منتدى الهجرة واللجوء => الهجرة و واللاجئين => الموضوع حرر بواسطة: nonakoko في 23:20 06/08/2009
العنوان: سؤال بخصوص المغادرة من سوريا
أرسل بواسطة: nonakoko في 23:20 06/08/2009
اخواني الاعزاء اكو موضوع دوخني - صار كم يوم نسمع عن عوائل استلمو الفيزة وراحو ديسوون مغادرة من سوريا طبعا وبدائرة الهجرة القو القبض عليهم وحولوهم الى دائرة ثانية وبعدين تم ترحيلهم الى العراق شنو السبب محد ديعرف - الي ارجو منكم اذا سامعين هيج شئ او تعرفون اشخاص سوو مغادرة بهاي الايام رجاء تساعدونة بهالموضوع ولكم جزيل الشكر
العنوان: رد: سؤال بخصوص المغادرة من سوريا
أرسل بواسطة: ابو خالد في 06:16 07/08/2009
والله يااخوي ماسامعين هيج شي هاي اشاعات لو شخص يجوز اصلا مطلوب للحكومه السوريه واسمه موجود عدهم وتم القبض عليه اثناء مراجعته
العنوان: رد: سؤال بخصوص المغادرة من سوريا
أرسل بواسطة: Baghdady73 في 09:33 07/08/2009
تحياتي
اول مرة اسمع هكذا خبر واعتقد الامر مبالغ به ولا يخرج عن كونه شائعة واعتقد كلام الاخ ابو خالد صحيح يعني من الممكن ايكون الشخص قد قام بفعل معين ومطلوب للحكومة السورية والا فالامور تسير بصورة طبيعية
بغدادي
العنوان: رد: سؤال بخصوص المغادرة من سوريا
أرسل بواسطة: مهند الكانون في 10:42 07/08/2009
أخي العزيز nonakoko
ماكو هيج شي أمبارحة اصدقائي ثنين سووا مغادرة مع العلم كانو مخالفين اكثر من خمس سنوات .. بس مجرد أكو قرار جديد نقل اختام الجواز والمغادرة صارت من محافظتك اللي ساكن بيها مو من الشام ..
تقبل تحياتي
العنوان: رد: سؤال بخصوص المغادرة من سوريا
أرسل بواسطة: عراقي بسوريا في 12:19 07/08/2009
فعلا شباب اني اعرف واحد بسوريا جان باقيلة 5 ايام ويروح لالمانيا راح سوة مغادرة رحلوا للحدود العراقية هو وعائلتة مباشرة بسشنو السبب ما اعرف اني هم
العنوان: رد: سؤال بخصوص المغادرة من سوريا
أرسل بواسطة: nonakoko في 12:42 07/08/2009
شكرا لتعاونكم اخواني الاعزاء - والله اني كلش دايخ بهالموضوع لان اني وعائلتي عدنة تجاوز اربعة اشهر وخايف من الترحيل لان السفارة الالمانية متنطينة الفيزة على الجواز - ينطون الفيزة بالمطار ودنسمع اخبار عن ترحيل العراقيين بس شنو السبب مدنعرف هل السبب هو تجاوز او همة مطلوبين من قبل الحكومة السورية رجاء اذا تسمعون اي خبر شاركونة بي
العنوان: رد: سؤال بخصوص المغادرة من سوريا
أرسل بواسطة: Baghdady73 في 13:11 07/08/2009
هناك شخص موجود في المطار يعمل ضمن منظمة الاي او ام ووظيفته تسهيل عملية خروج اللاجئين الى الدول المعنية وهذا الشخص مسؤول عن الاوراق وختم الخروجية..لهذا عند الكلام ان هناك اشخاص رحلوا الى الحدود فهذا يعني ان هناك مشكلة مع ذلك الشخص بسبب عمل معين يمنع من خلاله من السفر الا الى العراق وانا متاكد ان مسالة تجاوز الفترة الممنوحة للاقامة ليست من ضمن الامور المانعة للسفر لان هناك غرامة تدفع في جوازات المرجة في حال المخالفة وهي بسيطة جدا وتقبلوا تحياتي
بغدادي
العنوان: رد: سؤال بخصوص المغادرة من سوريا
أرسل بواسطة: عيني بغداد في 23:32 07/08/2009
السلام عليكم
والله ما أعرف من وين يجيبون هذي السوالف؟
يوم 4\8 ختم صديقي مغادرة وهو في طريقة الى كندا واليوم جنت يمه دا أودعه. مسمعنا اكو هيجي موضوع.
تقبلوا مروري عيني بغداد
العنوان: رد: سؤال بخصوص المغادرة من سوريا
أرسل بواسطة: فداء الروح في 23:43 07/08/2009
هلوو اخوان واخوات : صديقتي عدها منع . مع ذلك راحت وسافرت ال المانيا حتى اجوي ديرحلوها قبل سفرها ب 3 ايام لكن تدخل الاصدقاء والجيران وما خلوهم وراها ب 3 ايام كانت مفيزة وراحت عن طريق اليو أن الى المانيا ,, ماكو هيج حجي حتى لو مخالف يختم وخلي عود يختموله منع 5 سنين من المطار ما يرجع عود .. تحياتي الكم
العنوان: رد: سؤال بخصوص المغادرة من سوريا
أرسل بواسطة: مهاجرين بلا حدود في 00:17 08/08/2009
السلام عليكم اخواني الاعزاء
اخواني .. هناك دائما اسماء للعراقيين المطلوبين لوزارة الداخلية العراقية والمخابرات وهذه الاسماء موجودة في النقاط الحدودية بين البلدين سواء كانت حدود التنف او طريبيل او منفذ القائم وربما هناك تعاون اكثر بخصوص هذا الموضوع بين البلدين والما عندة شي ليش يخاف والمثل يكول (حرامي لتصير من السلطان لتخاف )
بس لازم الواحد يخاف من تشابه الاسماء وهذه مشكلة لايوجد لها حل ولاسامح الله اذا صارت ,, بهذلة x بهذلة ... والله اليستر
تحياتي
العنوان: رد: سؤال بخصوص المغادرة من سوريا
أرسل بواسطة: free2ea في 02:54 08/08/2009
السلام عليكم الله يستر على الجميع زين الي يتحددله موعد سفر وبعدين يسفروا للحدود العراقية يعني الجواز مالته بيه فيزة للدوله المتوطن عليهه بهاي الحالة شلون يصير يطير من العراق لو بامكانه يدخل الى دولة ثانية ترانزيت لو يتصل بالامم المتحدة من العراق ويعرض القضية والله هاي شغلة تدوخخخخخ واحنه ما عايزين دوخة
العنوان: رد: سؤال بخصوص المغادرة من سوريا
أرسل بواسطة: nonakoko في 12:25 08/08/2009
اخواني الاعزاء ولو دادوخكم بالاسئلة - بس اريد افتهم من الاخوة الي يعرفون عوائل اترحلت للعراق هل اترحلو فقط لو دكولهم منع همينة ؟
الرجاء من الاخوة الي عدهم معلومات يشاركونة بيهة ولكم جزيل الشكر
العنوان: رد: سؤال بخصوص المغادرة من سوريا
أرسل بواسطة: ام شهد في 15:59 08/08/2009
ولله اني هم عندي صديقه المفروض تروح المانيا من 28-7-2009 بس طلع عليهم منع مغادرة الحدود السوريه وباقيه بس الفيزا اللي بالمطار المهم حاولوا ياااجلون الرحله وكالت الهم موظفة الاي او ام حلوا المشكله واني رح ااجل سفركم وبعدين اتصلوا بينه من تكمل المشكله هسه المشكله شلون رح يفيزون الها بالمطار اذا اتحدد موعد سفر ثاني في حالة مكدروا يرفعون المنع وشلون تسجل مغادره بالهجره والجوازات السوريه طالما عليها منع قبل متروح للمطار ؟؟؟؟ مع العلم امورهم كامله بالنسبه للسفر لاالمانيا
العنوان: رد: سؤال بخصوص المغادرة من سوريا
أرسل بواسطة: lisaa في 17:41 08/08/2009
طيب هذولة الي عليهم منع ليش ميراجعون الامم المتحدة قسم الشؤؤن القانوية ؟؟؟ طبعا اذا همة عندهم ورقة حماية؟؟؟
العنوان: رد: سؤال بخصوص المغادرة من سوريا
أرسل بواسطة: مهاجرين بلا حدود في 19:09 08/08/2009
اخواني الاعزاء ......... نصيحة اخوية
اقامة المدارس تنتهي بانتهاء الموسم الدراسي ولايوجد حجة للعراقي لكي يمدد اللاقامة في الصيف ولذلك بعد انتهاء المدة واعطاء ختم المغادرة لابد من ::::::::::
تغيير الاقامة من مدرسية الى مرضية وباسرع مايمكن وارفاق جميع اسماء العائلة مع الشخص صاحب التقرير الطبي (عافاكم الله ) طبعا هي كلها كلاوات بس المهم تااييد السكن مطابق لاقامة الشخص وضروري جدا ان يكون السكن مطابق للتأيد السكن لانهم بعد فترة تقوم الجوازات بالتجييك الامني على الشخص وهناك تعليمات جديدة بضرورة التأكد من تاييد السكن مع صاحب طلب الاقامة والاتصال به ومقابلته من قبل موظف بالامن ويتم بعدها التأكيد والموافقة على الاقامة
اخواني ... لاترفقون سند الاقامة السكني بعنوان غلط او غير موجود او لصديق او لاي احد كان
لانه سوف يتصلون به للتأكيد واذا لم يلاقوا جواب بعد الاتصال سوف تأتي الاقامة بالرفض حتما
وهناك اقامات سنوية ولكن بترتيب خاص ويرادله ناس ادبرها انتو وشطارتكم (للعلم والتذكير )
واي سؤال اني حاضر تحياتي للجميع
العنوان: رد: سؤال بخصوص المغادرة من سوريا
أرسل بواسطة: Baghdady73 في 20:57 08/08/2009
السلام عليكم وتحية طيبة
هناك توضيح مهم حتى لا الاشخاص الذين على سفر يصابون بالقلق والذعر لان المسالة لا تحتاج الى هذا التهويل وكثرة الاشاعات..صحيح هناك الكثير من العراقيين الذين يمنع سفرهم من جميع المنافذ الحدودية السورية وانا رايت بعضهم مهيء للابعاد من قبل السلطات الرسمية ولكن هؤلاء هم من عليهم دعاوى قضائية لاي سبب كان سواء من اشخاص عراقيين او سوريين ولهذا تدرج اسمائهم في قائمة المنع حتى القاء القبض عليهم وهناك كما ذكر احد الاخوان من هم مطلوبون لاسباب سياسية وجرمية وهذه الحالات كثيرة..مسالة التجاوز بعد انتهاء الاقامة لا تدرج ضمن قائمة المنع وحكمها هو تقديم الشخص الى محكمة في دائرة المرجة للهجرة والمحكمة تعني ان تقدم طلب يتم بموجبه دفع غرامات تاخير والحصول على ختم خروجية وهاي كل المسالة, وبالامكان التاكد من هذا الكلام في قسم المرجة والسؤال عن الاجراءات التي تتخذ بحق المتجاوز. حتى في الاردن هناك رسم يدفع كغرامة قبل الحصول على ختم الخروجية
تحياتي
العنوان: رد: سؤال بخصوص المغادرة من سوريا
أرسل بواسطة: عيني بغداد في 11:25 09/08/2009
السلام عليكم
أقامة المدارس صالحة لمدة عام من تأريخ التقديم لها. اني قدمت على أقامة المدارس في شهر 11 من السنة الماضية وقبل كم يوم رحت ختمت أخر ختم واللي هو لمدة 3 أشهر تنتهي بشهر 11 ومن بعدها المفروض اقدم اوراق أستمرار الدراسة للاولاد لغرض الحصول على وصل أقامة جديد لسنة جديد.
هذا الاجراء المتبع لأغلب الناس وما أعرف من وين هذا الاخبار التازة مال الاخت فداء الروح لان سألت أكثر من شخص على الكلام اللي ذكرته ومحد أكد هذا الشي
أرجو من الادارة غلق الموضوع أو حذفه لان الكلام الي بيه محبط للناس بالاضافة الى كون نسبه كبيرة منه غير مأكدة.
تحياتي عيني بغداد
العنوان: رد: سؤال بخصوص المغادرة من سوريا
أرسل بواسطة: Baghdady73 في 10:25 10/08/2009
السلام عليكم
بالنسبة الى اقامات المدارس المنتهية فانا كنت قبل كم يوم بجوازات ركن الدين وكان معي شخص صاحب عائلة ايضا ختموله انهاء اقامة المدارس يوم 1-7 ومنحه 3 اشهر اقامة سياحية وبعد سؤال الموظف بعد انتهاء ال 3 اشهر ما هو الاجراء من اجل مدارس الاولاد فاخبره الموظف بوجوب تقديم معاملة اقامة اخرى وانه لا توجد مشكلة في الحصول على اذن الاقامة في وقتها اي نفس العملية التسلسلية..بالنسبة الى الاخت فداء الروح لا اعتقد اننا نقوم بتكذيبك لا سامح الله ولكن باعتقادي ان هناك اجتهادات شخصية من قبل بعض الموظفين ليست مستندة على اي اساس قانوني وبرايي في حالتك فالافضل ان تسافري الى بغداد وتعاودي الدخول بتقرير طبي في خلال اسبوع او اقل طالما انه يباع بمبلغ 100 دولار للشخص والحصول على اقامة سياحية مؤقتة لمدة 3 اشهر بدون تحمل اعباء قانونية لاحقة
تحياتي
العنوان: رد: سؤال بخصوص المغادرة من سوريا
أرسل بواسطة: marwan.aqrawi في 13:10 10/08/2009
يا جماعة ترة سوريا صارة الاقامة بيهة ما تنجرع يعني اني حرت اسويت
اخير شي اشتريت بيت ورة سنة اجاني رفض وهسة سويتهة على اليوان وانطوني شهر
ودنشوف رحمة الله بالكي ارجع ارجع ماملة البيت بس حتة هسة وقفوا اعطاء حكم محكمة للعراقيين
العنوان: رد: سؤال بخصوص المغادرة من سوريا
أرسل بواسطة: Baghdady73 في 14:51 10/08/2009
الاخ العزيز مروان
تحية طيبة
حاليا بامكان العراقي التملك وغيره من المواطنين العرب في سورية ولكن بشروط من ضمنها ان تكون مساحة البيت لا تقل عن 200 متر مربع ولا يحق لمالكه بيع الملك الا بعد انقضاء فترة 5 سنوات على تسجيل العقار كما ان البيع يكون الى شخص سوري حصرا او ان الوريث يكون سوري في حال عدم بيع البيت بعد الخمس سنوات..يعني شروط حلوة ومرتبة وتخليك تشتري فورا وتحصل اقامة على اساسها والكل يعلم ان 200 متر مربع بيت في الشام كم يكلف!!!
تحياتي
العنوان: رد: سؤال بخصوص المغادرة من سوريا
أرسل بواسطة: Baghdady73 في 17:01 11/08/2009
الاخت العزيزة فداء
تحية طيبة
بالنسبة الى التملك حسب قانون 2008 نعم هو طابو اخضر وتستطيعين الحصول على اقامة على اساس الملك بعد تقديم معاملة الى وزراة الداخلية والحصول على موافقة الوزير بالتملك والحصول على طابو..وبعد الحصول على موافقة الدتخلية يتم تحويل المعاملة الى الامن السياسي للموافقة عليها..طبقا للقانون فيجب ان تحصل الموافقات بيسر كونها قانونية وبعدها تتحول الى دائرة الهجرة والجوازات لاستحصال سند الاقامة ويكون على الاغلب سنوي "اي يجدد كل سنة مرة" وعلى اساسه يحق للشخص ان يسافر خارج سوريا لمدة 3 اشهر بختم خروجية واحد متعدد او 6 اشهر بختم زيارة وعودة غير متعددة ولكك عند شراء العقار يجب ان ياخذ بنظر الاعتبار ان لا تقل مساحة العقار عن 200 متر مربع كما لا يحق للشخص التصرف بالعقار اي بيعه قبل مضي 5 سنوات كما ان الورثة يجب ان يكونوا سوريي الجنسية والا فللورثة الحق في بيع العقار الى سوري خلال سنة من وفاة صاحب الملك والا فسيتم مصادرته من قبل السلطات السورية ;D واي تفاصيل اخرى اني حاضر
تحياتي
بغدادي
العنوان: رد: سؤال بخصوص المغادرة من سوريا
أرسل بواسطة: lisaa في 10:07 12/08/2009
مرحبا اخوان اشلونكم بس حبيت اوضح شي بخصوص معاملات شراء البيت ترة الشغلة تطول من 7 اشهر الى سنة لانوا المعاملة تروح الى اكثر من دائرة .