ankawa
منتدى الهجرة واللجوء => الهجرة و واللاجئين => الموضوع حرر بواسطة: casper_baghdad في 13:59 03/08/2009
-
السلام عليكم شباب
شباب اني قصتي قصة لان هاي ثالث دولة ترفضني ( امريكا طبعا اني رفضتها ، والمانيا والسويد همه رفضوني ) وهذا كله خلال سنة واحدة من تاريخ تقديمي للامم المتحدة في عمان
البارحة خابروني على توطين جديد الى ايرلندا وان شاء الله وبركة دعواتكم انه انقبل لان هيج فكر عبالك دينصور ما شايف
طبعا بالمناسبة الاسبوع الماضي كان الوف البريطاني موجود في عمان وقابل عدد من العوائل
سؤالي هو هل الوفد البريطاني هو نفسة رح يقابلني علساس ايرلندا مقاطة من بريطانيا لو شون
ثانيا ما هي ميزات ايرلندا بالنسبة للاجئين
الي عندة معلومات عنها اقتصاديا بالنسبة للشغل او الدراسة او المساعدات او مخصصات السكن والتأمين الصحي واي معلومة ارجوكم لا تبخلوها علية
طبعا اني كلما يحولوني دولة اروووووووح واسرح واطير عليها واشتغل واسكن واتعب وحتى سفرات اجي على اهلي وتالي يدك التلفون يكولولي مرفوضض هههههههه الله لا يكولها هلمرة لان استويت هنا
اتمنى من تكون عنده اي معلومة لا يبخلها والي ما عندة معلومة دعواتكم لان دعوة المظلوم مستجابة ودعوة المسافر هم وماكو مثل العراقيين مظلومين ومشردين بسفرهم
متنميا لكل اعضاء هذا المنتدى وزواره والقائمين عليه وكل صاحب مصيبة ان تنفتح ابواب السعادة والراحة عليه وان يسلمكم واهليكم من كل شر ويبعده وان يفرجها علينا بسفر قريب وعاجل وسريع وسهل ويجمع شملنا بأهلينا على الخير دوما وان يرزق القائمين على هذا المنتدى الاجر ويرزقهم صحة وعافية على ما يقدمون من مساعدة لاااااااااا توصف لجمع شمل المحبين والمساعدة فجزى الجميع كل خير
اخوكم
casper _bagdad
-
ادعوا الله سبحانه وتعالى ان ييسر لك امرك لما فيه مرضاته جلت قدرته وان يفتح عليك ابواب رحمته وفضله انه سميع مجيب
-
مرحبا اخي
عندي استفسار منك
هسة من يتصلون بيك من ال iom
ويكولولك طلع الك توطين على اميركا
شلون ترفض الموضوع ؟؟ بس تطلب غلق الفايل لو شلون ؟؟
وشلون يتم تحويلك الى دولة اخرى يعني انت تكول انه رفضتك
المانيا والسويد وهسة طلعتلك ايرلندا
شلون الواحد يكدر يقدم مرة ثانية ورة ميرفض دولة ميعنة ؟؟؟
??? ???
ياريت تنطيني اي معلومة اخي ممكن استفيد منها
-
السلام عليكم اخى الخير فى مايختاره الله انا اختى فى ايرلندا دبلن المساعدات جيدة جدا والاطفال الهم راتب اسبوعى الى عمر 18 سنة والام الها راتب على اطفالها اسمة جايلد بنفت ينحط الها بالبنك كل نهاية سنة من غير راتب السكن والعيشة الى هى للاب كل اسبوع الابناء عندما يبلغون 18 سنة يتحولون نظام ثانى وهم راتب يعنى اكثرية العراقيين يعيشون على المساعدات ومايحتاجون شغل لان رواتب قوية واتمنى للجميع الموفقية واسالك الدعاء لانى بانتظار الموافقة الامنية امريكا
-
الله ياريت اروح ال ايرلندا
-
اخي العزيز arch.s
اني خابروني اي او ام وقالوا لي تعال فلان يوم فلان ساعة وجيب اوراقك كلها
من رحت جان عبالي انه اي او ام هيه الي تحدد الدولة ما عبالي بس امريكا لكن خلال الانتضار ومن خلال الحجي بيني وبين العراقيين الي جانوا ينتضرون ويايه على المقابلة افتهمت واول ما صاحوا علية كتلهم انه اني ارفض امريكا
كالت ليش وشنو الاسباب وخوفتني من الرفض حييييييل وكالتلي اخذ فترة تفكر وروح اسأل المفوضية اذا اعندك خيارات اذا رفضت امريكا كتلها لا ما اروح ولا انتضر هسه ارفض امريكا وكالت بالتأكيد محد يجبرك على دولة تروحلها ولا انته تجبر دولة انه تقبلك فأحتمال رح تنتضر هوايه واحتمال تروح منك فرصه التوطين مرة ثانية كتلها مو مشكلة بس امريكا لاااااااااا ما اروح
وقعتني على ورقة انسحاب من برنامج اي او ام وانطنتي نسخة من الورقة
فسألتها شلون هسه رح يرجع ملفي للمفوضية كالت احنه رح نبلغهم لكن انته ضروري تروح عليهم وتبلغهم بأنسحابك من برنامج اي او ام
المهم اني سحبت روحي ومن الغبشة على المفوضية كالو خلي نسخة من الورقة مال الانسحاب بالصندوق مال البريد الي يم السكيورتي ويا ورقة المفوضية
طبعا بالمناسبة مكتوب بالورقة شنو اسباب رفضي لامريكا وموقعين عليها اني والموضفةالي بال اي او ام
وطبعا ورة ما خليت الظرف بالبريد خابرتهم وكتلهم رفضت
ورها بشهرين خابروني وسألوني كالو ليش رفضت
ورها المخابره هاي كالوا حولناك على المانيا
ورة حوالي شهر ونص كالو حولناك على السويد لان المانيا رفضتك ( بدون ما اقابلهم ) لكن حددولي موعد مع الوفد السويدي وقابلت موظف جانت المقابلة على احسن ما يرام الا الربع ساعة الاخيرة كام يتهمني اتهامات ويريد اثبت برائتي كتله انته ما فرقت عن اي مليشيا بالعراق لان تتهمك بدون دليل وتريد اثبت براءتي فهو صار عصبي واني داحجي بصياح ويا هههههههههه فوك القهر ورة ما خلصت المقابلة كتله رح انقبل لو لا ههههههه
المهم ورة شهرين بالضبط قابلوني اليو ان وكالولي ليش رفضوك السويديين وانه اني وضعي صار صعب لان هاي الدولة الثالثة وكعدوا يكولوي بيا جزء كان صعب بالمقابلة وكم سؤال حول قصتي للتأكد وكالو احتمال نحولك لدولة جديدة ويمكن ايرلندا لكن مو متأكيدين
البارحة خابروني كالو ملفك رح يتقدم لايرلندا ويريدون يتاكدون اذا اهلي ويايه بالتقديم على المفوضية لو لا؟
وهسه اني داسوي بحث عن ايرلندا
ونسأل الله التوفيق للجميع
-
شكرا اخوية fddd
والله رفعت معنوياتي ويا ريت الله يسمع منك انه تكون الحياة مثل ما كتبت واتمنى المزيد من المعلومات
والشكر موصول للاخ Radio-Amateur على دعواته الصادقة نسأل الله ان يستجيب وان يفرج عن الجميع وان يعجل الفرج آمييييييييين
-
انشاءاللة وبعون الرب هل مرة تكون مقبول ربي يوفقك بكل المقابلات وانشاءاللة يوم نسمع عن سفرك للبلد الي تريد وتتوفق بكل مراحل الحياة
-
مرحبا اخي كاسبر _بغداد
اي والله احنا هم خابروا علينا وكالولنة انه تعالوا
وجيبوا كل اوراقكم وياكم
بس هم ما كنا نعرف انه بس اميركا
المهم احنا ناووين نرفض بكل الاحوال
وان شاء الله تطلع النا بريطانيا ويوافقون علينة
وننتظر حالنة حال غيرنا طلعت طلعت
ما طلعت النا الله
الف شكر الك اخي على الرد السريع
-
اخي العزيز ..اتمنى لك كل الموفقية وان شاء الله تكون ايرلندا هي المحطة الاخيرة لقبولك ...
ملاحظة ,هناك بعض الناس قاموا برفض التوطين الى امريكا وبالتالي قامت المنظمة بغلق ملفاتهم نهائيا
اي لم تتحول ملفاتهم الى الامم المتحدة او الى دول اخرى او ماشابه ذلك !!
هنالك بعض الناس قاموا بتأجيل السفر الى امريكا ولاكثر من مرة ومن حقك تأجيل السفر لسبب معقول
حتى تستطيع ان تصل الى قرار اخير فيما اذا رغبت بالسفر الى امريكا او لا !!
تمنياتي لك بالتوفيق
-
اهلا وسهلا بيك في ايرلندا وانشالله مقبووووول وصدكني هاي من حسن حظك لان عالاقل لغة ايرلندا هي الانكليزية بينما الالمانية والسويدية من اصعب لغات اوربا والتكيف صعب بدون لغة خصوصا بالبداية .
اخي الكريم اني مقيمة بايرلندا حاليا ... بالنسبة للشغل بايرلندا شحيح شوية بس المساعدات جيدة جدا مثل ماكالك الاخ fddd هناك مساعدات لكلك طفل لغاية 18 سنة وراتب لكل شخص بالغ واكو مساعدات اضافية للاشخاص اللي يعانون من امراض مزمنة عافاكم الله .. اما الدراسة مجانا للاجئين وتكدر تعادل شهادتك بسهولة خلال 6 اسابيع وتدخل كورسات لغة وراها كلية ... الايجار يدفعولك حسب افراد العائلة بس عموما المبلغ مايتجاوز 1200 يورو شهريا ... اما بالنسبة للتامين الصحي فاللي مايشتغل يعطوه مديكال كارد والعلاج عليه مجاني حتى الاسنان ( حشو , تنظيف , قلع) وحتى اي عملية جراحية ضرورية ماعدا عمليات التجميل طبعا ..
هاي اهم المعلومات واي شي اني بالخدمة والف هلا بيكم انشالله
بس حبيت بالنهاية انوه انه ايرلندا الجنوبية هي دولة مستقلة تماما عن بريطانيا ماعدا مدينة تقع شمال ايرلندا المتمثلة بـ(بلفاست ) مازالت مقاطعة تابعة لبريطانيا لحد الان بحكم احتلالهم لها .
-
زين اخوية انت من قابلت توطين قبل لتروح للاي او ام مجنت تعرف انت متحول لامريكا ؟؟؟؟؟؟؟؟؟؟ و طبعا اخواني اكيد اللي معاجبة يروح لامريكا و ممضطر ليروح بسسسس اللي ما عندة غير خيار ليجرب فيكة الرفض لان ما اتصور تصيب بهاي الصورة اللي تحدث عنها الاخ و ترة تخسرون المشيتين
-
الاخت انجي
انا شاااااكر جدا دعواتك وأسال الله ان يوفقك ويجزيك عنا كل خير لما تقدمين من معلومة او كلمة تعيننا فيما بيننا ولك في الاجر نصيب كبير والمنتدى كله يشهد الك ولتايكر وعكعك وووو واعذورني على عدم ذكر الاخرين لكن الكل في هذا المكان تساعد بعضها ليس لغايه شئ سوا المنفعة العامة للجميع وحب الخير للجميع ويعم على الجميع
-
اخواني Ammar Frankfurt وعاشق تراب الوطن
من خلال تجربتي انا بالرفض لامريكا وتجربة زملاءي الذين كانوا معي بالعمل والان همه بكندا كانت بدون اي معوقات واتوقع الذين تنغلق ملفاتهم حسب ما ذكرت همه ما عرفوا كيف ومتى يرفضون امريكا
وطريقة ابلاغ المفوضية بذلك والاسباب
طبعا اذا فرضنا انه الشخص قرر نهائيا ما يريد امريكا او اموره وضعه يسمح بصبر شوية او مثلا اهله جميعا في بلد غير امريكا وهو الشخص الوحيد البعيد عنهم
لكن ما سمعت احد هو انقبل على التوطين على اي بلد وانغلق ملفة الا اذا كانت الاجراءات كاملة جميعها للسفر حتى موعد السفر وبقى بس يصعد للطيارة وتذكر انه يريد دولة ثانية فهذا ما اعرف شكول علي الا انه الله يسامحة لان تعب الدنيا واخذ مكان شخص غيره وفجئة صار مزاجة ازرق وراد غير دولة
اني ما اشجع على رفض امريكا ولا على قبولها كل شخص وضروفه لكن انصح بالتصرف السليم لصالح نفسه ولصالح غيره
-
الاخت بت بطوطة
ما اعرف شلون اشكرج على هاي المعلومات التي اسال الله ان يجعل لك بكل حرف مليون حسنة وانتي حسبيي شكد
اختي اني طامع بأن اسالج اكثر حول المساعدات بالنسبة لشاب وحدة يعني لا عائلة ولا جهال ولا كل شئ شلون رح يكون السكن رح يدفعون الى متى الايجار وبالنسبة الى الدارسة اني اساسا رغبتي اشتغل علمود الدراسة فهل من الممكن تكون الدراسات الماستر او دكتوراه مجانية؟؟؟ لو شلون تكون او شتنصحيني
مسأله مهمه وهي معاملات لم الشمل اريد اعرف كل معلومة عليها اذا تكدرين
بالنسبة للجواز الايرلندي كم سنة للحصو ل عليه وهل يعامل معاملة الجواز البريطاني وهل استطيع ان ادخل بريطانيا بدون فيزة لو شلون ؟ واكو قبل ما احصل على الجواز ترفل ديكومنت ؟
ارجو ان ما اكون ثقلت عليج وتذكري بأن الله كريم وبكل حرف مليون حسنة ;D :D
-
اخوية كاسبر بغداد تدلل احنا اخوة ويكفي دعائك النا وانشالله تجون وترتاحون عن قريب
راح احاول اجاوب على اسئلتك على شكل نقاط :
1- هنا لاتخاف الاعزب وصاحب العائلة نفس الشي لان كل شخص عنده مساعدات ومديكال كارد ويدفعولة الايجار الى ان يلكة شغل واذا مالكة ماتنقطع المساعدات نهائيا واكو شباب صارلهم سنين هنا عايشين عالبنفت .
2- الدراسة مجانا للاجئين واحب ابشرك انه همة اللي ينطوك فلوس وقروض وكارت للتنقل وكلشي عليهم .
3- لم الشمل ممكن تقدم عليه اول ماتوصل للزوجة والاولاد اذا متزوج و( الام , الاب ) اذا كنت اقل من 21سنة والا لازم تثبت انه انت المعيل الوحيد لاهلك وهمة بحاجتك وتعززهة بتقارير عن حالتهم الصحية حتى يستثنوك من القانون
4- يحقلك التقديم عالجواز الايرلندي بعد مرور 3 سنوات كاملة من تاريخ دخولك ايرلندا وراها مامعلوم الفترة الى ان تحصل عليها بس عموما ما تتجاوز السنتين كحدّ اقصى . والجواز الايرلندي جواز اوربي حاله حال الجواز البريطاني والالماني . بالنسبة للترفل دوكمنت موجود ايضا بس ماعندي معلومات اذا ممكن تقدمون عليه باعتبار انت عندك الجواز العراقي بس احنا صدرولنه ترفل دوكمنت لان ماعدنا جوازات عراقية بس هم اسألك بيهة انشالله واتاكد .
5- بالنسبة لدخول بريطانيا بالجواز العراقي وحتى اذا كان عندك ترفل دوكمنت فلازم تقدم على فيزة لحين حصولك عالجواز الايرلندي ... بس هنا اكو خطوط جوية تسمح لحاملي الترفل دوكمنت بدخول بريطانيا بدون فيزا وهواية عراقيين رايحين جايين عن طريقهة وبدون مشاكل .
اتمنى استفاديت من معلوماتي البسيطة وامانة اي سؤال يخطر ببالك اني اختك هنا وحاضرة لاي استفسار ..
تحياتي
-
هذا رابط السوشيل ولفر وكلشي بيه يخص المساعدات
http://www.welfare.ie/EN/Pages/default.aspx
هذا موقع (دليل المواطن) اذا عندك اي استفسار في اي مجال
www.citizensinformation.ie
هذا موقع يفيدك حتى تعرف حقوقك كمهاجر
www.immigrantcouncil.ie
وهم تدلل
-
مرحبا اخواني واخواتي
والف شكر الكم على كل المعلومات القيمة
صراحة احنا اليوم يالله دزوا علينة علمود الكارت الازرق
يعني بعد ما حصلنة عليه
وكالت النة الي كتبت المعلومات مال الكارت الازرق على التوطين انه طلع على اميركا
وكنالهة انه ااحنا منريد اميركا كالت هذا الكلام مع الخط الساخن
وهي متعرف شي بس حذرتانه ينسد فايلنا
المهم احنا الاسبوع القادم عدنا لاول مرة مقابلة وية ال
iom
يعني شغلتنا بعدها طويلة
بس من كلامك احسن نرفض بأول مقابلة ونصبر والصبر من الله بلكي حولونة على غير دولة
وياريت بريطانيا لانه اغلب اهليتنة هناك بس مو اقارب درجة اولى
يعني عمام وخوال وكم عائلة وحتى يملكون الجنسية البريطانية لانه هم ولادة بريطانيا
ومستعدين يكفلونة
لو شنو رايكم بلكي هم يرفضونة علوى اذا هم رفضوا يكون منهم مو من عدنا بس هاي يرادلهة بخت
وحظ
ياريت اذا اكو اخوة بعد قدموا على تغير الدولة او رفضوا يحجولنة شنو صار وياهم
وبأنتظار ارائكم وتجاربكم
والف شكر الكم مرة ثانية
-
اخي الكريم arch.s
احب اكولك هاي موظفة الكارت الازرق من مرة شفتها وكتلها رفضت امريكا ردت اتخبل من حجيها بحيث جديات كوووووووووووة لزمت نفسي وما كفشتها من شعرها لان مو بس سدتها بوجهي وانما كالتلي روح اشتريلك قبر بسحاب وموت بعمان احسنلك وانت تخيل وضليت اسبوع اريد بس انسى كلامها السم كوووة
المهم اخوية كتلك كلمن وضروفه ولا تستعجل بالرفض يعني ما اريدك تتندم اذا تأخر توطينك مرة ثانية وتلوم نفسك على هذا القرار
امريكا دولة كبيرة جدا وفرصها كبيرة لكن بنفس الوقت اذا تريد ترفض فأول مقابلة ارفض وانسحب
تحياتي لك اخوية واتمنالك التوفيق الكبير والعاجل بأذن الله
-
اخي كاسبر الف شكر الك
والله اني متعبتك وياية بأسئلتي
المهم هاية الي قابلتنا هم سدتها بوجهنا وشنحجي وياها
تكول ما اعرف واتصلوا بالخط الساخن
لو بس افتهم شكو مشغليهة كان ارتاحيت
احنا صراحة افضل النا نرفض ونخلص بس ورة منقابل اول مقابلة بال
iom
ونشوف تاليتها وين يصفي بينا الدهر
صدك سؤال هسة اني اخوية متزوج واول مرة قابلنا باليو ان سوولة فايل خاص به
بس المفروض يربطون فايلاتنا بس ما طلبوه ويانة بالمقابلة
شلون نتأكد انه ربطوا الفايلات مالتنة ؟؟
والف شكر الك اخي ولكل الاخوة