السلام عليكم
قبل كل شيء اعتذر عن الانقطاع عن الكتابة من يوم وصولي بتاريخ 29 تموز 2015 ولحد اليوم وذلك لانشغالي بالمراجعات مع المنظمة وتكملة الاوراق المطلوبة للحياة في امريكا
خط الرحلة هو اربيل /اسطنبول /لوس انجلس /سالت لك في ولاية يوتا
الملاحظة الاولى موظف الهجرة في عمان حدد لنا نحن اربعة اشخاص 4 حقائب كبيرة 20 كيلو وثلتة حقائب هاند باك من 5 الى 7 كيلو ولابتوب عدد 3 وفي الحقية وعندما اتصل موظف الهجرة من اربيل حدد لي لكل شخص حقيبتين كبيرتين وزن كل واحدة 23 كيلو وهاند باك لكل شخص من 5 الى 7 كيلو ولاب توب لكل شخص طبا كان هذا التوجيه قبل يوم السفر بيوم واحد وهذ الموضوع اربكني لان اني كنت مشتري حقائب كبيرة علمود اعبر اكبر وزن الي صار وياية انه الون من مطار اربيل ماكو مشكلة لكن بعد وصولنا الى اول مطار في امريكا وهو مطار لوس انجلس استلمت الحقائب كاملة وتم اخذنا الى فندق للمبيت والسفر في اليوم الثاني وفي صباح اليوم الثاني اجينا للمطار ومع موظف الهجرة الي اجونا للفندق وبالطريق يكلي لازم الحقائب لاتزيد عن 50 باوند وكل شخص حقيبتين وهاند باك بدون وزن لكن تكون بحجم يدخل رفوف الطائرة وكل شخص لابتوب واحد واي جنطة اكثر من 50 باوند والي تساوي 23 كيلو تدفع غرامة 100 دولار عن كل جنطة لحسن الحظ جنت شايل حقيبة قماس فارغة للطوارىء اني طلع عندي 3 حقائب زيادة وزن فطلعت الجنطة القماش واخذت من اوزان الجنط الثقيلة ودخلتهة وياية للطائرة وعدى الموضوع بدون غرامة الوزن
وصلنا الى مطار سالت لك في يوتا بعد ساعة طيران وكان بانضارنا الكيس وركر وهي من جمهورية الكونغو وخالين وياها مترجمة سورية المظمة دتعلم المترجمة الاجراءات حتى اتصير كيس وركر بالمستقبل وهذا الموضوع اثر علية لان من دا احجي وية المترجمة اتكول اني مو الكيس وركر مالتكم واني داواحه صعوبة بالتفاهم وية الكيس وركر الكونغولية على كلن كان معاهم متطوعين شباب ابنية وولد جايين بسيارتهم فوزعنة الجنط بين السيارتين ووصلنا الى الشقة وهي شقة صفيرة مساحتها متتجاوز 60 متر مربع غرفتين صفيرتين وصالة صفيرة وفتوحة على المطبخ الصغير لكن بيه رفوف كاونتر نكدر انخلي بيه اغراض كثيرة
الاسرة والدواشك والجراجف جديدة وجدر جبير واحد وطاوة واحدة كبيرة وصحن تبسي واحد كبير وجدر كهربائي لطبخ التمن وملاعق وسكاكين وجطلات
لكيت خالينة خاوليات عدد 4 وفرش اسنان ومعاجين اسنان ومعجون حلاقة ومعطر جسم وكلينكس حمام وكلينكس مطبخ الكناتير اهنا دفن بالبناء خاين بيها سيت تعاليك
اما الصالة خاين قنفة موديل صيني مال حافات المياه لنكجونج بعد فترة اتخلصت من عدها وكرسيين مال طخم واحد جلد مشكك والثاني قماش ايضا اتخلصت من الكرسي الجلد الى سميتة اني كرسي ملك الجبشة وايضا خاين ميز بسيط من هذا الي يطبك للطعام وارعة كراسي 2 حديد نوع جيد و2 بلاستك نوع تعبان هذه الاغراض الي ذكرتها هي ممتلكاتي يعني اذا اشيل اكدر اخذها وياية والي تم تجهيزها من مبلغ الوكم البالغ 925 دولار لكل شخص طبعا هذا المبلغ متشوفة انت يبقى يم المنظمة
الشقة تحتوي على الاتي وهو ملك صاحب الشقة
الشقة مفروشة موكيت درجة اولى عدى المطبخ وثلاجة كبيرة ولو موديل قديم لكن تبريدها ممتاز وطباخ كهربائي كبير مع الفرن وغسالة صحون مدنستعملها
بعد ما شفت الشقة ودوني الى ادارة المجمع لتوقيع العقد اهنا انصح لحد يوقع عقد اكثر من 6 اشهر علمود اذا مرتاحيت بالشقة تكدر تطلع ورة ستة اشهر
الماء على المجممع اما الكهرباء والغاز الي يشتغل السخان عليه اني ادفع واجار الشقة 710 دولار وممنوع التدخين بالشقة وممنوع تربية الحيوانت والحمد لله اثنينهن اني ما احبها
اليوم الثاني اخذونة على دائرة الفود ستامب وطلعولي كارد بمقدار 645 دولار لاربعة اشخاص وتم التقديم على السوشل سكيورتي نمبر والي استلمتة بزمن قياسي بعد 8 ايام مع المدكيت (الضمان الصحي ) وهو ل 8 اشهر فقط
وتم صرف صك بمبلغ 145 دولار كمصرف جيب
وبعدها بيوم ودونا الى محل d i وهو متجر كبير للاغراض المستعملة وتكون رخيصة وكالولي عندك 120 دولار لازم تتسوك بيها كلها ترست عرابانة كاملة بيها من اوف ومايكرو وطابعة ولوازم مطبخ وغيرها واني انصح بالشراء من هذه المواق لان موادها تاتي من التبرعات
مااطول عليكم البارحة اشتريت سيارة سوناتا 2008 سودة كلين تايتل يعني ممضروبة ب 3500 دولار تلحكا 300 دولار ضرائب وفحص السيارة والارقام
الغريب بالموضوع انه تم تحويل السيارة باسمي خلال 3 دقائق فقط واستلمت الارقام
وطلعت سويتلها تامين وترجمت الاجازة المحلية حتى اكدر اسوق براحتي واليوم اول يوم راح اطلع بيها
تحياتي وتمنياتي للجميع بالتوفيق
