ankawa

منتدى الهجرة واللجوء => الهجرة و واللاجئين => الموضوع حرر بواسطة: النورس الحزين في 17:49 27/06/2009

العنوان: مهاجر جديد - الجزء الثالث
أرسل بواسطة: النورس الحزين في 17:49 27/06/2009

                                           بسم الله الرحمن الرحيم
    والصلاة و السلام على افضل خلق الله محمد (ص)
               تحية احترام وموده لكل الاديان

اخوتي الاعزاء في الجزء الثالث من مشواري وددت ان اسرد عليكم كيف سوف تبداء حياتك في الولايات المتحده الامريكيه من حيث التاثيث والاكل والمشرب ووو.
اخوتي الافاضل اول وصولك سوف تنقلك المنظمه الى موقع سكنك ان كنت قادم من غير كفيل وباغلب الاحيان يكون بمجمع سكني متواضع به نوع الامان الخدمات حيثما تذهب هي متشابها ولاتشوبها اي شائبه اقصد خدمات الماء والصرف الصحي والكهرباء المهم يودوك لبيتك تلكه بيتك وبي مواد غذائيه تكفيك لمدة ثلاث الى اربع ايام وبي ميز طعام وكراسي على عدد افراد اسرتك وكذلك  اسره على عدد افراد اسرتك طبعا الاسره جديده لكنها متواضععه ومنادر جديده ومناشف جديده وجراجف جديده ومنظفات فقط هنا تسال نفسك هاي هديه من المنظمه ؟؟؟الجواب لا .المواد كلها يشتروها الك من الولكم مني وهذا الولكم مني اي مبلغ الترحيب يستلمها اي لاجيء للولايات المتحده ويبلغ قدره اربعمائه وخمسه وعشرين دولار يتم ايجار البيت منه وشراء احتياجاتك منه ويبقى مبلغ بسيط من المال لدى الكيس ووركر ((شخص مسؤول عن الكيس اي الاشخاص))هذا المبلغ المتبقي لدى الكيس ووركر يشتريلك احتياجاتك منه طول فترة ما قبل الفود ستامب وبعد استلامك الفود ستامب يجي يتحاسب وياك فلس فلس ويرجعلك المبلغ المتبق من ما انفقه عليك طول هاي الفتره التي تكون قرابة شهر .اهنا نجي لسؤال مهم شلون راح ااثث بيتي واشتري احتياجاتي الاخرى لان الكيس ووركر مو مكابلك وكاعد راح تكون عندك بعض الاحتياجات مثل قطع الاثاث والشسوار والاوتي ووو؟؟اهنا اخواني تدخل النخوه العراقيه والطيبه والكرم العراقي اخوتي الاعزاء سوف اسرد عليكم امر موجود لكن للاسف اغلب المهاجرين ما سولفو النه اخوتي بعد سكنك بايام سوف يتوافد اليك عراقيين القدامه ((عراقيين المعارضين والمهاجرين القدامه من كل الطوائف والاديان))وسوف يقدمون اليك كل احتياجاتك من اثاث ولحوم وحليب وخبز وحتى اجهزه اخوتي صدقوني يوميه يجون يدكون بابك ويتمنوك تحتاج شي حتى يجيبو الكم اني مثلا اجتني مره سفرها المقبور صدام كرديه وجابتلي مسواك اكل وغراض مطبخ اقدر مبلغها بما لا يقل عن مائتين دولار واجاني اخر من رجال الانتفاضه الشعبانيه واشترالي جهاز تلفون مع اشتراكه لمدة شهر وكان ما دفعه امامي ما يقارب السبعين دولار واجاني شخص اخر من الفلوجه ووداني الى السوق العربي وخلاني اسوق منه بعض احتياجاتي الاخرى طبعا حتكولون هذا الفلوجي ما قدم الكثير راح اجاوبكم غلطانين لان منطقة الاسواق العربيه تبعد عني بالسياره تقريبا ثلاث ارباع الساعه ذهاب ومثلها رجوع غير المسافه المقطوعه من سكنها الى سكني فلو حسبنا مصاريف الوقود والمجهود سوف تعرفون كم الرجل كان كريما ومتعاونا المهم اود ان افاجئئكم بشيء اكبر بكثير وهو اني تفاجئت بان كل العوائل العراقيه الي بمنطقتي وطبعا كلهم جدد لكيت هذوله نفسهم مقدميلهم نفس الشيء بل في بعض الاحيان اكثر اخوتي صدقوني ما يمر يوم اذا ما يخابرون كل عائله ويسئلوهم عن احتياجاتهم بل هنالك جمعيه للععراقيين وهي قيد الانشاء ايضا من الان يقدمون خدمات موطبيعيه للعراقيين الوافدين جدد طبعا هذا كله في فورت وورث ودالاس وارلينتون ما ادري عن باقي المناطق والولايات الي عليه بهاي المناطق اتصورو اخوتي هذوله مرات من يشوفون واحد مستحي منهم تدرون شيسوون ؟؟؟؟ يكومون يلزمون ورقه وقلم ويفترون بالمطبخ وبالغرف ويسجلون ويفاجئوك بيوم اخر بانهم ياتون محملين بالاغراض اخوتي هذا الكلام شفته بعيني لما يقارب العشرين عائله صار وياهم نفس الشيء ونفس الاشخاص المتعاونين
اذا اخوتي هنا سوف نعرف بان اول فتره سوف لن تشعر بغربه ان شاء الله ولاتشيل همها ولكن ولكن ولكن هنا اطلب منكم جميعا بان تجازون هؤولاء الناس اولاد بلدكم بان تجازوهم بدعائكم اخوتي عليكم بالدعاء لهم فهم اكثر الناس استحقاقا به لعونهم للغريب
اي سؤال اني حاضر واي كفاله اني حاضر

وشكرا

العنوان: رد: مهاجر جديد - الجزء الثالث
أرسل بواسطة: angie-dawood في 18:19 27/06/2009

وين مايروح يبقى العراقي اهل الكرم والضيافة ربي يبارك بيك وبعائلتك اخي العزيز النورس وربي يرزقك من جميع الجهات ويفتح ابواب الرزق كدامك بالتوفيق

العنوان: رد: مهاجر جديد - الجزء الثالث
أرسل بواسطة: مهاجرين بلا حدود في 18:23 27/06/2009

السلام عليكم اخونا العزيز النورس السعيد

وحمد لله والشكر على سلامة وصولك لامريكا  وان شاء الله تتوفق بحياتك ونسمع دائما اخبارك الحلوة

لقد اثلجت قلوبنا بهذه الاخبار الرائعة .... ونتمنى لك اقامة سعيدة

وان شاء الله دائما العراقيين قلب على قلب ...وهذا طبع العراقي الاصيل

تحياتي وامنياتي لك بالموفقية
اخوك ابو محمد

[/font][/color]

العنوان: رد: مهاجر جديد - الجزء الثالث
أرسل بواسطة: vincenzo في 19:13 27/06/2009

الله يسعد ايامك صديقي الحزين
واتمنى منك تخصص جزء من مواضيعك الحلوة عن العزاب من يوصلون شلون يسكنوهم
وممكن واحد يستلم الويلكم بايده ويرفض الشغلات اللي يشتريهه اله الكيس ووركر وهوه عود بعدين يتصرف باليعجبة بشراء الضروريات وحتى التاجير اذا امكن

العنوان: رد: مهاجر جديد - الجزء الثالث
أرسل بواسطة: myiraq في 23:15 27/06/2009

مرحبا اخي النورس السعيد(مثل ماسماك الاخ مهاجرين بلا حدود) .... مبروك وصولك  بالسلامة ولانك انسان طيب التقيت بناس طيبة مثلك والله سبحانه وتعالى وقفلك الناس الخيرة بطريقك... وسعيدة جدا انك مرتاح وان شاء الله دائما . وياريت ماتحرمنا من كتاباتك عن ارض الاحلام حتى تخفف عنا صعوبة الانتظار.
اختكmyiraq

العنوان: رد: مهاجر جديد - الجزء الثالث
أرسل بواسطة: القرش في 00:39 28/06/2009

                                      السلام عليكم

 عاشت ايدك اخويه على هذه المعلومات الي تشرح القلب .. والله لو نفتر العالم كله مانلكي مثل طيبة وكرم العراقيين لا ابدآ . يبقى العراقي عراقي ومايتغير طبعة ابدآ ابن خير وابو نخوه والشهامه شي مايوصف . الله يوفق الجميع ويرزق الجميع .

                      يبقى العراقي رفعة رأس بين كل العرب

 ابو انس

العنوان: رد: مهاجر جديد - الجزء الثالث
أرسل بواسطة: BaghdadGhost في 01:19 28/06/2009

يا اخي والله من جاي اقرا الموضوع عبالك اقرا موضوع عضو من اعضاء المنتدى تحول الى منطقة بالعراق ,,,,,,,, 

هيه هاي مواضيع الهجرة و اللجوء الي تشرح القلب و تحجيلك على صميم التعامل (كبشر) و ليس التعامل (كتاجر) ,,,,,

الف الف مبروك اخي و ان شاء الله الموفقية لكل عراقي يعين اخوه العراقي بالغربه ,,,,,,,

العنوان: رد: مهاجر جديد - الجزء الثالث
أرسل بواسطة: عكعك التطوى في 03:11 28/06/2009

مش كور اخويه النورس السعيد على ه ذه الاخبار الي تعبره عن النخوه وال شهامه والكرم العراقي الله ي جازيهم على اعمالهم ان شاء الله

تمنياتي لك بالتوفي ق

العنوان: رد: مهاجر جديد - الجزء الثالث
أرسل بواسطة: سبع صنايع في 06:37 28/06/2009

والله اخوية النورس الاخبار حلوة وخصوصا انه قريبا رح اكون بدالاس
بس اتمنى ان يكون التعاون لاجل التعاون فقط وليس للتدخل والقيل والقال وانت من يا عمام
وعجبتني هاي الفكرة مال المنظمة او الجمعية وكوم التعاونت ماذلت لعد همة اليهود شلون صاروا


مبارك سلامة الوصول

العنوان: رد: مهاجر جديد - الجزء الثالث
أرسل بواسطة: Wingo في 10:30 28/06/2009

مشكور عيني على موضوعك المفيد
الله يبارك بأخوتنا الكرماء و الله يجازيهم بكل خير
تحياتي

العنوان: رد: مهاجر جديد - الجزء الثالث
أرسل بواسطة: النورس الحزين في 00:02 29/06/2009

اني بالخدمه للجميع بس تمنيت على الجميع الدعاء للطيبين

العنوان: رد: مهاجر جديد - الجزء الثالث
أرسل بواسطة: مهاجرين بلا حدود في 00:14 29/06/2009

اللهم يسر ولا تعسر  لكل العراقيين وين ماكانوا ..... سواء بجانب اخونا النورس السعيد
ام في بلاد الغربة ...ام في الوطن الجريح ...

ولاتزعل الله يفرجها على الجميع ان شاء الله ...

العنوان: رد: مهاجر جديد - الجزء الثالث
أرسل بواسطة: ابو روزا في 22:37 30/06/2009

حمدلله عالسلامه اخي بالموفقيه انشالله للجميع

العنوان: رد: مهاجر جديد - الجزء الثالث
أرسل بواسطة: عيني بغداد في 14:25 02/07/2009

السلام عليكم
شكرا على الموضوع الرائع اللي يظهر تعاون العراقيين بالغربه.
أتمنى كل العراقيين في كل دول المهجر ان يكونون بهيجي حالة من التأخي والمحبه.

أن شاء الله يوفقك في حياتك الجديده ويسهل أمورك.

تحياتي

عيني بغداد