ankawa
منتدى الهجرة واللجوء => الهجرة و واللاجئين => الموضوع حرر بواسطة: zeeta في 12:25 29/07/2009
-
اخواني عندي استفسار اخويا يريد يروح لسوريا ويسجل اولادا بالمدرارس السورية واخذ وثايق الاولاد من بغداد وصدقها داسأل هل تسجيل اولادا بالمدارس السورية ينطو على اساسها اقامة وشكد مدتها وبيها تجديد
وسؤالي الثاني شلونها المدارس السورية بالنسبة للعراقية ومعاملة اطفالنا هناك متاثر عليهم نفسيا
اخواني اي معلومة تساعدونا بيها نكون مشكورين والرب يباركم
لاتقل يارب ان همي كبير بل قل ياهم ان ربي كبير
-
اخوية العزيز
اني من كنت قبل 6 أشهر بسوريا كان التسجيل جدا سهل يعني كل المدارس تقبل وبسهولة و يعطونك اقامة كل شهر قابلة للتجديد اني كنت بمحافظة اللاذقية وأذا شافوك مستمر بالبقاء بسوريا يعطون كل شهرين او ثلاثة أشهر و تروح اتجدد من جديد
المدارس بسوريا جيدة من ناحية التعليم و يعلمون اللغة الانكليزية من صف الاول و كذلك لغة فرنسية
و لاتوجد سوء معاملة للعراقيين بل بالعكس اخواني تاقلموا و بكل سهولة و تبقى ايضا أذا كانوا اطفالك جديدين بالدراسة يعني مو كساله ههههههههه
ملاحظة واحد اذا كنت من الاخوان المسيحين فأكو مدارس خاصة للمسيح لان اكو درس اسمه ديانه بس مامتاكد من الشغلة لان اكو مدارس ادرس الديانة المسيحية طبعا الشام يعني دمشق أحتمال تختلف و اللي اقصدة مدارس خاصة يعني مو على حسابك وانما حكومية مثل باقي المدارس
اكيد اكو درس الوطنية لان تدري حزب البعث بس ماكو تعال انظم للحزب و هاي الخرابيط يعني المدارس جيدة و بكل سهولة يتاقلم الطفل وياهم يجوز اللهجة شوية تختلف بس عادي كله شهر و تتعود و تكون جدا سهلة اتمنى اكون ساعدتك بهاي المعلومات واني حاضر
اخوك رافد
-
شكرك اخوي العزيز
زين هما راح يرحون لجرمانة زينة هناك
يعني كل شهر يروح يجدد لازم
وممنون واعذرني للازعاج
الرب يحفظك
-
السلام عليكم
أخي العزيز
أني صالي بسوريا من سنة 2006 ولحد الان.
أقامة المدارس تقدم عليها بعد تسجيل الاولاد بالمدرسة الحكومية وينطوك كتاب للاقامة وتكمل وياه باقي الاوراق من سند أقامة وفحص صدر.من تقدم على الاقامة ينطوك وصل مراجعه تراجع بيه حسب ما يكلولك بالهجرة والجوازات فحاليا المراجعه كل 3 أشهر تختم وترجع للبيت وبالشارع محد يسالك وين أقامتك مادامك ماعندك مشاكل ويه أحد وبحالك.
المدارس جيدة وايضا حالة أبنك مهمه لان الشاطر يمشي عدهم بس أكيد تحتاج متابعة من قبل الاهل, أولادي الاثنين من الاوائل بمدارسهم وكل المدرسين يحبوهم وعلاقتهم ممتازة ويه زملائهم.
أي تحتاج أسأل عليه وان شاء الله منقصر وياك.
تقبل ردي
عيني بغداد
-
جرمانه راح تلكه هواي عراقيين هناك والمطاعم العراقية ومنطقة متوسطة بصراحة اني مارايح هناك بس سامع لان اني كنت باللاذقية
الليك بعض النصائح لان انت الظاهر ماعندك فكرة عن سوريا وهاي راح احجيلك تجربة شخصية حوال بقيت هناك شنتين
من الحدود خلي احضر اخوك الخمسة الالف بالجواز ترة كلش عادي لان أذا ماانطيته هو راح يطلب
دير بالك من اصحاب التكسي لاتبين نفسك انت اول مرة تجي لسوريا يعني قبل لا تصعد عامل على الاجرة او تتفق وياه عداد واحتمال اذا منطقة بعيدة تتفق وياه عداد و نص
لاتخلي صاحب التكسي يغريك يقول لك عندي شقة جديدة ونظيفة وايجار ارخص لاتسمع الكلام واتروح ترة اوديك على شقة تعبانة ماتسوة لان كل التكسيات هيج
اذا ناوي تكعد بالبداية بفندق نظيف و حلو انصحك بفندق الماجد قرب سينما السفراء دوار الصالحية
الليله حوالي هسة بالصيف 70 دولار
احتمال هسة راح تلكة الاسعار شوية اعلى وخاصة الشقق لان فترة صيف و سياحة
التلفونات انصحك بخط MTN ماادري اشو اشوفة احسن واكو سيرياتل
طبعا اخوك أذا اول مرة يدخل على سوريا طبعا راح اشوف اكو تغير يعني المدينة النظام يعني احسن من العراق فأذا راد يتونس شوية اكو يمك
جبل قاسيوون هسة كلش حلو
سوق الصالحية
سوق الحميدية
السيدة زينب الخ
واذا اتروح سفرة روح اللاذقية كلش حلوة لان المحافظة هاي انظف من الشام بالصيف غالية الشقق بس بالشتاء بعد العيد ترخص الشقق كلش
والنقل بسوريا كلش رخيص يعني اكو خدمة السيرفيس كلش رخيص و بكل مكان موجودة
بس اذا ناوي يريد اقدم لجوء وناوي يطلع برة فأنصحك يجي على الاردن لان هواي احسن
يكدر يقدم من يوصل على الامم المتحدة حتى يحصل مساعدات و مواد غذائية
اذا عندك أستفسار اخر اني حاضر
-
مشكور اخويا رافد داتعبك وياي
زين ليش الاردن احسن مو العيشة غالية والشقق همين يكلون وهسه بالعراق صارت حيل صعبة ندخل للاردن تقدم وبعد شهرين لو تنقبل لو تنرفض
ليش سوريا شغلتهة صعبة وبعيدة اذا قدم على اليو ان
-
سوريا من ناحية العيش نعم ارخص واسهل كلش الاقامة من ناحية معاملات اللجوء على الامم ابطئ وترة اني واحد من الناس سنتين مامتحول توطين بينما هنا هسة اليوم تحولت للهجرة عندي مقابلة اولى و قبلها باسبوعين مقابل مقابلة توطين واكو هواي حالات بسوريا نفس الشئ يعني انهملت الفايلات و قسم منهم ياس ورجع للعراق
هذا رأيي الشخصي بس من ناحية العيشة والدخول و الاقامة نعم سوريا احسن و بعد انت فكر زين شنو اتريد
أذا مشتغل اخوك ويه الامريكان خلي يقدم على برنامج الهجرة المباشر IOM لان هاي الشغلة ترة مامتوفرة بسوريا
بعد خلي اخوك يفكر زين يعني مو شرط تاخذها قاعده انه سوريا ماراح تنقبل مو شرط هية حيرة و دوخة راس بس هاي حالنه كلنه
بالنسبة اللي تركت سوريا لان ماعندي اطفال بالمدارس فتركت سوريا و هسة بالاردن
اخوك رافد
-
سلام اخوان واخوات ... طبعا اني هسه قريته للموضوع اعذروني . الاخ المستفسر كلام الاخوة كله صحيح ولكن الان الموضوع لا يخص المناطق السياحية ولا الاسواق ولا المدارس اصلا اقايم ماكو وتكدرون تسالون ورح تشوفون الي ديصير . اولا بدأ بمطقة تلو الاخرى ترحيل ومنع 5 سنوات كلها لان مدافعين الضرايب والعقد مو مصدق هو منو الي يدفع الضريبة مالت البيت من اول ما بناه للان صاحبه لو المستأجر اللاجئ؟ عموما فوق ال 90% من اخوانه العراقيين وغيرهم القليل من غير العراقيين لم تصدق عقودهم لنفس الغرض واعتبرت هذه الان مخالفة يمنع منها ال 5 سنوات المذكورة . جيرانه من البيوت انأخذوا وشوفة عيون مو كلام هذا عن سمع . اختكم الان نفس المشكلة اعاني ولكن اكول بلكت ييجي الفحص الطبي يخابرونة ومن المطار عود يندكلي 10 سنين مو خمسة ::) المهم ما طولها ولا اريد اسدها بوجه الي ييجي قابل اني دا امنح الاقامة لكن صدقني شكد ما تصعب كل شي حتى الي ما عنده اي مشكل وعقده نظامي نطوه اسبوع وبعدا مغادره والقليل منهم لسبب غير مفهوم تمدد لهم الاقامة . عموما اني والدتي اجتي من اسبوعين ورجعوها من الحدود وبعدها حصلت ترانزيت ايران ودخلت هنا لمدة 3 ايام فقط بالرابع سافرت ورجعت الى كوردستان .فكروا وسالوا لف مرة ولا تخطي اي خطوة قبل لا تضمن البعدها و ايضا فكروا بمنطقة غير جرمانه . تكون اكثر هدوء وسكينه ولاسباب اخرى .ارجوا ان لا اكون اثقلت واعتذر ان تجاوزت , سلام وتحية للجميع
لنصلي من أجل بعضنا الآخر
اختكم فداء الروح
-
الاخت فداء
ماعرف شنو اللي داتقصدي بالحجي اللي كتبتي وهل هو يشمل سؤالي لو بالغلط كتبتي على الاقامة بسوريامداينطون اقامة لو وين
مشكور
-
حبيبي ما راح اطول عليك السالفة
بالنسبة للمدارس كولشي تمام يكدر اخوك يسجل اطفالة بأي مدرسة يختارها وبعدين ياخذ كتاب تأيد ويورح يقدم على اقامة سنوية بدارسة ابنه وينطو ورقة تتجدد كل ثلاثة اشهر ..
واذا انت تريد تقدم على ال UN الأفضل أن تكتب قصة جيدة واذا يكون وياه اثبات تهديد بعد احسن ..
وإيجارت السكن تختلف بكل محافظة وبكل منطقة ..
يعني يمنا بالحسكة اللي هي قريبة على الموصل الأيجارات ما بين 6500 إلى 8500 ليرة سورية يعني ورقة ونص ورقتين ..
والتوفيق للجميع
-
السلام عليكم
الاخت فداء الروح:
أذا ممكن توضحين موضوع السكن وعدم دفع الضريبه والترحيل لان هذي أول مرة أسمع بهذا الموضوع وبيا مناطق صار علمود نسأل بيها وأذا كان حقيقي نلحك نسوي عقود ايجار مصدقه ونخلص من دوخة الراس.
تحياتي
عيني بغداد
-
سلام للجميع اخواني واخواتي
اني عندي اطفال بالمدارس الابتدائية ومتوسطة بعد ظروف صعبة قررت اروح لسوريا واعيش هناك لان امان اول شي والعيشة شوية اقل من هنا ويكولون الامم تساعد العوائل
بالنسبة الي كام لولد وبنية شكد معدل العيشة هناك بالنسبة للايجار والمعيشة من اكل ولبس وووزايدة وناقصة
يعني انطوني ارقام ومصاريف المدرسة واي منطقة تناسبني ؟؟؟؟
اشكر الجميع واملي بالاجوبة من كل واحد عايش هناك