ankawa
المنتدى الثقافي => زاوية الشعر الشعبي => الموضوع حرر بواسطة: Furat yosip في 11:34 31/05/2017
-
انفجار بشارعنا
ندعي من الله كل يوم
مثل هل اليوم مايجينا
بلكن ينسانا مرة الحزن
يعبرنة وما يمر بينا
....
كل يوم تفجير وشباب تموت
والدفانة تصيح والله ملينا
گمنا من نسمع بچي نذكر اسمك
مدري نسينا الضحك مدري الضحك ناسينا
.....
حكومتنا غدت بس قاطات
او من سوف الى سوف سابينا
باقين بچذبهم ... لك حتى الچذب ضاج
بس عمت عين الوكت الجابكم علينا
....
ارهاب وقتل هيچ صفت بغداد
هجت الناس ودم انترست سواجينا
ادري هو من الموت هم يشبعون
من دنعل ابو الاٍرهاب و خرب دينا
....
هاجرت من سمانا حتى النجوم
او ضلت عتمة بلا ضوة ليالينا
حتى الشمس غطاها دخان
تاليها ضاجت وبطلت تضوينا
.....
يروح الحزن علينا ويرد بساع
هذا هم حظنا چا احنه شبدينا
خلصنا العمر كله بالاحلام
او تيتي تيتي مثل ما رحنه جينا
....
عابتلك يالفرح اشوفك مامريت
عود انت هم موجود !! والله مادرينا
راح الحگ وصار الوفه مسجون
او ضاع الوطن بين شرطتنا او حرامينا
....
گضيناها حرب او بيها احنا ملعونين
انترس بيها حاضرنا وانخنگ ماضينا
يمكن يجي باچر وايصير خير
لاباچرنا سمع ولا چن احنا حچينا
....
مغضوب عليك يا شعب من سالف الازمان
مگطوعة النخل ومحروگة بساتينا
حسباتك يا وطن صارن هواي
حسبة تجيبنا وحسبة تودينا
فرات يوسپ