المنتدى الثقافي > زاوية الشعر الشعبي

سلام انته

(1/1)

ابراهيم الخزعلي:
   

سلام انته
( الى الشهيد الخالد سلام عادل،
وكل الشهداء الأحرار الذين حملوا
ارواحهم على اكفهم من اجل كرامة
الأنسان والأنسانية والغد المشرق..)

لو نحچي  طول العمر
ونسولف بقصته
يصعب علينا الوصف
عمّا جره وشفته
 وشما كتبنه الشعر
بس انته  ترجمته
وشگد مصايب شفت
ما وصلت لقمته
او لو تقره  كل القصص
بكل عمرك العشته
ما تلگه مثله بطل
او ما تشوف ملحمته
وبکل لغات البشر
الحیّه والمَيْته
ما نلگه بيهن حرف
من سر الذي بقصته
او كل نذل من گابلك
شما حاول  بكل خسته
چلمه وحده ما حصّل
بصبرك انته حيرته
والأقزام ولّت من صحت بيه
الشفته والماشافك
والشافك او ماشفته
والجلاد يرجف
من رفع سوطه
بنظرتك انته ارعبته
 وعيونك الگالتله
منو انته
سلام انته
او اسد انته
او جبل انته
او شمس انته
او نجم انته
او گمر انته
او ضوه انته
او شموخ انته
او كرامه انته
او رجوله انته
او بطوله انته
 اباء او كبرياء انته
او شجاعه انته
او شهامه انته
او عطاء انته
 فكر انته
او نضال انته
او وفاء انته 
 غيره  او مرجله انته
محبه انته
او مجد انته
او خلود انته
الشعب انته
الحزب انته
لأن انته
سلام انته
والظنوا شمعه البروحك
بجروحك يطفوها
ما عرفوا شمس انته
هم شايف شمس تطفه
وضواها بروحك اشعلته
شفنه ، او سجل التاريخ
 اللي تلطّخت ايده
مات بعاره وبعلته
دمّك غالي ما يرخص
لعيون الشمس بس انته رخصته
او ذاك الموت من شافك
وگع  يم رجليك
او بيدك انته گوّمْته
انخطف وجه المنيه
من شافتك مهيوب
او خاف الموت منك
وانته ما خفته
او من انطيت روحك
للوطن والناس
لافد يوم واحد منهم الخانك
ولا واحد منهم الخنته
يالزارع ابوجه الناس
بسمه ونور
او نبض گلبك محبّه او خير
انته بدربك انثرته
وبيوم اللي شبگت الموت
دموع من الشمس طاحت
او عليك انتحبت ابسكته
السمه والگاع باسنّك
او مثل المستحي انته
گاللك  سلام الخير
 سلام اعليك
من كل معدم او كل كادح
او من كلمن مشه بدربك
الشفته والماشفته
 او من كلمن مشه بدربك
الشفته والماشفته

الدكتور ابراهيم الخزعلي
28/01/2019



تصفح

[0] فهرس الرسائل

الذهاب الى النسخة الكاملة