سلام للجميع,
الحمد لله استلمت P.E. license قبل 3 ايام بعد انتضار طويل, حيبت اكتب عن تجربتي عسى ان تكون مفيدة للاخرين.
قبل 5 سنوات كان حلم ال.P.E صعب المنال , يمكن كل اللي اسمعه عنه واقراء عنه يخلي الف عقبة امامي, بس الحمد لله كان اكو (((كبش فداء))) اني مدين له بالكثير لانه مهندس محمد القرغولي من اريزونا كان اول واحد سمعت بيه اجتاز امتحان البي اي , والولد ساعدني بكل معلوماته (واللي سهلت عليا كثير من المشوار).
السبب او الدافع اللي خلاني اجتاز امتحان البي اي في وقت قياسي هو فقداني لعملي , والرجوع مرة اخرى لعملية البحث عن فرصة اخرى , دفعتني انه امتحن بوقت قياسي اقل من 4 اشهر من القرائة المتواصلة.
مكنت مستعد , يعني مكانت عندي شهايد بضرف مختوم حتى اكدر اعادلها بال NCESS وعملية التسجيل والحصول على تواقيع من مهندسي عدهم .P.E كانت تاخذ وقت , وكذلك شروط الولاية اللي اني بيها (TEXAS) كانت صعبة جدا وحتى اكدر احقق شروطهم يرادلي عدة اشهر (هاي اذا قبلوا يالاوراق اللي راح اقدمها الهم ), لهذا السبب لله سهلها عليا وتعرفت على مهندس محمد من اريزونا اللي نبهني الى انه اريزونا متطلب اي مستمسكات قبل الامتحان مما سهل موضوع التسجيل , سجلت في ارزونا واخذت الامتحان في شهر الرابع 2014 ونجحت والحمد لله والنتيجة طلعت في شهر الخامس وفي شهر 12 كملت معاملتي واستلمت P.E. license.
خلال فترة التسجيل صادفت كثير من المعوقات , بس الحمد لله , الله مكني وسهلها , راح اذكر كل المعوقات عسى ولعل انه تسهل امور باقي المهندسين اللي ناويين يكملون ال P.E. license.
1-اني امكمل FE في كالفورنيا وساكن واعمل في تكساس , يعني ماكو مشكلة امتحن في اريزونا لان شروطهم اسهل.
2-بعد ان سجلت اون لاين في ال NCEES ودفعت رسوم الامتحان في اريزونا اتفاجئت بعد اسبوعين انه بورد المهندسين في اريزونا يطلب مني تدقيق نتيجة ال FE , ويطلب شهادتي معادلة من NCEES ويطلب شهايد خبرة اني اتفاجئت بالطلب مالهم لاني قبلي امتحنوا 3 مهندسين 2 منهم نجحوا من المرة الاولى وكذلك سجل معي على امتحان اريزونا 3 اصدقاء 2 منهم من كالفورنيا والاخر من نييورك , واني الوحديد اللي بورد المهندسين مال اريزونا يطلب مني هذه الطلبات مقدما!! (وهو عكس ما مكتوب في موقعهم!!), الصدمة كانت كبيرة الي لانه كنت حاجز على الامتحان وكذلك مشتري الكتاب ومبلش اقراء, وموضوع جلب الشهادة من العراق بضرف مختوم وايصالها الى NCEES مع شروط اخرى لل NCEES مثل السلي بس اي المنهج الدراسي لقسم الميكانيك لسنة 1997 ((منيين اكدر اجيب هاي الطركاعة)) وكذلك كتاب باسم وعنوان الوضيفي ورقم هاتف وايميل الموضف المسؤل عن اصدار الشهادة ضمن فورمة معدة مسبقا بللانكليزي من قبل ال NCEES (وهاي الطركاعة الثانية , يا موضف بالتسجيل راح يقبل يكتب اسمه وتوقيعه وعنوانه الوضيفي وايميل العمل !!!).
كان همي انه اقنع بورد المهندسين في اريزونا ان يسمحولي اكمل الامتحان وبعدين ادوخ بمسالة متطلباتهم , والحمد لله شرحتلهم واقع العراق واقتنعوا انه اكمل الامتحان واقدملهم المستمسكات بعد النجاح (((ملاحضة اني متقصد اكتب بالتفصيل لغرض اعلام الجميع انه اذا انسدت باب , فبالاصرار والبحث ممكن ان نجد ابواب مفتوحة اخرى , ورحمة الله دائما موجودة)))
3-اول ما بورد المهندسين طلب مني طلباته التعجزية دفعت 400 $ لل NCEES كاجور معادلة الشهادة ودزيتها الى بورد المهندسين لاقناعهم اني ماشي في موضوع تلبية طلباتهم وكان هذا احد الاسباب اللي خلتهم يقتنعون.
احدى الزميلات في الجامعة ساعتدتي باستخراج الوثائق من الجامعة ولكن موضوع انه توافق الموضفة او معاون العميد للشؤون العلمية على توقيع كتاب يحمل فورمة NCESS كان من سابع المستحيلات , اما موضوع السيلي بس او المنهج الدراسي مال ايام 1997 فما اتمكنت من الحصول عليه , بس نزلت من موقع جامعة بغداد السلي بس الجديد واللي يختلف بعدد الساعات والمنهج عن ايام ال 1997 , مكان كدامي غير ادز الشهادة والسلي بس الحديث مثل ما هوه وبدون الكتاب اللي يحمل اسم الموضف و.....
الحمد لله اندز الضرف بالدي اج ال من العراق والشهادة وصلت وتعادلت بدون مشاكل وبدون ميسالون على كتاب الموضف , في حال لو سالوا كنت راح اسالهم ان يتصلو على ايميل جامعة بغداد التسجيل الموجود في اسفل شهادتي.
صديقي الاخر كان معادل شهادته في منضمة اخرى من هاي النص ردن , ومكان عنده احد بالعراق يساعده باستخراج الوثائق لهذا السبب كتب الى بورد المهندسين في اريزونا بعد ان نجح عن صعوبة الوصول الى العراق وقبلوا بالمعادلة مال هذه المنضمة النص ردن وبدون ان يخسر 400 دولار مثلي.
اما صديقي الثالث عمل على نقل نتيجة الامتحان من اريزونا الى كالفورنا , لانه في ولاية كالفورنيا لا يطلبون معادلة عن طريق ال NCEES , فقط يطلبون الشهادة بضرف مختوم ويقوم بورد المهندسبن في كالفورنا بمعادلة الشهادة مجانا بدون دوخة ال NCESS.
رباط السالفة , انه اذا انسدت باب لا تياس اكو غير طرق والموضفيين اهنا مو مثل موضفيين العراق , يعني ممكن يسمع ويتفاهم , يعني اللي شروط ولايته صعبة ممكن يمتحن بي اي في اريزونا , واذا كان امعادل شهادته في منضمة نص ردن فممكن ان يستخدمها بدل معادلة ال NCESS , او ان ينقل نتيجة الامتحان الى ولاية كالفورنيا وهناك يستحصل على license
اخوان الكلام كثير , راح اكتبلكم عن باقي المعوقات في الايام القادمة, وانشاء الله يكون الموضوع مفيد الكم.
تحياتي
محمد الزعيري
