ankawa
منتدى الهجرة واللجوء => الهجرة و واللاجئين => الموضوع حرر بواسطة: راهب الحب في 15:34 20/06/2009
-
أخواني الأعزاء ... السلام عليكم
تحيـة طيبـة .... وبعـــد
عندي موضوع مهم جداً وحايرين بي هوااااية وأتمنى أقرأ نصائحكم وأرائكُم بهاي الشغلة وخصوصاً إللي يعرفون بهاي الأمور خلي يجاوبوني إجابة دقيقة رجـــاءاً .. وأشكركم مقدماً على مشاركاتكم بإبداء الأراء وأتمنى التوفيق والإستقرار للجميع ودمتم بألف خيـــر ... †
وصلنا لمراحل متقّدمة لتوطينا في أمريكـا وقبل أيام إتصلوا بكفيلنا ووقع الأوراق وگالوله راح يجون بعد شهر وحضّرنالهم شقة 3 غرف نوم وصالة قريبة من المدارس وما متأكد إذا هي شقة وحدة لو شقتين لأنه إحنا عائلة تتألف من 7 أفراد وكلتنا بأعمار شباب وبسن الزواج ووجهتنا هي إلى ولاية نيفادا / لاس فيغاس ...
وبنفس الوقت جان عدنا معاملة لجوء إنساني لأستراليا ولحسن حظنا وأخيراً بعد 7 رفوضات متكررة وخلال هاي السنين الخمسة إللي عشناها بسوريا قبلونا هسة ودزوا فورم (80) لكفيلنا وراح ننتظر المقابلة والمفروض بعد شهور ... أريد نصيحتكم هل يمكن تجميد توطين امريكا لو لأنهُ وصلت لهاي المرحلة ما يصير إلا نرفضها ؟؟ ادري راح تگولون عصفور باليد خير من عشرة عالشجرة وأستراليا تطول إجراءاتها إلى سنة أو أكثر حتى تسافر ما تنحزر بنفس الوقت يعني ( مغامرة) ولكنها تستاهل الإنتظار لأنها بلا شك ماكو مقارنة بينها وبين أمريكا بمسألة الحقوق وراحة البال والرفاهية .. والسبب الأهم إنه إحنا شباب يعني خياراتنا أفضل بأستراليا كشباب من ناحية الإستقرار و الزواج بسرعة ولا تنتظر كرين كارد ولا جنسية حتى تسحب زوجتك إذا هي خارج امريكا ... فأتمنى من إللي عنده إلمام بهذا الموضوع ينطيلي رأيه بكل صراحة وأشكركم مقدماً ودمتم بألف الف خيــر متمنياً إلكم الإستقرار بأقرب فرصة .... †
أخــوكــُم
وسـام بهنـام داؤد الخابــوري
دمشـق / سوريــا
20/6/2009
-
اخي العزيز ان شاء الله الاخوان ميقصرون وياك بالاجابات... بس حبيت اكلك مثل ما انت ذكرت عصفور باليد احسن من عشرة على الشجرة بس مع ذلك كل انسان اعرف بضروفة و مصلحته وين
الله يوفقك ان شاء الله على اي خطوة تقوم بيها
تقبل مروري اخوك ابو داليا
-
عمي الله يساعدهم
اني ما اكولك عصفور باليد خير من عشرة على الشجرة
عمي اكولك
عصفور باليد خير من خروف على الشجرة
عمي باجر واستراليا كالت الوضع اتحسن والحياة تخبل بالعراق ؟شتسوي ؟
وعقلك براسك تعرف خلاصك
ابو الحسن
-
السلام عليكم
والله اخويه اني اكَول ارضى بالنصيب وسافر امريكا . وبعدين سياسات الدول بهل الايام ماتنحزر . وخصوصآ من قبل حكومة العراق وانت تدري هذا هوشيار زيباري يوميه مسوي فد مكسوره جديده للاجئين العراقيين . اخويه روح لامريكا احسنلك لتروح بعدين تشوف نفسك بطريبيل .
ابو انس
-
الاخ العزيز وسام
تحية طيبة
بالنسبة لمسالة السكن فطبعا الكفيل عنده الخبر اليقين كونه هو الذي وقع على اوراق الكفالة ولكن باعتقادي كونكم 7 اشخاص سوف تكون شقة او بيت مكون من 3 غرف نوم وصالة, اما ما يخص مسالة اللجوء الانساني الى استراليا فهذه النقطة مبهمة نوعا ما وتحوي الكثير من الاستفسارات!!هل تم قبول اعادة توطينكم في استراليا من قبل الامم المتحدة او بصورة مباشرة بواسطة كفيل في استراليا؟ وفي حال كون التقديم مباشر فهل يضمن الكفيل قبول جميع افراد العائلة للجوء والسكن في استراليا لانني التقيت بكثير من الحالات التي تم قبول بعض افراد العائلة دون البقية وهو موقف صعب جدا. انا اتفق معك ان قوانين اللجوء والحقوق للفرد هي اضل في استراليا منها في امريكا بالاضافة الى وضع العمل والسكن ولكن في حال تم اخذ القرار بالتوجه نحو خيار استراليا فليس لديك الان اي خيار سوى رفض اعادة توطينك في امريكا واغلاق الفايل اي ليس لديك الحق في اعادة توطينك في امريكا عبر منظمة الاي او ام وهو خيار صعب يجب عليك التفكير مرارا وتكرارا قبل خسارة هكذا فرصة وفي كل الاحوال انت اعلم بظروفك والله المسهل وتقبل تحياتي
بغدادي
-
انت لاتحتاج الى نصيحة لان انت ذكي عارف نقاط الضعف والقوةبكل تفاصيله ,انت اكثر واحد ممكن يقرر صح لان ماعرف عنك ولاظروفك ولالالالالالالالالالالا
ركز وقرر هاي نصيحتي الاخوية واتمنى من الله ان توصل الى القرار الحكيم
-
ارضى بنصيبك ولي يقسمه ربك وربك هو مقسم الارزاق
-
اخويه ال un شلون توطنك على دولتين في ان واحد واذا تقصد انك مقدم مباشر على سفاره استراليا
فكل شيء يمشي بمسار خاص بس انته مراحل امريكا واصله نهايتها ونعرف ان اجراءات استراليا طويله جدا والنتيجه بها مجهوله فمن ناحيه المنطق والعقل يكول (عصفور باليد) ولكن ما اعتقد تقدر ان تؤجل قضيتك فتره طويله ويتوجب عليك ان تختار بي امريكا والتي هي سهله المنال وبين استراليا والمجهول وانته صاحب القرار باختيارك
-
اخي وسام
طبعا موضوعك جدا شدني وبشكل اتاثرت بوضعك وحقك انت بوضع جدا جدا حساس لكن الاهم انه انت سيد الموقف
وانصحك اخي انه تفكر جيد بالموضوع وانصحك ابد لاتتسرع بقرارك
ولو لو كنت اني بدالك اترك للامور على حالها وامشي ع الحبلين لان اكيد واحد منهم راح تكون نهايته اظمن واسرع
وين متصير اول شيء كمل بطريقها لان افضل من تجيك فرصتين وتختار وحده منهم وبلتالي متصير او متكون من نصيبك وبعدين حتى الندم ميفيدك
حقيقه اخي اني خطيبي تقريبا اله نفس المشكله ولو همه لحد الان ممخابريهم ع التوطين لكن كايليلهم انه ملفك يستوجب التوطين وهمين حايرين في حاله صارت شغله اليو ان
لكن نصيحه من اختك اترك الامور كما هي وانتظر النتيجه من يامكان تجيك وكمل بالطريق
ويارب يقربلك الطريق الافضل وشكرا
الاشوريه
-
أصدقائي ألأعزاء ::
أشكركم جداً على نصائحكُم وأرائكُم المفيدة إلي بس حبيت أوضّح بعض الأمور وهي :: أنه كفالة أستراليا مو توطين على ال IOM وإنما على الكفيل أكيد ومن قبل ما يبدي التوطين بسوريا أصلاً إحنا هاي خمس سنين نقدم على أستراليا .. وأني من كتبت ما گلت إنه راح نرفض توطين أمريكا وننتظر مجهول أستراليا بس حبيت أستفسر لا أكثر .. أكيد إحنا باقيين لأنه هواااية ناس گالت إحتمال من ترفضوها ينغلق الملف ..
وبالنسبة للسكن إتأكدت هي شقة وحدة وأبلغوا كفيلنا وهي خالتي بأنه تريدهم يجون يمك لو نشوفهلم سكن وبعد ما خابرنا كفيلنا حتى نقرر گلنا نريد سكن بوحدنا لأنه عددنا جبير 7 أفراد فگالوا حضرنالهم شقة 3 غرف نوم وصالةوراح نتكفلهم 8 أشهر فقط وقريبة من المدارس ....
أكيد بالتالي إحنا ما نريد نخسر المضمون وننتظر المجهول وخاصة توطينا ما شاء الله ب 3 شهور كملّنا حتى فحوصات وخابروا كفيلنا ووقع الأوراق وگالوله بعد شهر يجون .. وإحنا اهنا حتى ظرف الموافقة الرسمية ما إستلمناه بعد ...
أشكركم جداً أخوتي وأدعيلكم بالتوفيق والإستقرار والله الموفـّق ...... †
أخــوكــُم / وسـام بهنـام داؤد الخابــوري
دمشــق / سوريــا
21/6/ 2009
-
اخويه العزيز وسام تحية طيبه
خلي في بالك اذا دزيت الفورم 80 يعني بعده فحوصات وبعد الفحوصات تنتظر مابين ال6 اشهر والسنه الى الطيران خلال هاي الفتره انته راح تكون مكمل اجراءات التوطين الى امريكا واذا مقبول بخير وسلامة على امريكا راح يتوقف الامكريشن مال استراليا هذا كلامي من تجربته احد اصدقائي اللي هو انرفض 3 مرات من سوريا وبالاخير قبلوا ودز الفورم 80 وبعدها اتصلوا بي اليو ان على فحوصات امريكا يعني انقبل بعد اسبوعين اتصلوا بالكفيل باستراليا بلغوا انه ملفه نغلق لانه مقبول امريكا
نصيحتي الك كمل اجراءات التوطين الى امريكا خلي هيه تكون هدفك الاول وفي حالة انرفضت من الامريكيه انته معاملتك ماشيه مال استراليا والتوفيق من الله
-
الاخ العزيز وسام
ما زال قطعت شوط كبير من مشوار امريكا وجميع التفاصيل تمت بهذه السرعة فتوكل على الله لان حسب كلامك بعدة شهور انكتبتلك امريكا بينما انتظرت عدة سنين استراليا ولحد الان لا شيء سوا بعض الامال الغير مضمونة..رايي عسى ان تكرهوا سيئا وهو خير لكم فتوكل على الرب وانشاءالله تتسهل امورك في امريكا وتجدها افضل من استراليا
تقبل تحياتي
بغدادي
-
أخوية العزيز بغدادي 73 ::
أشكرك على ردك إلي وأكيد أخي العزيز إحنا منتظرين وما راح نرفض ولا نحجي شيء وهي الأيام دتمشي ونشوف شيصير ....
تحياتي لكل أخواني إللي جاوبوني وأتمنالكم الإستقرار والطمأنينة وراحة البال ودمتم بألف خيــر ... †
أخــوكــُم / وسـام بهنـام داؤد الخابــوري
-
الاخENG. MEDOO المحترم
ارجو ان توضح في كلامك من الذي اتصل بالكفيل في استراليا وابلغه ان الملف انغلق لان توطنو الى اميركا
عزيزي ان اللجوء الانساني الخاص الى استراليا عن طريق الكفيل ليس له اي علاقة بال يو ان فمن الذي اتصل بالكفيل ولماذا ينغلق الملف حيث لا يوجد اي اتصال بين برنامج اللجوء الانساني الخاص لاستراليا بال يوان
الرجاء توضيح كلامك مع شكري وتقديري
-
اخي العزيز BSRBSR
الشخص المسؤول عن الملف في استراليا اتصل بالكفيل وابلغه بالرفض بسبب القبول عن طريق اليو ان الى امريكا وهذا ماحددث قبل اكثر من شهر
-
اخي اني راح اجاوبك باستخدام مجموعة من الامثال الطريفة:
عصفور باليد خير من عشرة على الشجرة - مثل عربي
وكلني اليوم جوعني باجر - مثل بغدادي
الخير فيما اختاره الله - مثل عربي
روح والهوة ابضهرك - مثل بغدادي
التاكلة احسن من التنوعد بيه - مثل من منطقة الفرات الاوسط
مع تحياتي
رائد
-
السلام عليكم اخوية العزيز اتوكل على الله وكمل اجراءات التوطين لامريكامثل مكلولك الاخوة وماشالله عليكم بعدكم شباب وتكدرون تشتغلون وتكونون نفسكم والله يسهلها عليكم وعلينة ولضيعها من ايدك عسى ان تكون خير الكم اختك دانة
-
الاخ العزيز ENG.MEDO
اشكرك اخي العزيز على اجابتك لسؤالي
بس الرجاء اخي العزيز هل سمعت مثل هذه الحالات هنا في تركيا اذا انت الآن في تركيا لاننا ايضامقبولين ضمن اللجوء الانساني على استراليا وننتظر المقابلة وفي نفس الوقت تحول ملفنا للامريكية ولكن لم يتصلو بنا عالفحوصات حيث كانت مقابلتنا الثالثة اي مقابلة المحلفين يوم 1 حزيران ولحد الآن لم يتصلو ا لاجل الفحوصات
علما ان كفيلنا في استراليا اتصل بدائرة الهجرة واللجوء الاسترالية في ملبورن للاستفسار عن وجود اي علاقة لمعاملة اللجوء الانساني لاستراليا بال يو ان فاجابوا ان لا علاقة لهم ب اليو ان
مع جزيل شكري وتقديري
-
الاخ الكريم ENG. MEDO
رجاء اعطائي ما يمكنك من معلومات حول الرفض من الاسترالية الذي جاء الى اصدقاءك في سوريا بعد ان توطنو الى اميركا لان هذا الموضوع يهمني جدا فهو مطابق لحالتي
وانني في قلق شديد حول هذا الموضوع
حيث لا اعرف ما العلاقة بين السفارة الاسترالية وملفات اللاجئين الخاصة الواصلة اليها من استراليا وبين ال يو ان
حيث اذا كان ملف اللاجئ محول من قبل ال يو ان الى السفارة الاسترالية يكون هناك علاقة بينهما حول هذا الملف
شكري وتقديري لتعاونك
-
اخي العزيز BSRBSR
صديقي اللي تكلمت عنه هو موجود معي في تركيا ونحن في اسطنبول وهو مقدم من سوريا منذ 2007 ونرفض واضطر للخروج من سوريا اجباري وجاء الى تركيا وسجل على اليو ان واثناء التقديم اي بالمقابلة الاولى في انقرا رفض امريكا وقال لديه كفيل في استرايا وبعد 5 اشهر اتصلوا بي اليو ان واخبروا انه استراليا رفضت الملف لانه مرفوض 3 مرات ورجع على الامريكيا وبعد الكفيل قدم مره اخرى للجوء الانساني في استراليا وفي فتره الانتضار وبعد ارسال الفورم هو قد انهى المقابلات والفحوصات على الامريكيا فاتصل الشخص المسؤؤل عن الكيس في استراليا بالكفيل وكال انغلق ملفه لانه مقبول بالتوطين الى الولايات المتحده هاي كل القصه
واي سؤال اني حاضر
-
أخواني الأعزاء اشكركم جداً لمروركم وابداء أراؤكم البناءة ... المسألة شغلة وقت لا أكثر وبإعتقادي حتى لو تتأخر سفر أمريكا ما راح تأخذ أكثر من 3 شهور ؟؟ ويمكن حتى موعد مقابلة أستراليا ما جاية بعد ؟؟
بصراحة وما اخفي عليكم كلتنا نتمنى أستراليا بلا شك وأمريكا من قبلنا التوطين إلها جان لا حول ولا قوة لا أكثر لأنه ما جنا نملك إلا الإنتظار لأستراليا ؟؟ وأحب أضيف دزيت رسالة للسفارة الأسترالية بالأردن على طريق موقعهم الإلكتروني وبلغتهُم بالقصة كلهاوبالتفصيل الممل بين أمنية أستراليا وتوطين أمريكا ؟؟ وهذا الحجي قبل يومين لأنهُ الفورم 80 وصلنا إهنا لسوريا ولازم نعبي الفورم وندزه للسفارة المذكورة للأردن .. وإجالي الرد بعد ساعة من شخص إسمه أحمد وهو مساعد موظف التأشيرات وهيجي شغلة كاتبلي حولنا رسالتك لقسم الرسائل المستعجلة وطلب مني ادزله الفايل نمبر الأخير للمعاملة والأسم ورقم الهاتف حتى نگدر نقدم المساعدة الممكنة لكني متردد وما جاوبته لحد الآن خوفاً إنه تأثر سلباً على المعاملة و لأنهُ بكل الأحوال ما راح نگدر نرفض أمريكا إذا إجى موعد سفرها ؟؟
تحياتي وإمنياتي للجميع بالتوفيق والإستقرار ودمتم بألف الف خيـــر ... †
أخـوكـُم / وسـام بهنـام داؤد الخابــوري