܀ܡܫܘܼܚܬܝܼ ܠܲܝܬܠܵܗ̇ ܟܘܼܢܵܝܐ܀
ܚܲܫܐ ܘܡܲܘܬܐ ܘܲܚܛܝܼܬܼܐ
ܒܕܝܼܪ̈ܐ ܒܟܲܪܡܐ ܕܚܲܝܘܼܬܐ
ܒܵܒܵܐ ܕܝܼܠܹܗ ܒܲܫܡܲܝܐ
ܟܡܵܐ ܣܪܝܼܬܐ ܝܠܵܗ̇ ܚܲܝܘܼܬܐ܀
ܡܼܢ ܥܲܘܠܐ ܕܒܲܪܢܵܫܘܼܬܐ
ܒܛܝܼܢܬܐ ܝܠܵܗ̇ ܒܟܠ ܒܝܼܫܘܼܬܐ
ܪ̈ܚܝܼܩܹܐ ܡܢ ܗܲܝܡܵܢܘܼܬܐ
ܒܝܼ ܪ̈ܢܝܹܐ ܕܥܸܠܕܒܼܵܒܼܘܼܬܐ܀
ܒܠܒܵܘܵܬܼܐ ܚܸܫܟܵܢ̈ܐ
ܚܲܕ̄ ܠܗ̇ܘ ܐ̄ܚܹܪ̄ܢܐ ܣܲܢܝܵܢ̈ܐ
ܒܟܠܲܝܗܝ̈ ܫܒܼܝܼܠ̈ܐ ܥܲܡܛܵܢ̈ܐ
ܒܪܘܼܡܚܵܐ ܘܓܘܼܠܐ ܩܲܛܠܵܢ̈ܐ܀
ܒܝܼ ܫܲܠܛܵܢܬܐ ܕܐܲܒܼܕܵܢܐ
ܪ̈ܝܼܡܹܐ ܝ̄ܢܐ ܪ̈ܚܡܹܐ ܘܲܚܢܵܢܐ
ܠܲܝܬ ܙܲܕܝܼܩܐ ܘܠܐ ܟܹܐܢܐ
ܐܲܚܟ̮ܝܼ ܓܒܼܝܼܠܬܐ ܕܣܵܛܵܢܐ
ܒܝܼ ܠܫܵܢܐ ܦܲܪܡܵܢܐ܀
ܡܼܢ ܚܘܼܒܐ ܕܚܲܕ̄ ܒܲܝܬܘܼܬܐ
ܠܲܝܬ ܦܝܵܫܐ ܐܲܚܵܝܘܼܬܐ
ܘܒܹܝܠ ܝܸܡܵܐ ܘܒܵܒܐ ܕܒܲܝܬܐ
ܡܢ̄ ܥܘܼܡܩܐ ܦܪܝܼܣܬܐ ܣܲܢܝܘܼܬܐ܀
ܫܘܼܠܛܵܢ̈ܐ ܕܥܲܡܡ̈ܐ ܚܪ̈ܝܼܒܹܐ
ܠܟܘܼܪ̈ܣܝܹܐ ܕܢܟܼܝܼܠܘܼܬܼܐ ܝ̄ܬܝܼܒܼ̈ܐ
ܒܩܲܠܒܼ̈ܐ ܟܲܕܵܒܼ̈ܐ ܩܠܝܼܒܼ̈ܐ
ܒܟܵܟܲܝܗܝ̈ ܚܲܪ̈ܝܼܦܹܐ ܕܹܐܒܼ̈ܐ܀
ܩܪ̈ܵܒܹܐ ܒܟܠܲܝܗܝ̈ ܕܘܼܟܵܢ̈ܐ
ܡܢ̄ ܙܲܝܢ̈ܐ ܒܐܝܼܕܐ ܕܩܪ̈ܒܼܬܵܢܹܐ
ܫܠܲܕܹ̈ܐ ܒܟܠ ܥܵܠܘ̇ܠܵܢ̈ܐ
ܒܟܠ ܡܕܝܢܵܬܼܐ ܘܡܲܪ̈ܙܵܢܹܐ܀
ܒܸܒܥܵܝܐ ܝ̄ܘ̄ܚ ܫܲܝܢܐ ܘܲܫܠܵܡܐ
ܘܫܝܵܦܬܐ ܠܟܝܵܢܐ ܕܛܵܠܘ̇ܡܐ
ܠܲܝܬ ܢܒܼܵܥܐ ܫܒܼܘܼܩ ܡܢ ܛܠܘ̇ܡܝܐ
ܘܒܟܠ ܐܲܪܥܐ ܬܦܝܼܟܼܐ ܕܸܡܐ܀
ܡܐܲܝܟܼ ܥܵܒܼܵܐ ܕܠܲܝܬ ܠܹܗ ܡܵܪܐ
ܛܠܝܼܩܐ ܝ̄ܠܹܗ ܚܘܼܒܐ ܘܲܫܪܵܪܐ
ܒܚܲܒܪ̈ܵܢܹܐ ܡܸܠܝ̈ܐ ܡܪܵܪܐ
ܫܘܼܠܛܸܢܐ ܝ̄ܠܹܗ ܓ̮ܘܼܢܓ̮ܵܪܐ܀
ܗܵܕܟܼܐ ܒܕܵܐܗܐ ܚܘܼܬܵܡܐ
ܡܛܹܐܠܲܢ ܠܐܘܼܪܚܐ ܕܫܘܼܠܵܡܐ
ܕܠܐ ܐܝܼܩܵܪܐ ܘܪܘܼܡܪܵܡܐ
ܩܪܝܼܡܐ ܝ̄ܠܹܗ ܓܲܘܢܐ ܐ̄ܟܘ̇ܡܐ܀
ܥܲܒܼܕܝܼܫܘ̇ܥ ܣܵܗ̄ܕܐ
