اخواني اعضاء المنتدى الكرام..
اول شي اعتذر عن التأخر عن كتابة هذا الموضوع مع انه كنت واعدة نفسي ان اوفر معلومات قصتي باقرب فرصة بعد وصولي لكن للاسف كلش انشغلنا بشغلة ورة شغلة..
الابلكيشن مالتنا كفالة خماسية من الاردن.. قدمنا الطلب بشهر الرابع 2012 بمكتب الهجرة في كندا وجتي الموافقة المبدئية بشهر السابع 2012
وراها انكطعت اخبار الشغلة واحنه بدينا نقلق الى ان واخيييييرا بشهر السادس 2014 يعني بعد سنتين وشهرين! اجانه تلفون للمقابلة.. خابرو قبل 3 اسابيع من تاريخ المقابلة.. وطلبوا نجيب كل اوراقنا وهوياتنا الاصلية ويانه..
رحنا والحمدلله المقابلة كانت سهله لكن بصراحة طويلة ثلاث ارباع ساعة.. كل تفصيلة من تفاصيل الملف سالتنا بيها.. المهم انه الشخص يكون محضر نفسة وقاري كل الاوراق الي قدمتوها والقصة ووضوح استحالة العودة للعراق.. ويكون صريح وواضح ويجاوب على كد السوال فقططط.. ووراها كالتلنا اني ما اشوف مانع للموافقة على ملفكم.... طبعا بدون مبالغة الدمعة طكت بعيني من الفرحة.. ربي يكتبها لكل راغب بيها..
وراها كلتلنا انه نوقع على ورقة القرض مال السفر (يعني ما انطتنا اختيار، كالت انه تفضل انه احنه ناخذ القرض ونروح عن طريق الاي او أم بدل ما احنه نروح نحجز بحدنا) المهم فوقعنا واحنه الممنونين طبعا
انطلقنا فورا لعمل الفحص الطبي وكان الملف ما واصل يم العيادة ههههههه لان رحنا كبل من السفارة كان المفروض ننطيها فد يوم يومين يلة نروح.. وفعلا بعد يومين رحنا وسوينا الفحص.. عبارة عن فحص دم وادرار واشعة ثم مرينا عند الدكتور يعني اشياء روتينية.. وخلص العيادة همه يدزون الملف للسفارة احنه ما النا علاقة..
وهم نامت علينا طابوكة لمدة 3 شهور ونص! ردنا ننجلط نريد نعرف وين وصلت الشغلة مدندري.. المهم قررنا نروح للسفارة نسأل.. وفعلا رحنا اكو يوم الاربعاء السفارة اللي بعمان تسمح بالاسئلة للي يروح من وكت تقريبا قبل الثمانية لازم تكونون هناك.. رحنا وسالنا كالت وين الفحص مال بنتك! كتلها اني بنتي اصلا صغيرة ماالها فحص طبي! هنا الموظفة كامت تخابر واشو عبالك انتبهت انه خطأ منهم انه واصلة الفحوص وبالغلط همه كاعدين ينتضرون فحص بنتي اللي ما مطلوب اصلا.. عاد كلتلي خلص روحي وخلال كم يوم يتصلون بيكم..
نفس اليوم الظهر السفارة اتصلو ويامحلاها لمن يطلع رقم السفارة بالموبايل...
كالولنا جيبو الجوازات وجيبو حسن سيرة وسلوك من المخابرات وتعالو للسفارة اي وقت.. وفعلا انطلقنا لعمل حسن سيرة وسلوك واللي اخذت تقريبا اسبوعين الى ان خلصت! وراها اخذتها واخذت الجوازات وسلمنا الجوازات للسفارة..
ثاني يوم اتصلوا بينا الاي أو أم وكالو احنه استلمنا جوازاتكم تعالو بعد يومين تستلمون خط الرحلة واحظروا دورة تثقيفية لمدة 3 ايام.. كانت دورة جميلة جدا بيها معلومات حلوة عن كندا وكنا جميع الحاضرين مثل عائلة وحدة رغم اختلافاتنا العرقية والدينية..
وفعلا استلمنا خط الرحلة وتم اسفر بحمدالله بشهر ال 12 2014... وكل عام وانتو بالف خير عام 2014 حب يودعنا بهدية حلوة وهي الهجرة الى الوطن الجديد..
طبعا البداية في كندا صعبة ومو مثل ماتوقعناها رغم انه كان ببالنا انه البداية اكيد صعبة بس مهما الواحد يحاول يتخيل فهي الامور تختلف.. تفاصيل الحياة تختلف هنا.. المهم هي تستاهل التعب وهذا المهم...
هسه دا أتامل يبدي الربيع عاد لان الثلج فد شي هنا! ما يخلص! والبرد جان قارص كلش.. الحمدلله على كل حال وربي يعين كل بردان او جوعان او يحلم بوطن...
اتمنى اكون شرحت بتفاصيل كافية واني جاهزة لأي سوال انشالله اكون قادرة على الاجابة عليه..
معلومة اخيرة: موقع الهجرة اللي نشوف عليه وين واصل الملف ابدا ما فادنا.. كان التحديث دائما يحدث متأخرا جدا!
بالتوفيق للجميع
