ankawa
منتدى الهجرة واللجوء => الهجرة و واللاجئين => الموضوع حرر بواسطة: راهب الحب في 13:00 08/07/2009
-
بالبداية أشكر كل الاخوان بالمنتدى على سعة صدرهُم وأبشركُم بإنه أني البارحة إستلمت الظرف ونتيجتي كما هي المتوقعة 1000 % (الموافقة) والحمدلله والشكر على كل حال ...
عندي موضوع مهم حاب أتطرقله وهو اني صار أكثر من شهرين من بديت أشارك بهذا
المنتدى الرائع ( الهجرة واللاجئين ) ..لأنه أني أصلاً ما جنت أفوت وأشارك وأنشر لغير منتدى كتابات وخواطر حصراً من 4 سنين تقريباً ...
موضوعي هو لحد هاي اللحظة ما قريت موضوع لأحد الاخوة الواصلين لأمريكا وعدهُم كفيل .. كل تفاصيل السفر إللي قريتها من الاخوة الأعضاء المشكورين كانت عن ولايات ومساعدات قدموها إلهم قسم التوطين الخاص بالولاية والمنظمة إللي إستلمت هؤلاء الاخوة من المطار للبيت ...
فما أعرف يمكن أني عابرة علية وما قريت تفاصيل السفر للأخوة إللي ناشرين وعدهُم كفيل لو لا ؟؟ بس صدكوني صار شهرين وما قريت ولا وحدة ؟؟؟
أتمنى من الأخوة إللي واصلين وعدهُم كفيل ينقلونا الصورة كما هي وذكر كل التفاصيل وشيختلف الكفيل أو بدون كفيل يعني من غير يرافقك للدوائر الرسمية ويعرفك على اماكن النقل والتسوق ووو الخ .. زين إذا يوقع على الأوراق شنو معناها أنحرم من هواية حقوق مثل ما قريت بإحدى المواضيع حول إلتزامات الكفيل ؟؟ زين إذا عدد العائلة أكثر من خمسة وما گدر الكفيل يستوعبهم ببيته أو قسم التوطين اخبروهُ بإنهم حضّروا شقة للعائلة شراح يتغير وشنو الفرق أرجو التوضيح مع فائق تقديري وإحترامي لجميع الأخوة وأتمنى تجاوبوني وخصوصاً إللي راحوا عن طريق كفيل ...
شكر خاص للأخ أبو مريم إللي طلب مني أكتب بنفسي خبر موافقتي وما أكتبها بردود الاخوة الآخرين .. ممنولك يا حبيبي والف شكر وتمنياتي للجميع بالتوفيق والإستقرار بأقرب فرصة يا رب †
-
اخي راهب الف مبروك وانشااللة السفر القريب والتوفيق
اخي العزيز اذا كان بيت الكفيل ما يسع للقادمين اللاجيين الذين هو كفيلهم يكدر يبلغ المنظمة بذالك وهما راح يحضرون مكان الهم قبل وصولهم وكلشي ما ياثر لا عليك ولا على الكفيل من كل النواحي اطمئن اختي سافرت الى كلفونيا قبل 12 يوم وكان الكفيل اخو زوجها وهو ما يعرف سياقة ولا لغة اتصل بالمنظمة وكال اني ما اعرف لغة ولا سياقة اريد انتوا تودوهم الى دائرة الولفر لاخذ المساعدات واستخراج كل الاوراق الرسمية الهم وهما وافقوا وكانو كل يوم يرسلون شخص هو يقوم بهذة المهمة وحتى من اجروا شقة صاحب الشقة طلب كفيل مثل كول صاين حتى يوقع على عقد والمنظمة هي تكفلت بذالك بس هو ما اقتنع راد شخص يكون عنده املاك مثل بيت و اي عمل مثل ستور لو اي عمل يكون حتى يضمن انه راح يستلم فلوس الايجار المهم الشغلة فضت وكان احد الاقارب هو تكفل بالعقد وهسى هما تقريبا اخذوا كل حقوقهم وما اثر اي شي عليهم مثل ما ذكرت واي استفسار اخر نحنوا بالخدمة
-
اخي الكريم,اختي انجي
اهلي سافروا الى فلوريدا بتاريخ 9/6/2009
عن طريق كفيل هناك
الكفيل لا يوقع اوراق ولا اي شي يسوي
مجرد ان يكول انو اني اعرف هذا الشخص المسافر وعندي استعداد اساعده مساعده معنويه( معنويه بس ) لا اوراق تتوقع ولا شي واهلي اول ما وصلوا الكفيل راد هوه يستقبلهم بالمطار
وراحوا تغدوا عنده وعند المساء بنفس اليوم الشقه كانت جاهزه وناموا بشقتهم من اول يوم
المنظمه هيه الوورلد ريليف
والشقه لزك ويا شقه الكفيل
هاي تجربه عاشوها اهلي
مع التحيه
انور الجلبي
-
الأخوة الأعزاء :: إنجي وأنور المحترمين ::
أشكركم على ردودكم المفيدة بس أعتقد ويا الكفيل مالتي غير شكل وهي خالتي :::
في ولاية نيفادا مدينة ( لاس فيغاس ) الغنية عن التعريف گالت وقعت على الأوراق وما أعرف كفالة معنوية لو مادية الله أعلم ؟؟؟ أما بخصوص إستضافة الكفيل فما كانت عدها مانع بس إحنا طلبنا نگون مستقرين بوحدنا لأنهُ عددنا 7 وصعبة نثقل عليهم وفعلاً أكدولها بأنهُ حضرنالهم شقة قريبة من المدارس 3 غرف نوم وصالة وگالوا خلال شهر يجون وهذا الحجي من يوم 18/6/2009 واول البارحة يلله إستلمنا ظرف الموافقة فشوكت تخلص الإجراءات وموعد السفر الله أعلم ....
تمنياتي للجنيع بالتوفيق والإستقرار ودمتم بألف الف خيــر ... †
أخــوكــُم / وسـام بهنـام داؤد الخابـــوري
-
السلام عليكم
طبعا اخي العزيز هية تتبع الكفيل واذا تريد تعرف عن كفيلي او تجربتي فيمكن اني حالة خاصة بس راح اسولفلك
طبعا اني لا شفت منظمة ولا اي شي ولا اي مساعدة والسبب انو الكفيل مالتي زنكين وخشمة يابس ومن يخابرو يكلولة جيبلنيا ننطي فلوس يكول اني ما اروح لهيجي مكانات وما اريدك تروح انت واني موجود وانت ممحتاج اي شي ... طبعا الرجال يعتبرني مثل ابنة واشترالي سيارة واني انطيتة كل فلوسي وهو اشترى بيت وسجلة نص باسمي ونص باسمة.
مغزى الحجي انو المنظمات اللي تساعد او الحكومة تكيف على هيج واحد من يوفر ضمان كامل للاجئ بس هم تكدر تاخذ حقوقك بس كون تداعي بيهن .
اتمنى اكون شاركت بتجربتي بشكل كافي
-
اخي العزيز انا اتفق مع الاخ انور في الكلام عن تجربة اهله و استطيع ان اؤكد لك ان الكفالة معنوية لكن ممكن ان تتطور حسب رغبة الكفيل انما ليس عليه اي مسؤولية قانونية اذا رفض مساعدتك فقط يطلبون منه الاستقبال في المطار و لاحظ انا كتبت يطلبون اي انه ليس امر فاذا رفض فالجمعية المسؤولة عنك ستقوم باستقبالك. بالنسبة لتجربتي مع الكفيل قام باستقبالي في المطار و مسبقا كان قد استأجر لي ستوديو في موتيل لانه رفض ان يستأجر اي شقة لي و قال انا اريدك ان تطلع على الخيارات الموجودة و انت من يقوم بالاختيار، طبعا ساعدني في الايام الاولى في التعرف على المدينة لكن كل المعاملات الرسمية كانت مسؤولية المنظمة. انت تحتاج الى الكفيل ليس للتوقيع بدل عنك لكن لتعزيز توقيعك (co-sign) لانه بالنسبة للامريكان انت غير معروف لهم لانك جديد لكن بمرور الايام لن تحتاج الى توقعيه بجانب توقيعك خاصة اذا اصبح لك عمل و لك حساب بالبنك و انت تسدد الفواتير و ليس هناك ما يقلق الغير منك. تمنياتي لك و للجميع بالموفقية
-
اخي انور شنو الكفيل ما يوقع على اوراق لعد اني شسويت اربع مرات وقعت على اوراق مال كفيل وتعهد بان استقبلهم من المطار واستظيفهم يمي الى ان يشوفون شقة وكل شي اساعدهم شلون ما وقعت على اوراق ???
-
الأخوة الأعزاء :: علي وماجد وإنجي ::
أشكُركم على مروركم الكريم وردودكم المفيدة وأتمنالكم التوفيق ودمتم بألف الف خيــر ... †
أخــوكــُم / وسـام بهنـام داؤد الخابـــوري
-
http://www.ankawa.com/forum/index.php/topic,291844.0.html
-
اختي انجي مثل ما كلتلج حتى اني تعجبت
لا وقع اوراق ولا شي
بس خابروه الكفيل وكالوله انته تكفل هذوله الناس,تعرفهم,صحيح كرايبك
كاللهم اي
لا اوراق توقعت ولا شي من هذا الكلام
هاي تجربتي الخاصه
مع الشكر
انور اجلبي
-
أخوية العزيز عكعك الوردة وأنور أشكركم مرة ثانية وما قصرّتوا أبداً ....
بصراحة كل الاخون المجاوبين ما مقصرين بس هم حبيت أقرأ للأخوان إللي وصلوا عن طريق كفيل حتى تتقرب عندي الصورة اكثر تمنياتي للجميع التوفيق والإستقرار بأقرب فرصة ... †
أخــوكـُم / وسـام بهنـام داؤد الخابـــوري