ܒܸܐ̄ܡܵܪܐ ܝ̄ܠܹܗ ܥܲܬܝܼܩ ܪܚܝܼܡܝܼ ،، ܠܐ ܗܲܝܡܵܢܘܼܬܐ ܒܐܲܠܵܗܐ ܓܵܘ ܐܲܦܓܼܵܐܢܸܣܬܵܢ ܐܝܼܠܹܗ ܓܘܼܢܚܵܐ ܒܸܫ ܓܘܼܒܼܪܐ ܡܢ ܩܛܵܠܬܐ ܕܚܲܕ̄ ܓܲܒܼܪܐ،،
ܡܠܘ̇ܐܵܐ ܒܝܲܕ ܝܵܘܣܹܦ ܝܲܠܕܐ- ܣܝܼܕܢܝܼ
ܬܲܪܓܵܡܬܐ ܠܠܫܵܢܐ ܐܵܬܘ̇ܪܵܝܐ
ܥܲܒܼܕܝܼܫܘ̇ܥ ܣܵܗ̄ܕܐ - ܣܝܼܕܢܝܼ
ܫܘ̇ܥܝܵܬܐ ܕܟܲܬܵܒܼܐ ܐܲܦܓܼܵܐܢܵܝܐ ܥܲܬܝܼܩ ܪܚܝܼܡܝܼ (ܟܵܐܒܘ̇ܠ 1962)، ܕܩܸܢܝܵܐ ܝ̄ܠܹܗ ܠܫܘܼܟܵܢܐ ܕܓܼܘ̇ܢܓܘ̇ܪ ܒܫܸܢ̄ܬܐ 2009 ܡܓ̮ܵܪܘܼܒܹܐ ܝ̄ܠܹܗ ܒܐܵܢܝܼ ܫܘ̇ܥܝܵܬܼܐ ܕܥܵܒܸܕ ܒܘܼܨܵܝܐ ܠܡܲܥܢܵܝ ܕܪܹ̈ܫܘܵܬܐ ܕܝܼܠܹܗ ܢܦܝܼܠܐ ܡܲܥܸܪܒܼܐ ܬܚܘ̇ܬ ܡܲܥܒܕܵܢܘܼܬܵܝܗܝ̈، ܕܒܸܚܝܵܐ ܝ̄ܠܹܗ ܓܵܘܹܗ، ܘܒܸܩܢܵܝܐ ܝ̄ܠܹܗ ܡܢܹܗ ܡܲܪܕܘܼܬܹܗ، ܘܒܚܲܕ̄ ܥܕܵܢܐ ܕܣܘܼܚܒܪܹܗ ܠܐܲܪܸܫܟܼܵܬܐ ܕܐܸܣܦܵܢܝܐ ܡܲܕܪܝܼܕ، ܠܲܦܪܵܣܬܐ ܕܫܘ̇ܥܝܼܬܹܗ ܐ̄ܚܵܪܵܝܬܐ ܕܚܘܼܬ ܫܡܵܐ (ܠܝܼܛܐ ܕܘ̇ܣܬܘܝܼܦ̮ܸܣܟܝܼ) ܒܐܲܨܸܚܬܐ ܐܸܣܦܵܢܵܝܬܵܗ̇ ܕܲܦܠܝܼܛܠܵܗ̇ ܡܼܢ ܒܹܝܬܼ ܦܪܵܣܬܐ ܕܣܝܼܪܘܝܼܠܐ، ܗܘܼܡܙܸܡܠܹܗ ܟܲܬܵܒܼܐ ܐܲܦܓܼܵܐܢܵܝܐ ܥܲܬܝܼܩ ܪܚܝܼܡܝܼ ܕܒܸܚܵܝܐ ܝ̄ܠܹܗ ܓܵܘ ܦܵܪܝܼܣ، ܘܲܩܪܝܼܡܐ ܝ̄ܠܹܗ ܠܫܘܼܟܵܢܐ ܕܓܼܘ̇ܢܓܘ̇ܪ ܒܫܸܢ̄ܬܐ 2009 ܠܫܘܼܥܝܼܬܹܗ ܕܝܼܠܵܗ̇ ܬܚܘܼܬ ܫܸܡܐ (ܐܝܼܣܵܪܐ ܕܲܡܣܵܝܒܪܵܢܘܼܬܼܐ) ܩܐ ܘܲܟܝܼܠܘܼܬܐ ܕܛܸܒ̈ܐ ܕܐܸܣܦܵܢܝܐ (ܐܝܼܦ̮ܝܼ)، ܡܛܠ ܫܘܼܥܝܼܬܹܗ ܐ̄ܚܵܪܵܝܬܐ ܘܥܲܠ ܟܲܬܵܒܼܐ ܐܘ̇ܪܸܣܢܵܝܐ ܓܘܼܒܼܪܐ ܘܫܲܪܟܐ، ܒܸܐ̄ܡܵܪܐ ܝ̄ܠܹܗ ܥܲܬܝܼܩ ܪܚܝܼܡܝܼ ܕܒܸܫܩܵܠܵܐ ܝ̄ܠܹܗ ܡܸܢܕܝܼ ܒܸܫ ܦܪܝܼܫܐ ܓܵܘ ܫܘܼܥܝܼܬܵܐ ܕܣܵܦܪܐ ܐܘ̇ܪܸܣܢܵܝܐ (ܓܘܼܢܚܐ ܘܬܲܢܒܐ)ܢܘܼܩܙܐ ܕܫܘܼܪܵܝܐ ܠܲܒܢܵܝܬܐ ܕܦܲܪܨܵܦܵܝܘܼܬܼܐ ܕܫܘܼܥܝܼܬܹܗ(ܠܝܼܛܐ ܕܘ̇ܣܘܝܼܦ̮ܣܟܝܼ)ܐܘ̇ܣܟܵܪ ܘܵܐܝܠܸܕ ܟܹܐ ܐܵܡܸܪ ܗ̄ܘܵܐ، ܕܠܹܐ ܡܵܨܵܚ̈ ܡܲܙܝܕܵܚ̈ ܡܸܢܕܝܼ ܐ̄ܚܹܪ̄ܢܐ ܠܡܸܢܕܝܼ ܕܩܵܕ̄ܡ ܐܵܡܸܪܹܗ ܕܘ̇ܣܬܘܝܼܦ̮ܣܟܝܼ ܥܲܠ ܟܝܵܢܐ ܕܒܲܪܢܵܫܐ، ܘܲܒܨܘܼܪܬܐ ܕܝܼܠܵܢܵܝܬܵܗ̇، ܠܓܹܢ̄ܒܐ ܕܝܼܠܹܗ ܐ̄ܟܘ̇ܡܐ ܒܸܫ ܪܵܒܐ، ܐܝܼܢܐ، ܐܝܼܡܵܢ ܕܸܕܥܪܝܼ ܒܫܹܢ̄ܬܐ 2002 ܩܐ ܐܲܦܓܼܵܐܢܸܣܬܵܢ، ܘܲܚܙܹܐܠܝܼ ܕܵܐܟܼܝܼܠܵܐ ܒܹܐ̄ܙܵܠܐ ܡܵܪ̈ܵܘܵܬܐ ܕܲܩܪ̈ܵܒܹܐ ܓܵܘ ܥܵܠܘ̇ܠܐ، ܥܒܼܝܼܪܵܗ̇ ܓܵܘܝܼ ܚܲܕ̄ ܪܥܵܫܬܐ ܠܝܼܕܵܥܬܐ ܕܐܸܢ ܡܵܪ̈ܵܘܵܬܐ ܕܲܩܪ̈ܒܹܐ ܒܚܲܕ̄ ܪܦܵܦܐ ܟܹܐ ܪܵܥܫܝܼ ܒܝܼ ܓܢܵܗܐ ܕܲܙܪܝܼܥܠܗ̄ܘ̇ܢ ܠܲܙܕܘ̇ܥܬܐ ܕܠܐ ܚܲܕ̄ ܥܸܠܬܼܐ، ܒܗܵـܝ ܥܕܵܢܐ ܬܘܼܚܡܸܢܝܼ ܒܝܼ ܟܲܬܵܒܼܐ ܐܘ̇ܪܸܣܢܵܝܐ ܕܘ̇ܣܬܘܝܼܦ̮ܣܟܝܼ ܘܫܘ̇ܥܝܼܬܹܗ (ܓܘܼܢܚܐ ܘܬܲܢܒܐ)،ܘܲܪܚܝܼܡܝܼ ܕܒܸܚܙܵܝܐ ܕܒܸܚܙܵܝܐ ܝ̄ܠܹܗ ܠܓܵܗܹܐ ܩܵܕ̄ܡܵܝܬܐ ܓܵܘ ܒܵܗܵܪ ܕܫܹܢ̄ܬܐ ܐܵܬܝܵܢܬܐ ܓܵܘ ܦ̮ܪܲܢܣܐ ܠܲܣܢܵܕܬܐ ܘܲܦܪܵܣܬܐ ܕܫܘ̇ܥܝܼܬܹܗ (ܐܝܼܣܵܪܐ ܕܲܡܣܵܝܒܪܵܢܘܼܬܼܐ) ܓܵܘ ܣܝܼܢܵܡܐ، ܒܫܵܘܬܵܦܬܐ ܥܲܡ ܟܵܬܘ̇ܒܼܐ ܕܣܝܼܢܵܪܝܘ̇ ܦܪܲܢܣܵܝܐ ܟܵܐܢ ܟܠܘ̇ܕ ܟܵܐܪܝܝܼܪ، ܒܵܩܘܼܪܹܐ ܝ̄ܠܹܗ ܒܹܐ̄ܡܵܪܐ، ܕܘ̇ܣܬܘܝܼܦ̮ܣܟܝܼ ܟܹܐ ܫܲܪܸܪ ܗ̄ܘܵܐ ܓܵܘ (ܐܵܚܘܼܢܘܵܬܐ ܟܵܐܪܵܡܵܙܘ̇ܦ̮) ܘܥܲܠ ܠܫܵܢܐ ܕܐܝܼܦ̮ܐܢ ܟܵܐܪܵܡܵܐܙܘ̇ܦ̮، (ܐܸܢ ܐܲܠܵܗܐ ܠܲܝܬ ܗ̄ܘܵܠܹܗ ܐܝܼܬܘܼܬܐ ܡܵܨܹܐ ܗ̄ܘܐ ܒܲܪܢܵܫܐ ܥܵܒܸܕ ܗ̄ܘܐ ܟܠ ܡܸܢܕܝܼ)، ܘܐܵܢܐ ܒܓܲܪܝܼ ܟܹܐ ܒܵܩܪܸܢ ܗ̄ܘܐ ܓܵܘ ܐܲܦܓܼܵܢܸܣܬܵܢ، ܟܲܕ ܟܠܲܝܗܝ̈ ܟܹܐ ܗܲܡܸܢܝܼ ܗ̄ܘܵܘ ܒܡܵܪܝܐ ܐܲܠܵܗܐ، ܕܵܐܟܼܝܼ ܝ̄ܠܲܝܗܝ̈ ܒܪܵܝܐ ܐܵܢܝܼ̈ ܟܠܲܝܗܝ̈ ܡܵܘܬܵܢ̈ܐ؟، ܘܒܵܒܐ ܕܥܲܬܝܼܩ ܪܚܝܼܡܝܼ ܕܟܹܐ ܦܵܠܸܚ ܗ̄ܘܐ ܒܪܸܡܙܐ ܕܫܲܠܝܼܛܐ ܓܵܘ ܛܲܟܼܣܐ ܡܲܠܟܵܝܐ ܐܲܦܓܼܵܢܵܝܐ، ܒܸܟܬܵܒܼܵܐ ܝ̄ܠܹܗ ܠܫܘ̇ܥܝܼܬܐ ܕܲܓܙܝܼܪܐ ܕܫܘ̇ܥܝܼܬܹܗ (ܓܘܼܢܚܐ ܘܬܲܢܒܐ) ܥܲܠ ܟܙܝܼܪܐ ܕܫܘ̇ܥܝܼܬܹܗ ܫܠܝܼܚܐ(ܪܲܣܘܼܠ)، ܘܩܐ ܐܲܬܪܹܗ ܐܲܦܓܼܵܐܢܸܣܬܵܢ، ܟܲܕ ܩܛܝܼܠܹܗ ܪܲܣܘܼܠ ܠܣܵܒܼܬܐ ܙܵܢܝܼܬܼܐ(ܓܲܘܵܕܬܵܗ̇) ܗܵـܝ ܣܵܒܼܬܐ ܕܲܙܥܝܼܦܠܵܗ̇ ܠܚܲܒܝܼܒܼܬܹܗ ܕܲܡܫܵܢܝܵܐ ܠܙܵܢܝܼܬܼܐ، ܘܒܸܓܪܵܫܐ ܝ̄ܠܵܗ̇ ܫܘ̇ܥܝܼܬܐ ܕܪܲܣܘܼܠ ܕܲܦܫܝܼܡܵܐ ܝ̄ܠܹܗ، ܘܒܸܪܥܵܫܐ ܒܬܲܢܒܐ ܒܥܸܠܬܼܐ ܕܲܩܛܝܼܠܹܗ ܠܗܵܝـ ܣܵܒܼܬܐ، ܥܲܡ ܐܲܝܟܸܢܵܝܘܼܬܐ ܕܩܵܐܹܡ ܓܵܘ ܐܲܦܓܼܵܢܸܣܬܵܢ، ܡܛܠ ܩܪܵܒܼܐ ܕܝܼܠܹܗ ܒܲܝܢܵܬܲܝܗܝ̈، ܘܲܬܠܵܚܬܐ ܕܪܹ̈ܫܘܵܬܐ، ܘܡܼܢ ܚܪܵܒܼܐ ܕܒܸܩܘܵܠܐ ܝ̄ܠܹܗ ܡܢܹܗ ܐܵܗܐ ܐܲܬܼܪܐ، ܘܐܝܼܡܵܢ ܕܫܵܩܸܠ ܦܘܼܣܩܵܢܐ ܪܲܣܘܼܠ ܕܣܵܦܹܐ ܓܵܐܢܹܗ ܩܐ ܒܸܝܬܼ ܕܝܵܢܬܐ ܕܟܹܐܢܘܼܬܼܐ ܕܩܝܼܡܠܹܗ ܒܐܵܗܐ ܓܘܼܢܚܐ ܕܩܸܛܠܐ، ܠܹܐ ܗ̄ܘܐ ܐܲܢܸܢܩܵܝܐ ܐܵܗܐ ܡܸܢܕܝܼ ܩܐ ܗܝܼܟ̮ ܦܲܪܨܘ̇ܦܐ، ܘܲܨܒܘܼܬܹܗ ܠܹܐ ܗ̄ܘܐ ܐܲܢܸܢܩܵܝܬܐ ܠܲܕܟܼܵܪܐ ܒܢܸܣܒܵܬ ܨܸܒܘܵܬܼܐ ܐ̄ܚܹܪ̈̄ܢܹܐ، ܒܓܹܢ̄ܒܐ ܕܝܼܗ̄ܘܵܗ̇ ܝܼܣܝܼܪܬܐ ܐܲܚܟ̮ܝܼ ܒܩܸܛܠܐ ܕܚܲܕ̄ ܐܲܬܬܼܐ (ܒܲܟܼܬܐ)، ܘܐܵܗܐ ܦܘܼܠܚܵܢܐ ܒܲܨܒܘܼܬܹܗ ܟܹܐ ܡܲܒܨܸܪ ܪܵܒܐ ܡܼܢ ܐܲܢܸܢܩܵܝܘܼܬܐ ܕܐܵܗܐ ܡܸܢܕܝܼ، ܡܐܲܝܟܼ ܕܒܸܚܙܵܝܐ ܝ̄ܠܹܗ ܣܵܝܘ̇ܡܐ ܕܡܲܙܝܘܼܕܹܐ ܝ̄ܠܹܗ ܘܒܹܐ̄ܡܵܪܐ؛ ܒܸܩܘܵܠܐ ܝ̄ܠܹܗ ܪܲܣܘܼܠ ܡܢ ܢܸܣܝܵܢܐ ܒܫܲܦܝܼܪ ܕܘܼܒܵܪ̈ܐ ܦܝܼܠܵܣܘ̇ܦܵܝ̈ܐ ܥܲܠ ܐܘܼܪܚܐ ܕܘ̇ܣܬܘܝܼܦ̮ܣܟܝܼ، ܐܝܼܢܐ ܟܢܘܼܫܝܐ ܐܲܦ̮ܓܼܵܐܢܵܝܐ ܡܫܲܚܠܦܵܐ ܝ̄ܠܹܗ ܠܐܵܗܐ ܡܸܢܕܝܼ، ܟܲܕ ܒܸܚܙܸܝܐ ܝ̄ܠܹܗ ܕܠܐ ܗܲܝܡܵܢܘܼܬܐ ܒܡܵܪܝܐ ܐܲܠܵܗܐ ܐܝܼܠܹܗ ܓܘܼܢܚܐ ܒܸܫ ܪܵܒܐ ܡܢ ܩܛܵܠܬܐ ܕܚܲܕ̄ ܓܲܒܼܪܐ، ܘܲܦܝܵܫܐ ܝܠܵܗ̇ ܥܲܡܝܼܩܬܵܗ̇ ܨܒܘ̇ܬܐ ܒܸܫ ܪܵܒܐ ܟܲܕ ܩܛܝܼܠܬܵܐ ܐܝܼܠܵܗ̇ ܐܲܬܬܼܵܐ(ܒܲܟܼܬܐ)ܙܵܢܝܼܬܼܐ، ܥܒܼܝܼܪܬܵܗ̇ ܒܫܸܢ̈ܐ،، ܒܸܕܥܵܪܐ ܝ̄ܠܹܗ ܥܲܬܝܼܩ ܪܚܝܼܡܝܼ ܓܵܘ ܫܘ̇ܥܝܼܬܹܗ (ܠܝܼܛܐ ܕܘ̇ܣܬܘܝܼܦ̮ܸܣܟܝܼ) ܕܦܵܪܸܣ ܠܠܫܵܢ̈ܐ ܙܸܡܪܵܝܐ ܒܲܝܢܵܬܼ ܣܸܪ̈ܛܹܐ، ܘܚܲܒܪ̈ܢܹܐ ܚܫܝܼܚ̈ܐ ܕܝܼܠܲܝܗܝ̈ ܓܵܘ ܡܠܘܼܐܵܐ ܕܝܘܼܩܪܸܢܐ ܝ̄ܠܹܗ ܒܐܵܢܝܼ̈ ܐܲܝܟܸܢܘܵܬܼܐ ܒܐܲܬܝܼܪ̈ܐ ܡܐܘܼܠܨܸܢ̈ܐ ܕܒܸܩܛܵܥܐ ܝܢܵܐ ܒܝܼܝܵܗܝ̈ ܚܘܼܠܡܵܢ̈ܐ ܘܫܵܗܘܵܬܝܵܬܼܐ، ܐܵܘ ܡܘܼܢܘܼܠܘ̇ܓܵܐܬ (المونولوجات) ܕܝܼܠܲܝܗܝ̈ ܓܵܘܵܝ̈ܐ ܥܲܡ ܩܵܐܹܡ ܒܸܫ ܩܸܫܝܵܐ، ܘܒܸܚܙܵܝܐ ܝ̄ܠܹܗ ܟܲܬܵܒܼܐ ܥܲܬܝܼܩ ܪܚܝܼܡܝܼ ܕܒܸܚܵܝܐ ܝ̄ܠܹܗ ܒܐܲܣܝܼܪܘܼܬܹܗ ܓܵܘ ܦ̮ܪܲܢܣܐ، ܕܗ̇ܘ ܒܐܵܗܐ ܫܘ̇ܥܝܼܬܼܐ ܕܝܼܠܵܗ̇ ܚܫܝܼܒܼܬܐ ܫܠܵܡܐ ܩܐ ܣܸܦܪܵܝܘܼܬܐ ܓܲܢ̄ܒܵܪܬܵܗ̇، ܣܸܦܪܵܝܘܼܬܐ ܕܟܵܐܦ̮ܟܐ، ܘܟܵܐܡܘ̇، ܘܣܝܼܪܦ̮ܐܢܬܸܣ، ܕܦܝܼܫܠܹܗ ܕܘܝܼܪܐ ܬܲܪܥܐ ܕܩܲܕ̄ܡ ܥܲܒܼܕܢܹܗ ܕܝܼܠܵܢܵܝܐ ܠܲܟܬܵܒܼܬܐ ܠܦܘ̇ܬܼ ܐܲܦ̮ܓܼܵܐܢܸܣܬܵܢ، ܐܵܦܸܢ ܕܒܝܼܕܵܥܐ ܝ̄ܘܸܢ ܘܝܼܬܠܝܼ ܡܕܲܪܟܵܢܘܼܬܼܐ ܚܲܝܠܵܢܬܵܗ̇ ܠܐ ܝܠܵܗ̇ ܡܸܬܼܡܵܨܝܵܢܬܐ ܕܣܸܦܪܵܝܘܼܬܼܐ ܡܲܨܝܵܗ̇ ܡܫܲܚܸܠܦܐ ܠܬܹܒܹܝܠ ܐܝܼܢܐ ܡܲܨܝܵܗ̇ ܕܫܲܚܠܸܦܐ ܩܐ ܐ̄ܢܵܫ̈ܐ ، ܘܓܵܘ ܕܵܐܗܐ ܟܬܵܒܼܐ ܡܨܹܐܠܹܗ ܕܘ̇ܣܬܘܝܼܦ̮ܸܣܟܝܼ ܕܥܵܒܸܕ ܡܲܥܒܕܵܢܘܼܬܼܐ ܥܲܠ ܚܲܕ̄ ܥܠܲܝܡܐ ܐܲܦ̮ܓܼܵܐܢܵܝܐ ܘܦܵܠܸܚ ܩܐ ܫܲܚܠܵܦܬܹܗ ܒܥܸܕܵܢܐ ܕܩܵܐܹܡ، ܘܐ̄ܡܪܹܗ ܒܵܥܹܝܢ ܕܣܵܦܩܸܢܵܐ ܓܵܐܢܝܼ ܩܐ ܟܬܵܒܼܬܐ ܓܵܘ ܡܠܘ̇ܐ̈ܐ ܐ̄ܚܹܪ̈̄ܢܹܐ ܡܛܠ ܐܝܼܬܼ ܪܵܒܐ ܡܢܲܝܗܝ̈ ،،،
ܥܲܒܼܕܝܼܫܘ̇ܥ ܣܵܗ̄ܕܐ
