حجنجلي
حجنجلي و بجنجلي
ضاع وتفرهد بلدي
وقائدنا بالمحاصصة ملتهي
هاي حصّتك وذيج حصّتي
والشعب مهتري هري
وبيهم متورط ومبتلي
هذا مصير خيراتك بلدي
كعكة الك وكعكة الي
كيكة الك وكيكة الي
حجنجلي وبجنجلي
بين هاي وذيج وذاك
انباكت نفطاتك بلدي
حنونة ومالكي وجلبي
عمار ومطلك ونجفي
علاوي ومسعود و جعفري
ما خلو شي الك والي
لا احد بيهم يخاف ولا يستحي
خمطوا بأسم الدين الحنفي
واسم كل سيد و كل ولي
حجنجلي وبجنجلي
كردي شيعي وحنبلي
قسمونا الى طوائف ومللِ
هم اللي ضيّعوا وتيهوا
مستقبلك ومستقبلي
ومستقبل الشعب وكل هلي
حجنجلي وبجنجلي
وطفر الشعب وتطّشر
وطشاره ما اله ولي
سياسينا ونائبنا بالبوك
منشغل وملتهي
وجاع الشعب وكل هلي
وبالفقر كله مكتوي
حجنجلي وبجنجلي
ايمته الوضع يصفى وينجلي
