بهجة الدنيا
يا أبوي يا أمي يا بعد كل هالناس
يا قلب ينبض بالمحبة والإحساس
يامن غلاكم في حياتي حياتي
يسري في صدري مثل ترديد الأنفاس
لو قلت يا أبوي عمري هديه
وأقدمه لجلك براحة يديه
ما ظن بوفي ربع فضلك علي
لأنك عطيت الحب من غير مقياس
أمي حنانج في عروقي ودمي
وإن شفتج أنسى كل ضيقي وهمي
وإن قلت انا أمي وأمي وأمي
تتبسم أيمامي ولا أحس بالياس
علمتني يا أبوي معنى السعاده
وأهديتني من طيب قلبك قلاده
فيك الوفا يلقى وطنه وبلاده
وإنت الوطن لي عشت له رافع الراس
يا أمي يا وجه النور والضي والخير
بيدج سنيني يا سنيني غدت غير
مهما كبرت أبقى وسط عينج صغير
وأبقى بقلبج غير عن كل هالناس
لا حرمني الله من غلاكم ومنكم
والله يبعد ضيق الأيام عنكم
بدعي عسى الرحمن دوم يحفظكم
يا بهجة الدنيا ويا كل الإحساس
