السلام عليكم اخواني واخواتي ..... اليوم الحمدلله حصلت على اجازة السياقة بعد ما نجحت بالاختبار العملي .... مثل ما تعرفون او سامعين السيارة بولاية كبيرة مثل تكساس ايدك ورجلك وكلش ضرورية وحتى من تقدم على شغل دائما يكون مطلوب من المتقدم ان يمتلك وسيلة نقل يعتمد عليها واجازة سوق ..... قبل ما اتكلم عن اجازة السوق خلي شوية اسولفلكم على وسائل النقل المتوفرة بهيوستن - تكساس :
اول شي وسائل النقل العامة والي هي الباصات وخطوط المترو : هي عبارة عن باصات كبيرة ومكيفة ومريحة بس مشكلتها انه بطيئة ولازم تحول على اكثر من باص حتى توصل للمكان الي تريده .... تكلفتها للركبة الواحدة هي دولار وربع .... اذا صعدت بالباص وعندك بس دولار وعشر سنتات عادي ادفعها وماكو مشكلة .... بموقع الانترنت مكتوب اذا ما كان عندك المبلغ الكامل انت مسموح انت تدفع كل الخردة الي عندك حتى لو اقل من المبلغ المقرر ... اني اول ما وصلت رحت على موقعهم بالانترنت
www.ridemetro.org وطلبت الكارت مال باص اون لاين وورة اسبوع تقريبا وصل على عنوان بيتي بالبريد .... الكارت ممكن تشحنه من نفس الباص او باستخدام الفيزا كارت مالتك يم مكاتب الشركة المخصصة .... الميزة بالكارت انه بعد كل خمسين ركبة ينطوك خمسة مجانية
وسيلة النقل الثانية هي التكسيات : هيوستن بيها شركة تكسي واسعة الانتشار اسمها yellow cap وعدهم رقم بس تخابر عليه وتنطيهم عنوانك يدزولك سائق لهناك وياخذك لبيتك .... شوية تكلفتها غالية
وسيلة النقل الثالثة هي الUBER : هاي الاوبر شنو ؟ عبارة عن تطبيق تنزله بتلفونك الاندرويد او الابل وتسجل بيه .... لازم تكون تملك فيزا كارت حتى يقطع منه مبلغ الكروة .... ورة ما تنزله وتسجل بيه وخلي نفرض طلعت لمكان وتريد ترجع للبيت ومابيك حيل تروح بالباص .... تفتح البرنامج وتطلب سائق يجيك على عنوانك .... الحلو بالموضوع انه ارخص من شركة التكسي بهواية ... اني اشوفها مناسبة نوعا ما للمشاوير الضرورية .... مثلا رحت تسوكت وعندك غراض هواية .... جربتها من نفس المكان لبيتي وية شركة التكسي المبلغ صار 18 دولار ووية اوبر صار المبلغ 11 دولار
هاي كانت نبذة عن اهم وسائل النقل بمدينة هيوستن .... هسة نجي نحجي على الاجازة وخطواتها :
لكي تكون مؤهل للتقديم على اجازة سوق لازم يكون عندك الاوراق التالية :
-السوشيل سكيوريتي نمبر
- هوية بيها تاريخ ميلادك مثل الجواز او الكرين كارت
- عقد الايجار ومذكور بيه عنوانك كامل وموقع
- فاتورة باسمك واصلة لعنوانك لمجرد تاكيد العنوان .... اني استغنيت عنها بالبنك ستيتمنت الي يدزوه كل شهر على عنواني
انت عندك كل هاي الاوراق كاملة ..... تروح على اقرب مركز يم بيتك .... تكدر تشوف المراكز قريبة عن طريق الانترنت
www.txdps.state.tx.us تدخل الزب كود ويطلعلك وين اقرب واحد .... تكدر تحجز موعد اون لاين والطريقة كلش عملية وسهلة ومريحة وتخلصك من فترات الانتظار الطويل .... تفتح الموقع الي يمك وتروح على put me in line online وتدخل رقم تلفونك وهاهيه .... قبل ما يوصل السرة مالتك بربع ساعة تجيك مسج وهكذا
المهم تروح وتوصل تقدم اوراقك واول شي عندك هو الامتحان النظري الي يكون على الحاسبة .... اكو كتاب تكدر تنزله من الانترنت وتكعد تقرة بيه وتروح تمتحن واكو معاهد متخصصة تروح يمهم دورة بمبلغ 50دولار وتمتحن هناك .... ورة ما تكمل الامتحان وياخذون بصماتك ويتاكدون من اوراقك رح يسالوك نحددلك موقع سياقة لو انت تحدد اون لاين ؟ انت مخير انه انت تحدد الموعد او هم يحددوه الك براحتك والحلو انه تكدر تمتحن العملي باي مركز ثاني يعجبك يعني مو شرط نفس المركز الي قدمت من عنده اول مرة
خلي نفرض حددت موعد .... لازم شوية تتدرب على قوانين السياقة وشروطها واهم شي يركزون بيه هو السرعة المحددة وعلامات الوقوف والParallel park .... تكدر بشوية تدريب تضبط كل هاي الشغلات وتروح تمتحن وانت واثق من نفسك .... الناس الي ما عدها خبرة بالسياقة يكدرون يروحون على معاهد بس شوية مكلفة او اكو منظمات تعلمك سياقة مجانا لان انت لاجى وبعدك جديد بالولاية
ومبروك عليك الاجازة وانت هسة مؤهل انت تشتري سيارة وتسوق براحتك بكل امريكا
اي سوال او استفسار اني حاضر وبالخدمة
تحياتي
