-
مرحبا شبااب و بنات منتدى عنكــاوة
اني مشترك جديد و ماصارلي فترة من لكيت هذا المنتدى الرائع بصراحة لأن جنت انخبش بالنت على شغلات بس الكاها هنا !!!
اخوكم اشتغل وية القوات الامريكية بسنة 2004
مقدم على الـــiom عن طريق BaghdadInfoCenter و عندي مقابلة اني و عائلتي يوم السبت .......
منو مسوي مقابلة مال اللي مشتغلين وية الجيش ؟؟؟؟ مترجمين ؟؟؟؟؟ و شنو طبيعة المقابلة ؟؟؟؟؟
مع العلم اني ما متهدد .... بس عندي صور مال هاون واكع اباب بيتنا من جنت اشتغل وية القوات ، بس المحضر مال شرطة ما حصلته من المركز لان القضية قديمة ؟؟؟؟
شنو طبيعة المقابلة و شنو الاسئلة ؟ و شنو اللي لازم احجيه ؟؟؟
اخوان رجاءا اللي مسوي هاي المقابلة من المترجمين الرجاءينجدني و يعلمني شنو اللي يصير .....
ارجو من اللي عنده علم بيها ان يرد لان ماباقيلي شي
رجااااءا رجاااءا اخواني
-
تحياتي اخي العزيز Interpreter2004
احب بالبدايه ارحب بيك في هذا المنتدى الرائع منتدى عينكاوا واكلك اهلا وسهلا بيك ..
بخصوص موضوع المقابلات ال IOM اكو موضوع جدا مهم ومفيد لجميع المقابلات التي تتم في IOM بكل التفاصيل الدقيقه لهذه المقابلات من ناحيه الاسئله وكيفيه الاجبه عنها .. وهذا الموضوع موجود في قسم اهم المواضيع للاخ العزيز عكعك وراح ايظا اتشوف تجارب لناس قابلوا وكاتبين تجاربهم اثناء المقابله .. اتمنى ايفيدك هذا الموضوع وهذا الرابط
http://www.ankawa.com/forum/index.php/topic,294296.0.html
اخوك
محــ2009ـــمد
-
الف شكر عالردود السريعة منكم اخواني
اخي محمد2009 بالنسبة لموضوع الاخ عكعك موضوع وافي و شافي بس يدووخ هههههه
اخوية ماجلان ... انت همينة مترجم ؟؟؟
زين كم مقابلة هي مال مترجمين ؟؟؟؟
و شنو اللي لازم اوديه من اوراق و مستندات ؟
و اني اهلي وياية ، فهل الاسئلة الموجهة الي رح تكون نفسها لاهلي ؟
ابوية و امي و زوجتي و ابني الصغير ؟؟؟؟
و اشكركم مرة ثانية عالرد السريع
الله يوفقكم و ينولكم اللي ابالكم
-
السلام عليكم
اخوية اني سويت هاي المقابلة بشهر الثاني وكانت اشوية طويلية ومثل ما اتفضل اخوية على الاغلب يكون الي اليقبلك مصري لو لبناني المهم انت راح ايسئلوك بهاي المقابلة على كلشي بحياتك يعني على المدرسة الابتدائية والاعدادية الى اخره يعني ايسولك على اشياء انتة ما تتوقع راح ايسولك عليهة لان هية بلنسبة النة كلش تافهة وراح اتكون على الاغلب هاي المقابلة على جزئين الجز الاول راح ياخذ بي المعلومات عنك والجز الثاني وهوة المهم الي راح يكون الجزء الامني يعني انتة ليش اتريد اتروح لمريكا وانتة لازم اترتب الك فلم لان هذا كلش ايسهل وايكثر من نسبة قبولك وانتة من اتسوي هذا الفلم لازم اتناقشة مع كل افراد العائلة متك مو ايصير تضارب بل الحجي لان اذا صار هيج يعني راح ايعرفون انتة جاي اتجذب وراح تلاص
واخيرا اخوية من اتسوي الفلم مالك لازم تتذكرة واتذكر كل افراد عئلتك بي لان من اتسوي القابلة الثانية انشائ الله لازم ايكون حجيك ايطابق المقابلة الاولى مو اهنا تحجي شكل واهناك شكل لان اذا سويت هيج ترة كلش تنلاص
اخوية اني بل الخدمة على اي معلومات لخ واعذرني على التقصير
-
شكرا حبي دارك آنجل عالرد و التوضيح
زين اني اذا ادبرلي كتاب تهديد ؟؟؟؟ يمشي بس ارتب قصة عليه ؟؟؟؟ يعني اذا يدزولي كتاب تهديد عن طريق ايميل و اسحبه و اوديه الهم مراح يكللولي اشو الكتاب مطبوع جديد و مو مثل بقية الاوراق مالتك اللي هي الريكومنديشن و ملاعيب العيد ؟
و مثل ما ذكرت احنا واكع اباب بيتنا هاون من جنت اشتغل وية الربع بس المشكلة انو بس صور عندي يعني محظر الشرطة ما حصلته
فشلون ارهمها ؟؟؟؟
بلكت خبرتكم
-
اخوان ما احد رد لي هسة
رجااء المساعدة و الله يوفقكم
[/color][/size]
-
اي اخي رتب كتاب تهديد يمشي اني اخوك مترجم وقابلت قبل خمس اشهر بالقليل , بس همة ايسألوك عن التهديدات الي مار بيهة انتة بسبب شغلك فأنت كوللهم ان انتة هواية ناس عرفوا بيك انتة مترجم وايسموك جاسوس وخاين واذا الامريكان طلعوا راح ايقتلوني وعندي صديقي انقتل بسبب الشغل هذا وانطيهم فد تاريخ اني سويت هيج حبيبي ومشت وكلش عبر, واذا عندك اي سؤال ادلل اني بالخدمة.
-
شكرا عالرد عمري
بس يعني احتاج قصة محبوكة كلش زين متخرش المية مثل ميكولون ؟؟؟؟
يعني مثلا اذا كتلة اني اشتغلت وية الجيش و بالقاعدة كان اكو ناس من نفس منطقتي و شافوني و من هالسوالف ،،، هل يقتنع بيها ؟؟؟؟
او لازم الا اثباتات و دلائل ؟؟؟؟؟
مع العلم انو اني وراها اشتغلت بمكان اخر كمترجم بس وية شركة امنية ؟؟؟؟
بس اريد توضيح على طريقة سرد و كتابة القصة و اكون ممنون الكم و ما انسالكم الجميل ابد
[/color] [/size]
-
يمعوود اخوان مروتكم
اللي يكدر ينجدني بطريقة
اهم شي هو التهديد بالقصة ؟؟؟؟
اني كللولي بس مقابلة عادية يسالون اسئلة عامة و ليش تريد تروح لاميركا و من هاي السوالف
-
اخيInterpreter2004 اولا اهلا وسهلا بيك وبانضمامك للمنتدى وان شاء الله انتوا راح اتلزمون المنتدى بعد تتخرج الدورات الي قبلكم فانت ان شاء الله هسه بديت على الطريق والله ايسهل امورك وايسرعها
اولا انت اذا دزوا عليك للمقابله فالمفروض انت حاجيلهم قصه بالايميل او شرح عن حالت التهديد الي اتعرضتلها...مو صحيح؟؟؟
فأنت ابقى على قصه وحده واذا عندك صورة الهاون هاي رتبلها قصه قصيره جدا ومرتبه ومو شرط عندك ورقة شرطه لان بمجرد شعورك بالتهديد واي اشاره اله كافيه
ولتحاول ابدا ترفق اي اوراق مزوره اكتفي بالي موجود وعندك حتى لو قليل بس حقيقي احسن متالف هوايه واذا طلع بيها ثغره كلها تنلاص
وهاي القصه اكتبها واطبعها واقروها انت وافراد العائله وضل صر عليها ولتجيب تواريخ هوايه حتى لتغلط بيها لان بس ايلكفون تاريخ ايضلون ايخربطوك بيه
وانت هسه اكتب تواريخ الدراسه مالتك والمدارس حتى تذكرها وحتى ميلاد اخوتك واهلك وتاريخ زواج اهلك فهاي كلها حضرها
وان شاء الله ياربي ايوفقكم وهيه كلش سهله هسه اتشوفها اسهل مما تتصور بس اتكون واثق من القصه وتحجيها بصدق وهاي الله ايوفقكم
اختكم ريم
-
الف شكر الكم جميعا على المعلومات و المعنويات اللي رفعتوها الي
ربي يوفقكم و يسهل امركم و ينور دربكم
صدك شوية كمت اركز هسة لان كنت كلش متخربط لان كل واحد يحجي شكل و ما افتهمت شي
شكرا مرة ثانية
[/size]
-
اخي العزيز صدكني اي اثبات ميريدون بس خلي تواريخ بالقصة يعني بفلان تاريخ شافني واحد من جيراني وراح حجة بيهة بس ما اعرف منو من جيراني الي شافني ولكن بالمنطقة انتشرت معلومة ان اني اشتغل بهاي القاعدة لان اذا كلتلة واحد من جيراني راح ايكيك منوة من جيرانك شافك وشسمة وين بيتهم وعنوانة فأنت خلي كلشي مجهول وادلل.