نزلت السؤال ومحد جاوبني بس وحده من الأخوات بالمنتدى محتاج أجابه مفصله الله يخليكم

[Yazin2015]

أني وصلت لأمريكا قبل 3 اشهر وزوجتي صار حدهه حمل قبل شهرين الحمد لله بس المشكله اني محصلت على شغل ودا افكر ارجع للعراق بس ردت اعرف من الطيبين اذا الطفل نولد هنا بأمريكا شنو راح يحصل حتى أكدر أوصل للقرار الصحيح وممنون لأهل الخير...

[hero2]

ان شاء الله السلامة..
الطفل المولود بامريكا يحصل على الجواز الامريكي مباشرة
يحصل على ميديكت من الولادة لغاية 18 سنة
بعد الولادة تسجل الام والطفل على برنامج WIC  برنامج مساعدات منفصل عن بقية المساعدات اذا كنت لاجي وتحصل على مساعدات بصفتك لاجئ, يعطون للام مواد غذائية بسيطة ويعطون للطفل حليب اطفال في حال عدم رضاعته من الام.
تسجل على مساعدات اخرى غير برنامج الويك مثل الفود ستامب وسنامب
وتحصل على كرسي سيارة لحمل الطفل
وبالنسبة للام والاب فمراح يستفادون من جنسية الطفل الامريكي الا بعد ما يصبح 18 سنة ويقيم بامريكا ويقدملهم على الاقامة ومن بعد مرور خمس سنوات تحصلون على الجواز.
وربي يسهلك

[indallasmike2016]

الاخ السائل
لقد اجابك الاخ hero  بالتفصيل الكافي و الوافي و ليس للطفل الامريكي حقوق مالية او مادية سوى الجواز و الحليب
وفقكم الله

[جوكر الهندسة]

الاخ السائل
لقد اجابك الاخ hero  بالتفصيل الكافي و الوافي و ليس للطفل الامريكي حقوق مالية او مادية سوى الجواز و الحليب
وفقكم الله

بالنسبة للتفاصيل صحيحة مال الاخ هيرو عدا مسألة الكرسي مال السيارة للطفل هاي ماعرفها و ماعرف منين ياخذوها اذا يقرا تعليقي يسويلي فظل يكولي منين يستلمون كرسي حمل الطفل مال السيارة لان اني عندي طفلة و جنسيتها امريكية و مقدم ع الاسايلم و لحد هسه ممستلم القرار
المهم حبيت اصحح فكرة انه للطفل ماعنده حقوق مالية سوى الجواز و الحليب....
بالنسبة الي بنتي حصلت ع جواز و سوشل سكيورتي و حليب من برنامج الwic و طبعا بعد ست اشهر تقل كمية الحليب و يكومون ينطون وياها سيرلاك و اكو شي مثل المربة يمكن مهروس فواكه هذا هم يكومون ينطوه و كذلك يحصل الطفل ع فود ستامب الي متكون من ( مبلغ للفود و هذا متكدر تسحب منه فقط تشتري بي و اتصور ميتجاوز 200 دولار + مبلغ كاش تكدر تسحبه من الكارد او تشتري بي و طبعا مبلغ الكاش يختلف مرات صفر و مرات يوصل لل360 دولار تقريبا كوله تعتمد على الدخل السنوي للعائلة يعني العائلة الي عدها دخل سنوي مينطوهم كاش او ينطوهم بس قليل)
معنى الكلام هاي الشغلات كولها يستلمها الطفل حتى لو الابوين عدهم فقط فيزا سياحية و ماعرف اذا الواحد يرجع لبلده هاي تنقطع او لا
بالنسبة الي كل ما ذكرته اعلاه استلمه و اني دخلي السنوي صفر
تحياتي

[Yazin2015]

شكرًا للجميع والله يوفقكم

[hero2]

الاخ جوكر الهندسة
بالنسبة لكرسي السيارة ايضا يعطوه للطفل من عمر شهرين فما فوق يعني حتى لو صار عمره اكثر من سنتين او ثلاثة هم يعطوه
العنوان بالنسبة ل هيوستن وما اعرف بعد غير مدينة وهو
    6400High Star
Houston , Tx 77074
Phone: (716) 665 3103
فقط كل يوم جمعة من كل اسبوع ساعة عشرة الصبح تروح تسجل اسمك وتحضر درس للتعليم على استعمال الكرسي وبعدين راح يتصلون عليك بعد فترة لتسليمك الكرسي 

[جوكر الهندسة]

الاخ جوكر الهندسة
بالنسبة لكرسي السيارة ايضا يعطوه للطفل من عمر شهرين فما فوق يعني حتى لو صار عمره اكثر من سنتين او ثلاثة هم يعطوه
العنوان بالنسبة ل هيوستن وما اعرف بعد غير مدينة وهو
    6400High Star
Houston , Tx 77074
Phone: (716) 665 3103
فقط كل يوم جمعة من كل اسبوع ساعة عشرة الصبح تروح تسجل اسمك وتحضر درس للتعليم على استعمال الكرسي وبعدين راح يتصلون عليك بعد فترة لتسليمك الكرسي

اشكرك ع المعلومة بس اني القصد شسمها الدائرة الي ينطون بيها كرسي للطفل يعني دائرة رسمية لو منظمة و اتمنى تكولي اسم الدائرة
تحياتي

[hero2]

دائرة مو منظمة
Multi service center of southwest
المفروض من راجعت دائرة ال WIC  هم يخبروك ويعطوك العنوان مال هذه الدائرة اذا كنت بغير مدينة هيوستن.
واعتقد بنفس الدائرة اللي تقدم فيها على الفود ستامب (اعتقد) لان لاحظت ناس تقدم على الفود ستامب من نفس الدائرة

[CivilEng]

UP

[Mahir-Texas]

اود اضيف لجواب الاخوة انه، بالنسبة ل هنا في بلينو، تكساس يمكن للمراة الحامل الحصول على كارت ال WICوالمساعدات التي تتضمنها. وهذه المنظمة اسمها WIC وهي حكوميةويمكن البحث عن موقعها من خلال google . وتستمر هذه المساعدات بعد ولادة الطفل لحين بلوغه 5 سنوات. كذلك بالنسبة لذوي الدخل المحدود او خلي نكول العوائل الفقيرة فممكن ان تطلب المراة الحامل التسجيل باحدى الكنائس او عن طريق المنظمات لاجل اجراء مايسمى هنا ب Baby shower وذلك قبل الولادة بفترة معينة، وهي عبارة عن حفلة بسيطة يقومون خلالها باهداء كافة احتياجات المولود الجديد من حفاضاة وملابس والعاب وسرير طفل و كرسي سيارة وتقريبا كل شئ ممكن ان يحتاجه الطفل. والاهم ممكن تحصل المراة احامل على تامين صحي medicaid يشمل زيارات دورية لطبيب مختص والولادة في احدى المستشفيات وكذلك لحالات الطوارئ،،،ولاتشمل الاسنان والعيون لحين بعد الولادة بعدة اشهر.