كم المعونات للاجئ في فنلندا

[((الدكتور))]

السلام عليكم لو ممكن احد يعرف كم المعونات للاجئ في فنلندا وبعد الحصول والموافقة علي لجوء كم المعونات الي ياخذه الشخص وشكرا وتحياتي لجميع

[((الدكتور))]

 

[طريق النجاح]

اكو صديق ساكن بفلندا. وحجالي على المعونات  المساعدات. منطينه بيت بلاش وسيارة. وراتب على النفر 3000 وعايش احسن عيشة. واكيد اغلب العراقيين مكضيه على الراتب والنوم بس بهاى الفترة انقطع عن المراسلة يخاف من الحسد هو حجالى وتورط لان حتى اهله ما يعرفون بحاله لان يبجى بوجه الله. يكول لاخوه. انى جاى اجدي بالشارع ؟؟؟؟؟؟؟

[تفرج]

اخوية زينة المساعدات تكفيك عيشة زينة بس مو مثل ماكال الاخ طريق النجاح ممعقولة النفر 3000 دولار يعني اذا 3 نفرات ياخذون دفتر ماعتقد اكو هيج شي اخوية
الي ادري بي الطفل 400 والزوجة 600 والزوج 700 وسكن الدولة تدفع الايجار وطبعا هذا كلة لان ماكو دخل من يبدي يشتغل تبدي تقل المساعدات

[((الدكتور))]

مشكورين جدا . بس اعتقد شوي مبالغه بيه 3000$ جان هساا ناس كله هناك . والله اعلم تحياتي لجميع

[عباس التميمي]

الحياة مو بهذيج الصعوبة بفلندا مقارنه بغير دول و مساعدات بيها خير
و الله يوفقك

[لورنس السفاح]

دكتور هو شلون توصل لفنلندا ؟؟
اخذنا وياك ههههههه

[((الدكتور))]

مشكورين اخوان  ... لورنس السفاح كل الهلا اخوية يلا نروح سوية بالنسبة لسؤالك عندي شنغن يوناني ومناك اطلع انشاءالله  ولو احد عنده معلومات علي موضوع لجوء حالين خلي ينورنا تحياتي.

[ابو باقر]

دكتور لو سمحت شكد كلفتك فيزا الشنغن ومنين كدرت تحصلها

[((الدكتور))]

كل الهلا اخوية ابو باقر اني محصله قديمة من 2013 من ليبيا عن طريق مكتب تحياتي الك واني بالخدمة

[لورنس السفاح]

دكنور ليش الشنغن مابيها اكسباير ؟؟
اني لو مني ومنك اروح للنروج هم بصف فنلندا
ع الاقل منتخبهم مرات يصعد لكاس العالم
بس فنلندااااااااااا انسىىىىىىىىىىىى هههههههههه
هسه شكد الكلفة دكتور للشخص ؟
وبالنسبة للعائلة نفس السعر ع العدد لو اكو تخفيضات
مو هي ع اساس ملابس لورنس يدور تخفيضات ههههههههههههه
تحياتي وبالتوفيق ان شاءالله

[((الدكتور))]

هههههه اخوية لورنس لا بيه وراح تسقط بشهر 8 الجاي سنتين متعددة . كلفتي بحدود نص دفتر بس قديم هل حجي وعلي موضوع نرويج قالو صعبة مينطون لجوء للعراقين وجوازهم 7 سنوات يلا تاخده بس فنلندا اسهل قالوا اسهل وبالنسبة لطوبة عمي واحد يروح للبرازيل منتخبهم صاعد وخوش اجواء عدهم ^_* هههه وبالنسبة للعائلة والله ماعندي معلومة اني مسويه بوحدي  موفق صديقي

[alwaleed88]

أسأل الله لك التوفيق والنجاح وتسهيل الأمور
وجميع الأخوة

[((الدكتور))]

منور ياغالي علي مرورك الكريم

[ghost8888]

اول ما تقدم لجوء تسكن بالكامب وهم اوفرولك طعام وشراب وينطوك مصرف جيب 50يورو هالحدود
ورا ما تحصل لجوء يأجرولك شقة سكنية على حسابهم وينطوك تقريب 300 يورو لكل شخص بالاضافة الى اجور كورسات دراسة اللغة ..

[((الدكتور))]

مشكور اخوية الغالي . انت حالين هناك لو بس عندك هل معلومات ؟لان حبيت استفسر عن المعيشة في البلد وهل اللجوء مفتوح يعني دينطون عراقين وخاصة جاي بشنغن يوناني ؟ وهل هناك دول افضل في المعونة واسهل في اللجوء الي عنده هل معلومة خل ينورنا وبارك الله بالجميع تحياتي ^^

[ghost8888]

انا مو بفنلندا بس اخواني اثنين هناك واحد راح قابل سنتين والاخ قبل سنة وقدموا لجوء ....
وعادي ينطون لجوء للعراقيين بس لازم عندك قصة مرتبة ..
اما بالنسبة للفيزا الشنغن من يونان ما عندي معلومات عنها ..

[لورنس السفاح]

دكتور عيوني
قبل كم يوم قريت بالنت انه فيزا الشينغن لازم كبل تروح بيها للبلد
الي تريد بيه اللجوء يعني بحالتك لازم كبل تروح لفنلندا
ماتمر باي دولة اخرى
لان يكلك اذا نزلت بدولة اخرى من دول الشينغن وبصمت هناك
بس تدخل فنلندا ويعرفون ببصمتك يرجعوك للدولة الي بصمت بيها
زين انت باليونان بصمت لو لا ؟؟
وشلون طريقك لفنلندا ؟
بالتوفيق دك

[((الدكتور))]

هلوو اخوية الغالي . اني من قدمت علي شنغن بصمة بالسفارة اليونانية اصلن ورحت لليونان عادي طبيت بس ماسافرت دولة لخ غير اليونان . واني هسا بعد جم شهر راح اروح لليونان واخذ طيارة راسا لفنلنداا من دون مااتزل بدولة لخ الخلاصة حتي تبقي بس بصمة السفارة فسئلة علي موضوع بصمة اليونانية قالو علساس ميرجعون بسبب قرار من محكمة انو ميرجعون لليونان . والي عنده معلومة يعرفه علي موضوع خل يقلناا تحياتي لجميع

[((الدكتور))]

ghost8888 مشكور اخوية الغالي علي معلومات . بس مقتلي شلون المعيشة هناك اخوانك مرتاحين بالمعيشه الشعب طبيعته فرص الشغل . مشكور ويوم الي تلحق اخوانك انت هم موفق انشاءالله ^^