السلام عليكم اخواني واخواتي الاعزاء
كل انسان لازم يشوف هواي امور بالحياة صعبه كانت او سهله ولازم يكون عنده قابلية للتحمل لكل شي كان جيد او سيء
قمت بالتقديم على منظمة IOM منذ سنة 2010 لاني عملت مع القوات الامريكية منذ سنة 2003 كنت من اوائل العاملين مع القوات التي دخلت بغداد كانت ايام صعبه وخطره وكل الي عملو مع القوات الامريكية يعرفون الخطورة
اشتغلت بعدت شركات بديتها بشركة لبنانيه وبعدين بشركة KBR سوبر فايزر في اللوندري وبعدها عملت بالسفارة وعملت مترجم مع القوات الامريكية في عدت مناطق بالعراق واخرها عملت بشركة امنيه مع مستشارين امريكان مدنيين
تعرضت للخطف والتعذيب بسبب عملي اصبت بطلقه ناريه في القدم وطعنات في الكتف والظهر والحمد لله
الله كتبلي حياة وخلصت من الموت .. لكن التهديدات والمخاوف استمرت لان اني انهزمت من المجموعة الي خطفتني
اخواني كلكم تعرفون مشوار الIOM مقابلات فحوصات والخ من الاجرائات
خلصت كل مقابلاتي وكملت الفحص الطبي الاول سنة 2011 والكفيل وقع الاوراق
نزلت الولاية والمطار منذ سنة 2012 واياضاً قمت بأعدة الفحص للمرة الثانية
بعدها اعادة فحص للمره الثالثة 2013
وايضاً اتصال بالكفيل هل لازلت متكفل بفلان كللهم نعم اكيد كالو ما باقي شي يوصل
صارت حالة الملف HOLD شهر الثاني 2014
بعدها عدت الفحص للمره الرابعه سنة 2014 شهر الرابع
اتصلو بالكفيل شهر السادس 2014 وايضاً قام بتوقيع اوراق الكفاله نفس الي وقعها سابقاً
وانتظار وأمل وصبر واحلام وامنيات كل هذا الانتظار والامل ما فارقني ابد
كنت انتظر اتصالهم لتحديد موعد السفر وكل احلامي الي جنت احلم بيها تنتظر هذا الاتصال اكمل دراستي واوصل واسوي كيت شغله وفلان شغله واساعد فلان وفلانه ووووووو الخ
يوم 17-12-2014 يوم المفأجاة المره فتحت موقع عمان عيوني راحت على حاللة الملف ( مغلق )
بدات تساولات ليش شلون شنووو رحت لبست مناظري كلت خاف ما دا اشوف بوضوح
لكن لكيتها نفس الكلمة ( مغلق )
هنا ضحكت بهستيريا من صدك الي اجاه رفض يعرف هذا الشعور الي مريت بي
اتصلت بالمنظمة الي بعمان
انطيته رقم الملف كال اخي انت جايك رفض امني
كتله شنو السبب ممكن اعرف كال ( ما بنعرف السبب .. فيك تقدم استئناف )
كتله اخويه اني اعرف نفسي كلش زين ماعندي مشاكل وامشي بصف الحايط
بقى مصر على كلمة ما بنعرف يا اخي رفضك امني
كتله اخويه سؤال ما اريد امريكا اني حالتي بالعراق صعبه وحياتي مهدده اتذكر المحلفة طرحت عليه سؤال ... اذا حولنه ملفك الدولة غير امريكا توافق .. كلتلها نعم اوافق اني كل الي اريده مكان بي امان ويحترم حقوق الانسان واكدر اعيش بي
كال فيك تقدم على غير برنامج وغير دوله ما فهمت شنو قصده
اخوتي اني كتبت هذا الشي مو اريد اخوف الي دينتظرون لكن ردت اشارككم بقصتي الشيقه
والي عنده نصيحه يكدر يقدمها اليه فلا يبخل عليه بيها
اني بالنسبة اليه ما اريد امريكا بعد ولا راح افكر بيها ابد ولا اريد اسمع اسمها بعد لان خدمتي الهم لسنوات كان رد جميلهم اليه هو رفضي
شنو الي اكدر اسوي حالياً اذا طلعت العمان او تركيا اكدر افعل ملفي لكن على غير دوله لو لازم اقدم على UN لو افكر بهجرة غير شرعيه لو شنو الي اسوي ممكن تساعدوني وياريت اصحاب الخبره يكونون حاظرين بردودهم
واسف للأطالة
اتمنالكم السفر السريع لكل المنتظرين والي ينتظرون مقابلات اتمنى تمشي اموركم بسرعة
والي تحددلهم موعد سفر اتمنى يوصلون بخير وسلامة
وشكراً الكم
الله يساعدك اخوية ذكرتني من جنت بالشغل واجاني ايميل الرفض وتخربطت احوالي . المهم اخوية الراح راح رح انطيك عدة حلولو وتكدر تسويهه كلهه سوة بس من عمان
1. اكيد القرار الك بس رتبلك استئناف وقدمة وانسا انت مخسران شي
2. تقدم عال UN وان شاء الله تتوطن بس التوطين يرادلة بالقليل سنة الى سنة ونص واحيانا اكثر
3. اذا عندك كفيل بأستراليا تكون وضعيتة زينة يعني ماعندة مشاكل ولا ديون وراتبة زين بهالحالة تكدر تقدم هجرة لاستراليا وتاخذ من سنة الى سنة ونص . طبعا كل اللي ذكرتلكيا مابي شي مضمون وانت تعرف بس واحد يتوكل على الله والله كريم
طبعا ما انصحك ب un تركيا كلش يتاخر
او يبقة الحل الاخير اللي اني حاليا دا افكر بي بس متردد وهو الهجرة غير الشرعية الى فنلندا ومتردد لان صارلي 9 اشهر مقدم استئناف وثاني شي مقدم un ودا انتظر توطين فحيرة والله كريم
ملاحظة : عمان تعتبر غالية قياسا ابغداد او تركيا
الله يسهل امرك واني خاضر لاي سؤال
