ܒܥܘܬܐ ܕܐܘܡܬܐ
ܦܘܠܘܣ ܕܢܚܐ ـ ܣܘܝܕ
ܡܫܵܢܝܼ ܦܵܣܘܿܥܬܵܐ ܐܵܚܘܿܢܵܐ ܕܪܘܼܚܵܐ
ܝܵܐ ܒܪܘܿܢܵܐ ܕܐܘܼܡܬܵܐ ܘܫܲܪܝܼܪܵܐ ܕܝܸܡܵܐ
ܡܫܵܢܝܼ ܦܵܣܘܿܥܬܵܐ ܕܐܵܫܘܿܪ ܡܕܲܒܪܵܢܵܐ
ܕܫܲܡܝܼܪ݇ܡ݇ ܓܲܢ݇ܒܵܪܬܵܐ ܘܣܲܢܚܹܪܝ݇ܒ݇ ܩܪܵܒܼܬܵܢܵܐ
ܘܦܵܪܸܩܠܹܗ ܡܩܵܦܲܣ ܢܸܫܪܵܐ ܕܚܘܼܝܵـܕܵܐ
ܢܸܫܪܵܐ ܕܸܫܠܵܡܵܐ
ܫܒܼܘܿܩܠܹܗ ܩܵܐ ܕܦܵܪܸܚ ܥܲܠ ܛܘܼܪܹ̈ܐ ܕܢܝܼܢܘܹܐ
ܫܒܼܘܿܩܠܹܗ ܩܐ ܕܦܪܸܚ ܒܸܪܩܝܼܥܵܐ ܕܒܵܒܹܝܠ
ܕܫܵܥܸܫ ܓܘܼܠܦܵܢܹܗ ܕܩܕܵܚܵܐ ܝ݇ܢܵܐ ܢܘܼܪܵܐ
ܘܓܲܪܓܸܡ ܓܵܘ ܐܵܐܲܪ ܕܐܵܬܘܿܪ ܓܲܢ݇ܒܵܪܬܵܐ
ܕܒܹܝܬܢܲܗܪܹ̈ܝܢ ܚܲܡܬܵܐ.
ܫܒܼܘܿܩܠܹܗ ܩܵܐ ܕܦܵܪܸܚ ܓܵܘ ܪܩܝܼܥܵܐ ܕܚܘܼܒܝܼ
ܘܚܲܠܸܠ ܡ̣ܢ ܐܲܪܥܝܼ ܘܡ̣ܢ ܐܘܼܪܚܵܐ ܕܐܘܼܡܬܵܐ
ܥܸܠܥܵܠܹ̈ܐ ܛܪ̈ܘܿܢܹܐ ܘܚܲܝܦܘܼܬܵܐ ܟܘܿܡܬܵܐ
ܒܲܗܪܸܢ ܥܲܠ ܐܘܼܪܚܵܐ ܕܝܸܡܵܐ ܚܸܫܵܢܬܵܐ
ܝܬܝܼܒܼܬܵܐ ܠܡܲܕܒܚܵܐ ܚܘܼܪܕܝܼܬܵܐ ܒܕܸܡܵܐ
ܐܵܢܝ݇ ܥܲܝܢܘܿܗ̇ ܩܠܝܼܩܹ̈ܐ ܠܪ̈ܘܼܡܝܵܬܹܐ ܕܓܲܪ̈ܡܹܐ
ܕܒܢܘܿܢܘܿܗ̇ ܫܲܪܝܼܪܹ̈ܐ ܚܕܝܼـܪܹ̈ܐ ܝ݇ܢܵܐ ܠܫܸܡܵܗ̇.
ܫܒܼܘܿܩܠܹܗ ܩܵܐ ܕܦܵܪܸܚ ܢܸܫܪܵܐ ܕܚܹܐܪܘܼܬܵܐ
ܘܡܲܫܦܸܠ ܠܫܘܿܥܒܵܕܲܢ
ܘܢܫܲܪܬܵܐ ܣܲܡܵܢܬܵܐ ܕܲܪܩܘܿܒܼܠ ܐܝܼܬܘܼܬܲܢ
ܡܵܪܸܡܠܹܗ ܡܪܹܫܲܢ ܟܠ ܦܲܘܛܵܐ ܛܪܘܿܢܵܐ
ܕܦܪܵܡܵܐ ܝ݇ܠܹܗ ܪܘܼܚܲܢ
ܛܠܵܩܵܐ ܠܐܝܼܬܘܼܬܲܢ
ܫܩܵܠܵܐ ܠܚܹܐܪܘܼܬܲܢ
ܘܐܵܬܵܐ ܕܦܘܼܠܵܓܼܵܐ ܙܪܵܥܵܐ ܓܵܘ ܒܲܝܬܲܢ .
ܫܒܼܘܿܩܠܹܗ̇ ܩܵܐ ܕܦܵܪܸܚ ܛܲܝܪܵܐ ܕܸܫܠܵܡܵܐ
ܘܡܲܫܠܹܐ ܠܓܲܪ̈ܓܘܿܡܹܐ ܘܐܵܢܝ݇ ܗܲܪ̈ܒܹܐ ܛܪ̈ܘܿܢܹܐ
ܓܵܘ ܪܩܝܼܥܵܐ ܕܐܘܼܡܬܲܢ
ܕܦܵܪܸܩܠܹܐ ܚܲܫܲܢ
ܡܲܕܥܸܪ ܪܵܡܘܼܬܲܢ
ܡܲܕܥܸܪ ܚܹܐܪܘܼܬܲܢ
ܕܡܵܛܲܚ ܠܪܵܘܚܵܢܵܐ
ܕܡܵܛܲܚ ܠܫܘܼܗܪܲܢ ܕܕܲܥܒܼܲܪ ܠܲܘܓ̰ܵܢܵܐ
ܕܐܵܬܘܿܪ ܓܲܢ݇ܒܵܪܬܵܐ
