ankawa

منتدى الهجرة واللجوء => الهجرة و واللاجئين => الموضوع حرر بواسطة: حشاش في 18:59 23/04/2009

العنوان: شحن الكتب المهمه
أرسل بواسطة: حشاش في 18:59 23/04/2009
اولا ارجو ان تقبلوني عضو جديد معكم وانااسف لانضمامي لكم متاخرا وبعد حصولي على موعد استلام الفيزا على برنامج المترجمين ولكني اكتشفت منتداكم الرائع مؤخرا من احد الاصدقاء

عندي مشكلة لم اجد لها حلول عملية عندكم
او احتمال الموضوع مطروح سابقا فارجو اعطائي روابط تناقش سؤالي

الموضوع باختصار اني عندي مجموعة كتب دراسية او عامة وزنها بحدود ال 100 كيلو وارغب باخذها كلها معي ومعضمها باللغه الانكليزية ومعضمها موجود في امريكا ووجدتها في مواقع مثل امازون وغيرها ومجموع اسعارها حتى لو كانت مستعملة ونضيفه بحدود كم 100 دولار

المشكلة انه اني رايح من بغداد ومن بغداد يسمحون بحقيبه واحده 20 كيلو وحقيبة يد 5 كيلو للشخص الغير متزوج

ففكرت ان ابعثها قبلي او بعدي عن طريق الاهل والاصدقاء فسؤالي الاول هو ايهما افضل ان ابعثها لاحد اصدقائي في امريكا ام اتركها واوصي عليها احد الاصدقاء في بغداد ان يرسلها لي

والمسالة الثانية هي احد عنده اي اقتراحات عن طريقة شحنها باقل التكاليف ولا يهم الفترة لوصولها وكم هي الكلفة التقريبية للشحن واي نصائح اخرى

ارجو ان تكون اول مشاركة لي معكم مفيدة لي ولجميع الاخوان والاخوات الذين على وشك السفر
واشكركم مقدما

العنوان: رد: شحن الكتب المهمه
أرسل بواسطة: نـور في 19:09 23/04/2009
اهلا وسهلا بيك اخونا حشاش في بيتك الثاني ... وانشاء الله اتفيد وتستفيد....

بالنسبة لسؤالك اعتقد هو اصلا ممطروح بالمنتدى .... وانشاء الله الاخوان يساعدوك لا اتشيل هم


تحياتي...
العنوان: رد: شحن الكتب المهمه
أرسل بواسطة: عكعك التطوى في 19:10 23/04/2009
اخي الكريم اهلا وسهلا بيك

اخي طبعا تعرف الغرامه على كل كيلو 150$  في 100 =  15000$
او تتخلى عنها بالمطار

تكدر تشحنها عن طريق DHL   ارامكس  فدكس  وغيرها اذا موجده يمك وتستفسر

او عن طريق مراجعه مكتب البريد  وتستفسر عن المده والسعر

وطبعا الشغله تسويه بيدك افضل من ما تعتمد على احد غيرك

تحياتي
العنوان: رد: شحن الكتب المهمه
أرسل بواسطة: MAGGIC في 19:13 23/04/2009
اهلا وسهلا بيك بالمنتدى

عزيزي الجواب بسيط

اذا كان لديك اقارب في امريكا ارسل الكتب الهم بالشحن قبل لاتسافر
واذا مكان لديك اقارب بس تعرف انت وين راح تسكن (عنوانك الجديد ) ارسل الكتب بالشحن لعنوانك الجديد وانت من توصل استلمها وارسلها باسمك


تحياتي
العنوان: رد: شحن الكتب المهمه
أرسل بواسطة: angie-dawood في 19:22 23/04/2009
اخي العزيز اذا تريد اشحنها عن طريق مكتب عربي مثل هذا الشخص الي يحول فلوس هو هم يشحن اغراض مثل كتب وملابس وكل شي وهو عنده مكتب ببغداد وسوريا وامريكا ---------- يعني تكدر تشحنها من بغداد الى امريكا توصل بخلال اسبوعين وياخذ كل كيلوين وربع 7 دولارات احنا هنا نحسبها كل ------- باون ------- بكيلوين وربع مثل حسب بغداد لانه هنا يمشون على الباونات اذا تريد اكو رقمه بموضوعي اسال وانا اجاوب واسمه سمير بركه --------- واسم شركته --------- شركة البركه -------------
العنوان: رد: شحن الكتب المهمه
أرسل بواسطة: beepeep في 19:33 23/04/2009
أول شي أشحنه الى الأردن او سوريا و بعدين من هناك أذا عندك أحد يشحنلك اياها الى امريكا

في الأردن أكو مكتب نقليات الشرقية  حوالي 2 الى 3 دينار أردني على الكيلوو
و ممكن  تخابرهم  0096264621775 حتى تعرف أكثر و يجوز يتعاملون ويه مكتب في بغداد


و الله ربك
العنوان: رد: شحن الكتب المهمه
أرسل بواسطة: الكاوبوي العراقي في 19:48 23/04/2009
عجيب امور غريب قضية
الله يرحمك غفوري افندي
العنوان: رد: شحن الكتب المهمه
أرسل بواسطة: حشاش في 19:50 23/04/2009
اشكركم جدا اخوتي على الترحيب وانشاء الله اكون عند حسن ضنكم

اخي الغيور اشكرك على الترحيب وعلى كون سؤالي ما مطروح سابقا

اخي عكعك اني اعرف انه الغرامات بالمطار هي مبالغ طائلة وابد ما مفكر بيهه وبعدين شيشيلها وياية واشكرك على الارقام
سؤال...هذا DHL   ارامكس  فدكس  وين صاير ببغداد وشكد ياخذون عالكيلو او الباون وشكد يطول الشحن وهل امان انه اكللهم اني اريد اشحن فد شي لامريكا وانتو تعرفون الضروف ببغداد
وسؤال اخر اي مكتب بريد ببغداد عنده هيج خدمات حاليا حتى اروح اسال واتاكد من الاسعار والفترة

اخي MAGGIC اشكرك كثيرا على المقترح
اني عندي كلش هواي اصدقاء بامريكا ثقات امريكان ومهاجرين عراقيين وهم اكدر ادزهه الى اللي بنفس ولايتي اللي راح تكون ماساشوستس
بس اريد اعرف وين اروح اشحنهه وشنو الطريقة وشكد التكاليف

اشكرج جدا اختي روز بس ممكن تدليني وين صايرة شركة البركة ببغداد او بغير محافضات او رقم تلفونهم ببغداد وما عندج علم اذا عدهم فد طريقه ارخص شوية وميخالف تطول شهور على ما توصل بس اهم شي توصل
العنوان: رد: شحن الكتب المهمه
أرسل بواسطة: angie-dawood في 20:08 23/04/2009
اخي العزيز بالنسبة للكتب اني هسى اتصلت بهذا الشخص وكال احنا بس نحول فلوس من بغداد وكال اذا  يريد خلي يدزها الى سوريا ومناك يوصلها الى امريكا وكال خلي يسويها على شكل وجبات مو شرط كلها يشحنها مرة وحدة وهذا هو رقمه اذا تحب تساله  اسمه سمير بركه بدالة 1248  هاتف 8753837  شوف بلكن يفيدك ------------------ تحياتي

العنوان: رد: شحن الكتب المهمه
أرسل بواسطة: ★AbN✰BaGhDaD★ في 20:12 23/04/2009
اهلا وسهلا بيك اخي العزيز حشاش ..وبالنسبة لسؤالك بصراحة الاخوان ماقصروا بالجواب ...

تحياتي الك
ابن بغداد
العنوان: رد: شحن الكتب المهمه
أرسل بواسطة: حشاش في 20:39 23/04/2009
اشكرك اخي
 BEEPBEEP
 ويمكن هاية الطريقة شوية ارخص بس هم غالية

اشكرك اخي الكاوبوي العراقي على الرد بس ممكن توضح اكثر

اختي تعبتج وياية بس هذا الرقم ببغداد ؟؟
واني اسلمهه ببغداد لو هم لازم ادزهه الى سوريا؟
حتى اخابرة واجيبلكم الجواب

اشكرك اخ
ibn-BAGHDAD
على الترحيب
العنوان: رد: شحن الكتب المهمه
أرسل بواسطة: angie-dawood في 20:42 23/04/2009
لا اخي هذا تلفون الجوال مال هذا الشخص ومثل ما كلت الك لازم من سوريا وتكدر تسويها على شكل وجبات بالتوفيق اخي
العنوان: رد: شحن الكتب المهمه
أرسل بواسطة: حشاش في 21:02 23/04/2009
شكرا اخت روز
هو سمير بركة موجود ببغداد؟ هذا كان قصدي لان الرقم يشبه الارقام الارضية مالة الكراده يمكن..ما اعرف
بس اذا هوه مو بالعراق ماكو رقم للشركه ببغداد او بس موقعهه بيا منطقة
العنوان: رد: شحن الكتب المهمه
أرسل بواسطة: lisaa في 21:05 23/04/2009
 مرحبا حشاش اشلونك  اولا مكتب  الداتش ال و الفيديكس  و الارمكس ببغداد بفندق فلسطين او الشيراتون واحد منهم .و اذا تريد تبعثها من سوريا فأكو المكتب  مال بريد الحكومي السريع بسوريا جماعة دزوا غراض 60 كيلو ب 500 دولار وصلت ب 20 يوم. و اذا تكول اشلون ابعثها الى سوريا اذا عندك احد اهنا اكو شركة الغتام او الزيتوني مال نقليات تشحن غراض من بغداد الى سوريا بيوم واحد توصل. اتمنى اكول استفاديت
العنوان: رد: شحن الكتب المهمه
أرسل بواسطة: Haidor في 21:09 23/04/2009
DHL موجودة بالكرادة داخل هي و TNT بس ذني غاليات ... ليش متدزهن بالبريد العراقي؟ تره يوصل ... و اذا تريد جرب بفد شي بسيط و رخيص ... و الكلفه لا شئ تقريبا.

تحياتي ... حيدور
العنوان: رد: شحن الكتب المهمه
أرسل بواسطة: ألمــــدرس في 21:49 23/04/2009
حبيبي حشاش

اهلا و سهلا بيك بوسط اخوانك

عندي ثلاث طرق لحل الموضوع

- ان ترسلها الى الاردن او سوريا وشحنها من هناك .. على الكيلو 3 دنانير اردني تقريبا 5 دولارات . واذا زادت الشحنه عن 100 كيلو يكون السعر للكيلو.

- أن تبحث عنها في النيت وتقراها بالحاسبة وتخلص من دوخة الشحن ... بس المشكله خاف انته مثل الوالد ميحب يقرأ إلا بكتاب.

- أن تشحنها بهمر لأمريكا ... بس اخذ رقم الهمر والوحده بأي ولاية .

وانته حاول تشوف شركات شحن ببغداد

اخوك غسان
العنوان: رد: شحن الكتب المهمه
أرسل بواسطة: سماره في 22:02 23/04/2009
اكو حل بسيط بس ما ادري انت تكدر تسوي وهو ان تشحن كل الاشياء المهمه عن طريق البريد العسكري ( الامريكي) لان انت اذا عندك صديق من الجنود الامريكان وتثق بيه طبعا ممكن هو يشحن الاشياء باسمه ويحتفظ بيها الى ان انت توصل وهاي الطريقه اخت البلاش والوصول ممضمون ان شاء الله
العنوان: رد: شحن الكتب المهمه
أرسل بواسطة: حشاش في 22:30 23/04/2009
اشكرج اخت
lisaa
بس اذا هيجي سعر هذا كلش غالي ولو اسويلهن فلتره واخذ بس المستحيل الكاه هناك او اللي سعره كلش غالي

وهم سؤال لاخ
مرحلة وحدة نت بغداد الى امريكا من شيراتون او ميريديان ارخص تطلع لو الى احدى دول الجوار وبعدين لامريكا؟

وبالمناسبه اني ميهمني العشرين يوم وحتى اذا صارت اشهر بس على حساب السعر
العنوان: رد: شحن الكتب المهمه
أرسل بواسطة: حشاش في 22:39 23/04/2009
اخواني الاعزاء
الموضوع ليس محدد بالكتب وانما لاي شيء عزيز على احدنا ووزنه اثقل من المسموح
والكتب هي مجرد مثال يشغل بالي انا شخصيا وممكن ان يكون عند كل واحد اشياء مهمه عنده ودايخ بيهه ومستعد لان يدفع فلوس حتى ياخذها معه بس المسالة هي اي الطرق هي الارخص للي امكانيته المادية متسمحله بدفع هكذا مبالغ
واشكر مشاركاتكم وارائكم
وانشاء الله اتعلم منكم شلون افيد بالمستقبل باي شي اعرفلة وخصوصا بال
siv
العنوان: رد: شحن الكتب المهمه
أرسل بواسطة: حشاش في 22:48 23/04/2009
اخي
Haidor
اعتقد ان رايك هو الاكثر اقناعا لحد الان ولكنه غير واضح

اولا اين اراجع (البريد العراقي) ؟ هل يوجد مكان في بغداد او دائرة حكومية تقوم بشحن المواد الثقيلة الوزن دوليا وباسعار (اخو البلاش)

وما هو ال
TNT
وما هو ال
DHL

وما هو الذي كلفته لاشئ تقريبا

ارجوك التوضيح لي ولجميع المحتاجين لرايك المفيد جدا
العنوان: رد: شحن الكتب المهمه
أرسل بواسطة: حشاش في 23:01 23/04/2009
اخي غسان
اشكرك على الترحيب
الطريقة الاولى مكلفة جدا وانا  لست على استعداد لدفع 500 دولار تقريبا لنقل كتبي رغم اهميتهه بالنسبه لي

الطريقة الثانية غير واضحة ولكن ما فهمته منها هو شرائها عن طريق الانترنت (نسخ الكترونيه/نسخ حاسبة) ان وجدت ولكن الكثير منها غير موجودة هناك او سعر الكتاب قد يصل الى اكثر من 100 دولار اذا كان جديد
بالاضافة الى انه عندي حوالي 30 كيكا بايت بهارد خارجي به مئات الكتب وقسم منها اصلا موجودة عندي ولا اخفي عليك ان القراءة من الحاسبة باستمرار تؤذي العين ولا يمكنك ان تؤشر عليها بعض الاشياء

وقد فكرت بان اشتري سكانر واخزنها كلها الكترونيا واخذها معي ولكن سمعت ان اسعار الطابعات والكارترج والحبر والورق جدا غالية في امريك بالاضافة اى ان هذه الطريقة تاخذ وقت ومجهود كبيرين جداا

وحتى اذا قررت شرائها من الانترنت مستعملة مثلا فلن اجدها جميعا مثلما هي عندي الان اللا بعد وقت قد يطول

واشكرك على النكتة في الطريقة الثالثة
العنوان: رد: شحن الكتب المهمه
أرسل بواسطة: حشاش في 23:09 23/04/2009
اخي سماره
عندي اصدقاء كثيرين جدا في الجيش الامريكي ولكن المسالة ليست بهذه البساطة
لاني كيف سالتقي بهذا الصديق
فهو لا يمكن او لايريد ان ياتيني او يواعدني خارج قاعدته
اما اذا اردت ان اخذها انا الى قاعدة امريكية فكيف سادخلها بوزنها الكبير جدا وماذا ساقول للحرس الذين في البوابات

وخصوصا اني تركت العمل مؤخرا للاستعداد للسفر وسلمت باج الدخول لاي قاعدة امريكية
العنوان: رد: شحن الكتب المهمه
أرسل بواسطة: شذى العراقية في 23:11 23/04/2009
اهلا وسهلا بيك اخوية في بيتك الثاني وانشاء الله كلنا اخوة نفيد ونستفيد


بالنسبة  لشحن الكتب من بغداد يتم عن طريق

مكتب بريد بغداد الموجود في الصالحية بجانب مستشفى ابن البيطار للقلب والاوعية الدموية(مقابل المتحف العراقي)وهذا المكتب حكومي موتجاري

وانشاء الله توصل بخير وسلامة

طبعا كتبك وياك

اختك

شذى العراقية

العنوان: رد: شحن الكتب المهمه
أرسل بواسطة: سماره في 23:18 23/04/2009
شوف اخ حشاش اولا اتفق ويا شخص من الامريكان وثانيا اتفق مع مجموعه من اصدقاءك العراقيين الي بعدهم يشتغلون هناك وخلي يدخلوها على شكل دفعات وهذا الشي اني سويته بنفسي وحتى اشياء غاليه طلعت بس اهم شي اتفق ويا شخص ثقه واي استفسار اني حاضره
العنوان: رد: شحن الكتب المهمه
أرسل بواسطة: حشاش في 23:20 23/04/2009
اشكرج جدا اخت شذى على الترحيب والمساهمة القيمة جدا في الموضوع

هل عندك اي فكرة عن تسعيرتهم او شكد يطول ال
PACKAGE
حتى يوصل

وعن امانتهم في ايصال الاشياء المرسلة
العنوان: رد: شحن الكتب المهمه
أرسل بواسطة: حشاش في 23:28 23/04/2009
اخت سمارة
طريقة جيدة جدا نضريا
ولكن صعبة التطبيق لكل الناس للضروف الامنية في العراق وخصوصا للذين يعملون عملنا وحول القواعد الامريكية
ولكني ساحاول تطبيقها
شكرا للنصيحة القيمة
العنوان: رد: شحن الكتب المهمه
أرسل بواسطة: شذى العراقية في 00:47 24/04/2009
اخوية العزيز لاشكر بين الاخوة هذا واجب

الطرديصل بين ثلاثة اسابيع واربعة اسابيع  وتكتب عنوان المرسل ورقم الموبايل وعنوان المستلم ورقم تلفونه حتى اذا ما وصل يرجع للمرسل بس هو اكيد يوصل 100%

وسعر الكيلو الواحد سبعة الاف الى تسعة الاف دينار عراقي

حتى تحافظ على كنبك اشتري نايلون ثخين شفاف من السوك يستعمل للزراعة(للمغطة)

واشتري قماش خام ابيض  تخيطه على شكل كيس مفتوح من جهه وحدة

تاخذ كتبك للبريد راح يشوفوها ويوزنوها بعدها تغلف الكتب بالنايلون الشفاف وتلصقها بلاصق  فوي وتخليهم بالكيس الخام  وتخيطها

طبعا تاخذ وياك ابرة وخيط ومقص


واخيرا تكتب عنوان المرسل ورقم الموبايل وعنوان المستلم ورقم تلفونه  بخط واضح


وراح تاخذ منهم وصل بالرسوم الي راح تدفعها ووصل اخر  بوزن الطرد ورقم الطرد وبيه عنوان المرسل والمستلم


ومن الله التوفيق

اختك

شذى العراقية
العنوان: رد: شحن الكتب المهمه
أرسل بواسطة: وداعاً بغداد في 09:08 24/04/2009
عمي والله هاي ست شذى أم بيت مضبوطة ....عمي الحشاش بعد شتريد أكثر من هاي التفاصيل وأذا كلش وكفت أني راح أسافر بعد شهر أخذهن وياي وأعوف الجنطة اللي بيهة هدومي وهدوم العائلة وتدلل ...
العنوان: رد: شحن الكتب المهمه
أرسل بواسطة: حشاش في 22:03 24/04/2009
اخي وداعا بغداد
الموضوع يمكن تعميمه ليشمل اي مقتنيات عزيزة عليك
انا مثلا بالنسبة لي اعز شي عندي هو كتبي
اشكرك على المرور والنكته
اضحكتني بعض الشئ
العنوان: رد: شحن الكتب المهمه
أرسل بواسطة: NOOR 2 في 22:57 25/04/2009
اهلا اخي حشاش

نورت المنتدى
اخي نتذكر ايام زمان في بغداد وخصوصا في منطقةالكاظميه
واسطة نقل جميله جدا وباقيه في الذاكره
وهي العربه والتي يسحبها عفوا احد الحيوانات وهما حصانين
وما اجمل تلك الايام عندما نذهب ونعود مع ابائنا الى المنزل بواسطة تلك العربه
ونحن صغار والفرحه التي تملء قلوبنا
ونصور كم الوقت المستغرق لحين الوصول

المهم
اتمنى من الله عزوجل  ان يعم على هذا البلد المحروم نعمة التطور
وتكون عملية شحن الاشياء الخاصه سهله جدا وغير مكلفه
اتمن وادعو الله ان تصل انت وكتبك بالسلامه

اخوك NOOR 2
العنوان: رد: شحن الكتب المهمه
أرسل بواسطة: abujo في 11:59 23/05/2009
سلام عليكم
احد يعرف شكيد ياخذون بمطارات امريكا اذا الواحد شحن الغراض بشحن جوي فد 60 كيلو لان اني سالت الشرقية للشحن الجوي بالاردن وكالو منعرف؟ احد يفيدنا بهل الموضوع؟
العنوان: رد: شحن الكتب المهمه
أرسل بواسطة: BaghdadGhost في 04:15 23/06/2009
اخوان ,,,,

طبعا الموضوع مفيد فكلت  اجيبه للصفحه الالولى للمنتدى ,,,,,

و حبيت اذكر للاخوة الي ذاكرين بريد بغداد بالموضوع بان سالت ببريد بغداد و هذا الشي غير معمول به حاليا ,,,,, يعني ماعدهم بريد بين بغداد و امريكا ,,, يعني هاي الفقرة مو بالحسبان