الهجرة الى كندا عن طريق الفيزا السياحية الامريكية (موضوع شامل) الجزء الثاني

[louy canada]

اخواني الاعزاء

مثل ماوعدتكم هسه راح نكمل الجزء الثاني حول (الهجرة الى كندا عن طريق الفيزا السياحية الامريكية)

اخوان اني عن نفسي اجيت على امريكا الى مشيغان وبقيت يومين لدى احد الاقرباءوبعدها فتت كندا وعن الدخول الى كندا لازم تتوفر هذه الشروط

1- انه انت مامقدم هجرة في امريكا او اذا جنت مقدم لازم تستلم امر الرفض وبعدها تجي امريكا
2- ان يكون عندك كفيل من الدرجة الاولى في كندا (اب - ام -اخت-اخ -خال -عم-عمة -خالة)

وقبل ماتوصل امريكا واذا ناوي تفوت كندا مثل مامذكور سابقا لازم الشروط تكون متوفرة بيك
ولا تكول عندي صديق يتكفل ومادري شنو ترى يدفروك ويرجعوك ل امريكا

حاتكولي احجلي شون فتت .... ادلل حاكولك 

بعد وصولي امريكا بيومين اجا عليا اخوية من كندا وتوجهنا للحدود (يفضل الذهاب قبل الساعة 8صباحا)
طبعا بالحدود الامريكية محد يكلك هلا ( يعني مالهم علاقة بيك )
وعبرنا التنل الامريكي - الكندي اللي يربط مدينة اسمها وندزر مع مشيغان
وعند وصولنا الحدود الكندية الضابط الكندي كال اريد الجوازات طبعا كلش اعتيادي واعيدها كلش اعتيادي الامر .... اخويا كال الا ( هذه جوازي ووياي اخويا ديريد يفدم هجرة لكندا )

الضابط بغاية الاحترام كال تروح على هذا المكتب وفعلا توجهنا الى المكتب
واخويا حجى وياهم وكال اني جبت اخويا من امريكا وهو جان بالعراق وهسه هو يريد يقدم لجوء

طبعا اول شي فتشو اغراضي وجنطة اليد وبعدها استلمو جوازي والمستمسكات مالتي
(( الانتظار في الاوفيس تقريبا 15 ساعة وحسب الشغل مالتهم وخلالها راح تشوف كيفية التعامل الانساني وحاتحب البلد قبل دخوله لطيبة الكنديين واحترامهم الك )

خلال هالعشر ساعات او اكثر  راح .....اولا يجيبولك مترجم وراح يكون اكو تحقيق وياك والاسئلة

تكدر تشوفها على http://www.cic.gc.ca/english/

لان هيا عبارة عن ابلكيشنات وتمليها المحقق يسالك وانت تجاوب (يعني ترتب سوالفك قبل ماتروح )

بعدها هم راح يكون اكو بصمات وتحقيق هم بسيط مع ضابط اخر
وهم راسا راح يدزون ل امريكا يجيكون اخاف عندك شي وهربت وسوالف امنية .....

وبعد  التاكد من انه الكفيل مالتي اخويا وبعد اكمال معاملتي تم الموافقة على قبولي ك لاجى موقت وتم تحديد موعد محكمة لي بعد شهر ونصف ...حاينطوك هوية مؤقتة + اوراق هواية عن اجاباتك وعن اسماء الاطباء والمحامين وهالشغلات والخ

طبعا بعد ماتستلم الاوراق لازم تعمل فحوصات طبيةخلال شهر  +تلزم محامي وتدز قصتك خلال 15 يوم الى المحكمة وطبعا هاي كلها تكدر تسويها فري (ابلاش) شون ؟؟؟؟؟

مثلا المحامي تكدر تتصل على http://www.legalaid.on.ca/en/  حتى تاخذ الموافقة على دفع الفلوس للمحامي من قبل الدولة بس يجب عليك ان تكول ماعندي فلوس انت واخوك يعني مو اخوك يكول اني عندي ترى مايدفعولك خلي يكول اخوك اني ماعندي ومااتكفله ب اي فلس

وابضا تتصل على الاولفر وتاخذ موعد وياهم وتروح تقابل وانشالله اكيد يتم قبولك وصرف راتب شهري الك بس لاتجيب هواي فلوس على الحدود لان راح يجيكون عليك الولفر
والفحوصات اصلا فري بس تودي هويتك المؤقتة واوراقك

بعد ان تلزم محامي اكيد راح ترتب الك انت قصة وياريت تكون واقعية بلا اكشن ترى كلشي يعرفون راح تروح للمحكمة وهناك راح يتم تقرير مصيرك اما البقاء او تسفيرك بس 99بالمية القبول خاصا اذا جنت مسيحي او الاقليات مع احترامي للاخوة ولكن انا مسيحي ولهذه داحجي اللي شفته والعراقيين جميعا تقريبا مقبولة لضروف البلد التعبانة ...

والحمدلله اني تم قبولي على الاقامة الدائمة واستلمت الاوراق بعد شهر وسويت الهيلث كارت الكندي والدولة الى حد الان تصرفلي راتب وداروح على المدرسة لتقوية اللغة ... ودابدي اسس حياة جديدة

والله يوفقني ويوفق الجميع ...


للعلم اني من بغداد والفيزة اخذتها من بغداد قبل ماتنسد السفارة وسافرت عن طريق الاردن

وهاي الله وكيلكم كل اللي صار وياي جايز مو كلش تفاصيل هواي ذكرت  بس انشالله اجاوب ع اسئلتكم


مع تحياتي الك اخوتي ...

[outtoother]

حياك الله اخي لؤي
وبارك الله فيك وانشاء الله الموفقية في حياتك الجديدة
وانا اايد كلامك بان الاقليات لهم حظ اوفر في الحصول على الاقامة
والله الموفق وكل شخص وحظه ونصيبه

تحياتي
ابو داوود

[alwaleed88]

ننتظر رأي الأخ شمعة في هذا الموضوع

[outtoother]

اخي وليد انت اعلنت الحرب
هسة راح اتصير بالطلقات
بس صدك اخ شمعة مختفي
احتمال ديعد الاجابة

[DN-DN]

اخويه لوي كندا اشكرك عالى هذا الموضوع الجميل
يعني على كلامك اذااقدر اطلع فيزه لكندا نسبة
قبوللي عاليه بسبب ظروف العراق لان الاخوان قبلك
كانوا يقولون القبول شبه مستحيل من الداخل ؟؟

[alwaleed88]

الأخ outtoother جهز نفسك خوية
جهز السواتر الترابية والبس الأحزمة
والنساء والأطفال نزلهم بالسراديب
ولا تنسى تلبس العشب للتمويه

شكراً عفواً

[outtoother]

الأخ outtoother جهز نفسك خوية
جهز السواتر الترابية والبس الأحزمة
والنساء والأطفال نزلهم بالسراديب
ولا تنسى تلبس العشب للتمويه

شكراً عفواً

اخي الوليد حياك الله
ذكرتني بالعشب للتنويه
تحياتي الى حضرتك

[louy canada]

شكرا لكل التعليقات 

1- اخوية ماعنده جنسية كندية (اقامة دائمة)
2- انا شخصيا بعد دخولي بشهر تكفلت خالتي رحت للحدود وبالهوية اللي انطوني ياها اتكفلتهم
مع العلم ليس لدي عمل او اي شي يعني حديقة  ولا ماخذ قبول المحكمة
3- واخوان اني اكثر من 15 عائلة  اعرفهم اجو عن هذه الطريق  وهواية منهم متزوجين مع اطفالهم هم
وكل الناس نفس الشي عملو والحمدلله امورهم تمام
4- ليش هيا المساعدة للمهاجر مو ولفر ؟؟؟  ليش المهاجر من يشتغل مو يكطعون عليه الراتب
والمعروف الصحة في كندا مجانا لكل مواطن

واكيد ماكووو مواطن غير شرعي بكندا لان ابوه يحترك بلا اوراق مو مثل غير دول ولهذه انشالله تشوفون بل حدود والله الباب مفتوح كدامك تكدر تطلع تفوت تطلع عادي

واني من داحجي حبيت اوصل للناس هاي المعلومة اللي هيا يم هواي ناس مامعروفة

[AbULAITH]

 
 هسة منين اجيب قريب من الدرجه الاولى
رجعت الكآبه

[AbULAITH]

اخ لؤي
نشكرك على المعلومات وعلى تجربتك
بس اريد اعرف هل الحدود الكندية هي طلبت منك انو تجيب كفيل
حسب كلامك اخوك بادر بالتعريف عن نفسه ، ولكن هل انت متأكد انه يجب ان يكون هنالك كفيل من اقاربك لكي يتكفلك
ولماذا استبعدت الصديق
مع الشكر

[المهندس الزورائي]

هذا الموضوع التمام .. اشكرك جزيل الشكر عليه . اني عندي عمي مع عائلته بكندا لكن المشكلة هسه هو بالامارات يشتغل ( عنده كرين كارت ) .. فما اعرف هل ممكن يفيدني موضوعه لو لا ؟ عائلته ( زوجته واطفاله ) بكندا وعدهم اقامات دائمية فهل ممكن يفيدوني ( يعني زوجة عمي وابن وبنت عمي ) ؟ اكرر شكري وامتناني واتوقع يحمى وطيس المعارك في قادم الأيام 

[alwaleed88]

مع جمال وروعة الموضوع وقيمة المعلومات فيه إلا أننا إلى الآن ولله الحمد لا يوجد أي إصابات وانتهت الغارة الجوية بسلام
ولكن هذا لا يعني أن الغارات انتهت، ومثل ما قال الأخ الزورائي أعتقد سيحمى وطيس المعارك في قادم الأيام، لكن نرجو أن لا يتم استخدام السلاح الكيماوي أو البراميل المتفجرة

شكراً أخوي لؤي على المعلومات القيمة التي فتحت أمامنا آفاق واسعة

[louy canada]

اخ شمعة
1- اخويا وياه الجواز العراقي وعنده فيزا سياحية امريكية
2- المشكلة ما اقدر ادز الاوراق مالتي الك حتى اشوفك بعينك وقرار المحكمة
3- في حالة كنت على الاولفر الاسنان والعيون والادوية مجانا الله وكيلك راجع معلوماتك
4- اني انصرف راتب الي من اول دخولي كندا
5- فعلا اني تكفلت خالتي لكونها حالة خاصة اكو بقصتها وهو يفوتك بس المحكمة حايكون الها مثل نفطة عليك وكون على ثقة قبل عدة اشهر كان صديق يقدر يتكفلك بس هسه ديشدد على الدرجة الاولى 
6- اني انقبلت ك لاجى ,تكدر تشوف نموذج الهوية المرفق

[louy canada]

اخوان اللي يحب يشوف القانون
هذه الرابط بيه كل التفاصيل http://www.cbsa-asfc.gc.ca/agency-agence/stca-etps-eng.html

وبالنسبة للاخ شمعة انت لو هسه اصورك نفسي طبيت هم دتكذبني واتمنى تشوف اللنك اعلاه
ولضيق الوقت اخذتلك صورة اتمنى تقتنع بيها

[TOFEE.US]

الف مبروك اخوية اني عندي اقرباء في كندا ماعدهم الجنسية الكندية ويطبون ويطلعون لامريكا عادي حاله حال الي عنده جواز كندي لكن بعض الاخوان ماعدهم معلومات ويحجي بكيفه تحياتي الك والف مبروك مرة ثانية

[المهندس الزورائي]

مثلما توقعنا .. ارتفع رتم الأداء .. واشتدت النقاشات .. واتوقع المزيد من السجالات في قادم الأيام .. فقط أتمنى ان تبقى الروح الرياضية حاضرة في النقاش .. لانه في النهاية من يقرا هذه المعلومات هو المستفيد الأكبر .. ينبغي ان نشيد بجميع الأطراف ( المتنازعة  ) لانهم يحاولون توفير المعلومة الصحيحة والمفيدة لنا .. كل من وجهة نظره .. تحياتي للجميع وبانتظار المزيد

[hishamalamri]

طبعا شمعه مصصم انو هذا الحجي غلط لا حبي مو غلط حجي الولد كله صحيح واني هم دخلت بنفس الطريقه

[AbULAITH]

 اخ hishamalamri
هل من الضروري كفاله احد الاقرباء لهذا الغرض
انا باعتقادي الامر لا يحتاج الى وجود كفيل اذا كنت تريد ان تطلب لجوءعند الحدود
ارجو التكرم بافادتنا
مع تحياتي الك وللجميع

[شمعه 3]

الاخوه والأخوات جميعا

وصلتني على الخاص رسائل من بعض الشرفاء والغيارى والنشامى من العراقيين الاصلاء اصحاب الغيره والكرامه والشرف وكانت رسائلهم هذه تحتوي كالعاده على عبارات وجمل وكلمات تدل على ذوقهم واخلاقهم الرفيعه في ( السباب والشتائم ) وما يسمى بالعاميه ب ( الفشار )وكلها من الدرجه الاولى طبعا ... والسبب لانني كتبت كل المعلومات المتعلقه بطلب اللجوء من الحدود في كندا وصححت ما ذكره اصحاب القصص المشكوك فيها حول هذا الموضوع ..

وسبق وان وصلتني رسائل  مشابهه قبلها ولكنني تجاهلتها مرات ومرات  لكن السيل قد بلغ الزبى كما يقول المثل العربي وهذه المره كانت رسائلهم من نوع اسلحة الدمار الشامل ....

وهؤلاء الغيارى والنشامى العراقيين دافعو دفاع مستميت عن اصحاب المواضيع التي قالو فيها انهم دخلو الى كندا وحصلو على اللجوء من الحدود بينما نزلو على شمعه بكلام( فشار) من الدرجه الاولى ومن النوعين المدني والعسكري ...

من هم هؤلاء ؟؟؟؟  وربي الذي خلقني لا اعرفهم ولكن  لا اقول فيهم الا قول الله سبحانه وتعالى ( حسبي الله ونعم الوكيل ) ....

من الذي يدفعهم ؟؟؟ وربي الذي خلقني لا اعرف من يدفعهم ولكنهم حتما مدفوعين ولا اقول فيهم  ايضا الا قول الله تعالى ( وما للظالمين من انصار ) ....

واتهموني ايضا بانني لا اريد الخير للعراقيين ولا اريد ان يستفيد الاخرين من اللاجئين العراقيين وكأن كندا وحدودها ملك شمعه مع العلم  انني قلت مرات ومرات ان كندا (مو مال ابو واحد لا ملك شمعه ولا غيره).. كما اتهموني بانني اريد ان اضر (يعني اسبب الضرر) لكل اللاجئين العراقيين لان شمعه حاقد على كل اللاجئين العراقيين حسب كلامهم وادعاؤهم ونسو ان شمعه نفسه كان لاجيء لسنوات طويله ...

وطبعا لم ينسى هؤلاء الغيارى والشرفاء من القول بانني عديم الضمير وعديم الاخلاق مع الوان وانواع واشكال من السباب والشتائم التي لا يقولها غير العاهرين والعاهرات ( اكرمكم الله وحاشاكم ) ....

وبناءا على ذلك واستنادا الى هذه الرسائل فقد قررت حذف جميع مشاركاتي وردودي التي كتبتها في المواضيع الخاصه باللجوء من الحدود في كندا ولن اكتب في اي موضوع اخر نهائيا في عينكاوا لان المثل يقول :

( الباب اللي يجيك منه الريح سده واستريح )

 والاخوان الذين يرغبون بالتواصل معي بامكانهم التواصل على الايميل او على الخاص ..

تحياتي للجميع واسفي على هذا النموذج السيء من المحسوبين على العراقيين الذين يقطعون سبيل المعروف بين الناس ...

اودعناكم في امان الله

اخوكم

شمعه - كندا

[المهندس الزورائي]

خبر محزن من الأخ شمعة .. أتمنى إعادة النظر بي . بخصوص من يشتم ويسب فهذا يعكس اخلاقه وتربيته .. وانت يا اخ شمعة تعرف زين ان اللي يشتمك يشيل من ذنوبك الى ذنوبه فلازم ما يأثر عليك هكذا نوع من الكلام . يا اخوان .. كلنا عدنا عقل ونكدر نميز المعلومة الصحيحة من الخاطئة .. والنقاش في هكذا مواضيع مفيد للجميع لانه يكشف معلومات ما نعرفها .. اذا كنتوا تعتقدون ان ( س ) من الناس كلامه غير دقيق احتفظ بالمعلومة الدقيقة لنفسك ولا تمشي على كلامه شراح تستفاد اذا شتمته ؟ انا عندي بعض المعلومات اللي تخالف بعض من كلام الأخ شمعة بس عندي عقل اكدر اخذ الخلاصة الصحيحة من معلوماتي ومن كلام شمعة او من كلام باقي الاخوان .. اكرر وأقول .. النقاش الودي بي مصلحة للجميع .. والسباب والشتائم ما تنفع صاحبها بل تضره لان الله سبحانه يعاقبه على كل كلمة شتيمة واحنه بامس الحاجة لمساعدة رب العالمين مو لاغضابه ! اذا عدكم رأي شنو المشكلة طرحوه هنا ع العام وباسلوب محترم .. كولوا احنه نعتقد كلامك خاطئ مبيها شي ليش لازم مسبة وكلام غلط ! عجيب امركم !

[lawo]

مرحبا جميعا.. سجلت على منتدى للرد على هدا موضوع ..منتدى كلش ناجحة انشاءاالله يداوم عشت ايدكم(اعتدر لان لغة عربيتى مو زينة..
 شفت هاى رد على نفس حالة  louy canada  و باختصار كلامها صح و يصير ادا واحد موجود بامريكا بفيزا سياحية و عندها اقرباء(درجة اولى او ثانية او ثالثة) , تروجين الى اوفيس شوؤن مهاجر الى موجود فى بعض حدود امريكا كندا,, ادا قريب هم يجى للحود احسن...الى كاتبة هاى معلومات يكول عن تجربة..انى شخصيا ما عندى تجربة و عن نفسى هم اريد طريقة مضمونة للجوء الى كندا عن طريق فيزا سياحية امريكا انى و زوجى طفلى  ما عندى احد بكندا.

اقرؤ رد مال Kriv فى هدا رابط على موضوع
http://www.canadavisa.com/canada-immigration-discussion-board/-t262926.0.html

[mohajer88]

السلام عليكم ,اوجه كلامي للأخ شمعة المحترم واقول لك ان اوقفت ردودك ومشاركاتك في هذا المنتدى فقد حققت الهدف الذي يصبو اليه هولاء الناس العديمي الاحترام الذين يحاولون الاساءة اليك بالسباب والشتائم لانهم لا يملكون سوى هذا الاسلوب المفلس ،ارجو منك دوام التواصل والتوجيه لاخوانك العراقيين ،،وتقبل تحياتنا

[lawo]

اريد اخابركم انى بكندا هسا عبرت حدود امريكا-كندا بمشى قليل مدة والحمدلله استلمنا نفسنا فى داخل كندا وعندنا محكمة ورا شهرين بعد دخول

[الورد الاخضر]

الموضوع جميل
سوال الذي ليس لدي اصدقاء او اقارب هل يقبلون بقبوله كلاجىء او لا

مع التقدير

[Aziz Alani]

مرحبا
ممكن احد يجاوب الورد الاخضر لان صراحة نفس مشكلة,,,,لا قريب درجة اولا ولا صديق بكندا