ankawa
منتدى الهجرة واللجوء => الهجرة و واللاجئين => الموضوع حرر بواسطة: مصطفى السيماتي في 09:51 25/06/2009
-
السلام عليكم
اريد اسأل عن مسألة مهمة اتفيد اهواية ناس بعد وصولهم لامريكا ان شاء الله
يكدر اللاجئ بعد وصولة لامريكا ان يقدم طلب تحويل لحالته من لاجئ الى مهاجر؟؟؟ وما هي الفورمات اللازم يمليها حتى يبدي بالمعاملة؟
هاي المسألة مهمة لليريد يحصل كرين كارد بعد دخولة لامريكا مباشرة(هاي مسموح بيها فقط لجماعة الاس اي في) لان اللاجئ لازم ينتظر سنة يللة يكدر يقدم على معاملة الكرين كارد والمعاملة تاخذ تقريبا اتلث تشر يعني التوتال 15 شهر.
مع الشكر
-
اخوية مثل مايكول المثل العراقي العام ((ماكو هيج بطة تلعب شناو)) يعني انتة دخلت امريكا لاجيء فلازم تكمل سنة حتهة تحصل كرين كارت يعني هية المسالة مو بكيفنهة اكو قانون ثم ان صفة اللجوء عنك لاتنتفي بعد السنة لانك ستبقى بصفة اللجوء داخل امريكا الا ان تحصل على الجنسية وهذا الكلام من محامي متخصص بالهجرة في الولايات المتحدة ومنقول عنه.......... اشكرك
-
حبي هذا الشي مااعتقد يصير انته بيا صفه تطلع راح تضل علية لمن تستلم جنسية
عندي صديقي مهندس طلع لاجي على منظمة IOM وراد يحول الى مهاجر او مقيم او اي شي غير الاجي
راح للمنظمة وطلب مساعدتهم بهذا الصدد كالوله الى الوراء در والى الشقه عد هذا الشي دوم مايصير ليش ماقدمت وانته بالعراق على برنامج الهجرة الخاصه ليش قدمت لاجي
المهم رجع كلش ضايج واني حبيت شويه اخذ من خاطره كتلة عيني لاتزعل تره ماضل شي على الجنسية وتغير الصفه الي انته بيه هيه بس اربع سنوات وسبعة اشهر هسه يطبن منا يطلعن منا ههههههه
-
هية ترة بس اول 10 سنين صعبة وراهة الحياة كلش طبيعية هههههههه للمزح فقط...
-
لا ميصير اخويه العزيز اخويه انته ليش مدوخ نفسك بهاي الشغله يعني اذا حصلت على الكرين كارد شراح تسوي وانته اول متروح راح ينطوك I94 وامبلويمنت ايديه وسوشل تكدر تشتغل بي وطلع اجازه وطلع حساب بنك وغيرها من الامور الرئيسيه الي تحتاجها وانته بين متخلص معاملاتك وتفتهم الوضعيه راح تلكه السنه مخلصه وبجيبك الكرين كارد وهسه الي اخذو الكرين كارد شحصلو بي اخويه انته هسه اوصل وبعدين راح تلتهي بغير شغلات
تحياتي
-
مصطفى
اولا اقرا موضوعي قبل اربع اشهر
http://www.ankawa.com/forum/index.php/topic,271774.msg3689572.html#msg3689572
بوقتهه جانت المشكلة مهمه لان ال اس اي في الجديد توه طالع وهواي اخوان واخوات واصلين خوش مراحل بال اي او ام وان كانوا مستحقين لل اس اي في
بس المشكلة بوقتهه محد بالمنتدى جان مجرب هالشغلة رغم انه احنا هواي سمعنه بيهه واني شخصيا سمعتهه من محامي بالسفارة الامريكية سوالنه محاضرة حول ال اس اي في الجديد بشهر الثامن 2008
صديقنا زاك13 قبل حوالي 6 اشهر كال انه هوه طلع لجوء ومن وصل راسلوه جماعة نبراسكا حتى يكمل ال اس اي في بس هوه ما كان عنده واهس لاعتقاده الخاطئ ان المساعدات تقل
بعدين سافر اخونا الرهيب ماثيو لفلوريدا وسولفلي بعد بحث وتمحيص (كان نادم جدا على طلعته على برنامج اللجوء لان يعتبر ال اس اي في ميزة للعاملين مع الامريكان وحرامات يفرطون بيهه) انه الواحد ممكن يراسل نبراسكا اذا عنده COM Approval بس هم راح تاخذ وقت يجوز يوصل للسنه او اكثر (فبعد عليمن؟؟؟) واللي يسرع بيهه هو ان اللي يتصل بنبراسكا ظابط رتبته جبيرة وكان اللاجئ يشتغل وياه او محامي مختص بهالموضوع (والمحامين موجودين ببلاش توفرهم منظمات غير حكومية مهتمه بمساعدة العراقيين العاملين مع القوات الامريكية مثل اللست بروجكت والجك بوينت وان فاونديشن) فاخونا ماثيو تعاجز منهه حسب اخر ما سمعت منه
ممكن الواحد ينضر للموضوع بطريقة اخونا البطل زاك او البطل عكعك وهو انه اذا الهدف هو الحصول على الكرين كارد فقط فالسنه غمض فتح خلصانه
وطريقة تفكيرهم صحيحة لو هية بس شغلة كرين كارد (طبعا بالمواضيع المهمة المثبته راح تلكه موضوع رهيب لموتوني عن فوائد الكرين كارد) بس هي مو بس شغلة كرين كارد سريع
واللا قابل اعضائنا المخضرمين الرهيبين ماجلان وسبع صنايع ونور2 وحيدور وShow وبعد ما اعرف منو ميفتهمون من اخروا نفسهم شهور بس علمود يطلعون عالاس اي في
اني شخصيا لو بهالموقف اسوي مثلهم حتى لو ماكو كرين كارد سريع ولو بس يبقى الفرق النفسي وهو انه فيزة الهجرة هية مكافاة عالتعب اللي تعبناه وهي حق لنا وليس منة علينا
طبعا اكو فوائد اخرى للاس اي في غير الكرين كارد السريع واكو هواي مواضيع بالمنتدى ناقشت هالامر واتوقع هسه هم راح يسالني صديقي عكعوك عن هالفوائد وراح الخصله بس كم فائدةالمتاكد منهن :
1- ابو الاس اي في يطلع بالفيزا وبجوازه ويمته ميريد ويروح للولاية التعجبة
2- سهولة السفر من الولايات المتحدة لغير دول بنفس الجواز العراقي والعودة واللي يتذكر اختنا المتالقة هوليا شكد انتضرت حتى تحصل تصريح سفر حتى تروح لزوجها بالمانيا لان جانت لاجئة
3- ابو الاس اي في يكدر يقدم على شغل بالعراق وية الحكومة الامريكية او الشركات الامريكية المتعاقدة معها وبرواتب ممتازة وهاي كلكم تعرفوهه
اما في ما يخص صديق ميثم 70 فاحب اكله انه المنضمات اصلا متحب ابو ال اس اي في لان الظاهر ميخمطون فلوس من وراه مثل ابو اللجوء والدليل اسالوا حداد السيوف بكنتاكي وبعض الاعضاء اللي طلعوا على هالبرنامج فلذلك همه يحاولون ان ميشجعون اللاجئين المستحقين للاس اي في على طلب التحويل
زائدا اصلا هيجي procedure مال تحويل اصلا عدهم المحامين والضباط مال الهجرة يدوخون بيه لان جديد عليهم وتعليماته ما واضحه فشحال منظمة مساعدة لاجئين وموضفيها معضمهم من المهاجرين الجدد اللي كلشي ميفتهمون شتتوقع يجاوبون وادعو ميثم ان يوصل اصديقة بماثيو حتى يشرحلة تفاصيل التحويل اذا اله واهس وماثيو جدا كدهه وميقصر
اما صديقي العزيز صفاء فاكلك اذا تشوفلك اي بطة بس غنيلهه يا بط يا بط العب بالشط وهية تكوم تلعب شناو تك رجل هههههههههه
-
اخويه انته ليش مدوخ نفسك بهاي الشغله يعني اذا حصلت على الكرين كارد شراح تسوي وانته اول متروح راح ينطوك I94 تكدر تشتغل بي وطلع اجازه وطلع حساب بنك وغيرها من الامور الرئيسيهالي تحتاجها وانته بين متخلص معاملاتك وتفتهم الوضعيه راح تلكه السنه مخلصه وبجيبك الكرين كارد وهسه الي اخذو الكرين كارد شحصلو بي اخويه انته هسه اوصل وبعدين راح تلتهي بغير شغلات
تحياتي
والله كلامك ذهب صدك بالله جماعتي الي طلعوا الكرين كارت يكولون لا زادت و لا نقصت من شي راحت ورقه جه كارت ابمكانه و تعال شيل همه لا يضيع
شباب نصيحه لا تعبون تفكيركم بمعتقد\ات خاطئ و على الاقل اللجوء توصل الامريكا كلشي متدفع بس الاس اي في معاملات بغداد والفحص وغيره تصرف كومه عليه
انتوافكروا بالوصول
-
احبابي اعضاء منتديات عنكاوا المحترمون
صديقي العزيز vincenzo
والله كلامك صح المنظمات ماتستفاد من معاملات SIV واعتقد جاي يمشون المساعدات غصبن عليهم
هوا واحد خلي يطلع وطز بمسعداتهم اعتمد على الله وادور شغل وربك الرزاق
-
اخي مصطفى انت سائل نفس السوال بموضوعي اسال وانا اجاوب واني هل يوم خابرت محامي الهجرة وكال لا ميصير لانه انت داخل الى امريكا بصفة لاجئ وما تكدر تتحول الى مهاجر يعني ما يصير ومستحيل هم
-
تسلمون اخوان على هاي الردود السريعة وشكراً للاخت انجي اللي جاوبتني بالمكانين اللي سألت بيهم
هسة صارت المسألة كلش واضحة ورحم الله والديكم جميعاً
مشكورين
-
صديقي مصطفى
اتاكد من ماثيو هم
لان هو يعرف شخصيا ناس حولوا
وهم هو خطية 6 سنوات يشتغل وية الجيش وبعدين طلع كمجرد لاجئ
وحاول انته تدز رسالة لل USCIS وهمه ترى يجاوبون وانته تتاكد من كلامي
لان ماشاء الله التنكه لوجيا هالايام تخليك تحجي وية اي واحد بالعالم من اي مكان بالعالم
-
اخويه مصطفى مثل مكتلك انته اوصل ورتب امورك متشوف الا الكرين بجيبك ومثل مكال الاخ حسين ومثل مكتلك انه الكرين كارد مبي مميزات كبيره عن الي ميملكه والمميزات الي ذكرها الاخ فينوس لا تعتبر مميزات
لان انته تكدر تنتقل من ولايه الى ولايه اخرى بسهوله وبالنسبه للسفر هم تكدر طلع وثيقه سفر وتسافر ولو ما اعتقد انه الواحد اول ميوصل يروح يسافر لان يرادلك مده طويله ياله تندمج وتستقر بالاضافه الى كلفت السفر العاليه وراح تشوف الكرين كارد بجيبك وانته ممفكر بالسفر بعدك ويجوز متفكر ابد لان راح ترتبط بعمل واطفالك مدارس وغيرها من الامور
تحياتي
-
عكعك اخوية اني قبل فترة وديت اهل ولد صديقي بسيارتي للمنطقة الخضراء حتى يشوفوه وهوه ما بقى بامريكا غير 5 اشهر ورجع يشتغل بشركة ما اكدر اكول اسمهه
المهم هو جان راتبه قبل ليروح الامريكا 15 ورقة بينما هسه دياخذ تلث اضعاف هذا المبلغ وورة سنة يخلص عقده وبكيفه يريد يجدد لو يرجع لامريكا
واللي اتذكرة هسه هو حجاية اختي سمارة اللي تعرف شخصيا هواي جماعة اس اي في رجعوا يشتغلون وية شركات مدنية امريكية برواتب محترمه بالاضافة لاعضاء اخرين
كللي ابو اليو ان او اللاجئ يكدر يسوي هيج اول ما يوصل على الاقل ؟؟؟
وبالنسبة للفوائد اللي ما عاجبتك فكل واحد ورايه
اني لو بس يبقه الفرق المعنوي (مثل ما وضحت بردي السابق) هم كلش كافي بالنسبة الية
-
السلام عليكم
اخويه مصطفى طبعا شي اكيد ميصير وهذا الكلام من دائره الجمسيه والهجره الامريكيه وتكدر اتفوت على هذا الموضوع وتعرف التفاصيل
http://www.ankawa.com/forum/index.php/topic,313238.0.html
وبالنسبه الى الاخ vincenzo
تره هاي شغله انتظر اشهر او ربما سنه على اس اي في في سبيل اطلع علمود ارجع للعراق داشتغل هاي مو كل واحد يكدر عليها اخي .... احنه مدنحجي عن حالات فرديه احنه نحجي على الاغلبيه العامه وهي العوائل اخي الكريم يعني هو الواحد رايح لامريكا لكي يكون مواطن امريكي ولكي يجد الاستقرار والامان وهناك ايكون نفسه ويبحث عن فرص العمل وكذلك يرتاح نفسيا لما تقدمه له الحكومه من مساعدات من شتى المجلات وتعتني بسلامته ...... اي ابشرفك اتريده يرجع مره ثانيه للعراق وايبهذل عائلته فاخي اني برئي بخصوص موضوع اس اي في وموضوع اي او ام والحصول على الكرين كارت اكلك :-
1_ الكرين كارت الي ايريده ابسرعه يطلع هو الشخص الي حاط جوه ايده ومتاكد انه ايحصل عمل في العراق خلال فتره صدور الكرين الكارت في امريكا خلال 3 او 4 شهور وهذوله حقهم واتفيدهم ايكلك اني هم اضمن حياتي المستقبليه من ناحيه حصلت على الكرين كارت وهم اضمن حياتي الحاليه انه عندي عمل محترم ورواتب زينه بس مثل ماكتلك هذا للي ضامن يرجع للعراق والشغل ينتظره وطبعا اكيد والاغلبيه اتفيد الاعزب الي ماعنده عائله لان وين ايحير ابعائلته....
2_ بالنسبه للمسكين الاجئ اولا هو لاموظف ابشركه امريكيه ولاويه الجيش اهزم ابليله سوده من العراق ابسبب تهديد او ماكو عمل او الاوضاع الي ابصوره عامه تعبانه وهو حاليا بالدول العربيه يصراع الايام وغلاء المعيشه والامور الثانويه الكثيره وكل حلمه هو الاستقرار لان اي شخص بالدول العربيه متدري على غفله كلوله يله اخذ جنطتك وافلت والحكومه العراقيه الله لايرضه عنها ماعايفه الاجئين وبكل مكان اتسوي تعاقدات في سبيل الدول الي يجون الها الاجئين العراقين ترفضهم واترجعهم للعراق ... فهذا اخي مثل ماكتلك اريد الاستقرار مايفرق عنده لاكرين كارت ولاغيره لان لااريد يرجع للعراق ولالبهذلته لان اكيد ماعنده شي اكيد يضمن حصوله على عمل مع الشركات او الجيش الامريكي ....
فاخويه العزيز الكرين كارت يفيد الجماعه الي عدهم عقود عمل بالعراق وهايه خلاصه الحجي
ومشكور واسف على الاطاله
اخوكم عراقي للوريد
-
عراقي للوريد
مشكور اخي على الرد واكو مواضيع كثيره ناقشت ما تفضلت بي من وجهات نظر الله يبارك بيك
فينوس
ما تفضلت بي لايمثل سوى نسبه ضئيله جدا جدا واذا كان بتقديرك فايده الكرين كارد هو للرجوع الى العراق فهذه ما ارديها لان اني العراق يمي شبرين وصار 4سنوات او اكثر مارايحله انوب من اصير بامريكا اروح وطبعا هذا يشمل اكبر نسبه من الاراء اما الشغله المعنويه فهذه ماتوكل خبز واذا رايدها للكشخه فهذا بحثا اخر
-
السلام عليكم ... الى اخواني ولكل من يهمه امر الكرين كارت او اي شي انا عندي كرين كارت حصلت عليه في اول 23 يوم بس شنو الفائدة وشنو الي تستفيد منه كلشي ماكو لا ينطونا شغل لا يتقيدون بالبنفيتس الي وعدونا بيها اولا ماكو 6 اشهر دفع ايجار الشقة 4 اشهر بعدين يكولك باي باي .. والقرض مالت الطائرة ماكو مال تدفعها بعد 6 اشهر ايضا ورا 4 اشهر لازم تبدي تدفعها ... و المهم والكابوس هو الشغل ماكو غير شغل واحد والي يجي راح يتأكد ويكول والله صحيح حجى النا ... يسموها HOUSEKEEPER تنظيف التواليتات وترتيب الغرف بالفنادق .. والله غير هاي الشغلة ما راح تلكيها الا فقط في حالة وجود اقارب كثيرة لديك هنا وانا شخصيا ليس لدي ...واما ان كنت تفكر بالاصدقاء فالاصدقاء هنا سراب لن تستطيع ان ترهم ..وبعدين يا كرين كارت اولا راح تلتهي تطلع الك اجازة سوق لان بدون سيارة لازم تبقى بالبيت 24 ساعة وما تكدر تدور على شغل اصلا اسأل المجرب ولا تسأل الحكيم .. وانا موجود لاية سؤال اخوكم من ولاية ميسوري .... ندمان اجيت وتركت شغلي المحترم واهلي في سبيل امريكا وتنظيف تواليتات .
-
شكرا جزيلا اخوان لكل من شارك بهذا الموضوع . لأن هذا الموضوع كان ماثذ الكثير من تفكيري . وكاتن معلومات مفيده وواضحه وجديه بنفس الوقت . بارك الله بيكم اخواني.
ابو مريم
-
حبيبي باوع هذا البوري:
اني مقدم على الاي او ام، وتأخرت في التقديم على الاس اي في بسبب الشركة اللي كنت اعمل فيها كانت تريد التأكد من الاس اي في قبل ما ترسل لي الركمنديشن، ما اطولهة عليك، وصلت الى امريكا ونسيت موظوع الاس اي في، وبعد فترة اجاني ايميل (بعد وكت) استلمت بيه الكوم.........
رحت للجمعية كالولي هاي اتفيدك اتجرجبهة وتعلكهة بالحايط انته اجيت على برنامج وانتهى الموظوع
حكيت مع الناشنال فيزا سنتر، كالولي ارسل ايميل الى السفارة الامريكية في بغداد هاذي يمهم
حكيت مع السفارة في بغداد وكالولي انته من وصلت مرحلة متقدمة في احد البرامج (الحصول على الكوم او ختم الملف) يجب ان تترك البرنامج الثاني حتة تفسح مجال الغيرك.
مع تحياتي
رائد
-
أخوية العزيز هسة شسوي أنت دوصل بالأول وبعدين تحمل 5 سنين للحصول على الجنسية بعدها الله كريم ولا تفكر لا بلاجيء ولا بمهاجر....
تحياتـــــــــــــــــــــــــــــــــــــي ;)
-
أشكرك اخويا مصطفى على طرحك لهذا الموضوع اللي انا اعتبره ستراتيجي بالنسبة لي
انا عندي رغبة واستعداد اني بمجرد ان ادخل امريكا ارجع للعراق استأنف العمل بعقد مع احد شركات الاعمار مثلا..
كلامك مضبوط مية المية vincenzo
انا عندي اصدقاء دخلوا امريكا وخلال ثلاث اشهر او خمسة رجعوا للعراق وصار راتبهم تقريبا بين 5 – 7 ألف دولار بالشهر .. وهذا المبلغ ما تقدر تطلع في امريكا لو الدنيا تنقلب لو تشتغل وين ما تشتغل ما تقدر تطلعه..
بس انا مقدمة على الأي أو أم – وهسه مشت المعاملة بعد هاي السنين كلها ما أقدر أرجع أقدم على ال SIV وبصراحة كلش ضايجة أني أبقى سنة على الضايع خصوصا ً اني خسرت فلوس كثيرة في الأردن وبحاجة ماسة للعمل وعندي استعداد اني ارجع للعراق بشرط اني اكون محمية من قبل الشركة اللي انا اعمل لها.. كنت اتمنى اني ادخل امريكا وارجع اشتغل فد سنة أو سنتين وبعد ان اجمع مبلغ محترم – ارجع ابقى في امريكا اسوي بزنس او على الأقل اعيش حياة بلا مشاكل ومآسي ولا معاناة ..
لكن هسه راح اروح انتظر سنة يلا ينسمح لي أقدم على الكرين كارد!!!
وبعد السنة شوف يمتى تستلم الكرين كارد بعد معاملة اشطولها مثلا ً؟؟؟
لكن كان المفروض اني بعد سنة اكون مخلصة عقد السنة في العمل واكون راجعة لأمريكا على برنامج SIV
وهذا الأمر ما عرفته الا هنا في منتديات عنكاوا – أي بعد فوات الأوان
وللعلم أني مقدمة على برنامج Direct Access Program مباشرة على الأي أو أم ومكتوب أني بعد سنة يلا يحق لي اقدم على الكرين كارد.. :(
-
الله يوفق الجميع
محبة
المخضرمة أم يلدا – مترجمة - عمان الأردن 2005 – في انتظار التجييك الأمني - الأسبوع الثاني من السنة الخامسة انتظارا