ankawa
منتدى الهجرة واللجوء => الهجرة و واللاجئين => الموضوع حرر بواسطة: ابو بشات في 02:54 19/06/2009
-
اليوم من فتحت بريدي لكيت تنبيه من عين كاوة بوجود رسائل من اولاد اعزاز على اكليبي
وفتحت الموقع وشفت موضوعتي عن اول مشكله في امريكا والله طفرت الدمعه من عيني واني اشوفكم امحاوطين الكلب بالنصائح والابتسامه
اوليداتي انتم مثل الجرح كل ما اكولن اه احس بيكم اهلنه اللي ايشولون الجرح كبل صاحبة
مشاغل امريكا اهواي بس ما تمنع ابد الكتابة الكم حتى نتشارك الضحكه والخبره والدمعه
بس احيانا المنغصات اتاجل الكتابة وسماع ضحكتكم او اخباركم
عندي والله خوش مواضيع يمكن اتفيدكم بس احتاج اطبعهه وانزلهه للمنتدى
ورسائلكم اللي شجعتني اكتب الكم من جديد هية نفسهه اتخليني اعيد نشر موضوع ما محظوظ كل ما انشره تلتف عليه حيّة لو ينحذف لو ينقل اتخيلوا لكيته بالارشيف في استراحة الشباب اتخيلوا عمكم ابو داوود رايح يكتب باستراحة الشباب ولو شبابنه على الراس بس اشويه واكفه احسهه
سالفتي عن الناس اللي سبحانه ابتلاهم بخلل نفسي او عقلي واشلون اجو لامريكا وشلون اهاليتهم اكثر خلل من اولادهم لان ما اعانوهم بل خبلوهم بالزايد وهم احجي على موضوع مهم هو حقوق الجيران وقضية الازعاج وتدخل الشرطه وطبعا اكيد اكو ما بين السطور اكثر من اللي كلته
وهسة احجيلكم سالفة اليوم
جنت كاعد انتظر موعد مقابلتي ويه المحلفين راجعت ابالي التواريخ للمره الالف
سمعت صوت خشن يوحي ابصوت شايب كاتلته الجكاير وبالذات المزبن التفت صدك ارتبكت امريه ابنهاية الاربعينات من العمر وهيه اتعيد السؤال ..اكلك خويه ذولي اللي راح ايقابلونه وياهم طبيب
ارتبكت حيل اولا الصوت طلع صوت مره وبعدين سالفة طبيب ويه المحلفين اربكتني بالزايد يعني ايصير اكو جهاز كشف الكذب لو...كتلهه اختي ليش اتسالين مريضه وغمزت بعيونه ابراءه وكالت بعدين تعرف
صار عندي فضول ورغبه فضيعة ان اعرف بلكت عدهه معلومات جديده ما اعرفهه
كلتلهه اختي شنو الموضوع رحمه لاهلج فيدينا...باوعتلي مثل متباوع لواحد مسكين واثول كلشي ما يفتهم
كلتلي سمعت واتاكدت اكو طبيب لهذا اتفقت ويه احميد اتفاق ايسوي...
سكتت وسكتت المريه ام صوت الخشن و اني يا جماعه ابوجه لجوء واي معلومه مستعد ادفع عليهه جزء من عمري كلت ابصوت واطي حتى اتحس بالاطمئنان..احميد منو
باوعتلي بانزعاج كاني اهنتهه من سالته منو احميد وخوفا من ردة فعلهه كتلهه اعذريني المايعرفك ما ايثمنك لان صار عندي يقين انو احميد هذا لو يشتغل بالمنظمه لو مترجم المحلفين
شفقت على حالي وكالت خويه احميد ابني زينة الشباب صدقه لطوله من يمشي اسد ومن يوكف صكر ومن...
وكبل متكمل الاغاني الحماسيه عن ابنهه احميد اجو ولد ازغير يركض وهو ايصيح يمه لحكي اخوي حمودي
ام احميد كامت ابهدوء وغمزت وعضت شفه وكالت بصوت يشبه صوت اي واحد امسوي مؤامره..شوف السبع هذا جزء من اتفاقي وياه وراحت ويه ابنهه الثاني وهي اتباوعلي وتبتسم ابتسامه جنهه اتكلي شوف اشلون احميد عندي
ظليت كاعد واني خايف ايصير احميد هذا مسؤول اهنا وهسة اتعارك علمودنه احنه اللاجئين لو هذا...
بعدني واني افكر سمعت صوت جماعه من العراقيين وهيه اتصيح ابصوت عالي عزيز روح انته من ذيج الصفحه لتخاف كامل واكفله بالباب دير بالك لا ينهزم
اشو العالم كامت تتطافر من يمي والنسوان اتصيح يمه ... اني رجعت اشويه على الحايط وصرت قريب من الحمام كلت لروحي احميد علكهه واذا صار شي اسرع ختله بالحمام
فجاة يا اخوان شفت تنور مال غاز حاطيله رجلين ويركض بس بدل ما امصخم املبسيه دشداشه بيضه هذا التنور اجه ركض ودفعني من يم الحايط وختل وراي طبعا اتشاهدت اكيد اكو بيده سجينه وراح ياخذني رهينه والناس شكلوا حلقه نص قوس اكبالي وهمه ايدردمون ويحجون وفجاة انشقت الصفوف وظهرت ام احميد وصارت قريب من وجهي كلت راحت عليك يبو داوود هاي من البدايه متفقين اني الرهينه اليوم اكيد هذا احتجاج على الامم المتحدة لعد ليش هاي ام حميد سالتني اكو طبيب ويه المحلفين اشو ام احميد هم غمزتلي من جديد وهمست وكالت هاي الشغله بالاتفاق وفجاة رفعت صوته وكالت ولك احميد اروحلك فدوه كلشي ما اريد منك ولا عمامك يردون شي بس ناخذك للحمام
واني بعدني ما مفتهم شنو علاقة الحمام واحميد التنور الورايه اللي هوه زينة الشباب وفجاة تنور الغاز او احميد زين الشباب مد اديه وشبكني من وره وهو ايجوعر ما ما ما مااااااااااا
فجاة اشتميت ريحة الدمن مال الحدايق افترت ام احميد ورايه ابهدوء وهيه تهمس لا تتحرك تره هذا بالاتفاق واستدارت وصارت وراي اني انكمشت ابمكاني وشفت احميد تسحبه امه ابهدوء ومن صار كدامي شفت سرب من الذبان يمشي وراه وامسوي مضاهرة وتكاتف بحيث اي ذبانه ما عدهه مكان توكف بيه امجلبه ابغيرهه وصايرات مثل ضفيرة مايكل جاكسون ابوحده من موديلاته يمشي احميد زين الشباب ووراه على الكاع بوله صفره مثل عصير برتقال حاطين فوكه دبس طبعا الجماهير اتراجعت واحميد زين الشباب حذاءه ايطلع صوت مثل الواحد ماشي ابوحل لان الفوك نزل على....العالم ساده اخشومه التفتت عليه ام احميد وهيه تغمز هاي من ضمن الاتفاق وصاحو اسمي وما اتذكرت غير زين الشباب احميد والذبان وره دشداشته امسوي نفير عام والريحة جعلت حفاضة الاطفال عطر بالقياس الى اللي سواه احميد بالاتفاق مثل متكول امه
ومرت ايام ورحت استلم الظرف وشفت ام احميد اهناك فجاة بشت وهشت بوجهي ورحبت مثل اي معرفة قديمه طبعا اني اتلفتت ادور اكو ذبان لو لا حتى اعرف احميد اهنا لو...
ضحكت ام احميد وهيه تغمز وهمست بالاتفاق كل الي صار بالاتفاق وشوف طلعت الموافقه ونتشاوف ان شاء الله بولاية غمزت ونصت صوتهه وكالت اسم ولايه ابسرعة يشبه اسم الولايه اللي اني طالب لجوء بيهه
عفتهه وما فكرت اني هسه ارجف واريد اعرف الموجود بالظرف لان اولاد الكلب ما رضو ايكللولي بالتلفون طالعه موافقتي او رفض
كعدت وسمعت صوت واحد من الشباب هاي المسكينه ابنهه امخبل هم زين راحوا يا خذوه لامريكا بلكت ايعالجوه ما اعرف ليش اشتميت ريحة الدمن من جديد رغم ان كلبي انكسر عليه استغفرت الله وكلت يا رب اتسهلله
ومرت الشهور ورحنه لامريكا وبدت الحياة اهناك تاخذ مجراهه بالتعلم ومحاولة التكيف ويوم رحت لمركز التوطين اقدم على الكرين كارت سمعت صوت خشن ايكلي الدنيه ازغيره اشلونك خويه
التفتت شفت امريه شكلهه امرتب وما يتناسب ويه صوتهه باوعت احاول اتذكر
كلتلي اشبيك اني ام زينة الشباب ام احميد وكبل لا افك حلكي كلتلي انسه ذاك اليوم لان كل اللي صار بالاتفاق احميد هسه مطرب وبعد يومين عنده اول حفله امانه عليك اتجيب الجهال والمره اليوم لان اليوم عيد ميلاده وراح ايغني هاك هذا العنوان ...وبدت تكتب على ورقه بدون ما انطتني مجال احجي كلمه انطتني الورقه وهي تهتف زين الشباب راح ايغني عمرك خساره اذا ما جيت
انطتني العنوان وراحت تركض باتجاه الباص
عرفت من ولد عراقي موجود بالتوطين انو هم معزوم وكلي وهو يبتسم احميد عالجوه اهنا وهسه صار صدك زينة الشباب...الصدك ارتاحيت على الاقل ترتاح امه وايصير من حقهه تفتخر بيه بس سالفة الحفله وعيد الميلاد بقيت متردد اهواي بالاخير قررت اروح وحدي لان اذا اخذت داوود راح ايخبله للولد من جديد
وبالموعد وبيدي باقة ورد مكتوب عليهه ان شاء الله مطرب صاعد مثل النجوم واتصير زينة المطربين وكفت بالباب سمعت صوت دنبك ايهز هز ردت ارجع لان اعرف مشكلة ازعاج الجيران اهنا واني مالي خلك وانتظر الكرين كارت واي مشكله ممكن اتاخره واني بعدني متردد انفتح الباب وطلعت ام احميد وهيه اتلعلع ابصوته يا هله شفتك من الشباج فوت فوت يا هله يا هله
دخلت واني اتثر بخطواتي شفت عائلتين كاعدات وهذا الرجال الاحمراني اللي شفته بالمنظمه كاعد وحده وراسا صاحت ام احميد..ايها الحفل الكريم رحبو ويانه بالضيف العزيز ابو داوود
طبعا العائلتين كلهم ما بيهم ست اشخاص وهذا الاحمراني اشلون صار حفل وجمهور ما ادري صفكوا العائلتين ابحماس وجفلت جفله اخت الموت واني اسمع رشقة دنبك جنهه مقومة طائرات انتبهت واحد من اللي ايدكون خشابه شايفة عدة مرات بالمتنزهات اجه يتطوطح ومدلي الدنبك بدل ايده شميت ريحة العرك اتعط ضحكت ابخجل وضربت على الدنبك ضربه خفيفة وردت اروح ركض اكعد يم الاحمراني سمعت صوت ام احميد هاي وين ابو داوود غير اتسلم على زينة الشباب زاد خجلي التفتت شفت تنور الخبز الغازي صدك متحسن ملابس لماعيه مال مطربين مديت ايدي ابخجل وانطيته باقة الورد اشار احميد للدنبكجي وكلي ابصوت ناعم انطيهه لمدير اعمالي الدنبكجي ابسرعه نزل اكلاص العرك من ايده واخذ باقة الورد وحطهه على واحد من الكراسي البعيده احميد كلي ابصوت ناصي روح استريح انته الحظ كاعد وياك لان راح تسمع صوتي
عجبتني ثقته ابنفسه وكلت هاي الحجايات اكيد بالاتفاق ويه امه كعدت يم الاحمراني وسمعت خرطة دنبك وصاح احميد باعلى صوت يمكن يطلع من كائن بشري
البط يلعب بالشط...والسمج يشرب سوبي
وحبيبي جان امكمط...وهسه يركص جوبي
وانوب انوب النوووووووووووب
واشتغل رمي الدنبك وتصفيق العائلتين باوعت للاحمراني شفته ايهز راسه بانزعاج كلت يا الله اكو واحد مثلي ما عاجبه الوضع واندك الباب ووسط الهوسه راحت ام احميد تفتح الباب شفت امريكي ايدردم ويحجي بانزعاج كلت ماكو فايده راح اتصير مشكله خلي افلت وتوني كمت اجتني ام احميد وكلتلي هاي وين رايح لتخاف ذولي الجيران ايكولون صوت احميد حلو بس ياريت ايغني ابصوت واطي...الاحمراني اتبرع من يمه وكلي اكعد لان هسه راح ايغني اغنية فريد الاطرش يبو ضحكه اجنان (طبعا للامانه ما ادري اذا احميد غنه هاي الاغنيه بس ما اعرف ليش كل ما اريد اتذكر يا اغنيه غنه اتلح هاي الاغنيه ابالي )
ويا عيني على احميد وهو يغني يبو ضحكه اجنان مستحيل ما تتذكر كل فواتح الناس اللي اتحبهه بالعراق
ويبو ويبووووو ضحكه والله ضحكه يبوووووووووو اجنان اجنان اجنان...ورشقات دوشكة الدنبكجي طيرت كل طيور الولايه واندك الباب دكه خزعليه اقصد قويه واذا بالاحباب الشرطه مبتسمين واديهم متاهبه يم مسدساتهم وكمز الدنبكجي وهو يحجي ابهدوء اموجه كلامه اليه ابشرفك ابو داوود من اجيت دكيت على الدنبك لو لا كتله أي دكيت لان انته قدمت الدنبك بدل ما....وصارت سكته والشرطي يتقدم باتجاهي
وما اطوله عليكم اخذونه كلنه جمعت حبايب ما شاء الله واني واحميد وامه ابسياره وحدنه لان احنه راس البله
كعدوني يم الشباك وابصفي احميد وبالطرف الثاني ام زينة الشباب طبعا احميد عركان ويدردم جنه محصور اغنيه بس الخوف من الشرطه امسكته
ومشت السياره وطيط وما طيط واني اقره ايات ابكلبي وادعي تخلص القضيه ابخير ام احميد تهمس باذن احميد لتخاف حبيبي باجر اسويلك احلى من هاي الحفله الشرطي ايخابر والتفت على احميد وساله وتز يور نيم
طبعا احميد ما ادري ليش كطع النفس ...صاح الشرطي وتز يور نيم...وابصوت يرجف ومكتوم طلع الكلمات وهوه ايدندن بيهه...ضحكه اجنان مليانه ححححححنان
الشرطي صاح وات
احميد انطلق صوته وجوعر ابخوف
يبوووووووو ضحكه اج اج اج نا نان مليا نه حححححنننننننننننننان ..يا اخوان من كال نااااااااااااان الاخيره سمعت خرطة دنبك طلعت من جوه تنور الغاز اقصد احميد وكبت ريحة الدمن كل بالوعات الدنيه صارت بالسياره باوعت من الشباج شفت رغم البرد مجموعه من الذبان واكفه على جام السياره...وكلت لام احميد ابصوت واطي هاي الشغله من ضمن الاتفاق مو...
واستمر احميد (ابو ضحكه اجنان) وكل اصوات الدنابك تطلع من جوه التنور اقصد زينة الشباب وسيارة الشرطه على الخط السريع وكل ذبان الولايه يتبع السيارة
وتسلمون لعمكم ابو داوود
-
ههههههههههههههههههههههه
و الله يا عمي العزيز سالفة تخرب من الضحك
إن شاء الله ما يكون الموقف الرهيب أثر على مسألة حصولك على الكرين كارد ؟
و الله أني دا أفكر هسة إذا لا سمح الله رفضوني المحلفين ، دأفكر أقدم ورقة إستئناف ، بس أكتب بيها هاي القصص مال هؤلاء اللاجئين التحف حتى بس يعرفون شلون قراراتهم صائبة ههههههه.
الحمد لله أنه شفنا مواضيعك من جديد ،و فرحتنا عودتك للمنتدى .
الله يديم سواليفك الرائعة
في الحديث الشريف: "لا تقوم الساعة حتى يكون أسعد الناس بالدنيا لكع بن لكع"
و اللكع عند العرب هو اللئيم الوسخ القذر المستعبد
و لله في خلقه شؤون !
-
اتعذروني من المبايل اكتب
وليداتي وينك وشمعه اشكركم والله مشاعري خلتني لو اني مسؤول بالامم المتحدة جان...
وليدي شمعه ودوم شمعه
اشجاب العظيم عادل امام على عمك ابو داوود
ةليدي اني مو مءولف قصص اني احجي تجربتي ويه الوادم
وبعدين ايجوز انته سمعت اكو اشخاص كعدو على البطاله حتى ايكولون احنه كذا ويحصلون لجوء
لازم نعرف اللي ايصير اهنانه
وكلمات بسيطه مثل دمن وغيرهه راح تسمعهه اهنا واتشوف الابشع من السمع
ةليداتي
اللي انرفضه هذا ابد ما ينطينه تبرير حتى ما انسمعه
الحياة اهنا غصبن على ابو داوود ان تعرف او نتلفظ حتى الاشياء اللي ما نعرفهه او من لا بد نسمعهه
بس مو بالضرورة ابد ابدا انمارسهه
بعدين حديثنه طويل حول موضوع من اللاجيء اللي يستحق
تسلمون
-
ياهلا بيك عمي ابو داوود والله يمكن متصدك اليوم جنت داخله على ارشيف المنتدى وادور على كتاباتك لان صدك حلوه وتلقائيه ,,,, وياريت تكتبلنا اكثر والله ينطيك الصحه والعافيه وتنور المنتدى
اختك
سماره
-
العم ابو داوود
هاي القصة ضحكت هواية من كتبتهه اول مرة وهسة من قريتهه مرة ثانية بعد ضحكت اكثر
لتحرمنة من مشاركاتك الجميلة وياريت لو تكمل جميلك وتكتبلنه عن المنغصات اللي اكيد بيها فائدة للكل وخصوصا وانت ان شاء الله طاب على السنتين بالستيت حسب ما اتذكر...........الف شكر
-
مشكور عمي ابو داوود على هاي القصص بس والله متت من الضحك على تنور الغاز عبالي من صدك هههههههههه
نتمنى تتواصل ويانا على طول وتكتبلنا عن تجاربك والله يطول عمرك وينطيك العافية
-
مرحبا ... شلونك عمو ابو داوود سعيدة جدا بهذه الطلة الحلوة على المنتدى وبصراحة أنا ماكنت اعرفك بس لما قرأت احد مواضيعك القديمه التي قام بتحديثها احد الاخوة مشكورا بصراحة شفت نفسي ابحث بالارشيف عسى ولعل ارى قصة من قصصك الرائعة ... اتمنى انه ما تبخل علينا بهذا الابداع والاسلوب المشوق وهذه الخبرة بالحياة التي لاتقاس بالمستوى الاجتماعي او التعليمي .
سلام خاص لداووووووووووووووووووود
-
أخي ابو بشات المحترم
رحمه لوالديك لاتحرمنه من سردك للحقائق والتجارب اللي مرت عليك والله هاي المواضيع اني قاريتهه سابقا لكن قريتهه مرة اخرى هم واحد شويه يضحك وهم يعرف شكو ماكو ومن يوصل الى امريكا انشاء الله يكون عنده شويه معلومات وفعلا لازم الانسان كلشي يشوف ويسمع لكن مو بالضرورة يمارسها وعندي سوال اخير اذا تسمح لي, شخبار صاحبك اللي جان يغمز بعيونه لمن رحتو تصلحون الثلاجة ومن راد يتزوج وين صار شحل بي الدهر,مع تحياتي للعائلة الكريمة.
-
هههههههههههههههههههههههههه حلوة و قوية و عاد انتهت على خير لو شنو يمعود شلك بأحميدو و امه هذولي مشكلجية هههههههههههههههه
-
ههههههههه عاشت أيدك أخويه أبو داوود والله سوالفك مشوقه وياريت تبقى متواصل ويانه بوقت لفراغ بس معقوله وصلت لهذا لحد حت تحصل لجوء ام حميد
-
اخوية ابو داوود مدكلي انت بيا ولاية واذا متريد تكول كلي انت بالولايات الشمالية لو الجنوبية ;D ترة مابية حيل اروح عيد ميلاد احميد ههههههه
والله ضحكت ضحك على موضوعك سمعت الجيران ;D
عاشت ايدك
فحامي
-
و اللهاني همين خربت من الضحك خصوصا هذا احميد و الذبن الي وراة هههههههههههههههههه مسويين ازدحام و الذبان ما عنده محط رجل يوكر على احميد ههههههههههه
-
عاشت ايدك خوية ابو داوود والف رحمة على اهلك
ابو الحسن
-
نورت اخويه ابو بشات وعاش من سمع صوتك انشاءالله بخير
بس اني يمكن قاري هاي السالفه منك بس بس تدري هم ضحكت عليه مره ثانيه وكل شي دكوله يطلع منك عسل
تحياتي
-
واخيرا ... عمنا ابو داوود رجعت للاضواء من جديد والحمد لله على سلامة وصولك للمنتدى سالما
بصراحة جدا فرحت من شفت اسمك بالمواضيع واحنه دائما بذكرك ومننسى مواضيعك الشيقة والجميلة
بيناتنا الحجي (نريد موضوع جديد هههههههه)
تحياتي لك وسلامي للجميع
-
الغالين اولادي سبع صنايع وسمارة والشمريه
بيني وبينكم هذا الموضوع انقصف عدة مرات بالحذف وغيرت اسمه بلكت يسلم من المشرفين
رجاءا لتكولون
ودايمين لعمكم
-
myiraq ..hana2008 ..taif_alsaad1982
وليداتي الغالين
ما كو سعادة احس بيهه اكبر من ضحكه ومعلومه ازغيرة اتمر عليكم وانتم تنتظرون فرج الباري
اني اللي اشكركم
ودايمين لعمكم
-
اشكرك وليدي شيبو واقسم ايصير اكثر من اللي سوتهم ام احميد من اجل اللجوء
وليدي فحامي نصيحه بطل من اللجوء ما دام ام احميد موجودة
طبعا اتشاقه واي شي تحتاج امانه راسلني على الخاص واكيد ما اقصر ويه وليداتي
-
خويه الغالي والجبير باخلاقك ابو الحسن
اني اللي ادعي لوالديك ووالدين كل وليداتنه
اتشرفت بيك وزعلتك ويه انجي بنتنا على مود ابو البشات راح احجيهه الك بالتفصيل ليش اني ابو بشات وان شاء الله هاي اليومين تقراهه
على راسي اخوي وعضيدي ابو الحسن
-
ياهلا وميت هلا بعمي ابو بشات نورت المنتدى كل الهلا وكل الهلا بمواضيعك الرائعه ربي يطول عمرك بالصحة والسعادة دائما منور عمي ابو بشات
-
وليدي عكعك وانته اخوي ابو محمد
مو كلنه خلوهه سكته وغيرنه العنوان حتى ايمر الموضوع سلامات
يعني لازم اتنبهين المشرفين يعني كوه تردون اتقصفون الموضوع
والله بدون شقه انتم يا غاليين سؤالكم عني واحجاياتكم تنزل على اكليبي وكاني كاعد بين اهلي
سالم يا عكعك ويا ابو محمد
ودايمين يا رب لاهلكم وللجميع
-
ابنيتنا الغاليه انجي
كل الهله بالمهلي وصاحب القلب الجبير
دايمه ابنيتي
-
السلام عليكم
مشكور عمنا العزيز ابو بشات والله فريت القصة بصعوبة لان ما اكدر افتح اعيوني من الضحك و ذبيت ادموع يمكن عمري كلة ما ذاب هيج ادموع
ربي يوفقك ويطولنا عمرك
تحياتي الك
-
اخواني واخواتي الاعزاء وكل من تفاعل مع هذا الموضوع الرائع ومع كاتبه الاروع
هذه روابط لمواضيع ابو بشات حسب التسلسل التاريخي لكتابتها وباسمه الجديد "ابو بشات" لمن يرغب بالاطلاع على المزيد من هذا النتاج الراقي:
http://www.ankawa.com/forum/index.php/topic,246461.msg3497755.html#msg3497755
http://www.ankawa.com/forum/index.php/topic,246994.msg3500805.html#msg3500805
http://www.ankawa.com/forum/index.php/topic,247075.msg3501662.html#msg3501662
http://www.ankawa.com/forum/index.php/topic,247340.msg3503726.html#msg3503726
http://www.ankawa.com/forum/index.php/topic,247888.msg3507430.html#msg3507430
http://www.ankawa.com/forum/index.php/topic,248115.msg3509133.html#msg3509133
http://www.ankawa.com/forum/index.php/topic,249147.msg3516267.html#msg3516267
http://www.ankawa.com/forum/index.php/topic,249432.msg3517875.html#msg3517875
http://www.ankawa.com/forum/index.php/topic,249570.msg3519040.html#msg3519040
http://www.ankawa.com/forum/index.php/topic,310610.msg3941095.html#msg3941095
واما المواضيع التي كتبت باسمه القديم فارجو من احد الاخوان الاقدم مني ان ينزلها او يعطينا الاسم القديم لاني بصراحة ما ملحك عليه
ودمتم للنظال