ankawa
منتدى الهجرة واللجوء => الهجرة و واللاجئين => الموضوع حرر بواسطة: traveler في 16:18 08/06/2009
-
احبائي الاعظاء اتصلت هليوم ابمصر دا استفسر على القظية مالتي وانصدمت بتحديد ولاية منيسوتا بدلا من كاليفورنيا سان دييكو الي من المفترض كفيلي يكفلني اهناك الرجاء من الاخوة جماعة بغداد الكتابة هنا اذا كان لديهم نفس المشكلة لان اني دزيتلهم اي مايل طويل كلش شرحتلهم ليش تم اختيار ولاية من غير كفيل وهل لازم يكون الكفيل قريب من الدرجة الاولى يعني شغلة اتحير.
تحياتي traveler
-
اخوية ترفلر اريد اعرف منك بعض التفاصيل عن قضيتك يعني انتة ببغداد وشوكت قابلت محلفين والفحص الطبي وهل كنت قيد الدراسة لانه اكو حالتين لاصدقائي مثلك بالضبط حتهة اوجهك بالاتجاه الصحيح واني داانتظرك هسة........... اخوك صفاء
-
اخوان خلي افهمكم على شغلة ترى مو شرط كلمن عنده كفيل يروح يما هما يمشون حسب الفيزه هسى اني مو اختي من الدرجة الاولى وبمشكن ما جابوها يمي راح تروح لكلفونيا مع العلم اني كفيلة مالتها خابرت المنظمة هنا كتلهم ليش دزيتوها لكلفونيا مو اني اختها هنا بمشكن ومشكن هي بس للاهل بالدرجة الاولى كالت الموظفة قبل كان يمشون على صلت القرابة هسى ديمشون حسب الفيزه احنا دنمشي فمو شرط عندك كفيل تروح يم كفيلك 00
-
زين اختي لميس قصدي انجي لعد شنو الفايده من الكفيل اذا كل واحد بديره زين خوب واحد ميقدم على
كفيل لان بكل الاحوال همه يختاروله الولايه شو شغله غريبه هايه وجديده
-
والله اخي ترافيلر كان بودي انصحك... لكن يبدو ان................. عموما الموضوع كما قال اللاخ عكعك.... وشكرا
-
اي والله شغلة عجيبة وغريبة عاشت ايدك عكعوكي الوردة
استاذي العزيز صفاء الكرخي
اني امقابل المحلفين كبل شهرين وعشرة ايام تقريبا واجاني الرد المحلف ابو التأشيرة كبل اقل من شهر واخر تحديث جان تحديد الولاية هليوم واني امخلص فحص طبي كبل شهرين همينه ومنتظر رحمة الله واذا عندك اي استفسار اني حاظر وتدلل
traveler
-
حبيبي اترفلير الشغلة باختصار كالاتي....
المنظمة غير ملزمة مية مية بتوطينك في نفس الولاية التي فيها الكفيل لانه هناك معايير يتبعونها اهمها ماتحدده الولايات المتحدة نفسها وليس المنظمة هذا من جانب اما الجانب الاخر كلما صار زخم على ولاية معينة يتم نقل بعض الحالات الى ولايات اخرى ... طبعا كما قلت لك عندي اصدقاء اثنين نفس شغلتك وماكان منهم سوى القبول بالواقع لكنك تستطيع بعد وصولك الى امريكا ان تغير ولايتك الى الولاية التي فيها الكفيل عن طريق المنظمة المسؤولة عنك كما فعل اصدقائي... بقيت شغلة وهي انه انني لاحضت ان غالبية الاشخاص الذين ملفاتهم كانت قيد الدراسة سواء في الاردن او مصر او سوريا او غيرها يتم توطينهم في ولايات معينة ومن ضمنها ولايتك ولاسبب معروف لذلك!!! اشكرك
-
اخويه صفاء يا ملف قيد الدراسة اني ماخذ موافقة المحلفين مقدما بس بقت الامنية شلون يحددولي ولاية اذا ملفي قيد الدراسة? ارجو الانتباه الى هذه النقطة واني بعدني جديد يعني ما صارلي هوايه من استلمت الرد واكو هوايه ناس اعرفهم طلعوا هذالشهر من بغداد اجاهم نفس الرد ومأشريلهم على البند الرابع.
traveler
-
واللة يااخي عكعك ما اعرف شنو دور الكفيل قبل كان يودوهم يم الكفيل هسى الشغلة تغيرت بعد الزخم الي ديصير على الولايات مثل مشكن وكلفونيا بالدرجة الاولى ومشكن صارت حتى الدرجة الاولى قليل ما يجيبون اقاربهم يمهم هي صايره هوسى واحنا هم ماكو بيدنا شي نمشي وراهم وين ما يودوهم قابلين بس المهم يوصلون عاد مو حتى اعصابنا هم تلفت من ورى اليو ان ومشاكل السفر والجوء كل يوم قانون شكل صبح قانون وباليل قانون العالم احتارت بامرها ميعرفون وين راح يكون مصيرهم اللة يستر بس تسافرون وتوصلون بالسلامة وتستقرون واللة هو يدبرها وين ما كان المهم ترتاحون من التفكير بالجوء والقرارات ربي يفتحها بوجوهكم وتسافرون وتستقرون والكم رب اسمة كريم
-
ولله يااختي انجي واخوي عكعك
هذوله الامريكان
يمكن ديصفحون المنتدى ومتقصدين يغلطون الاعضاء باجوبتهم الى الناس؟
تحياتي لكما
الشذر
-
اخوية ترفيلر اني ماقصدتك انت بملفك قيد الدراسة بس حبيت انوه الى هاي النقطة اللي اني شفتهة وعلى كل حال الخير في مااختاره الله ......... نصيحتي اللك انه تتوكل على الله... وقل الحمد لله
-
ادري يعني اذا واحد عندة كفيل شنو المقصود انه يودو لغير ولاية شو يومية فيكات شكل و بين ما الواحد يتعود على شي يطلعون بفيكات جديدة و الله ملينة و طلعت رواحنة
-
اخوان بس حبيت استفسر يعني هسة جماعة اصدقائنا ححدولهم انه يجون هنا باتلانتا وحددو اسم المنظمة والكفيل مالتهم وقع الاوراق وهسة انطوهم موعد سفر 10-6 وبعدين غيرو علة 21-6
بس رحنة سالنة المنظمة عن اسمهم واين يتم التاجير كالو احنة اسمائهم عدنة بس ليهسة محد كاللنة رح يجون زين همة موعدهم يوم 21-6 اكو احتمال ايودوهم لغير ولاية وليش ليهسة المنظمة لم تبلغ بموعد سفرهم يعني اكو مشكلة
ارجو من اي شخص عندة جواب يرد علية
اختكم ام عبد الله
-
اخي العزيز
لم توصل لامريكا و اول مطار تنزل بيه كللهم اني ما اريد منيسوتا اريد اروح لهذا العنوان بكليفورنيا و الي راح يصر انوا يبيتوك بالمطار كم يوم لحين ما المنظمه مال اللاجئين الي بكليفورنيا تحصل ملفك و تقبلك يمهم و راح يتصلون باخوك لانوا لازم يبيتك يمه كم يوم او كفيلك لحين ميتبون وضعك لانوا مجان عدهم علم ,
وهذا الامر صار ويا اخويه لانوا مجان محددني كفبل بولاية تنيسي و باول مطار غير ولايته الى ولايتي وهسه هو يمي
وانته مراح تخسر شي اذا سالتهم بالطار او ل مطار تنزل بي بامريكا
و اذا موافقوا تكدر بعد شهر تبدل ولايتك
اني اول شي حطوني بنيوهامشر و بعده بدلت ولايتي
-
شكر الك اخويه العزيز حسين بس حسب معلوماتي الي ايغير الولاية مالته راح يمكن يتورط ويخسر المساعدات لأن احنه وقعنه على هذا الشي بالمقابلة الاولى حسب علمي وان شاء الله ما يصير الا الخير.
تحياتي traveler
-
اخوية الله يساعدك واني قبل ثلاث اسابيع نزلت نفس الموضوع عندي كفيل وهم حددوا ولاية اخرى وخليتها على الله وان شاء الله يسهلها عليك وعلينا .....اختك ايات
-
الله يسهل عليك اخي بأي مكان انشالله
بالتوفيق انشالله
-
اخي traveler العزيز تحية وسلام
اخي اي ولاية تريد تغير ما راح تخسر مساعداتك لانه قبل ما تسافر للولاية الي ردت تغيرها المنظمة الي بالولاية الي جيت بيها بالاول راح ينطوك كل الاوراق مال النقل واذا انت ما عندك كفيل مال الولاية الي راح تروح اليها المنظمة هي المسؤولة عنك حتى بغير ولاية لانه هما راح يخابرون المنظمة للولاية الاخرى الي راح تروح الها وهما راح تستقبلوك بالمطار وهم يكونون مجهزين الك المسكن وهم راح يودوك لاخذ كل المساعدات كلاجئ وما تنحرم من اي شي اطمئن 000
-
لا تخاف اخويه انته كلاجئ كل حقوقك محفوظه
زين شن رائك اني لم جنت بنيوهامشر و بعدكم 5 اشهر حولت الى تينيسي و بعد بكم شهر اجه اخويه
المنظمه الي استلمته هنا كلوله اذا اخوك الي هو اني صارله اقل من 7 اشهر بامريكا يكدر يجي نسجل اسمه ويا المساعدات مال الرواتب الشهريه كم شهر لحين ميكمل الشهر التاسع
بالنسبه للمساعدات الكل ماشيه على قانون
اني قبل ما احول سديت ملف الفود ستامب و الويك مالتنا بنوهامشر وقدمت بنفسي من جديد هنا و خلال اقل من اسبوع كله رجعتلي
يعني اختصار المساعدات متنكطع عيك مدام المكان الي انته رايح بيه اكو بيه منظمه لرعاية اللاجئين لان كل المنظمات مرتبطه من ناحية الفلوس بالحكومه الفدراليه هي الي تنطي الاخضر و المنظمات يكيفون واحد يجيهم علمود تجيهم مساعدات اكثر
-
احبائي اللأعظاء,ايات,انجي العظوة المميزة ,حسين,اشكركم الشكر الجزيل طمنتوني الله يطمن قلوبكم اذا ما فادت الاتصالات الي راح اسويها ويه اي او ام في بغداد راح اروح المنيسوتا ومناك اروح السان دييكو كاليفورنيا.
تحياتي الكم ......traveler
-
اخويه ترافل قبل ايام شفت باحد القنوات المصريه بالسبستايتل انه اوباما يرفض تقديم مساعدات ماليه الى ولايه كلفونيا واليوم ريت هذا الموضوع وكلا الخبرين لهما علاقه باسباب تحويلك على غير ولايه لان هذه الولايه تعاني من عجز بالميزانيه
شوارزنيجر يهدد بإغلاق ولاية كاليفورنيا
أعلن حاكم ولاية كاليفورنيا أرنولد شوارزنيجر أنه يعتزم إغلاق الولاية بشكل كامل إذا لم يتوصل المشرعون سريعا لاتفاق لسد عجز الموازنة البالغ تقريبا 24 مليار دولار.
وأفادت صحيفة " لوس أنجيليس تايمز" اليوم الخميس أن النجم السينمائي السابق أصدر التحذير أثناء اجتماع مع مجلس محرري الصحيفة.
ويمثل ذلك أبرز دعواته المثيرة حتى الآن لدفع المشرعين من حزبه الجمهوري للتراجع عن معارضتهم القوية لزيادة الضرائب والضغط على الأغلبية من الديمقراطيين للموافقة على إجراء تخفيضات حادة في برامج الصحة والرعاية الاجتماعية التي تستحوذ على اهتمام كبير في برامجهم السياسية.
وجاءت تعليقاته بعد يوم واحد من تحذير المراقب المالي لولاية كاليفورنيا جون شيانج من أن الولاية ستواجه عجزا في الموازنة بحلول تموز/ يوليو المقبل حال عدم التوصل لاتفاقية.
وقال شيانج إن حال عدم التوصل لاتفاقية فإن الولاية ستتحول إلي وضع المدين وستضطر للجوء إلى الاستدانة والحصول على قروض مرتفعة الفائدة لاستمرار تقديم الخدمات الأساسية.
وأوضح أن إيرادات أكثر ولاية أمريكية مكتظة بالسكان انخفضت بمقدار 14ر1 مليار دولار أي بنسبة 7ر17% في أيار/ مايو الماضي، ووجود 827 مليون دولار أقل من المتوقع في أحدث خطة موازنة الشهر الماضي.
من جانبه، قال شوارزنيجر إن الحصول على التمويل الطارئ أمر مكلف للغاية وإن تهديده بإغلاق الولاية أمر مطلوب لحث المشرعين على التصرف.
تحياتي