نظمت هذه القصيدة تضامنا مع تظاهرات شعبنا
للمطالبة بتحسين الخدمات والتي استشهد فيها المغدور ابن البصرة (سعد يعقوب المنصوري)
صوت تظاهرات العراق
ميسون نعيم الرومي
*(فوگ صوتك يا شعب ما يعله صوت)
الموت يا شعبي ابسبيلك احلـَه موت
استشهد امن اجلك (سعد)*
كافي تـتحمل بعـَـد
انـت حـر او للأبـد
اجدادنه (سومر واكد)-
اعراقنه حر اوأبي كافي السكوت
فوگ صوتك يا شعب ما يعله صوت
***
(البصره) ثارت هبوا شدوهـَه الحـِزم
انتوا أول من كتب حرف ابقلم
انتوا اصحاب الحضاره
ثـورة (البصره) شراره
(كربله او كوت) الإشاره
اخذوا ثارات العذارى
(بغداد) ترفض كل حرامي اوصِبـَـح حـوت
فـوگ صوتـك يا شـعـَب ما يعلـَه صوت
***
ايد بيد اونكسـراغلال الحديـد
الشعب لوثار كلـَّه .. يشبگ الدم الوريد
ظلم كافي جـور كافي
عاش عدنه الفگـر لافي
(أغـْـنـى) شعب اوصرت حافي
تصرخ اهلك بالمنافي
فورة الثورة استغلها اولا تخليها تفوت
فوگ صوتك يا شعب ما يعله صوت
اعراقنه حر او أبي كافي السكوت
-----------------------------------------
*(فوگ صوتك يا شعب ما يعله صوت) :- مقتبسه
من هوسات تظاهرات مدينة الكوت يوم 10/تموز/2018
*(سعد):- شهيد تظاهرة مدينة البصرة
نظمت هذه القصيدة تضامنا مع تظاهرات شعبنة
للمطالبة بتحسين الخدمات والتي استشهد فيها المغدور ابن البصرة (سعد يعقوب المنصوري)
--------------------------------------------------------------
11/تموز/2018
ســــــــــــــتوكهولم
