ankawa
منتدى الهجرة واللجوء => الهجرة و واللاجئين => الموضوع حرر بواسطة: المستعجل في 15:08 23/05/2009
-
والله يا اخوان دوخونه بهاي الاخبار الجديدة .... اي اتخص سفر العراقيين من سوريا الى اوربا وامريكا
زين اذا طلع الحجي صدك ... شنو هوه الحل ...
عمان ما تطي فيز الى العراقيين ...
بس حبيت اسال الاخوه في مصر (((( عكعك ,, شيبو ,, ابو انس ,, وكل اهل مصر ))) يمعودين الحكونه
مصر شنو اخبار الفيزا متالتهه ... اخوان اكو شروط او طريقة (( دراسة ,, سياحة ,, تفرير طبي ,, شي اخر )) ممكن ان يسهل دخول العراقيين الى مصر او عن طريق IOM خصوصا للي منتضرين موعد سفر او عن طريق دعوة او اي حل يمعودين اتلاحكونه قبل ما يمنعون سفرنه حتى للدول العربيه ,, كلشي يصير
-
اخويه المستعجل
الفيزه الى مصر لتفكر بيه ابدا لان الي يريد يجيب اهله ميكدر
وانشاء الله المنظمه تلكاله حل متبقى هيج
-
اخوية المستعجل انت واحدك تريد اسافر لمصر لو وية العائلة ؟
اذا وية العائلة انسة ترة كلش صعبة
واذا وحدك وعندك احد فاكو جامعات معروف ينطون عليهة فيزة بس هاي الجامعات كلش غالية وطبعا مو 100% ينطوك عليهة فيزة
او من بغداد دتفع فلوس ويخلون اسمك وية وفد وهمينة اطول والفلوس الي تدفعهة متسوة علمنظمة الي بمصر
اني انصحك اخي ال iom هنانة بمصر مخربطين ومتقل خربطتهم وحقارتهم عن الموظفين بغداد لو سورية
يا اخي اذا تريد قضيتك تمشي زين ومستعجل علسفر روح للاردن اكيد اكو طريقة يعرفوهة ابغداد بفلوس يسجلوك بجامعة مثلا لان اني مااعرف صارلي دهر بمصر
اتمنالك التوفيق وان شاء الله تمشي معاملتك بسرعة وتسافر
-
اخي والله اني جدا انقهرت الله لايوفق الي يكون السبب بس اخي اصبر ان شاء الله الخبر مو مؤكد واذا لابد فاني اشوف انه لبنان او تركيا اسهل الفيزا لان مصر جدا صعبة والتوفيق من الله .......اختك ايات
-
فحامي
اخويه فحامي اي جامعه ليس من صلاحيتها ان تعطيك فيزه حتى لو الجامعه الامريكيه
-
السلام عليكم
اخويه ابشر خير وان شاء الله الخبر كذب ومجرد اشاعه ..وانت تتصور اكوا احد يكدر يلغي سفر لاجئ عن طريق الامم المتده او iom مو معقوله والجميع عندهم حصانه ( دي امريكا ياباشا مش خرخاشه ) ههههههههه صح لو لا كلامي ياعيني منو يكدر يكول لا . اطمئن ياعيني ولا تفكر وان شاء الله نسمع خبر سفرك .
ابو انس
-
مشكرين اخوتي الاحبة (( عكعك ,, فحامي ,, ايات ,, القرش )) على الرد والاهتمام وانشاء الله رب العالمين ما يعوفنه وهوه ادرى بحالنه .... اتمنى ان يكون الخبر مو صحيح .. والله يستجيب دعواتنه ودعواتكم وابشركم مثل ما كال اخوية ابو انس انشاء الله
-
اخي عكعك الجامعة متنطيك فيزة بس من ينختم التسجيل بالتعليم العالي وتروح للاقامة الاقامة تنطي فيزة للشخص الي مسجل بهاي الكلية مثلا سجلنة كَرايبنة بجامعة مصر للعلوم والتكنلوجية قبل ست شهور ونطو فيزة و كَدر يجي لمصر من بغداد ومن راح للكلية وداوم هواية من اصدقائة والي عرفهم هناكة بالجامعة حصلوا فيزة بهلشهر و الشهرين الي راحوا
وبنفس الوقت اخوية في امريكا ردنة اجيبة لمصر حتة نشوفة فسجلنا بمعهد بس معروف وغالي بس مو مثل الجامعة طبعا من رحنة للاقامة انطونة رفض وكلولنة ننطي فيزة بس الي مقدمين علكليات وهذا الكلام قبل جم يوم
-
اخي المستعجل
اذا طلع صحيح مانعين السفر من الشام ف يكدرون يحولون السفر اللي بسوريا من لبنان
مجرد تاخذ تذاكر السفر تدخل الى لبنان كونك مرور الى المطار واذا لا اكو حل اخر
السفر الى لبنان مجرد عندك هويه غرفه تجاره وهذي ترسل عليها من بغداد وكونك حامل الهويه
تستطيع دخول لبنان يعني لا دووخ وانشالله ربك يدبرهاا واكو حلول عديده
ابو فيصل
-
أخي المستعجل
كلام الفحامي مظبوط ظبط العكال
بس ترة اني من الناس الي دفعولي رسوم تسجيل بالأكاديمية العربية للعلوم والتكنلوجيا في الأسكندرية وبالدولار وأخذوا الوصولات و ودوهة للتحرير ومثل الورد اجاني رفض ونص .... بس أخوك خش بطريقتة وخششت أهلي عصبآ علة مصر وأبو مصر
لعد 5 ملايين مصري شتغلوا عدنة وشالوا دولارات العراق ويخشون ويطلعون بكيفهم والأفندي يكول الي يعتدي على مصري يعتدي علية
وأحنة ما يدخلونة؟؟؟؟ لا والله ندخل بعيونهم وهمة الممنونين
بالتوفيق اخوية ولا تستعجل ترة الخبر مو مظبوط مال سورية
تحياتي
Baguncero
-
اخوان لاتنجرفون وره الاشاعات الي بغداد ديطلعون بعد شكو هذا الكلام الي تسمعوه لاصحه له
-
أخويه العزيز .. من تجربتي بمصر على مدى سنوات أقول اك بصراحه .. الان حاليات وحتى المستقبل المنظر ليس هناك اي امل بالحصول على فيزا لأن السلطات المصريه اوقفت منح اي عراقي فيزا لدخول مصر عدا الوفود الرسميه أو شبه الرسميه .. وبالنسبه للفيزا الدراسيه اي عن طريق قبول جامعي هم أكدر اكولك أغسل ايدو ونشفهه زين واي جامعه مصريه مهما كان نوعها تعطيك قبول ولكن هذا القبول ( ميوكل خبز) في موضوع الفيزا يعني قبول اي جامعه لا يعني حصولك على الفيزا .. واللي ايكولك كدرت أو أكدر اطلع فبزه باي شكل من الاشكال لا تصدكه أبد لان الفيزه مقفوله تماما على العراقيين في مصر وأكرر مقفوله تماما ..واللي ايكولك خشيت وطلعت أو أخش وأطلع وسويت لو اسوي هم لا اتصدك .. بس على حد علمي هناك طريقة وحده فقد هي أنه موجود في مصر معهد اسمه معهد الدراسات العربيه وهذا المعهد هو للدراسات العليا يعني بعد البكالوريوس يقبل خريجي الجامعات فقط وباختصاصات انسانيه فقط وليست علميه يعني مثل تاريخ وجغرافيا ولغه عربيه الى اخره .. هذا المعهد تابع لجامعة الدول العربيه وليس لأي جامعه مصريه لأن في جامعة الدول العربيه هناك منظمه اسمها المنظمة العربيه للتربيه والثقافه والعلوم وهذا المعهد تابع لها .. وعلى حد علمي المعهد يعطي موافقه مبدئيه على القبول ثم تستطبع ان تأخذ فيزا على اساس هذه الموافقه طبعا بعد التسجيل في المعهد ودفع رسوم أعتقد قيمة الرسوم أكثر من ( 1000)دولار يعني 5260 جنيه مصريعلى اساس سعر صرف الجنيه الرسمي وهو 562 .. ولكن امامك مشكله واحده في هذا الموضوع هي ان يقوم شخص موجود في مصر بالتقديم لك في المعهد ودفع الرسوم والتقديم على الفيزا نيابه عنك لأن المعهد لا يقبل التسجبل بالمراسله وأنما يتم التسجيل بالحضور شخصبا او من يمثله قانونا ... هذه هي الطريقه الوحيده وأعتقد أن هذه الطريقه هي ايضا غير مضمونه مئه بالمئه ولكنها أحسن الطرق المتوفره حاليا لكون هذا المعهد تابع لجامعة الدول العربيه وليس للجامعات المصريه .. يعني فرصه أحتمال حصولك على الفيزا لمصر بهذه الطريقه هي افضل من فرص بقية الطرق ومع ذلك أكرر انها ليست مضمونه مئه بالمئه .. وكن على ثقه أكيد انه اي عراقي يخرج من مصر حاليا لايستطيع العوده الى مصر الا اذا كان لديه اقامه فقط .. وكل الاخوان في مصر يعرفون هذه الحقيقه .. ونحن موجودن في مصر من سنوات والمثل يقول اسأل أمجرب ولا تسأل حكيم .. تقبل تحياتي ..
أخوك دمي خفيف
-
اخي المستعجل ان شاء الله اشاعات سالفة سوريا او مجرد رحله لغوها وطش الخبر بغير صوره الله أعلم بلنسبه لفيزا مصر فهي اشبه بلحظ يانصيب ولناس كاعده تشمر حجاره في بحر لعل وعسى تجيب واحد من اهلها قبل اسبوع رحت لتحرير وشفت عراقي ديكتب طلب فيزا لواحد من اهله ويضحك ومأيس راح يقبلوها وكال نشمر حجاره ببحر ياتخيب ياتصيب بس سمعت من بغداد اكو شركات تسوي فيزا ب23 ورقه لشخص واحد بس مامتأكد يجوز هم اشاعات الله يفرجها علجميع
تحياتي
شيبو
-
دمي خفيف اخوية حبيبي لجذبني ماعندي مصلحة بهلشغلة والي كلتة عن الجامعات الاهلية هذا حقيقة واني لامسة بس اكثر العراقيين ميكولون لكرايبهم هيجي حتة ليجون من بغداد لمصر وينامون براسهم
عيني اخوية المستعجل اذا عندك كرايب اهنانة عرف خليسولكيا ونصيحيتي الك عمان احسن ترة المنظمة الي بمصر مثل نكاسة منظمات بغداد وسوريا
-
اخي دمي خفيف واضيف على كلامك انه التقديم على معهد الدراسات التابع لجامعه الدول العربيه
لا يمنح الفيزه ولكن عند التقديم لطلب فيزه في مجمع التحرير ترفق هذا القبول مع المعامله وتبقى نسبه الرفض به حوالي 99% بعد ان ت تجازف بالمبلغ الذي دفعت
-
والله يا اخي كلشي يصير بهل الزلك
والله يخلي حكومتنا ورايتها سودة بس شنسوي
احتمال خبر سوريا صحيح لان سوريا ما عدها اتفاقية لاجئين هذا مكتب يقوم بالاعمال لكن لا يوجد اتفاق دولي اما مصر ولبنان والاردن هذولي عدهم اتفاقيات دولية لمنظمة الهجرة ما يكدرون يمنعوهم شنو بكيفهم هاي اتفاقيات دولية ؟؟؟
ثاني شي خلي يكلولي مطار مصر لا تطلع شنو بكيفة عندي فيزا وهو شعليه بأي حق اني مو مواطن سوري او مصري حتى تمنعني اني مواطن عراقي لو بالعراق مثلا ويمنعوك ربما لان بلدك بس انت ضيف ما الهم حق ان يسولك شي ودليل هسه اي عراقي يسوي مشكلة بمصر ما يسجنوا يسفروا ما الهم حق الا مسوي مكسورة تخص امن البلد
-
أخويه فحامي ما جذبتك اني وحشاك من الجذب قصدي مو عليك بس أخوي هنا نسمع هوايه عراقيين ايكولون كدرنه وسوينه وهمه لا كادرين ولا امسوين .. اني قصدي نحجي الصراحه للرجال حتى لا انخليه ايعيش بأمل ضايع ما بيه نصيب .. هذا قصدي ....
أخوي عكعك كلامك صحيح واني هم كلت انه رغم هاي الطريقه مال المعهد احسن من بيقة الطرق بس مو مضمونه ..