اخي احمد
ارجو التمييز بين الهجرة واللجوء
ممكن تطلع لاستراليا من بغداد عن طريق الهجرة .. واكو انواع للهجرة اشهرها هجرة الكفاءات .. هذا الامر يتطلب معادلة شهادتك وسنوات الخبرة من قبل اللجنة المختصة بالتقيم في استراليا .. اذا وافقت اللجنة على تقييم سنوات خبرتك وكان اختصاصك مطلوب حينها تبدي بأجراءات الهجرة والي تتضمن تقديم استمارة الهجرة لدائرة الهجرة الاسترالية .. وهذا النوع ما يطول بس اكو مشكلتين
الاولى هي وجود طلب لاختصاصك خلال السنة المالية الحالية ... تكدر تجيك موقع الهجرة الاسترالي immi.gov.au عن المهارات المطلوبة خلال السنة الحالية .. مع ملاحظة انه كل محافظة تطلب اختصاصات مختلفة عن المحافاظات الاخرى .. يعني مثلا ممكن سدني ما تريد اختصاصك هاي السنة بينما بيرث تريده .. بكل الاحوال انته تحتاج تجيك اختصاصك هو مطلوب او لا وبالتالي لازم تسوي تقييم .. واذا كان اختصاصك بالفعل مطلوب يتم منحك شهادة من دائرة التقييم في وزارة الهجرة وتكدر تقدم ملفك
بعد هذا راح تواجه مشكلة ثانية والي حسب رأيي -وتجربتي الشخصية في هذا المجال اعتبرها مقبرة الهجرة لاستراليا والي هيه شهادة الايلتس IELTS
هنا لازم تمتحن وتجيب على الاقل سبعة من تسعه بامتحان الايلتس ((بجميع اقسامه الاربعة)) طبعا اذا انكليزيتك زينة فممكن تعبره ((وهنا اركز على كلمة زينة)) لازم تكون ممتاز باللغة لان الامتحان صعب وما ممكن الغش او التزوير كونه يتم من قبل المركز البريطاني british council والي مراكزه موجودة ببغداد واربيل .. ولاحظ انه نوع الامتحان هو عام General مو اكاديمي والي المفروض يصير اسهل بس حسب رأيي سبعة من تسعة ((بجميع فروع الامتحان الي هي الاستماع والقراءة والكتابة والمحادثة)) صعبة وتحتاج قراية هواية .. مع ملاحظة انه بعض المحافظات تطلب ثمانية من تسعه مثل سدني .. وملاحظة ثالثة نوع الاختصاص المطلوب يطلب معدل ايلتس معين مثلا الطبيب لازم يجيب ثمانية من تسعة .. بينما اختصاصات اخرى مثل اللحام او النجارة فأقل شي لازم سبعة من تسعه.. وبأسهل الحالات ستة من تسعة بس مو اقل من ستة
نجي هنا اذا كان اختصاصك مطلوب وحصلت شهادة من دائرة التقييم وكدرت تاخذ الايلتس .. عدنها تقدم معاملتك لدائرة الهجرة بالتالي تاخذ سره وما اتصور تطول اكثر من سنه ينطوك فيزة هجرة .. بس للعلم تروح على حسابك بدون مساعدات .. ويمكن تعرف او لا انه الحياة باستراليا جدا غالية لواحد يجي على حسابة.
اكو طريقة ثانية انه يكون عندك عقد عمل offer من احدى الشركات العاملة باستراليا .. بالتالي راح تجتاز مرحلة التقييم بس يبقى الايلتس مطلوب وتمشي المعاملة مثل الاولى
الطريقة الثالثة .. انه يكون عندك مبلغ ربع مليون دولار تذبه وديعه باحد البنوك الاسترالية وما تلعب بالمبلغ .. ممكن تحصل على اقامة ..و صراحه اخي ما اعرف اذا ممكن تحصل جنسية عليه او.. قله المعلومات بخصوص هذا المجال هو لانه ما عندي ربع مليون دولار .. من يصير عندي عود استفسرلك
لاحظ انه الحالات الثلاثة هيه تندرج تحت بند الهجرة .. والي ممكن تسويها وانته كاعد ببغداد.. وانصحك اذا تحب تمشي بهذا الطريق انه توكل مكتب هجرة مو محامي لان مكتب الهجرة هو راح يتابع الموضوع عوضا عنك .. صح راح يجبحوك بالفين دولار .. بس احسن من المحامي الي يذبحك بخمسين ورقه وانته طالع
هنا الملاحظة المهمة .. اي نوع لجوء لاستراليا سواء كان بالفيزا 200 الي تم عن طريق اليو ان .. او الفيزا 202 الي يسموها الكفالة .. ما تكدر تمشي بيها وانته داخل العراق لان ببساطه تحتاج ورقة اليو ان والي يسموها ورقة الحماية الي تثبت انك مهدد .
طبعا اكو تفاصيل ثانية بخصوص اللجوء .. وكل نوع فيزا سواء 200 او 202 او حتى 201 الي ذكرها الاخ sydnilive مشكورا ((طبعا كلامة مية بالمية صح وجاي عن خبره )) الها تفاصيل ممله ..
نصيحتي .. اولا أنوي .. ثانيا ادرس ظرفك .. ثالثا صلي استخارة .. رابعا توكل على الله ثم اصدقائك هنا بالمنتدى راح يجاوبوك على اي سؤال انته ببالك
تحياتي وامنياتي الك براحه البال
اخوك روك
