هـــا ... بيروت
حامد كعيد الجبوري
هــا .. بيروت ..
هـــا بيروت .. هـــا بيــــــــــــروت ..
هــا .. يم الصنوبر والأرز والياس
هــا .. يم الزيزفون ، الجوري والريحان
هـا .. يم الغناوي والشعر والناي
( فيروز ) الفجر تغبش
كبل خيط الشمس تضوي
يفززها الحنين وشهكة القداح
( على جسر اللوزيه .. تحت أوراق الفيه )
يهب أبراسها الغربي
يـّنعسها الفرح وتنام
تغفــــــــــــه .. تغفــــــــــــه .. تغفــه ..
وما رجع ( شادي )
جبال من الثلوج وما رجع ( شادي )
اسنـــــــــــيــــــن وما رجع ( شادي ) ..
تمثال الثلج من الدمع منحوت
هــا بيروت ..
هـــــا بيروت ..
خدودج والعسل والهيل
جفنج والكحل والليل
تتمايل غـنج يا زهرة الرمان
اليشرب ...
اليشرب ماي شفتج
يسكر وميموت
هــا .. بيروت ..
هــا .. بيروت ..
خذيني ( النصري شمس الدين )
يغني الميجنه ..
والميجنه أتغني
( ريح الشمالي يا نسيم بلادنا )
هــا .. بيروت ..
شمة ياسمين وزخ مطر هادي
النده فوك النبع وينكط بروحي
صعد ( قوس القزح ) فوك السمه العالي
لزم بيده النجم وهلالج أيلالي
( وديع ) ....
( وديـــــــــع ) أيسلطن ويطرب
وأطرب حــــــــــــــــيل .. كلش حيل ...
( خود ليلى بنت ضيعتنا ) !!!
وليلى تمنعت متعاشر الشياب
دخلك يا ( وديع ) أتغني للحلوات
غناك أيكعد الميتين
ولا كلب الصبيه يلين
عمري .........
عمري ويمشي عالستين
( تراجيج ) كليبي والضلوع أبتوت ..
هــا .. بيروت ..
هـــــــا بيروت...
الشعَر فوك المتن والكذله شمس الله
وأسم الله على حسنج طولج أسم الله
يا أترف صبيه والخصر تعبان
شايل ثكل نهدج والنهد ريان
أغنيلج عتابه ، نايل وموال
خطابَه جبت نهر الفرات وجيت
دجله وحامورابي بابل وآشور
الجناين ، والمسلة ، وكل سحر عشتار
جبت ( ياس ) أعله أهلج هيبته (أعكاله )
( مدللين يلوك لحبابي الدلال )
( عزاز عدنه ) أيغني أعذب صوت
هـــــــا .. بيروت
هـــــــا .. بيروت
أسولفها بصراحه وما أخاف اللوم
خمرتج والسهر وعيوني بيج تحوم
هلبت والبخت وأحظه بوصالج يوم
أحلفج ( بالزبور وختمة القرآن )
(بالإنجيل بالتوراة ) ...
بعد بيه عمر وأتمشه عالروشه
وأصعد صخرة العشاك
وآخر كاس عمري وأنتخي الطيبين
يا كل الفرح يا جمعة الخلان
دخلكم يا أهل ( لبنان )
رجف كلبي ويحن البابل التاريخ
للحله العشك باب الفرح مفتوح
وعلى ( دبك ) الصبايا وركصة الجوبي
(عالندا الندا الندا / الورد مفتح عا خدا / وان ما عطيوني ياكي / يجبال العالي لهدا)
**
يرجال ويا أخت رجال / بالغيره مضرب أمثال
محروسه سهولج وجبال / وللعايل نقطع يده
**
معروفه بالشده ولين / أبطال أزلام وسمحين
بجنوبج مفتوحه العين / الباروده تغازل زنده
**
هـــــــا .. بيروت
أسولفها بصراحه وأكشف المغموت
أحجي بصوت عالي والعذول يموت
لو بسكوت أهمس .. .
طيب البسكوت
هـــــــا .. بيروت
هـــــــا .. بيروت
يريدون بحقد يلغون بيج الطيب
ويصلبون المسيح وتنسبي العذراء
ويلغون الكنيسه البيه ذكر الله
الله .. المحبه والفرح والغنوه والأفراح
الله ..السلام ونشوة القداح
الله ..الأمان البلبل الصداح
غنوة بصومعة توراة ..
جامع يقرأ القرآن ...
ناقوس الكنائس بالكلب يصدح
( سمراء من قوم عيسى من أباح لها * حب أمرءٍ مسلم قاسى بها ولها )
هـــــــا .. بيروت
هـــــــا .. بيروت
دنيه ولفلفتنه وصرنه بطن الحوت
لو نتحد واحد نمنع الشدات
لو موته نظل ونحضّر التابوت
لا بيروت ... لا بيروت ... لا بيروت
نسحك عالمنايا ونلوي فج الموت
ها بيروت ..... ها بيروت ... ها بيروت
العراق / بابل 2015 م
قرأت في المركز الثقافي العراقي / بيروت / نيسان 2015
