وصول اخوكم الى امريكا ..... تجربة الشهر الاول

[Eng. Iraqi]

السلام عليكم اخواني واخواتي .... ان شاء الله تكونون بخير ..... الحمدلله والشكر وصلت الى بلاد العم سام يوم 16/12/2014 اي تقريبا قبل شهر ونص .... رح احاول الخص نقاط باهم الاشياء الي شفتها واستفاديت منها عسى ولعل تفيدكم بالمستقبل

* اول شي الرحلة كانت كلش طويلة .... من بغداد المغادرة ساعة 9 صباحا .... الوصول الى عمان ساعة 11 الصبح وبعدين انتظار 14 ساعة وماكو فندق .... ووراها ساعة 4 الفجر المغادرة الى فرانكفورت ..... ترانزيت 3 ساعات وبعدها رحلة طويلة 11 ساعة تقريبا الى شيكاغو ..... ومن شيكاغو الى دالاس وبعدين الى هيوستن ...... سمعت نصائح الاخوان الي قبلي ولبسنا ملابس مريحة .... انصح الكل ان يتحضرون للسفر باحسن طريقة بالملابس المريحة وخاصة للجهال

* وصلنا لهيوستن ساعة 11 ليلا ولكيت كفيلي وموظف من المنظمة الي هو الكيس ووركر مالتنا .... اخذونا للشقة ..... الشقة بيها اثاث بسيط .... دوشك ابو النفرين الي ولزوجتي بغرفة وبالغرفة الثانية فراشين منفصلين للاطفال ..... الشقة بيها قنفة وكرسي وتلفزيون .... تبرعات جايبتها المنظمة النا

* المنظمة دورها ان تستلم الولكم مني وتوزعه وتصرفه باحسن طريقة ..... اول ما وصلت انطو لكل شخص 75 دولار ..... المبلغ الكلي كان 300 دولار وانطوني كارت مال وولمارت بيه 300 دولار حتى اكمل مستلزمات البيت ..... ايجار الباقي من شهر ال12 مدفوع ونفس الحال بخصوص ايجار شهر الواحد والشهر القادم

* نصيحة لكل الاخوان لا تعتمدون على المنظمة لان انتو بالنسبة الهم مجرد رقم .... يعني عائلة من اربع اشخاص وصلت وخلصنا منها واجتي عائلة جديدة وهكذا .... حاولو ان تدورون بنفسكم وان تبقون تلحون عليهم وفوك راسهم

* بخصوص مدارس الاطفال كلها مجانية وعلى الرقعة الجغرافية .... ابني الحمدلله تسجل بري ك Pre-K وصارله تقريبا 3 اسابيع يداوم .... بنتي الصغيرة خليتها على الويتنك لست مال هيد ستارت وننتظر والله كريم

* ورة فترة من وصولنا سمعنا انه اكو دورة اوتوكاد للمهاجرين واللاجئين الي صارلهم اقل من سنة بالولايات المتحدة ..... الدورة تكلفتها 80 دولار لان انت لاجئ بس من تنجح بالدورة وتاخذ سرتفيكيت يرجعون ال80 الك يعني تصير ببلاش ..... ونفس الحال بالنسبة لدورة الانكليزي للاشخاص الي انكليزيتهم ضعيفة

* هيوستن مدينة كبيرة كلش كلش وبيها مناطق زينة ومناطق وسط ومناطق تعبانة .... اني اعتبر منطقتنا وسط لا تعبانة ولا زينة بس شي طبيعي لان بعدني جديد والي يريد الحلو يصبر على مره

* اخذت بنصائح الاخوان الي قبلي وجبت مجموعة ادوية لان بس وصلنا وبسبب تغيير الجو الجهال تمرضو واحنا هم والحمدلله الادوية فادتنا الى ان استلمنا المديك ايد

اتمنى ان اكون وصلت فكرة عامة لكل الاشخاص الي ينتظرون سفر .... اي سوال اني حاضر وبالخدمة

تحياتي للكل

اخوكم

[Dono malaysia]

الف الحمدلله ع سلامتكم وياربي التوفيق والنجاح وتيسيير الأمر وراحة البال انا والله مااعرفك بس كلش فرحتاك لماقريت كلامك
اخي ممكن اعرف اعمار اولادك ؟؟؟ انا جهالي اربع سنوات ونص وثلاث سنوات ونص هل رح يدخلوهم بري كي جي ولا اكو حضانات مجانيه لو شنو؟؟؟
سؤالي الثاني شنو تقصد بدورة اوتوكاد ماسمعت عنها ممكن تكتب انا نبذه عنها وشنو فائدتها اذا ناخذها
وشكرا جزيلا ومتمنى تضل تكتبلنا تجربتك اول بأول

[Eng. Iraqi]

الله يبارك بيك اخي العزيز .... اطفالي الكبير عمره 5 سنوات واسبوعين بس لانه في بداية المدرسة كان عمره اقل من خمسة تسجل بري كي .... يعني من يوصل شهر التاسع يحسبون شكد عمره وعلی ضوئها يقررون يا مرحلة ... بنتي 3 سنين الا كم شهر ....
بالنسبة لاطفالك الكبير المفروض يداوم بري كي .... تشوف شنو المدرسة القريبة عليك وتاخذه تسجله او تسال المنظمة والثاني تكدر تسجله بالهيد ستارت .... مجرد تكتب الكوكل اسم ولايتك ووراها هيد ستارت ورح يطلعلك المكتب الرئيسي للولاية .... بالنسبة لحالتي كتبت houston tx head start وعن طريقها خابرتهم وعرفت وين اقرب مركز ورقم تلفونه
بالنسبة للاوتوكاد هو برنامج هندسي يخص بالاغلب المهندسين المدنيين والمعماريين والدورة مالته 10 اسابيع .... شنو تحب تعرف اكثر اني حاضر
تحياتي

[حسين الجبوري]

الاخ العزيز
كل التوفيق في حياتك الجديده وتمنياتي لك بالنجاح الدائم باذن الله
اخوكم
حسين الجبوري

[ابو الامراء]

الف مبروك وصولك بالسلامه وان شاء الله حياة سعيده وبالتوفيق ...نصيحه الى كل الاخوان الذين يرمون السفر ان لا يسافروا الى ولاية تكساس لانها تعتبر غير جيده ومن انكس الولايات في امريكا وذالك لعدة اسباب منها كثرة المكسيكيين وخصوصا الذين دخلوا تهريب وكذالك السود ولهذا تعتبر نسبة الجريمه فيها من اكبر واضعاف الولايات الاخرى وكذالك المساعدات لمدة 3 اشهر فقط والتامين الصحي لا يشمل الاسنان والعيون وكذالك الجو حار ورطب مثل البصره وتكثر فيها الحشرات وهذه المعلومات من عوائل اقاربي ذهبوا هناك ثم غادروها الى ولايات اخرى احسن بكثير وتوفقوا فيها واستقروا

[عباس التميمي]

الحمد لله على سلامتك
بالتوفيق انشاء الله

[سعدالعراقي]

كل التوفيق لحضرتك اخي العزيز ولأسرتك الكريمه وبالتوفيق ان شاء الله في وطنك الجديـــــد ..

[TOFEE.US]

الف الف مبروك والحمد لله على سلامة وشكرا على هاي المعلومات القيمة

[ابو المصطفى]

بالتوفيق انشاءالله اخي الكريم ..تحياتي ابومصطفى / تركيا

[iraqforme]

حمدالله على سلامة الوصول اتمنالك كل النجاح والتوفيق في حياتك الجديدة وعاشت ايدك على هذه التفاصيل .
مودتي لك أخي

[القلب المهاجر]

الف الف مبروك ويارب التوفيق في كل مجالات حياتكم

[Eng. Iraqi]

شكرا لكم اخواني .... ان شاء الله الي بعده ينتظر سفر يسافر والي مسافر الله يوفقه ويسهل اموركم ..... بالنسبة لجواب اخوية ابو الامراء

اخوية اني اتفق وياك بمعظم الي كتبته .... بس تكساس الولاية اكبر من العراق بهواية وبيها هواية مدن حلوة مثل دالاس, اوستن العاصمة, سان انتونيو وهيوستن

كل مدينة بيها المكانات الزينة وبيها المكانات التعبانة .... وصدكني الي ساد بابه وكافي خيره شره محد يوصل يمه وداعتك

تحياتي الك

[dododoo]

الف مبروك وبالتوفيق اخي

[Sonata*]

اخي العزيز

بلكي تعطينا معلومات عن اسم المعهد اللي يعمل دورة اوتوكاد او اي لنك بالنسبة لهذا الموضوع

واكون شاكر

[Eng. Iraqi]

اشكركم كلكم ويارب الموفقية للجميع .... بالنسبة لسوال الاخ سوناتا حول الموقع .... اذا انت لاجئ او مهاجر وصارلك اقل من سنة داخل الولايات المتحدة يحقلك تقدم ... المنظمة اسمها اليانس الي صايرة بهيل كروفت ستريت ... تروح الهم وتكلهم اني اريد اقدم علی دورة اوتوكاد وهاي مستمسكاتي وشوف شنو المطلوب وشنو يحتاجون ... وهذا عنوانهم كامل
6440 hillcroft street
Houston texas

تحياتي
تحياتي

[Sonata*]

مشكور اخي العزيز
اسم المعهد او المؤسسة Alliance for Multicultural Community Services
هذا رابط المعهد  http://www.allianceontheweb.org/index.html

[*Ray]

 بالتوفيق بحياتكم ان شاء الله

 اختك راي
 US

[مايكل اندريه85]

الف الف مبرووووووووووووك بالتوفيق