العنوان: قصة الجندي الامريكي الي تحول من جون الى ستار .
أرسل بواسطة: korkes في 21:47 25/08/2007
قصة الجندي الامريكي الي تحول من جون الى ستار .
اليوم جبتلكم قصه مال واحد جندي امريكي موجود بالعراق حاليا . وهذا الجندي الامريكي قصته قصه غريبه عجيبه . المهم . يكلك فد يوم من ايام المواجهات مال الجيش الامريكي ويا جيش المهدي بمدينة الصدر البطله جان اكو جندي امريكي اسمه جون اندرسون وهذا الجندي جان سايق همر مدرعه . باخر ايام الهجوم الامريكي على المدينة البطله اتصوبت الهمر مال اخونا جون وهوا انصاب اصابه كلش قويه بقذيفة هاون من واحد قناص قنص عليه ورماه بهاون دمرله الهمر مالته . فجان اكو حرمه جبيره بالعمر عايشه بوحدها بنفس الشارع الي انصاب بيه مستر جون اسمها جدريه . فهاي الحرمه العجوزه او الحجيه جدريه من شافت الهمر مال مستر جون دتحترك راحت ركض عليها حتى تشوف منو اكو بيها . فهيه اول موصلت للهمر المحروكه شافت شاب زغير بالعمر يعني ببداية العشرينات من عمره . هيه حن كلبها عليه وكبل اتذكرت ابنها الي مات بحرب ايران فقررت ان تاخذ هذا الجندي الامريكي يمها للبيت علمود تداويه و اخذته يمها للبيت بقى شهرين بلا وعي. فورا ما فاق من الغيبوبه مالته لكى نفسى بمكان غريب لا مي نضيف ولا كهرباء ولا متطلبات الحياة البسيطه . وشاف الحجيه جدريه تحجي لغى ميفتهم عليها شي . ولكن سرعان ما تكيف مع العيشه ويا الحجيه جدريه واعجب بالحياة البسيطه وسرعان ما اتعلق بالحجيه جدريه وتعلقت هيه بيه وصار يصيحها ( هبوبه ) وهوا يقصد بيها حبوبه بس هوا لساته ما متعود عاللهجه العراقيه الطوخ . وهوا طوال هاي الفتره الي بقى بيها يم حجيه جدريه جان يحس نفسى مثل ابنها وحس بنفسى ابن الها خاصتا بعد ما جان هوا وحيد يعيش بامريكا لان ابوه وامه واحد عايف الثاني . المهم فد يوم جان اكو بالمنطقه حجيه دلاله اسمها فتنه الدلاله وهاي الحجيه ما مخليه شي بالمنطقه ما تعرفه وحتى جان اكو دعايات تكول انه هيه الي بلغت عن مكان صدام من لزموه الامريكان . فد يوم جتي الحجيه فتنه يم الحجيه جدريه للبيت ومنعرف شلون لمحت مستر جون يمها بالبيت وهيه سرعان ما كامت تخوف الحجيه جدريه وتكللها :- هااااااااي شنو يمه عزه العزاج يجدريه لج يولي شنهي هاذ الامريكي ببيتج ولج ؟ تجاوبها جدريه :- جا خيه والله هذا مثل ابني اني شفتى مصوب واني داريته وداويته وهوا مثل ابني وصار ابني اصلا . فتنه تكول :- ولج هم لو بعدج زغيره جان كلنا ميخالف بس حقج يمه وليد حليو وينكرط كرط تجاوب جدريه :- لا يمه شنو حليو شنو عزا العزاج لج اكلج ابني هذا تكللها فتنه لجدريه :- لج عزاااااااااااااااا تعرفين لو عرفوا بيج جيش المهدي رح ينسفون المنطقه فوك روسنا . هنا الحجيه جدريه بدت تخاف كلش . يمه فتنه فدوه روحلج عيني شوفيلي حل للمشكله ما اريد يروح مني ستار ( جون سابقا ) وما اريد يكتلوني جيش المهدي يمه شوفيلي دباره . تكللها فتنه :- لج خيه اذا عرفوا بيج الامريكان يخلون طشارنا ماله والي . بس ولا ايهمج اني اشوفلج حل . وهنا ستار جان ديتنصت على الحجيه فتنه ويحاول يفهم عالحجي مالتها وهوا مستغرب من تصرفاتها ونضراتها عليه . وحاول مرتين يسال امه هبوبه على هاي الحجيه الي زارتهم بالبيت بس دايما جانت تكله جدريه ( ليتر وليدي ليتر - اي ول تيل يو بعدين ) المهم الحجيه فتنه لكت حل . جابت صخامن مال قوري مال الجاي وخبطته وخلته على وجه ستار ( جون ) وجابت كاميرا اسود وابيض وسحبتله صوره وراحت لسوك مريدي سوتله هويه مزوره وجتي . ووراها تحول مستر جون اندرسون الى ستار كاصد ومسقط راسه تحول من سان فرانسيسكو الى العماره . وصار كل يوم يلبس دشداشته ويخلي على راسه الشماغ ويطلع ويا الحجيه جدريه للسوك . ركب بالفورتات وبالتكسيات وبالباصات والامانات والتاتات والكيات وراح لسوك المخضر والف الحياة بقطاع 11 بمدينة الصدر . وكبل شهر كام يروح لساحة الاربعه والاربعين علمود يلكط رزقه هناك ويرجع للبيت وبيده جم دينار يونس بيهن امه هبوبه . ستار صار واحد منا صار ياكل اكلنا ويشتم هوانا ويحجي مثلنا ويسولف مثلنا وصار يحشش على الكلمات مثلا كبل يومين وهوا جان كاعد ويا جماعته بالكهوه اجا واحد وسلم على الشله وكال (شلون الشباب) وهنا كبل كام ستار وصاح بصوت عالي ( ابو جاسم بالله واحد تكه وثنين شباب رحمة للوالد ) والشباب طبعا خربوا من الضحك . المهم وراها سجل اسمه بجيش المهدي وكام يصلي يوم الجمعه بجامع المحسن وكام يطلع مضاهرات ضد الامريكان ويهتف بصوت عالي ( لاوه امريكا يالصدر ابنك ) و ( امي للموت توديني ... تملي الشاجور وتنطيني ... وتكول .... لو جابوك مجفن ليا لاركص على كبرك جوبيه ) وامه هبوبه واكفه من بعيد وتصيح عليه ( يمه ستوري بي كيرفل دونت بليف ذيم ذي ار قفاصه يمه) وهوا يكللها ( اي نو مام اي نو ) ويستمر بالهتاف ( يلاكونا لو بيهم زود ) .
هذه باختصار قصة الجندي الامريكي الي تحول من جون الى ستار
العنوان: رد: قصة الجندي الامريكي الي تحول من جون الى ستار .
أرسل بواسطة: hewy في 22:50 25/08/2007
هههههههههه يسلمووو على الموضوع الطريف ومنور منتدانا يا كوركيز
العنوان: رد: قصة الجندي الامريكي الي تحول من جون الى ستار .
أرسل بواسطة: shakar في 08:40 26/08/2007
ههههههههه حلوة يسلمووو
ومنور المنتدى ياوردة
العنوان: رد: قصة الجندي الامريكي الي تحول من جون الى ستار .
أرسل بواسطة: canary في 09:52 26/08/2007
ههههههههههه طريفة جداً القصة.....اهلا بك بالمنتدى
تحيــاتـــي وتقبل مروري كنــاري
العنوان: رد: قصة الجندي الامريكي الي تحول من جون الى ستار .
أرسل بواسطة: fadi_lion17 في 12:49 26/08/2007
ههههه اول بل بداية ارحب باخ كوركيس وثاني شي نشوف ونتعجب ههه اخر تطورات هههههههههههه
العنوان: رد: قصة الجندي الامريكي الي تحول من جون الى ستار .
أرسل بواسطة: korkes في 13:02 26/08/2007