ankawa
منتدى الهجرة واللجوء => الهجرة و واللاجئين => الموضوع حرر بواسطة: الكاوبوي العراقي في 13:20 27/06/2009
-
اخوتي الاعزاء
السلام عليكم
انا على وشك اتخاذ قرار صعب يخص موضوع هجرتي الى اميركا
كلكم تعرفون انني تاجلت بعد المقابلة الى امد غير مسمى
وبصراحة تعبت منذ 6 اشهر وانا مخبوص بس بالهجرة واهملت عملي ومما اثر على صحتي ومزاجي ومثل ميكول الامريكان I START LOSE MY TEMPER
افكر حاليا بارسال رسالة للسفارة بيهة رزالة قوية و استغناء عن الهجرة وراح ادز سي سي الى السبونسرات والظباط والان في سي .
طبعا الي يبرد قلبي انه بالرسالة راح اوضح انه مع الاسف عملنا معكم وساعدناكم وساندناكم ولكنكم تتخلون عنا بعد انتفاء الحاجة ولم تقتدوا بالبريطانيين اللذين نقلوا موظفيهم العراقيين خلال 7 ايام من مطار البصرة الى لندن ولم يدوخوهم بالمستمسكات والفورمات وجيب صورة قيد وعدم محكومية واذا انتة عندك نقص مرفوض وطبك مرض اذا انقتلت بالعراق ونكللهم يابة اذا رحنا للعراق نجيب مستند راح ننقتل يجاوبوك
I DONT CARE IF YOU WANT THE IMMIGRATION YOU HAVE TO BRING THIS DOCUMENTS OTHERWISE YOU INILIGIBLE TO RECEIVE VISA.
ما اعرف ليش انتوا ما ساويتونة وي المترجمين الافغان بنفس القانون الي مايريدون منه بس جوازة وجنسيتة وبس او كما مع الفيتناميين الموظفين معكم سنة 1975حيث نقلتموهم مع كل عوائلهم (حوالي 100 الف فيتنامي)بطائرات خاصة ولم تطلبوا منهم سوى الباج وبس.او كما عملتوا مع الاكراد سنة 1991
بصراحة اني هذا قرار شخصي وابدا مااريدة ياثر على اخواني بالعكس اشجع اخوتي على السفر والاستقرار بامريكا لانه احسن قرار واتمنى سلامة الوصول للمنتظرين سفر واستحصال الفيزا للي محدديلهم موعد مقابلة وسرعة السفر والقبول لاخواني على برنامج IOM والله يبارك بكم
والسلام عليكم ورحمة الله وبركاته
-
اخي العزيز انتة ارجع لشغلك وعملك وحياتك كأنك دزيت الرسالة واعتبرها شغلة منتهية بس لا تدزلهم شي لان انتة هسة منزعج وضايج فالقرارات بهيج ظروف تكون متسرعة ............تحياتي
-
والله اخويه الكابوي اكيد نفسيتك تعبانه وحقك بس اكلك استهدى بالرحمن واصبر وما انصحك ان تسوي هذا الشي لان برائي ما راح تقدم ولاتاخر لان عدهم اجراءات لازم يمشون عليها وجائز ضر متنفع اسال الله ان يمدك بالصبر ومثل مكلك الكلدار عبسي مارس شغلك وعملك وانسى الشغله وحاول تشغل وقتك ولا تفكر بيها ومتشوف الا يوم يكلولك تعال يمعود الطياره ضاله عليك
تحياتي
-
انت في حاله غضب كما تقول ,لذلك
مو صحيح تتخذ قرار تعتمد عليه حياتك و مستقبلك بهيج ضرف
انت تعبت و خسرت الكثير للوصول لهذه المرحله المتقدمه
الحصول على ثمره تعبك و خسارتك هو الي راح يبرد قلبك و يخفف غضبك و ليس كلمات رزاله
اسالك التائني بالقرار متمنيا لك راحه البال وصفاء الذهن
بالتوفيق للجميع
-
اخي العزيز الله يكون بعونك بس حبيت اوضحلك فد شي ويمكن انت تعرفه والكل يعرفةا خي العزيز الامريكان مصلحجية وانت اعرف بهذا الشي وشنو الجبرك على الشغل ويه المحتلين
-
اخي الكابوي لا تستعجل بقرارك انت صبرت صبرت اصبر لغاية هل شهرين لانه هنا يكولون لازم يستعجلون لدخول اكبر عدد من الاجيين قبل ابتداء السنة المالية انتظر شدسوي يا اخي انت بس لا تظل تفكر بيه وارجع لشغلك وعيش حياتك كانه مامقدم على اي شي ورح تشوف شلون راح تتفاجئ يخابروك على سفر موعد فحوصات لاي شي انت منتظره وانشااللة يخابروك عن قريب وربي يوفقك وينطيك الصبر
-
اخي الكابوي ,,,,,,
بعيدا عن العواطف ,,,, لان هيج قرار لازم متدخل العواطف باتخاذه و انما العقل ,,,,,, لذلك مراح اكلك لا حرامات ليش هيج ,,,,, و انما راح اكلك التالي :
اتمنه من الله بان متتندم مستقبلا على هاي الخطوة و الي اتخذتهه بسبب طلبهم منك تقديم ورقة باستطاعه الكل الحصول عليها (اثبات طلاق) ,,,,,, روح و الهوى بضهرك ,,, بس ما اريدك تنسا بان قرارك اعتمد ميه بالميه على تاجيلهم الك الاخير ,,,,,,
الله عليك لو مماجليك و منطيك الفيزا جان بطلت تسافر لو لا ,,,,,, اذا جان جوابك اي ,,,, من هسه اكلك الله يوفقك و احييك على هذا القرار الصعب ,,,,, اما اذا كان جوابك لا ,,,,,, ارجع و اكلك احسبهه مرة ثانيه قبل كل شي لان هذا القرار راح يلازمك طول حياتك
بالمناسبة ,,, لتنسه بانك صاحب عائلة ,,,, يعني حرام عليك تتخذ قرار مجرد لانك ضجت من شي معين ,,,, لان هذا الشي مو بس تابع الك و انما هذا مستقبل اطفالك ,,,,
اتمنالك الموفقية باي قرار تتخذه ,,,,,,
-
اخويه العزيز اعتقد انك تستعجل كثير وراح بعدين تندم على قرارك اكو مثل يكول (الي يشوف مصايب غيرة تهون عليه مصيبته) مثل جدا صح اكو عوائل كاعد تنتضر اكثر من سنة واني شخصيا دا انتضر اكثر من 11 شهر رغم اني محصل الموافقة من المحلفين ودا انتضر التجيك الامني اخويه الي اريد ان اكوله ان تصبر وتمارس حياتك الطبيعية مثل ما كلك احد الاخوان وهي تجي ان شاء الله .
-
اخي العزيز الكابوي العراقي بس كلمتين
لتصير كبش فداء؟؟؟؟
-
تحياتي اخويه الكابوي العراقي
طبعا اولا الله ايساعدك على الوضعيه الي انته بيها واني بصراحه مالومك على تعب الاعصاب الي انته اتمر بي لان هذا كل احنه تنمر بي بصوره عامه حتى الاخوه الاجئين الي مقدمين على UN وصارلهم 3 سنين او اكثر......
الامريكان انته يمكن تعرفهم اكثر مني والكل يعرف انه همه بلد القانون والشغله اشكد ماتكون تافه ومتستاهل هم ايدققون عليها ويطلبون وثائق في سبيل ماتاثر على امنهم مستقبلا لذلك هم جدا معقدين بكل معاملتهم وليس فقد الهجره او الاجوء ...
بخصوص قرار طبعا هذا قرار شخصي تابع الك واني ماكدر اكلك غيره لان انته صاحب القرار النهائي لكن انته مشيت خوش مشيه وماعندك شي يعني فات الكثير ومابقى اله القليل واعلم ياخي تره الشي الي وصلتله غيرك يتمناه يوصله اني من نصيحتي الك كاخ انه انته انسى الموضوع ومارس حياتك الطبيعيه ولاتخلي بالك يمهم وبنفس الوقت لادز الهم رساله ولاشي لان ممكن بهاي الرساله اتحط على نفسك نقطه سوده يمهم انته في غنه عنها في وقت همه احتمال في مراحل اصدار الفيزا الك وهذا الشي يمكن راح ايخرها هوايه من الاخوه الي انطوهم تاجيل شهرين او اكثر لاستلام الفيزا واستلموها بعد 15 يوم مثل اخويه الغالي ماجلان ملخص كلامي الك انه لاتستعجل ولاتخلي العصبيه اتسيطير عليك في مرحله مهمه ممكن اتغير حياتك .....
تحياتي الك واتمنالك حسن اختيار القرار
اخوك
محـــــ2009ـــــمد
-
حبيبي كاوبوي
اني مريت بضروف بس الله يعرف بيه بسبب الهجرة وداعتك طمست بالدين اضافة الى المشاكل الاخرى علما باني عاطل عن العمل من شهر 8 2008
للعلم اني كنت اعمل مراسل بوكاله امريكية وراتبي 5 اضعاف اللي يستلمه المترجم بالجيش ومن تركت العمل قبل سنة وقبل كم يوم الوكاله طلبتني ارجع ورفضت لان مليت من الحياة هنا بين تهديد وتهجير ونفاق وضحك على الذقون
انصحك نصيحة وحدة اطلع بسيارتك او اخذلك تكسي الصبح بغداد وشوف شكم واحد يكسر عليك ويغلس و شلون جندي مغاوير يسفط العالم ساعة وهو ميفتش اصلا
عموما القرار قرارك وعقلك براسك تعرف خلاصك
بالمناسبة اذا دابع الاخبار شوف الازدياد بعدد الانفجارات تزامنا مع مغادرة القوات الامريكية للمدن
-
صراحة هذا موضوعك فعلاً مفاجئ
بدون الدخول في أي تفاصيل أو أي تحفظات و أمور تخصك أو تخص عملك
نصيحتي ، لا تتخذ أي قرار و أنت في حالة غضب أو عصبية
إصبر و إنتظر و واصل حياتك بصورة إعتيادية كما ذكر الأخوة و توكل على الله تعالى.
و هذا الإجراء الراديكالي بعد مو وقته هسة ، و إن شاء الله ما راح تحتاج له.
الله عز و جل له حكمة في هذا التأخير ، وكل تأخير و فيه خير.
أسأل الله عز و جل أن يرزقك الخير و التوفيق
تحياتي
-
حبيبي انه مراح ازيد شي عن ما قالوه اخواني
بس اقول لك فكر وتذكر انو الصبر مفتاح الفرج وتوكل على الله وعيش حياتك عادي
وهاي الحركة الي تريد اتسويها اعتقد مراح تقدملك شي
بس لا تستعجل وفكر بعائلتك قبل ما تفكر بنفسك
صلي واقرا قران واتعوذ من الشيطان وانشالله الله يهديك الى طريق الصواب .... امين
شكرا لسعة صدرك
-
الصبر الصبر الصبرررررررررررررررررررررررررررررررررررررررررررررررررررررررررررررررررررررررررررررررررررررررر
-
لتتخذ قرار و انت في حالة من حالات الكآبة اللي تنتاب كل واحد بينة كل فترة بس ظل فكر بعائلتك و بمستقبلهم و من راح اطفالك يظلون يدعولك حتى بعد طولة العمر الك على اللي سويتلهميا استهدي بالرحمن و ادعي ربك يفرجهة و ترة هذا حال هواية من الاعضاء اللي وياك لعد اللي صارلة سنة و اكثر دينتظر الامنية او ملفة قيد الدراسة شلون هم جان بطلو وكالو منريد بس الواحد يصبر و ربك يفرجهة على الجميع باذن الله
-
اني جدا اؤيدك بهذا القرار صديقي
واني هم تضامنا وية قرارك هم راح ادز رزالة الهم ولو اني هستوني قدمت
بس شنو البديل اللي عندك
طبعا اني جاوبتك جواب منطقي اكثر بالارشيف وحل سهل
وانته بكيفك بعد
ابو نخوة شنو رايك بالدكتاتور المخلوع
لتخليني اصير عصبي واكلبهه سياسة ابو الاحتلال والخونه والمقاومة الشريفة
قبل كم سنة صارت زفة التخرج بقسم الكهرباء بكلية الهندسة فالطلاب جانو يهوسون "مقاومة مقاومة ...فرق الجهد عالتيار" ههههههههههه وبغير قسم مسوين بوستر عملاق معلكينه على حايط جبير جايبين صورة مال جنود امريكان واكفين كدام طيارة بلاك هوك وكاصين روسهم بالفوتوشوب وخالين صور الخريجين وانته قيس
خلي يولن
-
اذا تكتب هاي الرسالة وتلغي الموظوع فاللي راح ايصير انه موظوعك راح ينلغي حسب طلبك، والرزالة اللي راح تكتبهة ما راح اتأثر بأي واحد بصراحة وانت تكول مشتغل وياهم وتعرف مثل هيجي رسالة راح اتخلي اللي ميعرفك يضحك عالرزالة واللي يعرفك ويحبك يتأسف عليك لاأكثر ولا اقل
واذا انت متزوج ولديك عائلة فهاي المعاملة ليست ملك لك وحدك، فكر في مستقبلك ومستقبل اطفالك وزوجتك، بصراحة ارسال الرسالة وحرمان باقي العائلة اعتبرة اني نوع من الانانية، وانت هذا واحد من حقوقك، على اعتبار انت اشتغلت في ضروف صعبة وخطرة وياهم وتحملت كلشي ما تكدر تصبر بعد شوية؟
ومثل ما اتفضلو الاخوان اعتبر انت اصلا ما مقدم على اي برنامج، اعتبرهة بالشط
والقرار الاول والاخير هو الك
و أكو مثل ايكول اصبر على اولهة، تعرف شنو تاليهة،
وخليك عالخط ويانة عيوني،
والله كريم
-
لا اريد ان اضيف شيء على الموضوع لان كل الاخوه كفوا و وفوا وذكروا لك ما يفيدك وما يضرك
حبيبي واخي العزيز ايميلك ما راح يأثر بيهم على الاطلاق لان قبلك ناس سووهه ومحد كان بحالهم..
اسمحلي اقول انك مخطيء من راسك الى اخمص قدمك في اتخاذ مثل هكذا قرار
أخي العزيز صدقني واقسم لك بالله خسرت عشرات الالاف من الدولارات وخسرت صحتي وخسرت عدة وظائف قدمت لي ولكني رفضتها لاني كنت اتوقع سفري من شهر شباط 2008 لان معاملتي اكتملت تماما منذ ذلك اليوم وبقيت انتظر وانتظر وحركت كل الدنيا حتى ناس اصحاب قرار في اميركا ولم يستطيعوا ان يفعلوا اي شيء علما ان سبب تاخير معاملتي هو اهمال من النشنال فيزا سنتر وانتظرت وانتظرت اكثر من 18 شهر والله سبحانه وتعالى سهل علي وها انا املك الفيزا في جوازي وصالحه لمدة ستة اشهر صدقني الفرحه بالفيزا ضاعت بسبب الانتظار الطوييييييل ولكن ورغم كل هذا انا افكر في اطفالي ومستقبلهم لان لا مستقبل بدون وطن امن ومستقر يا اخي انظر للبعيد تخيل نفسك تقع لا سمح الله في يد المليشيات تخيل مجرم يعتدي عليك من سيحميك اذا كنت في العراق وانت (مختوم عليك انك مشتغل ويه الامريكان)؟؟ واحد الاخوه ما صدك تفتح هيج موضوع حتى ينزل على الامريكان نزله ونص فما بالك يصنعون بشخص عمل مع الامريكان؟؟؟؟
وتسقط المقاومه ويعيش التيار الكهربائي
اجعل من الانتظار والصبر رفيقي دربك لحين ما تفرج
-
اكولك شي واحد واني اؤيد كلامي اخواني كلهم .. بس شي واحد حطه كدام عينك ... قبل ما تدز اتذكر واحد من اطفالك لو صار بيك شي لو سامح الله ؟؟ لو انه الكهربا اkطفت باليل والدنيا حارة واطفالك ما يكدرون ينامون باليل وانت كمت تفتح مولدة لكيت فحمة معطبة شنو بوكتها الى تسويه ؟؟؟؟
-
فنوري حبيبي
ساعدناهم ضد الارهابيين والصداميين
والمنتدى مال هجرة ولجوء مو مال سياسة
احتراماتي
-
حبيبي الكابوي انت عبالك دتكول احساسي
بس صدق ماكو حل وجارة من العراق العظيم
اتذكر من جنت طفل اشكد جنت احب اشوف نيويورك
وندمت علئ كل ساعة ساعدت الامريكان بيها لان وقفو سفري قبل ايام من موعد اقلاع طيارتي
بس بعد اللي شفته بالعراق وبتركيا, مبقالي غير هذا الهدف الي هوة الوصول حتئ لو بقة يوم واحد من عمري وحتئ لو اكدي بشوارع تركيا لن ارجع للبلد الذي اخذ كل شي مني
تحياتي والرب يعزيك
-
السلام عليكم
أخي العزيز عندك حق بكل كلمه كتبتها واللي هيه متعبر عن اللي بداخلك بس ولكن تعبر عن كثير من الناس هم مثل حالتك تعبهم الانتظار.
ولكن, تتوقع أن من ترسل مثل هيجي رسالة رح تلكى صدى عدهم صدكني ما اتوقع رح ترمش الها عين يمكن اللي يقراها من يخلص يمسحها ويضحك عليك بعد ما يلبي طلبك بأن يوقف طلبك للهجرة بناء على رغبتك.
أني مدا اقلل من اهميه اللي انت كاتبه بس هذا واقعهم اللي احنه نعرفه.
رأي بانه انت صبرت وان شاء الله عاقبة الامر خير لك ولعائلتك فأرجو ان تأخذ الامر بحكمه اكثر وتفكر بمستقبل أطفالك لان هذا اهم شي برأيي.
تقبل مروري
عيني بغداد
-
اخي العزيز اصبر فاني اويد كلام اخواني الي جاوبوك فانت انتظرت وفات الكثير ما بقى الا القليل انشاء الله فاصبر ان الله مع الصابرين ولا تضيع كل شي مع تحيات اخوك شادو مان
-
والله ياأخي العزيز الاخوة الاعضاء ماقصرو بالردود صحيح المنتدى سوانا اخوة ان شاء الله
انت الي كلته صحيح وازيدك علم القوات الاسترالية من انسحبت همه دزو اميلات للمترجمين السابقين يعني الشغلة بالعكس وخيروهم بالسفر وسافرو خلال شهرين بس كل دولة الها قانونها وخاصة العراقيين الي اشتغلو ويه الامريكان مو قليلين والميزانية على كدها وان شاسء الله تلغيها الفكرة من راسك لخاطر عائلتك
ولمستقبلهم
-
الزميل صاحب الموضوع
يعني قرارك شويه غريب ...
يعني أنت تدري من البداية ان هذا البرنامج طويل و يحتاج صبر ...
و تدري كولش زين أن البرنامج يتكون من 5 مراحل
و يتطلب أن تدز عشرات الوثائق حتى تثبت لهم انك مشمول بهذا البرنامج...
و بالفعل دزيت كولشي ...و وصلت لأخر مرحله و هي المرحله الأخيره و الأهم (المقابله )..
و محصلت الفيزا بسببك أنت مو بسببهم همه ...لأنك ذكرت أنك كنت متزوج سابقا و مطلك ..
و شي طبيعي يريدون و رقة الطلاق ...مثل ما طلبوا منك ورقة(عقد زواج )...
و هسه عرفت أنهم يطلبوون طلبات كثيره و انهم ما عملوا مثل ما عمل البريطانيين و الدانماركيين ..
يعني أنت سويت و دزيت كولشي رادوو منك ....و فجأة ورقة الطلاق أثارتك و قررت الأنسحاب !!!
يعني شي ميشبه شي ....
الله يوفقك بقرارك و يهديك الى الطريق الصحيح
-
اخي ارجو ان تصبر ولاتضيع تعبك وتعب عائلتك واتاكد انه الخاسر بالاول والاخير هو انت وهم مكو شيء يأثر عليهم استهدي بالرحمن واشوف اخوانك وخواتك صارلهم اكثر من سنة وصابرين واني ويه اليوم صارلي سنة واربع اشهر ونص ولحد الان انتظر .....اختك ايات
-
اخي الوردة مرح اضيف شي من الكالوا اخوانه الاعزاء بس اكلك اني عبالي رح تكول يابه اخواني خواتي ترى الورقه المشؤومه دزيتها الهم ومترجمه ! تجي تكول ارزلهم وبرد كلبي والله كلبك ميبرد اله توصل لمريكا وهاي حقيقه لتخلي هيجي موقف يهزك اخي العزيز انت اقوى من هيجي شي بعد منريد نسمع هذا الكلام واريد تبشرنا انت دزيت الورقه الهم اليوم قبل باجر.
ترى النار متجوي اله صاحبها والحليم تكفي الاشارة.
تحياتي
اختكم
ساسي
-
حبيبي الكابوي ,,,,,,
شنو السالفه يمعود ,,,, بس لا سويتهه صدك؟ ...... اني توقعت بانك راح تكتب رد لكل الاخوان الي اشتركوا بالموضوع لانهم حريصين عليك و لانك اخ عزيز ,,,,,, البارحه دخلت للمنتدى ,,, كتبتلك كم رد بغير مواضيع ,,,, بس معلقت على هذا الموضوع ,,,,,,
الله يخليك لا تسويهه صدك ,,,,, و اتمنه ان تكتب رد تريح بالنه
-
والله يا اخي اني هم تعبت من هاي المعمعة . واكول حرامات احنة اشتغلنة وية الامريكان وعبالنة الدنية راح تصير بخير . بس صار العكس . واني اريد ادز رسالة الى البيت الابيض وأسألهم هل احنة العراقيين من ابتدع الكلمة المشهورة (((( أ . ر . ه . ا . ب )))) لو الامريكان . لأن احنة من جانو يحتاجون مساعدة من اي توع جنة ما نتأخر وهسة من صارت الشغلة يمنة . كالت الموافقات وحجت المعلومات . حشة القارئ من (!!!!!!) بهاي الشغلة . اعذروني بس اني روحي طكت لأن صارلي 9 اشهر انتضر المكموعة الله يكمعهم . والله يصبر الجميع ..........
-
الله يكون بعون اللي تاخرت معاملاتهم لاسباب خاصة
اني عندي مو واحد وثنين وانما عشرات الاصدقاء اللي كملت شغلتهم من التقديم للسفر بشهرين الى تلاثة وكلهم جانوا وظلوا الى اخر لحظه يشتغلون وية الجيش... ارقى جيش بالعالم
وهسه شبعانين ونسة بالكرين كارد بامريكا
فارجو منكم الصبر
من رام وصل الشمس (امريكا) حاك خيوطها............طمعا الى اماله وتعلقا
-
زميلي فسنجوون ..
...شنو تقصد بعبارتك الأخيره "وهسه شبعانين ونسة بالكرين كارد بامريكا"
ممكن توضح شوي حته تعم الفائده....أني دخت من سمعت الكرين كارد...
ننتظر أجابتك
تصبح على خير
-
الصبر اخويه الورد كمل الاوراق الي طلبوهه واترك الموضوع واتجهه لشغلك ومتشوف اله همه دازين عليك ان شاء الله وهذا الي تريد تسوي مو بصالحك هوه الكل مثل مدتشوف متاخرين وهم مشلوع قلبهم بس النتيجه يااخويه تسوه دعائنا الك بالصبر والتوفيق .
-
الاخ العزيز الكاوبوي العراقي يمعود دكول غيرها لا الامريكان ولا حتى البريطانين ولا اي دوله قبلت لاجئ تهتم بلاجئ حتى وان تجنس هذا الاجئ المسكين . انت تكافئهم ان بعثت بهكذا رساله لانه راح يبده يقراءها بس السطر الاول وراح ينكلب مزاجهم ويطلعون قهرهم باخوتك الي عليهم السرة فراح تظلم نفسك اولا ثم تعم على اخوتك العراقيين واني متاكد انت راح تراجع نفسك قد يكون لكي لا تظلم احد غيرك.
بالمناسبه هناك الالاف وانت اعلم مني كم ينتظرون بشوق ان يقبل ويرتاح .
وايضا انا هنا في المانيا منذ 8 سنوات وثق اتالم لالم اي عراقي.
تحياتي
سالم عقراوي
ميونخ
-
اخوتي الاعزاء
-
اخي العزيز الكاوبوي العراقي حبيبي انت من حجيك اتبين انسان شهم وفاهم ودارك الحياة وهيج انسان المفروض ميتسرع بالقرارات اللي ياخذهة والانسان من ياخذ قرار بحالة العصبية يعني مثل مواحد يجني على نفسة بحكم قاسي قد يندم عليه ليس خوفا من احد بل الندامة التي تصيب هكذا انسان في ظرف قد يكون لصالحه وعمر العصبية مأدت الى نتيجة اخذ الامور relaxe وهي تنحل let the time solves your problem واني بالمناسبة كلش اتالمت عليك لكن اللي اكولة اللهم يفتحهة بوجهك وبوجة كل العراقيين الطيبي اصحاب الغيرة والنخوة والسلام.
والد ( صابر للابد)