السلام عليكم , اخوان آني طلعت من العراق بال 2007 آني ومجموعة من الأصدقاء , وبالطريق لكيت آلاف مثلي مو مئات آلاف ... آني عبرت من تركيا لليونان ومن اليونان لأيطاليا .... بقيت بأيطاليا اسبوعين قبل ما أطلع لفرنسا ... تعرفون شنو ايطاليا ؟ أيطاليا آني أعتبره اجمل بلد أوربي ... يسموه بلد التاريخ والسحر والجمال ... روما المدينة التاريخة الحية من أكثر من 2500 سنة ... شحجيلكم بعد
كل هذه وآلاف العراقيين اللي مرو عليهه جانو مايطلبون اللجوء أهناك رغم انو بالألفين وسبعة جان العراقي يحصل الإقامة الأيطالية خلال أشهر !
تدرون ليش ؟! لأن ايطاليا تنطيك إقامة بس ماكو مساعدات (مثل أمريكا) , تكلك هذي إقامتك وروح أنته اشتغل وعيش (مثل أمريكا) !
رغم انو ايطاليا بيهه شغل , آني عشت ويه مصريين يشتغلون بمطاعم البيتزة واحدهم راتبه 1000 يورو , ويعيشون بسكن جماعي لأن أقل شقة ايجارهه 800 - 1000 يورو بضواحي ميلانو أو روما.
هسه آني مرفوض بالسويد وبعد مالي حق أقدم لجوء بدولة أوربية ثانية وأضطريت أقدم على امريكا وجاي أنتضر مثلكم , يكدر واحد يكلي شنو الفرق بين أمريكا وأيطاليا اللي جنه نضحك على اللي يكول أريد اقدم اللجوء بيهه ؟!
بالنسبة للعزاب اللي مثلي آني أشجهم يروحون لأمريكا , فرصة ومجانية ليش ماجربهه ؟! بس نصيحتي لايصفون الأكو والماكو بالعراق ... خلي يخلون صمام أمان لأسوء الأحتمالات , وعسى أن تكرهو شيئا وهو خير لكم , بلكي المجهول أحسن من المعلوم !
أما أصحاب العوائل اللي ماعدهم احد هناك يساعدهم ... فأكول كان الله بالعون .
تقبلوا هذه اللغوة مني ههههه مال واحد ضايج ... كل ما يصفن يتذكر شعر الجواهري الله يرحمه
يادجلة الخير قد هانتْ مطامِحُنا
حتى لأدنى طِماحٍ غيرُ مضمونِ
أتضْمنين مقيلاً لي
سواسيةً
بين الحشائش
أو بين الريــاحينِ ؟
خلواً من الهمّ
إلا همّ خافقةٍ
بين الجوانح أعنيها
وتعنيـني ؟