ankawa
منتدى الهجرة واللجوء => الهجرة و واللاجئين => الموضوع حرر بواسطة: ok_ok755 في 00:09 09/08/2009
-
السلام عليكم يا احلى منتدى
طبعا بالبدايه اني قريت هوايه مواضيع بالمنتدى وكدرت استنتج فد استنتاج بسيط بانه الي راح لامريكا ولكه شغل واستقر ينقلنه الصوره بامريكا بشكل حلو ويسوي واهس للناس تروح لامريكا وتبدي حياتها من جديد في مجتمع منفتح ومتحضر وتعيش حياتك كانسان, ولكن بعض الناس الي ما لكه شغل او ما يقبل يشتغل اي شغله لانه تعرفون هوه جان مدير عام بغداد ومن راح هناك هم يريد يشتغل مدير عام وهذا الشي اكبر غلط ؟؟
اخوان انت اذا جنت تشتغل وزير بالعراق تره لا تفكر بانه راح تشتغل نفس شغلتك هناك بامريكا ولازم تكون حاسب حسابك قبل ما تروح (ركز على هاي النقطه تحسب حسابك تشتغل اي شغله) بانه تشتغل اي شي لحد ما الله يفرجها عليك وتشتغل ضمن اختصاصك احسن من ما تنزل المواضيع الي تسد نفس الناس وتخليهم يكرهون امريكا (اذا هذا الواقع هناك لعد ليش رحت لامريكا اذا تعرف هذا الشي لا تروح احسن).
اني اجي وياكم اخوان بعد الازمه الاقتصاديه الشغل بامريكا كلش صار قليل او معدوم في بعض الولايات وهذا الحجي عن طريق بعض الاصدقاء الامريكان يعني اني هسه اعرف الشغل قليل هناك ومع ذلك مقدم على امريكا ودا انتظر الفرج, ليش لانه اني حاط بالي كلشي اشتغل اذا وصلت هناك لحد ما الكي الشغل المناسب اليه او ضمن اختصاصي(واني رايح وعايف شغلي الطاك الي بغداد براتب بالاحلام في سبيل اعيش حياتي كانسان وكشاب يريد يعيش حياته مثل بقية الناس) وهذا ما يجي بالساهل يحتاجله وقت وبالدرجه الاولى العلاقات اذا ما عندك علاقات فصعب تلكه الشغل الي من ضمن اختصاصك.فالي ما عنده علاقات او احد يعرفه هناك فلازم تشتغل اي شغله بالبدايه لحد ما توصل للهدف الي انت تريده وشويه وشويه تسوي علاقات والعافيه درجات.
واتمنى من الاخوان الي وصلوا امريكا ان يساعدون اخوانهم العراقيين عن طريق هذا المنتدى في البحث عن شغل طبعا هذا الحجي موجه للاخوان الي مستقرين لامريكا وصارلهم فتره وتعرفوا على الناس وعلى الاجواء واتمنى هذا الشي, لانه الصراحه بقية الجنسيات وراح اضربلكم مثل الهنود من يروح لامريكا لو تعرفون جماعته الهنود القدماء شنو يقدموله خدمات ليش احنه ما نصير مثلهم ؟؟؟ وليش العراقيين محد اله شغله بالثاني وقليل تلاكي ناس عراقيين تساعد ناس بالغربه شنو السبب ؟؟ وين العراقيين اصحاب الغيره ؟؟ انتو طالعين من بلدكم ليش ما تصيرون ايد وحده وواحد يساعد الثاني ؟؟؟
اتمنى كل شخص ساكن بامريكا بولايه معينه ينزل موضوع بالشغل الي موجود بهاي الولايه في سبيل يستفاد منها الاخوان الي ما لاكين شغل لحد هسه (هسه واحد يكول واني شعليه بالبقيه اني لكيت شغل اليه كل واحد عليه بنفسه) والله محد دمرنه غير هايه الحجايه على العموم الله كريم وانشاء الله الكل تلكه شغل وتستقر وتعيش حياتها مثل بقية العالم, وبعد ما اريد احد ينزل موضوع يكسر النفس ;D يمعودين فوك الوضع الي احنه بي بالعراق او باي دوله كانت وكاعدين ننتظر السفر على نار لامريكا ونسمع هذا الحجي صدك حجي يضوج ويطلع الروح !!!
وتحياتي لكل اعضاء هذا المنتدى والله يفرجها عليكم جميعا وتسافرون ....
-
اخي العزيز ok_ok755
شكرا لك على طرحك لمثل هذا النقاش ... واللي تفضلت بيه جدا صحيح ...
اتمنى انا ايضا ان يساعد العراقيين بعضهم البعض هناك في الغربة .....
والله يسهل امر الجميع ...
اخوكم
Iron_man
-
يا صاحب المشاركة انا طبعا ً اريد ادلو بدلوي حالي حال الناس
بس ما أعرف أبشنو اخاطبك انت بنية لو ولد؟
يعني خلصت الأسامي صار اسمها اوكي اوكي
على العموم راح احذو حذو الأخ الزلمة الحديدي قال لك أخي والله كريم
ما شاء الله ما شاء الله بلا حسد ... لك شني هااااااااااااي
ادلو بدلوي واحذو حذوي .. لو هيجي ثقافة لو مامش
-
أخي الفاضل
الطرح اللي طرحته بيه شيء من المنطق لكن مو كله صحيح
وبكل تأكيد الخلاف في الرأي بيني وبينك ما يفسد بالود قضية .. مو؟
-
انا ما أعرف احنا ليش نجلد ذاتنا؟
شنو مدير وزير
العراقي عراقي وعنده عزة نفس اتشق الأرض شق
العراقي المثقف الواعي الخبير الدارس المتعلم صعب عليه يشتغل شغلة ما تليق بيه
انا ما أتكلم عن نفسي
انا اتكلم عن حالة عامة للعراقيين اللي واصلين مرحلة ويجون فوق ضيم الغربة والذلة
ينزلون راسهم بعد نيل الشهادات الكبرى يشتغلون شغلة بمطبخ لو بحمام لو بغرفة نوم!!!
هاي الذلة فوق ضيم الغربة أتخلي أكبر واحد تنزل دمعته ويرجع للعراق
-
من جانب آخر
الشغل مو عيب ولازم الإنسان يتكيف مع الوضع صحيح هذا الكلام
ولكن هو الشغل وين؟
هو الأمريكي محتار بأمره واللي باع بيته باعه واللي ظل بالشارع واللي راح من تالي العز سكن أبيت عمته أم زوجته
هاي القصص من لبة الواقع
-
يروح العراقي اللي راسم ان امريكا جنة الأحلام
وهو برقبته عائلة تتكون من زوجته وأمه وبناته وخواته مثلا
وكلهن ما يقدرن يشتغلن وما يقدر يخليهن يشتغلن
وبعدين تطيح المسؤوليات كلها براسه
وتعال اشتغل بحمام وخلي هاي العائلة أتعيش
-
لازم الطرح يصير موضوعي ومنطقي
حتى اللي قاعد منسدح ليله ونهاره بس يبتسم ويوزع ابتسامات للسقف وللبنكة
ويحلم ان امريكا راح يسافر ويعيش عيشة الملوك
يفز
ومن يفز يبدي يفكر اشلون يطور روحه من هسه
-
المشاركات اللي بيها مآسي هاي تحكي الواقع اللي احنا لازم نستعد له من هسه
ولازم نفكر بيه ونشوف حلول لكل مشكلة قبلما نطلع
ونستفيد من كل مشاركة خير فائدة وننصح الآخرين
-
وانا اللي اشوفه ان كل العراقيين متماسكين وواحد يساعد الثاني
من نفس القومية والطائفة لو لا
انا لحد هسه ما شفت أي عنصريات وحزازيات والله ثم والله
انا اللي اشوفه ان الكل يعمل ويساعد ويكتب ويشارك تحت اسم العراق
وهذا اكبر دليل على ان الشعب العراقي شعب راقي وأصيل
-
يكفينا فخر ان احنا اللي علمنا الإنسانية الحرف والكلمة وصناعة العجلة
واحنا اللي اشرقت شمس الحضارات من أرض سومر وبابل وآشور
لذلك انا انصح الجميع ان يدرس كل كيس في كل مشاركة تنطرح دراسة وافية
ويسأل ويحضر ويرتب حتى ما يروح وهو حلمان
لا يروح وهو مستعد لأسوء الأحتمالات لانه عرف كيف يستثمر هذا المنتدى
وكيف يستفيد من تجارب الآخرين
-
وللعلم: انا عندي وظيفة وبيت وسيارة وكومبيوتر دسك توب ولاب توب!!!!
أمحضرين المهد قبل الولد!!
وكاعدة بس انتظر التجييككككككككككككككك الأمنيييييييييييييي :'(
يمتى يخلص واشلع
والله يسهل كل اموركم ويقضي حوائجكم ولا يخلي ايدكم تنمد لأيد غريب مو عراقي
ويفتحها عليكم من أوسع أبوابه ويعوضكم على كل شي خسرتوه ولا ينزل دمعتكم بس بالفرح
آمين
-
الله يوفق الجميع
محبة
المخضرمة أم يلدا – مترجمة - عمان الأردن 2005 – في انتظار التجييك الأمني - الأسبوع الثاني من السنة الخامسة انتظارا
-
اخي تره اغلب العراين الي ويانه ديشتغلون اي شغله تجيهم يعني نسبه كبيره منهم
ما اعترضوا على الشغل او نوعه بس هي المشكله بقلة الاشغال لاننو الي ديصير هنا اغلبية الناس الي فقدت وظائفه بسبب الازمه همه الطبقه الفوق الوسطى الموظفين مثلا وكاموا يزاحمون العالم بالشغلات البسيطه الي همه اصلا مجانوا يفكرون بيه
اخويه انته يمكن متعرف العراقين هنا شنو وظعهم بس اكلك ثق بالله الناس هنا اشتغلت اشغال مستحيل الواحد يتخيله حتى لف جوكليت ب 6 دولارات بالساعه اشتغلوا لانوا المشكله هنا تنحصر باخر ايام المساعدات لانوا مصاريف لازم تجفعه وماكو ابوا بيت يثنتظر ايجار شهرين متاخر او غير \\\
\بس انى اكلك الواحد اول ميلكي شغل يكدر يكفي احتياجات بيته اذا عائله تطلع راس براس اذا عزابي ويا عزابيه كاعد ممكن يجمعله كم فلس يتونس بيهن
-
عاشت ايدج ويسلم فمك ام يلدا على هل حجي صحيح احنا منتحمل انزل راسنا واحسن الانسان يحضر نفسه انه الحياة باميركا مو لعب ومو راحة ومو مساعدات يرادلها تعب ويرادلها بحث عن الفرصة وممكن انسان يتأذى سنين بس اكيد يرتاح بعدين واعتقد الكل متفقين انه العراقي مو مثل مثل البنغالي او غيرهم ولو الشغل مو عيب واي شغل لو شكد مكان بسيط هوة رفعة راس واحسن من مد الايد وكل انسان حسب ظروفه وكلنا متقين انه اميركا تحترم الانسان لانسانيته واليتعب يحصل وهاي الروحة فرصة ممتوفرة لغيرنا ومثل مكال الاخ فنشنزو بغير موضوع منو يحلم يحصل اقامة دائمة باميركا بعد شهر واحد بالنسبة للاس اي في
الناس اتبهذلت بدول اوروبا وابناء هاي الدول همة حلمهم اميركا واحنا جتنا معدلة الواحد ليحرك كل مراكبه هنا ويخليله خط رجعه ويحاول هناك ويتعب والله يسهل ولو تدرون اني العايفته هنا هو دراستي للدكتوراه وبالبداية مجنت مقتنعة وخايفة بس بقيت اشوفها فرصة وفكرت انه اذا حاولت من صدك والله وفقني ممكن احصل شي اكثر مناك
الله يرحم بالكل والله مينسانه ووشكد متضيق تنفرج
-
اريد احجيلكم فد قصة يمكن شوية تنطينا امل وهية عن عمي اخو والدي الي سافر بعثة دكتوراه لانكلترا سنة 1990 قبل دخول الكويت مباشرة وكانت على حساب الدولة ومعاه زوجته الحامل و2 بنات وتعرفون الي صار وانقطع التمويل وبعده هستو واصل والكلية بلغتنا ايريد يبقى يبقى على حسابه ايريد خل يرجع طبعا مرجع واشتغل شغل والله جان يكول مااكللكم اني شدا اسوي وبناته وزوجته حتى بتيتة للمطاعم كام يكشرون وخلص وكمل واخذ شهادته وهسة عدهم جنسي انكليزيه بناته خلصوا كليات هناك هوة رجع للخليج يشتغل بابو ظبي كمهندس حامل شهادة دكتوراه من انكلترا يعني تعب ولعب بس الصبر وصدكوني الله يفرجها
-
احب ان ارد على الاخت ام يلد فرج الله لها ويسر امرها وعجل لها في الخروج انشالله هي وجميع الاخوة العراقيين الذين ينتظرون ساعة الفرج ..تطرقتي في ردك الى ان العراقي عراقي وعنده عزة نفس اتشق الأرض شق ...والله هذه حصلت معي في اول عمل لي في اميكا احصل علية عندما بدأت يومي في فندق خمسة نجوم فندق راقي جدآ ومزدحم على دوام السنة وكانت مهنتي هي بانكوت ستب banquet set up والفندق يحتوي على قاعات كبيرة تعد للجتماعات والحفلات وغيرها ..دخلت احد القاعات مع المدير اي المنجر Manager في اول يوم عمل لي واعطاني كيس لي جمع النفايات وقال لي ارجوك ساعدني بجمع ماهو تحت الكراس في القاعة اخذت الكيس وقلت هذا ما اتيت من اجلة وكنت مهضوم بعض الشيء لكن سرعان ما التفت ووجدة المنجر سبقني من الجه الاخر وبدأ يلتقط الازبال والنفايات وهو المدير العام واخذ يعدل المكان للذين سيشغلون القاعة واخذ يكنس المكان وبدآت عندي تزيل هذه النزعة نزعة التعالي وهذا العمل ليس لي ..واحب ان اذكر شيء لو عملت في مكان ما يجب عليك ان تصبر واثبت لي صاحب العمل انك تستطيع ان ترتقي الى احسن اذا كان هناك عمل مفتوح لتكن مسؤل سوف يجعلونك مسؤل في نفس العمل ..العمل بل التداريج وكلما اثبت نفسك ارتقية الى الاحسن..وحتى نفس المدير هو من يقوم بتنظيف الحمامات او المرافق الصحية وعندما اقول صحية فهي فعلآ صحية ومرافقاتهم انظف من مطعم عندنا في العراق وبي بساطه مرافقاتهم هي نظيفه من غير تنظيف ...ارجو ان لا اكون قد اطلة عليكم
-
اريد احجيلكم فد قصة يمكن شوية تنطينا امل وهية عن عمي اخو والدي الي سافر بعثة دكتوراه لانكلترا سنة 1990 قبل دخول الكويت مباشرة وكانت على حساب الدولة ومعاه زوجته الحامل و2 بنات وتعرفون الي صار وانقطع التمويل وبعده هستو واصل والكلية بلغتنا ايريد يبقى يبقى على حسابه ايريد خل يرجع طبعا مرجع واشتغل شغل والله جان يكول مااكللكم اني شدا اسوي وبناته وزوجته حتى بتيتة للمطاعم كام يكشرون وخلص وكمل واخذ شهادته وهسة عدهم جنسي انكليزيه بناته خلصوا كليات هناك هوة رجع للخليج يشتغل بابو ظبي كمهندس حامل شهادة دكتوراه من انكلترا يعني تعب ولعب بس الصبر وصدكوني الله يفرجها
كلام حلو ومنطقي وان شاء الله كل انسان مثابر وتعبان على نفسه بحصل اعلى المراتب
-
لم اندم على شيء سوى اني اضعت ايامي وشبابي هباء في العراق فقد اعطيته كل شيء ولم يمنحني الا جواز G ب 500 دولار
-
الاخ العزيز ايرون مان شكرا على مرورك الكريم
الاخت ام يلدا اولا اسمي يعجبني واني ولد, طبعا شكرا على مشاركتج وكلامج احترمه وهم بي نوع من الصحه وهم بي نوع من التناقض !!! واني من كلت مدير وكلت وزير دا اضرب مثل لا اكثر ولا اقل العراقي يبقى عراقي ان كان وزير او كان كناس بس الفكره بالموضوع بانه دا اريد ابين شغله وهيه الشغل مو عيب ابد وان كان هذا الشخص يمتلك شهادات الدنيا كلها مع ذلك الشغل مو عيب !!! اختي العزيزه عندي صديقي بغداد من عائله فقيره بس هوه ما شاء الله عليه شاطر وطلع معدل بالسادس دخل كلية الطب بدون واسطات بدون فلوس وجان هوه المعيل الوحيد لاهله وعنده 3 خوات شوفي جان يدرس طبيه ويشتغل حمال !!! زين هوه طبيب ويشتغل حمال يوميته 10000 دينار ويصرف على اهله وعلى كليته زين اشو ما كال اني بعد كم سنه اصير طبيب شلون اشتغل حمال !!!! اختي العزيزه ام يلدا اكو مثل يكول الي يطلع من داره يقل مقداره وهذا الشي صار بينه احنه العراقيين يعني لا تصورين الواحد يروح لبلد اول مره يروحله يشتغل شغله درجه اولى بي ومثل ما كلت العافيه درجات والي يشتغل بمطبخ او بحمام مو عيب تره بينما العيب الي يكعد وما يشتغل ويكول هذا الشغل ما يليق بيه (والانبياء جانوا كلهم يشتغلون شغلات درجه عاشره الي جان يرعى الغنم والي كان نجار والي كان حداد محد اشتغل شغله طاكه وهذا دليل من الله سبحانه وتعالى بانه الشغل مو عيب مهما كان الانسان ومهما وصل ومهما اخذ شهايد)!!! وكذلك الامريكان عدهم اكبر عيب بانه الواحد اذا عبر ال 18 سنه وما يشتغل ويشتغل اي شغله مو عيب!!! بس للاسف المجتمع العربي يختلف عن المجتمع الغربي بهوايه اشياء من ضمنها بانه الي يشتغل حمال او كناس او زبال براي المجتمع العربي عيب هذا الشي ولكن المجتمع الغربي ما عنده هذا الشي, واما بالنسبه كلتي ماكو طائفيه فراح اكلج من تروحين وتشوفين بعينج هذاك الوقت تكدرين تحكمين على هذا الشي, ومع ذلك اشكرج مره ثانيه على رايج واتمنالج الموفقيه وانشاء الله تطلع هاي الامنيه الغضب وتروحين وتعيشين حياتج كانسانه تحب الحياة وتريد تعيش حياتها مثل بقية الناس.
اخي حسين كلامك صحيح وشكرا على مشاركتك واتمنالك الموفقيه, ولف الجكليت مو عيب تره بس الواحد مجبور يشتغل هيجي شغلات لحد ما تفرج ويلكي الشغل الي هوه يريده.
الاخت ورقاء شكرا على مشاركتج وشكرا على هاي القصه الحلوه واتمنالج الموفقيه بحياتج والمفروض الواحد من يوصل يشتغل اي شغله ومثل ما كلتي الله يفرجها.
-
الاخ هيثم هاي مشكلة العرب عدهم تعالي اكثر من اللازم يعني المدير على قصتك هايه ما يصير يلم الزباله اذا جان مدير عربي وهذا الي دمرنه !!! وكلامك سليم ميه بالميه وانشاء الله يا اخي الله يوفقك وتلكه شغل احسن.
Siv2007 شكرا على مرورك الكريم واتمنالك الموفقيه والنجاح بحياتك, وتعوض حياتك الي راحت هدر بالعراق بامريكا انشاء الله وتبدي حياة جديده ومستقبل احسن الك واذا متزوج لجهالك تحياتي الك.
-
ربي يوفقكم كلكم وانشاءاللة تشوفون شغل يليق بيكم اتمنى للجميع التوفيق بالحياة الجديدة والف شكر لصاحب الموضوع وكل بداية لا بد ان تكون صعبة الى ان تتعودون على الوضع وعلى المكان وانشاءاللة يتغير الوضع الاقتصادي نحوا الاحسن لكل بداية لابد اكون نهاية وكلنا مثلكم شفنا صعوبة رغم كانت امريكا وضعها الاقتصادي جيد بس هم شفنا صعوبة اللغة وصعوبة الحياة بالغربة وحمداللة هسى تعلمنا على البلد وعلى التقاليد وعلى القوانيين وعلى كل شي فيا اخوان انطوا شوي صبر لنفسكم ودائما خلي يكون عدكم امل بالحياة ومحد منا مايعرف شنو راح يكون باجر جائز بقدومكم تتغير الاوضاع ليش لا واهم من هذا وذاك لا تنسون انه اهم شي هو ( الامان ثم الامان ثم الامان ) الي هو كان سبب خروجكم كلكم صح لو اني غلطانه ربي يوفقكم جميعا
-
بالنسبة اللي فأني مع الأخ أوكي -أوكي بكل اللي يكوله والأخت العزييزة أم يلدا كلامها حلو بس شوية برادله شوية منطقية تتناسب مع الصعوبات اللي موجود هنا ..هنا بأمريكا تشتغل حتى تعيش وتكدر تكعد بالبيت وتعيش احسن عيشة بس يكون عندك كنز لو والدك مليونير أو يشتغل مقاولات بالعراق ويدزلك ..بس ....أذا لا نايم على كنز ولا والدك حرامي لازم تنزل أنتة وتتعب حتى تحصل اللقمة بشرف ..........أعرف هنا دكتور عراقي يشتغل كاشير بفارمر وصديقي ماجستير هندسة هم يشتغل كاشير والكل ما نقص شي من كرامتهم ولا فقدوا شهايدهم لأنه شهاداتهم بعقولهم مو على الورق لو بالوظيفة ..........الخطة شنو؟؟؟؟؟؟؟؟؟؟؟أشتغل أي شي ومشي أمرك.....قوي أنكليزيتك......أدرس ووراها روح لكل دول العرب كوللهم عندي شهادة من جامعة أمريكية وشوفوا الأحترام والتقدير .
-
كلام جميل ورائع بارك الله بيكم ومن الله التوفيق من جد وجد
-
انجي شكرا على مرورج الكريم والله يوفقج انشاء الله
وداعا بغداد كلامك مضبوط ميه بالميه وبارك الله بيك واني هذا الي اقصده الشغل ما ينقص من قدر واحد مهما كان ومهما كانت عنده شهايد او مهما وصل من منصب.
كمال الشاطيء شكرا على المرور والله يوفقك.
-
طبعا الشغل ابد مو عيب بس المشكلة وين الشغل
طبعا اني بكاليفورنيا ودندور اي شغله ماكو
عن طريق المعرف زوجي اشتغل بكاز ستيشن وصاحب الكاز ستشين عرااااقي ولو مو عراقي جان اشرفلنة
طبعا ياكل على زوجي 3 ساعات يوميا وطبعا هو المسيطر يعرف محتاجيله ومنكدر نشنكي عليه لانه يدفع كاااش
متشوفون الله هيجي سوة بينة من ورة هيجي نماذج عراقيين
-
ام منيه والله كلامج صحيح العراقيين من يطلعون بره مو الكل طبعا يتغيرون وياذون اخوانهم العراقيين بس ليش هيجي ؟ ليش ما تساعدوهم وتوكفون ايد وحده ؟ يااختي مثل هيجي نماذج هيه الي دمرتنه على العموم انشاء الله زوجج يلكي شغل احسن من الي هوه بي والله يوفقكم يا ربي وتحياتي الج.
-
تسلم وان شاء الله كل العراقيين الي اتبهذلو يرتاحون والله يوفقهم
بس ترة الحق يقال بالنسبة النة ماكو مقارنة وية الاردن يعني بالاردن رجعنة لي ورة وجنة نركض وكلشي ماكو
لا هنا فرق صح تعب بس اكو شي اكو شقة مرتبة حياة وامان وونسة وطبعا مستقبل النة ولاولادنة وكلشي بالبداية صعب والعافية درجااات
-
السلام عليكم
الموضوع جدا شيق ومفيد للجميع
انا اقول شغله وحده بس :
اللي يطلع برا وباي مكان لازم يخلي كدامه الأسوأ لان ما معنى خروج العراقي للبلدان الغربية معناها جنة الاحلام واذا لكى شغل واستقر فهذا الاحسن
بس ضيمنا وضيم بلدنا اللي ما كدر يحوينا خلانا انفكر بالطلعة برا
وتمنياتي بالتوفيق للجميع
-
السلام عليكم
خلي منحمل الانسان العراقي اكثر من طاقته لان عانى ما عانى خلال السنوات السابقة ولازال يعاني ولا نلموهه على ظروف هي خارج عن أرادته.
الذهاب الى أميركا لا يمكن قياسه بالذهاب الى اوربا الى تقدم الكثير للاجيء ومع ذلك اوربا في الوقت الحاضر دترفض العراقيين وترجعهم بشكل قسري للعراق.
أتوقع بعد اللي شفناه بالعراق وبالدول المجاورة رح نقبل ان نشتغل اي شغل في سبيل البقاء والحفاظ على العائلة خصوصا للاشخاص أصحاب العوائل لان المسؤولية عدهم كبيرة ولكن السؤال هو وين الشغل ؟ فالمسألة مو مسألة نوع العمل ولكن المسألة ضمن الظرف الحالي في أميركا هو أين العمل؟ والعراقيين الموجودين حاليا قبلوا ان يشتغلوا بأي عمل بس في سبيل يسد أحتياجات عائلته وميفكر يرجع للعراق بعد ما وصل الى أميركا.
أللي يريد يعيش باميركا لازم ينسى شنو جان يشتغل بالعراق وشكد ياخذ راتي وشلون جان يتعامل وين الناس لان الموازين بهذي الحالة مقلوبه ولازم يكافح في سبيل العيش الحالي وتوفير فرصة مستقبل جيد لأولاده لان أكيد كل هذي العملية بما فيها التضحيات اللي يقدمها الاهل هو في سبيل مستقبل أولادهم هذا بالنسبة للعوائل.
المواضيع اللي تكتب في المنتدى هي وجهات نظر وتجارب الاشخاص اللي كتبواها سواء سلبية او ايجابية لذلك من الافضل للكل أن يطلع على تجارب الاخرين ويأخذ منها عبرة بدل من أن يطلب عدم كتابة التجارب السلبية لانها من الممكن أن تأثر على نفسية بعض الاشخاص اذا كانت خياراته متأرجحة تجاه السفر او عدمه. وكل شخص حر بالنهاية في اتخاذ القرار المناسب له.
أما موضوع عدم تعاون العراقيين فيما بينهم فهي مع الاسف ظاهرة موجودة وواضحة وشفناها بدول الجوار العراقي وبالمقابل تلكه عراقيين يخدمك ويساعدك لان سمعك تحجي بالشارع بلهجة عراقية.
عذرا للاطالة.
تقبلوا مروري
عيني بغداد
-
الى الاخ اوكى اوكى اشكرك على الموضوع القيم واشاركك الراى باى شى وانا مريت تقريبا بنفس ضروفك كنت فى السويد وانرفضت ورجعت قدمت على امريكا ومن خلال تجربتى هناك تعلمت ان الشغل ابدا مو عيب واعلى اجر فى السويد هو لسايق الحافلة وسيارة الزبالة وعلى اى انسان يفكر بالهجرة ان ينسى العراق واقصد ان ينسى شغله او شهادته على اقل تقدير فى البداية التى تكون جدا صعبة وبالاصرار والتعلم والصبر والتاقلم مع المجتمع الجديد سوف يصبح كل شى سهل وتنفرج الامور واحب ان اوصى الجميع باستغلال الفرصة فى تقوية اللغة الانكليزية وعدم التفكير بالاعتماد على المساعدات وبس على الانسان ان يتعب وبعدين يلعب
-
ام امنيه انشاء الله العراقيين كلهم يرتاحون وتدرين اهم شي بامريكا بعيدا عن كل شي هوه الامان, الواحد يشعر بالامان والاستقرار هناك هذي تعادل كل التعب الي تعبناه بالعراق وشكرا على مشاركتج
ابو ايمن شكرا على مشاركتك واتمنالك الخير والموفقيه بحياتك
عيون بغداد بارك الله بيك على كلامك السليم ميه بالميه واتمنى الاخوان يمشون بحجيك
باسل بلالو الشغل ابد مو عيب مهما كان منصب الانسان وشكرا على مرورك وبارك الله بيك
-
اي والله اهم شي الامااان الي كنا مفتقديه بالعراق وان شاء الله تصير سواااالف
-
اي والله كلها تصير سوالف على العموم الله يوفقج ام منيه وتحياتي الج