ankawa
منتدى الهجرة واللجوء => الهجرة و واللاجئين => الموضوع حرر بواسطة: BaghdadGhost في 15:03 27/05/2009
-
اخواني الاعضاء ....
الموضوع بكل بساطه هو ان عائلة تنوي التقديم على اللجوء ....... اكو خيارين بالموضوع .... اما التقديم من بغداد ,,,, او السفر الى احدى دول الجوار و التقديم ...... و هذا الحجي كله على ال اي او ام ...... الاساله هي التالي :
1. ما هي المدة التي تستوجب لمعرفة بان العائلة مقبوله بالتقديم او لا في بغداد ... يعني بالعراقي من يقدمون ,,, ورة شكد راح يعرفون بانهم مشمولين بالموضوع ..... و اكو امل بالانتظار ...
2. هل الافضل التقديم من العراق ام خارج العراق بالنسبة للقبول وليش المصاريف و البهذله ؟ و لماذا ؟
راح اشرحلكم شنو السبب من كتابه الموضوع و شنو الي يدور اببالي و بال العائلة .....
كلنا نعرف بان التقديم من بغداد هو احسن من التقديم من خارج بغداد بالنسبة للجانب المادي .... ولكن بالنسبة لمساله القبول و سرعه السفر شنو الافضل .....
مربط الفرس يكمن في ان اذا قدموا من بغداد راح يكونون معرضين للرفض او القبول ...... اذا المدة الي نعرف بيهه بان الرفض او القبول قصيرة و تسوة الانتظار ... يجازفون العائلة بالتقديم من بغداد .... لا والله اذا لازم ينتضرون فد خمس اشهر ياله عود يعرفون مقبولين لو لا .... ذاك الوكت يخصموهه من هسه و يسافرون خارج العراق ....
انتوا شنو رايكم ...... اتمنه يؤخذ الموضوع بجدية لان على اثر اجاباتكم راح يحددون العائلة شنو الخطوة الجايه .... و اعرف كلش زين بانكم مراح تقصرون .....
مشكور مقدما عالردود .....
-
عزيزي شبح بغداد
كلامي راح يكون عن خارج العراق
بالنسبه للتقديم iom من يقدم اوراقه الثبوتيه والمستندات التي تثبت عمله مع القوات الامريكيه
راح ينقبل بالبرنامج ويزود برقم كيس وهذه تحصل من اول يوم التقديم وراها لازم يتاكدون من شغل
صاحب التقديم عن طريق ايميل يزودهم بي صاحب القضيه هذه الفتره تعتمد على سرعه رد صاحب العمل الذي كان يشتغل معه صاحب القضيه فكلما كان رده سريع كلما قلت المده للاتصال به من قبل المنظمه لعمل المقابله الاولى والعكس صحيح وراها تعتمد القضيه على قدوم المحلفين وغيرها من الاجراءات يعني يخلون بالهم على( اقل تقدير فد 6 اشهر الى سنه)
اما الرفض او القبول فهذا يعتمد على القضيه وراي المحلف بالقضيه سواء بالعراق او اي دوله اخ
-
شبح بغداد
رأئيي بالموضوع كالآتي:
اذا هذي العائله بخطر تطلع خارج العراق و تقدم و احسن شي الاردن من هالناحيه
اذا العائله مو بخطر و ما عدهم شي خللي يقدمون من بغداد
اذا العائله لازم لازم لازم يرحون لامريكا، خللي ليضيعون الفرصه و الوقت و يطلعون للاردن
اذا العائله راغبه للسفر بس مو لازم لازم ... العراق حاليا بي اماكن أمينه و يكدرون يقدمون من العراق و ينتظرون بس موو أكيد تصير
بين قوسين .. يعتمد على ظروف العائله
تحياتي .. حيدور
-
اولا شكرااا جزيلا اخي عالموضوع و اني برايي
انو من خارج العراق اتصور ضمان قبولهم او الموافقة على قبولهم يكون اضمن او اكثر احتمالا مما داخل العراق
لان مثلا اذا هم مهددين لعد شلون كاعدين في بغداد فهاي هم نقطة و اذا بمنطقة امينة و معليهم شي لعد شكو ديسافرون؟؟؟؟؟؟؟؟؟؟؟ يعني جتني عدة افكار
اما فيها ايضا جوانب سيئة و هي بحالة الرفض منتظرين كذا فترة و صارفين و جاهم الرفض يعني بوري
بعدين مصاريف مادية الله اعلم شكد ما عدا احتمال يفقدون اعمالهم داخل العراق النوبة يطلعون خسارة و راحت المشيتين عليهم
بس اذا هم مصريين برايي من خارج العراق لان اشوف مال داخل العراق السالفة مدري شونها
طبعااا هذا رايي
سلام
-
حبيبي عكعك .....
مشكور على الرد و بارك الله بيك ..... راح افهمك شنو السالفه ..... همه الصراحه ماعدهم احد مشتغل ويه الاميركان ...... اكو ولد طيب ساللنه و كاللوله اذا عدهم اثباتات تثبت اضطهادهم و صدق كلامهم يكدرون يقدمون من العراق ..... احنه هسه محتارين بين التقديم من بغداد و التقديم من خارج بغداد .....
بس اهم نقطه بالموضوع ذكرتهه بان الموافقة تعتمد على المحلف و رايه بالموضوع ......
مشكور مرة ثانيه ....
حبي حيدور ....
مشكور و ماقصرت بالجواب ...... صدك بالفعل هيه تعتمد على العائلة ....
-
اختي روز ......
المشكله هي التالي ....
اذا قدموا من العراق .... راح يحتفضون باعمالهم و المساله مراح تكلفهم شي .... و حته اذا اجاهم رفض .... فهمه مخصرانين شي ...
ولكن من خارج العراق ..... محاسنهه بان يجوز القبول و الاجراءات اسرع ...... ولكن مساوءها هي انهم راح ينتظرون فترة و يصرفون للمعيشه و اكيد مراح يكون عدهم مردود مالي ....
لكن .. قد البعض بيكم يكول ليش مبقدمون من العراق و اذا مصارت يروحون لخارج العراق و هم يقدمون .... هذا الشي صحيح بس المساله اذا سالفه العراق راح تطول مده و انرفضوا ,,, ذاك الوكت يكون حرامات الوقت الي قضو بالعراق و لو رايحين من البدايه و مقدمين .....
لذلك ارجع و اكول مربط الفرس هو شكد المدة الي المفروض يعرفون بيهه نفسهم ضامنين شي بالعراق لو لا .... اذا المدة قليله ... ماكو ضرر بالتقديم من العراق ..... واذا المدة طويلة ,,, لا والله من البدايه يروحون من خارج العراق .... لان مثل متفضل الاخوة قبلي عكعك و حيدور ... من خارج العراق احسن بالقبول و اقناع المحلف .....
هسه شنو رايكم .....
-
السلام عليكم
اخويه الغالي .اذا هم مرتاحين بالعراق وعدهم اعمال يمارسوها ومستقرين خلي يقدمون من بغداد واحسن من البهذله والطلعه للخارج . ومثل ماكلت انت حتى لاسامح الله اجاهم رفض هم كاعدين بمكانهم . هذا رأيي وخلي نسمع من باقي الاعضاء اخواني .
ابو انس
-
الموضوع بأختصار أذا همة ماعدهم أحد مشتغل وية الامريكان فمسألة التقديم من بغداد صعبة جدا لأن البرنامج في بغداد يشمل فقط العاملين مع القوات الامريكية فقط ومن خارج العراق فلا يوجد خيار جيد لهم غير سوريا والاردن ولبنان وتركيا ومصر وكلها فيها مساويء ومحاسن ويمكن الرجوع الى مواضيع عديدة في المنتدى للأطلاع عليها وشكرا
-
اخوية شبح بغداد
اكو مسألة كلش مهمة اذا قدموا من بغداد واجاهم لاسامح الله رفض فمن راح يطلعون ويقدمون من غير دولة مينقبلون بنفس الدولة الي رفضتهم بس يمكن يكدرون يقدمون لغير دولة
الرب ايكون وياهم
اختكم اوماها
-
اخويه شبح ذكرت انهم يردون يقدمون على iom من بغداد او من خارج العراق واني كتلك راح اجاوب من ناحيه خارج العراق والمده التقريبيه الي تسترقها وبعد هي تبقى يمهم همه يقارنون ما ذكرته وما ذكره الاخوان من اراء ويشوف المده الي يقضيها خارج العراق وهل ميزانيته تسمح بذلك ويقرر بس اخويه اني على حد علمي انه اذا ممشتغل ويه الامريكان مينقبل لان شروط التقديم واضحه بس ما اعرف شلون يكدر يقدم مباشر خلي يتاكد
-
حبيبي شبح
اذا العائله تحس ان الكيس مالتهم قوي و مايقبل الشك انصحهم يقدمون خارج العراق لان بيها عامل الوقت كلش افضل من داخل العراق وتستاهل البهذله و الصرف .
والعكس هو الصحيح
بالتوفيق للجميع
-
اخوية ماجلان انتة الظاهر حالك من حالي ترة داعيك مرتب امورهة وشغلاتهة هسة لانه لازم احتفل بالعيد الاول اللي وية IOM بغداد بعد ايام قلائل جدا وليهسة داعيك على الشحن البطييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييء والله كريم
-
اخواني و اخواتي ...
عكعوك ....
حيدور .......
rose rose .....
ابو انس ....
صفاء الكرخي ....
omaha ......
ماجلان ......
show ......
بارك الله بيكم على هاي الردود و المجهود الي بذلتوه بتقديم المساعده و النصيحة ...... الحمد لله و الشكر العائله قروا الموضوع و وصلوا لقرار و مثل مكلتوا بان يقدمون من خارج العراق ....... و تشكروا منكم هواي هواي ......
الحمد لله بان المنتدى بي هيج اعضاء و غيرهم من الاعضاء الي ميقصرون وربي يفتحهه بوجهكم مثل مجاي تقدمون المساعه لغيركم ......