ankawa
منتدى الهجرة واللجوء => الهجرة و واللاجئين => الموضوع حرر بواسطة: alugily في 08:23 05/08/2009
-
السلام عليكم ورحمة الله وبركاته اخواني الاعزاء اني اخوكم اسامة العكيلي (ابو فهد) من الاسكندريه الموضوع هو اني قبل شهر رحت الى الامم المتحده في 6 اكتوبر وقدمت الكارت الاصفر وشهادات الميلاد مال اطفالي وجواز الام لانه الام ليست عراقيه وطلبت منهم ان اضيف الاطفال الى الكارت الاصفر وشافت الموظفه الي اسمه دينا الاوراق وطبت جوه وره نص ساعه اجتني وكلتلي اوراقك مظبوطه بس يا ريت اجيبلنه شهادات ميلاد من السفاره العراقيه كلتله تأمرين ونطتني موعد على البارحه الي هو مصادف 4-8-2009 رحت اني الى السفارة العراقيه وراها اب كم يوم ويشكر الاخ علي الي بلسفاره لانه كملي الشهاداة ابنفس اليوم لانه اني جاي من الاسكندريه والبارحه اجرت سياره كبيره ومكيفه علمود الاطفال ميتبهذلون لانه يسمينه عمره سنة واربع اشهر وفهد عمره شهرين فقط ورحت للامم المتحده ومن ساعه الثامنة والنصف صباحا الى حد الساعه الواحده ظهرا يله قابلونه يعني اربع ساعات ونص بلحر والتراب لانه جانو ديحفرون ابصفهم والشفلات مشتغله والجهال مااريد اوصفلكم حالهم بس حسبي الله ونعم الوكيل بيهم المهم كولو طببونه لااضافه الاطفال قابلتنه موضفه اسف للفض بس اتنگط حقاره وحقد على العراقيين طلبت الاوراق والمستمسكات كلتلي دقيقه راحت على وحده بعد احقر منه واجوي الثنين كلولي ميخالف انظيفهم بس انريد منك ان اطلعلهم جوازات حته نتأكد انو هذوله عراقيين !!!!!!!!! اتصورو شهادة ميلاد مصريه مختومه ومصدقه من وزارة الخارجيه المصريه ووزارة الصحه المصريه وشهادة ميلاد من السفاره العراقيه كل هاي متثبت انو اطفالي عراقيين مااريد اطول عليكم لانه اني اصلا طولت عليكم بس اعذروني لانه والله اني هسه دااكتب وداارجف اعصابي كلش تعبانه من البارحه الحد هسه المهم اتصورو دااكللها الله ايخليج احنه جاين من الاسكندريه وشوفي وضع اطفالي واماجرلهم سياره ومصاريف واحنه وضعنه على كدنه اتصورو اتكلي روح لااسكندريه الى كاريتاس وكللهم حته ينطوك اجرة السياره وباستهزاء ولهنا اني كلته بعد كافي جان اتكب عندي واكوم عليهم واطشر الاوراق واشلع الماوس مال كمبيوتر واركعه بلحايط وافلشه وانفتح عليهم مثل المدفع الرشاش دك مخليتلهم لااول ولا تالي جان ايصيحون الامن عليه اول مجوي كلتلهم ديرو بالكم تتقربون عليه تره اني ميت والي يتقرب عليه اني ممسؤل تركه كبت عندي الغيره العراقيه وهنا اسويكم مثل الخرفان احسنلكم وخرو وجان اطلع للساحه ومااكللكم كله انلمت عليه سودانيين وصومالين واشكار غريبه عجيبه حته بيهم ناس لونهم اخضر ماادري اني من العصبيه هيج شفتهم جان تطلع عليه ركض الموضفه الي اسمه سحر جان تنطيني ورقه وكلتلي ده كل الي تقدر تعملو معانا طلعت الورقه مال شكوه كلتلي اكتبه وذبه بلصندوق البره جان اشككه وذبه ابوجه لا اكلكم ولا اتكلولي البارحه فلم هندي بل امم المتحده واني اسف لانه طولت عليكم بس حبيت اطرح احد المشاكل الي اتواجه العراقيين في الامم المتحده في مصر وشكرا
اخوكم اسامة العگيلي (ابو فهد)
-
حقك اخوية وشما حجيت عليهم مراح ايكفي
بس اكوا مثل اكلك ( كل من طلع من دار قل مقدارة )
وهاي احنة القراقين كلنة هشكل والمشكلة دي قل مقدارنة بالدول العربية الي على اساس هذولة ؟؟؟؟
على العموم هم اكلك احنة ما عدنة غير الصبر وطولة البال وتعال شوف العراقين اهنا ابسورية
هم نفس الشي اذا باليوان واذا بالسفارة العراقية او القنصلية المفتوحة ابحلب
يعني اذا ابن البلد يتعمد ايهينك وياخر معاملتك ويطلب منك طلبات هوة اصلا ميعرف اشلون اسويهة
فشتتوقع من الغريب
-
حسبنا الله ونعم الوكيل
-
شكرا اخواني على ردودكم وتعاطفكم ويايه بس تره الي ديقلل من احترام العراقيين وشأنهم ويخلي العراقيين مذلولين بل بلدان العربيه بلاخص حكومتنه الموقره واني مااستبعد انو همه الي ديوصون بقيه البلدان اب اذلال العراقيين ومااعرف شنو قصدهم من هذه وتره بمناسبه الفيز الى مصر هذه طلب من الحكومه العراقيه ان مينطون فيز للعراقين وهوايه امور تره سببها الحكومه العراقيه البطله المغواره على شعبه
وشكرا
-
حسبي الله ونعم الوكيل
اخويه تره بكل البلدان العربيه نفس الشي بس ميصير تفقد اعصابك لان انته اللي راح تخسر كلنا مرينا بهيج ظروف واطفالنه تبهذلو من الانتظار بس اللي يريد شي يفوت شي وان شاء الله تحصل اللي تريده بس اصبر وقوي قلبك وتحمل والله موجود وشايف الحال
تحياتي toofy
-
الله يوفقك ويوكف وياك لخاطر هل جهال يارب ولاحول ولاقوة الا بالله وربنا يفتحها بوجهكم يارب ويهون امر كل مضلوم وغريب طول بالك أخوية
-
الله يصبرك اخوية اسامة
اكيد حقك، منو جان يفكر يجي يوم يصير العراقي تحت رحمة المصري
بس حاول تهدي نفسك وتاخذ الاطفال وتروح على مكان حلو وتنسى كل شي وبعد يومين ثلاثة تحاول تفكر بهدوء شراح تسوي
وترى اكلك وين متروح نفس الشيء انت اذا تروح للاردن وتشوف المعاملة هناك راح تهون عليك مصيبنك
والله يصبرك ويكون معاك ويحميك انت عائلتك
-
حسبي الله ونعم الوكيل ....
يلا أخوية شسوي هذا هو أبسط فرق بين البلدان العربية والبلدان الغربية ...يعني أبسط شي هو التعامل من تطلع البلد أوربي تشوف الناس كلها تضحك بوجهك ويتمنون يساعدوك بكل صغيرة وجبيرة ....أما بالبلدان العربية هههههههههههه الكل معبس ومطنكر عبالك كاتل واحد من أهله الأفندي وأذا كتله أحتاج مساعده يكلب الدنيا ......أتمنالك الصبر ولا تصير عصبي ترة ما تفيد..
تحياتـــــــــــــــــــــــــــــي ;)
-
أخوية العزيز العكيلي أولا أهلا بيك بلمنتدى نورتنا
ثانيا اني جدا متضامن وياك وحقك بكل لسويته لأن مع الأسف صارو هذوله يتحكمون برأسنه ربي لا يوفقها معاجبها وروح اخذ من كرتاس شنو الحجي الزايد والعب باعصابنا والله كل عراقي عنده ذرة غيره المفروض يتصرف مثلك وهذا أبسط شي بحقهم يستاهلون اكثر هذا الصندوق كلشي ميفيد اني خليت بي ظرف بشهر التاسع 2008 ومطبوع يعني مو تكول ماواضح ولحد الان لاحس ولا خبر راح يصير سنة عليه فعاشت ايدك من شكيت لشكوى وشمرتها بوجها تسوه عمرها واني برأي لازم مانسكت على هذا الاستهزاء ونفضحهم بوسائل الاعلام وبالاسماء مدام تعرف اساميهم نسأل الله أن يسهل أمرك وربي يحفظلك اطفالك ويفرجها على جميع العراقيين
تحياتي
شيبو
-
مرحبا جميعا
اول شي اخويه العكيلي انا جدا متعاطف وياك وحيل مقهور على الاطفال اللي ما الهم اي ذنب
ثاني شي انته ركز على قضيتك مو تريدهه حجه على الحكومه اللي انته اسميهه موقره
لآن اخويه تره هيه الحكومه مو بحالنه اوكي
اني مثلك انولدت بتي اهنا بتركيا ولا سويتلهه اي اوراق من السفاره لحد الان ومن رحت الى مكتب اليو - ان
اتلكوني من الباب بس شافو ويانه اطفال واقصد الامن بالباب وهمه طبعا اتراك والموضفين ابدا ما اخرونه اقل من نص ساعه انطونه ورقة لجوء للطفله وكلهم اوجوهم مبتسمه لا انوب كالولي ليش تجي كان ممكن تتصل بالتلفون واحنه اندزللك الورقه بالفاكس
فهاي وين وذيج وين الله يكون بعونكم وبعونه
تقبل مروري اخوكم زونا تركيا
-
أنا لله ونا اليه راجعون حسبي الله ونعم الوكيل على كل من يحاول ان ياذي عراقي
الصبر اخويه الصبر انته هم سمعت بلد عربي بيه حظ وتعاطف مع القضية العراقية
الله ينتقم منهم اشر انتقام بحق محمد وال محمد ونشاء الله يولي عليهم شرارهم فيدعون فلايستجاب لهم
اخويه اوصيك بالصبر حتى تكمل شغلتك عدهم وعدنه مثل عراقي المعذره من الاعضاء الطيبين اذا عندك شغلة يم الكلب كله حجي كلب
-
اخويه العزيز ما اكول غير حسبي الله ونعم الوكيل بيهم واكلك شغله ثانيه لتصدك من يكولولك اكتب معاملتك وذبه بالصندوق لان مصيرالمعامله بالنفايات صدكني لان صارت بينه احنه من سنة 2007 يمكن لو اكلك كاتبين 4 معاملات وكلشي ماكو الى ان رحت وهم سويتلهم هوسه محترمه وكتله معاملتي هسه تدخل وكدامي وصدك دخلت المعامله وثاني يوم اتصلو بيه حته احضر مقابله باليو ان والحمد لله هسه كملنه كلشي ودننتضر الموافقه الامنيه انته هم هيجي سوي وربي يبارك بيك ويفتحها بوجهك ويبارك باطفالك امين
اختك مياده /مصر
-
حسبي الله ونعم الوكيل وانشاء الله اسوء من حالنةا يصيرون لك ذولة المصريين خيرنة مغركهم اذا جان هسة واذا جان قبل حسبي الله ونعم الوكيل بجاة اطفالك الي اتبهذلو والله لو يهود جان حنو بس شنكول غير اللخ ارحم الراحمين حسبي الله ونعم الوكيل
اشوكت الله ايخلصنة منهم ويخلصكم منهم
-
حسبي الله و نعم الوكيل بلة منو جان يفكر هذولة المصريين يسوون بالعراقي هيجي بس شنكول الله جبير اليهود يتمشون بنصهم و ميكدرون غير على العراقيين يمعود كلهم هيجي تعال شوف سوريا لعد البارحة رجال متاخر عن ختم الاقامة مالتة يوم واحد بس و لو شايف شسوة بي كام يهددة و يريد يختملة مغادرة و خطية الرجال جبير بالعمر يعني و الله لو بيدي الا اخمطة بوكس للسوري بس اويلي
منكول غير الله كريم و يخلصنة ان شاء الله منهم
-
الله يكون بعونك اخويا صدكني حقك بس هذا مو صوجهم صوجنا احنا نسكتلهم شوفو السودانين شيسون بيهم يموتون من الخوف منهم بالامم المتحدة والكاريتاس
يا اخوان لازم الكل يعرف بانه احنا لاجئين وعدنا حماية وكلهم هذولة ياخذون مرتبات خيالية بسببنا يعني مو بلاش يخدمونا
-
اخي حسبيه الله ونع الوكيل عليهم اخي المشكل انه معظم العراقيين ممحتاجين مثل باقي اللاجئين عايشين من جيوبنا وتندخل عملة صعبة ومع ذالك مخلصانين منهم بس الله سبحانه وتعالى يمهل ولا يهمل ان شاء الله ميدوم حال العراق هكذا ونرجع بعزة نفس وكرامه .........اختك ايات
-
اخي العزيز الله يصبرك انشاء الله ويسهلك امرك بس اخي العزيز للاسف احنه العراقيين هيجي صار بينه احنه الي جنه قبل من نروح لدوله يريدون يشيلونه فوك راسهم بس هسه للاسف كلشي اتغير والعراقي صار منبوذ من اغلبية الدول العربيه مو بس المصريين ولا السوريين ولا الاردنيين تقريبا اغلبية الدول العربيه محد يريد العراقيين واكولها للاسف الشديد يرحبون بالعراقيين بالدول الاجنبيه اكثر من الدول العربيه ويحترمون الانسان حتى لو كان لاجىء ويعاملوه مثل ما يعاملون اي شخص ثاني اخي العزيز لا تنقهر ولا تضوج لازم يجي يوم ويرجع للعراق وخصوصا للعراقيين مكانتهم بين الدول وانشاء الله يرجع هذا الشي قريبا بس العتب هم على حكومتك التعبانه الي كلشي ما تكدر تسوي وملتهين بس يبوكون وهذا هوه.
اخي العزيز اني حصلت عقد عمل بشركة اجنبيه براتب 6500 دولار شهريا في دبي علما اني اشتغل بشركه اجنبية بس ردت احول لدبي كلت احسن تدري وقعت العقد وكملت اوراقي كلها واخر شي جان يرفضون الفيزا مالتي الاماراتيين تعرف شنو كاتبين سبب الرفض لانه عراقي ولاسباب امنيه !!!!! والشخص الي اشتغل بمكاني واحد هندي بيوم واحد طلعتله اقامه 3 سنوات !!!!! عادي اخي العزيز مو بس انت متاذي كل العراقيين متاذيين بس شنسوي نصبر والله كريم تحياتي الك ولا تضوج ولا تنقهر الله يسهل امورك .
-
الله يصبرك اخي العزيز
نحن هم مرينا بنفس الظروف في الامم المتحدة وكان لدينا موعد مقابلة وعندما رحنا قاموا بدمج كارت ماما مع ملفنا ونحن لم نطلب ذلك ولم يقابلونا واصلا الي المفروض يقابلنا مسافر منذ 3 اشهر خارج مصر يعني يلوصون بكيفهم ومحد يحاسبهم ولحد الان لم نستلم كارت ماما وكانت معاملة الموظفة سيئة جدا بس نحن تملكنا اعصابنا وحتى زوجي كان يتكلم معها بطريقة عادية فقالت له انت بصرخة عليه ليه ؟
وهم جائت موظفتين تتكلم معنا بس بدون خصوصية يعني بالحديقة
وعندما اعترضنا يقولون مايصير نرجع الكارت القديم خلاص انعدم ....
ونحن نسكن القاهرة يعني كان طريق طويل بس اكيد مو مثلك الله يساعدك
-
انا لله وانا اليه راجعون
اخويه ابو فهد الورده حبيبي طول بالك يمعود محد يسوه والله العظيم وداعتك هذوله العرب حاقدين على العراقيين والاسباب كثيره وفوق ما تتصور وترى همه حقهم تدري ليش لان حكومتك العظيمه ما مسويه اي قدر وقيمه للعراقيين بالداخل والخارج بعد اتريد هذوله الحاقدين ايقدرونا ما اقول غير الله ينصرك على من ظلمك ولا تنسى انه اكو رب اسمه الكريم
اخوك البصري
-
حبيبي ابو فهد الوردة .... لاتضوج ولا يضيق خلكك انته تاج على راس اي شخص وحقك بكل شي
بالمناسبة اكولك فد شي اني من جنت صغير واقره على قصص الانبياء ( عليهم السلام ) جنت اكول بيني وبين نفسي لويش رب العالمين خص هذه البقعة بالذات بكل الانبياء يعني قصدي لويش مانزل منهم بالصين لو بامريكا مثلا وحنت احاول افتهم حكمت رب العالمين بالموضوع بس بيني وبينك هسة يلة افتهمت ورة الاحداث اللي مرينة بيها أنه الله سبحانة وتعالى نزل كل الانبياء عدنه لأن احنة ومع الاسف ومع احترامي لكل انسان شريف ( مو اوادم ) واكبر دليل هذا اللي ديصير بينه فأحنا صدك ( قصدي الامة العربية ) نستاهل هذا الشي لان احنا ما نتعظ وهمين ولحد الان ما ملتزمين بأمور دينه وابسط شي المساعدة والاحترام وهذه اهم خصلتين بكل الاديان السماوية.
أني اسف ولكن هذه وجهة نظري بالموضوع ولا اقصد الاساءه لأي أحد وارجو لك الموفقية وترة اني حجيت من ورة حركة كلبي على اخواني بالمهجر
اخوك
ابو خالد
-
اخويه ابو خالد وجميع الاخوه والاخوات انتو تاج على راس كل العرب وهيهات من مذلت العراقي واحنه نبقه طول عمرنه تاج على راس كل العرب اجمع مهما كنا من جميع اطياف الشعب العراقي من مسلمين ومسيحين وصابئه ويزيدين وكل بقيه الاديان والله كل العالم حاقد علينه من العرب الجرب فقط بس تبقا ايدينا فوق ايديهم للابد احنه شرف العرب واحنه قاموس العرب واحنه تاريخ العرب واحنه مستقبل العرب والله المستعان وليس العرب الجرب اجمع ماعدا العراقيين الاشراف
اخوكم اسامة العگيلي (ابو فهد)
-
السلام عليكم اخي ابو فهد
لتشيل هم وان شاء الله تفرج وماريد اواسيك او اواسي نفسي او العراقين بس للاسف هاي حال الدنيا انكلب عاليه واطيه وعلى كولة المثل البغدادي "طابوگ نام وشگنگ((كسر الطابوگ)) گام " يعني ابن الخير ابن الاصول هيج صار يتعامل وياهه الحمدلله على كل حال.
اخي ابو فهد هاي شتسوي حاجتنه صار يمهم ومثل من كول ادفعه بكصبه وكل امرك لله ان شاء الله تروح لامريكا وتستلم الجنسيه ويجي اليوم الي دوس على خشم كل واحد حاول ينتقص من كل عراقي لان الصراحه من دا اقره كلماتك والله دمي فار .
المهم هسه لتضوج وبشرنه شرح تسوي وشنو خطواتك المستقبليه وما اريدك تستسلم لناس همه يحاولون يمنعون الخير عن كل العراقين
تقبل مروري
عمار
-
اخويه الغالي العراقي (ابو فهد المحترم)
صدك المثل الي يكول من تشوف مصيبت غيرك تهون مصيبتك عليك
اخويه
انا تاثرت كثيرا بكلامك واتعاطفت معك على كل شيء قلته وخاصتا ان لديك اطفال ومعاناتهم التي انا اعرفها جيدا لاني لدي اطفال
اخويه
ثق وصدك ان مصر ارحم كثير من باقي الدول وخاصتا (الاردن )الي انا فيها اذا انته لكيت موضفة تخرج وترد عليك هنا في عمان لا يوجد من يرد عليك الا بلتلفون وعندما تصرف كارتات الشحن وتجيب عليك الة وتقول لها ما تريد وتتنتضر يوم الخميس للرد عليك ولا احد يرد عليك وهاكذا ثق ان سياسة اليو ان والسفارات العراقية في جميع الدول هي بنائا على توجيهات مديرها والمسؤل عليها ولا علاقة الموضفين الذين هم في الواجها لان لهم تعليماتهم ويجب التقيد بها ويبقى كل موضف واخلاقه لتعبير عن هذة التعليمات بشكل او باخر .
تقبل مني مروي
اخوك
raad rami
-
اخوية ابو فهد شلونك عيوني انتة.والله انقهرت وحزت بنفسي من سمعت سالفتك بس نكول الله كريم وتفرج اخوية لا تشيل هم.واحنا هنا اخوتك وحزام ضهرك
احوك الكبيسي
-
اخوية ابو فهد .. والله اني كلش اتأثرت من سمعت قصتك هذه ..لكن ما نكول غير حسبي الله ونعم الوكيل يعني ما اعرف اللوم عليمن على حكومتنا هذه التعيسة الي ما خلت قدر للعراقي لو على الحكومات الي احنا يمها يعني ... حرام هيج يصير بينه ... احنه اخوتك هنا .. والله وعاشت ايديك بلي سويته والله
-
والله والنعم منكم كلكم اخوتي وحزام ضهري والله العظيم ردودكي عبالك مي بارد ينزل على قلبي وينسيني الي صار بيه اني ممنون منكم كلكم وان شاء الله كليتنه نخلص من هلجياف العرب ونروح اصير عدنه جنسيه امريكيه ونجي انذلهم و نضحك عليهم ال هلحقراء الانذال
وشكرا
-
أخي العزيز ( ابو فهد ) لاتدير بال ولايهمك إرفع راسك انتا عراقي والي سويتا بحقهم كلش قليل وأي واحد كان بمكانك جان يسوي هيج وأكثر والله هذا اخر زمان احنا العراقيين الي شايفين وعايفين نبقى تحت رحمة المصريين وغيرهم والي نسو ا ان العراقي لم يبخل لا بماله ولا بدمه في سبيل الدفاع عن كل المصايب الي حلت بالامة العربية ، اخي ابو فهد حاول هذه المرة وياهم بهدوء وتحلى بالصبر علمود اولادك وعائلتك واتمنالك ألموفقية من كل قلبي أخوك / خالد من بغداد