الى روح الشهيد ( عمار الشابندر ) انسان السلام
انتصار الميالي
ابجي .... شيفيد البجي الصار... صار
انعى .... وشلون انعى الورد عمار
اذا ابجي ... ابجي بيك كل الجرى.. والصار.. والدار
واذا انعى ... راح انعى كل ورد العراق الراح طشار
ابجي .... على غصن السلام اللي ما ورد
ولا تانوه يكبر وينطينة الثمار
انعى .... بيك انة كل وجوه الشباب
اللي من تراب الوطن اخذت سمار
ابجي .... شلون.. وليش؟
سهلة ليش انة ابجي النهار
وانعى ليــــــــــــل..
طاحت من ثوبة النجوم وانطفت كل الاقمار
ابجي .... نجمك السابك وي وكت المغيب
وآذن بحرقة ومرار
انعى طيفك .... يل ضحكتك ترسم الفرحة
على وجوه الزغار وي كل الكبار
صعب ابجي
وانة وية الحزن مثل العندة ثار
وصعب انعاك
واكولك : روح..... مودع الله
شبيدي عالجرى ودار
ماعرفتك
بس اعرفك اني كلش
اعرفنك قصيدة مكتوبة بالحب والسلام
ولحن يعزف فرح
بكل موقع دمار
اعرفنك رسالة فكر
مختلفة عن كل الافكار
يمكن ابجي
ويمكن انعى
بس تظل كلمة وحرف نور
والك بكل قلب حبك الف صورة
ومليون تذكار
الف صورة ... ومليون تذكار
