون وياك ABCD واني انجليزيتي اصلا اني احجي وياهم بدون مترجم
واني اريد ادور على شغل بنفسي ماريد اعتمد على المنظمة
المهم
هسه يوم الخميس ان شاء الله موعد التقديم على السوشل سيكيورتي وان شاء الله بالايام الجاية شيصير وياي ابلغكم بالتفاصيل
دعواتي للجميع بالسفر القريب والله يوفق الجميع
واهم شي ميكون اكو احد زعلان مني
تحياتي واسف اذا اكو اخطاء املائية بس ماحب اراجع ورا ماكتب
