ankawa
منتدى الهجرة واللجوء => الهجرة و واللاجئين => الموضوع حرر بواسطة: ابو العباس في 01:48 20/08/2009
-
مساء الورد على الجميع ....
شباب اني ان شاء الله متوجه الى هيوستن وبس منتظر موعد السفر ودزولي الاشورنس فورم وبيه اسم المنظمه ارجو من الطيبين اللي بهيوستن انه اي معلومات عدهم عن هاي المنظمه سواء كانت جيدة ام غير جيدة من ناحيه اعتنائهم بالاجئين او المهاجرين والاهم اذا كان واحد يعرف هاي المنظمه وين اتسكن الوافدين الجدد يعني خوش مناطق لو لا؟؟؟
اسم المنظمه ...
INTERFAITH MINISTRIES OF
GREATER HOUSTON
3217 MONTROSE BOULEVARD
HOUSTONTX77006-3980
-
أحي ابو العباس
اتصلت بصاحبي بهيوستن وهو على نفس المنظمة وقاللي انها منظمةسيئة جدا.والمترجم العراقي اللي بيهه غير كفوء .
المهم حبيت انقللك الخبر من شخص ثقة ولكن انته شطارتك وياهم اذا عندك لغه انته طلع حقك منهم.
وهذا كلامي ليس لاحباط معتوياتك لكن كل المنظمات هي نفس الشئ وكلهه سيئه.
وانشالله رب العالمين يسخرلك اولاد الحلال ... وكل جماعتنه بهيوستن ولد اصول وميقصرون وياك انشالله.
-
حبيبي غسان اني ممنون منك يا وردة بس مو خوش خبر هذا والله ...
يعني هي مو سالفه اللغه اني الانكليزي مالتي زين لكن يعني اذا هي مو خوش منظمه اشرح ايفيد اللغه والله بعد مااعرف الله كريم ...
تسلملي وردة وتعبتك ....
-
اخي ابو العباس كان الله في عونك انا عندي نفس المشكلة ارجوك لو وجدت اي حل لمشكلتك بلغني وانا كذلك ان شاء الله .. والله يسهل على الجميع
-
غسان حبي ...
اني ضوجتك وتعبتك وسويت عليك زحمه ,, بس اتحملني شويه لان اشو كلبي كام يلعب ...
يعني بس اريدك تشرحلي حضرتك او اي عضو يعني شنو مو زينه المنظمه؟؟؟ يعني قابل شنو اللي رح ايصير؟؟
والمترجم شعليه طيب هو هذا صديقك على نفس المنظمه؟؟ واذا اي يعني ليش ديكول عليها مو زينه شنو ماكلين حقوقه لو شنو؟؟
تحياتي وردة واسف لالازعاج ...
اختي عسوله ....
عود اني كلتلج تعالي يمي بهيوستن شفتي انوب شنو صار؟؟؟
يله عادي يمعودة مادام الله موجود ماكو مشكله بلكي هسه الشباب ايفهموني يعني شنو مو خوش منظمه وخاصه اللي بهيوستن ورح اكون ممنون الهم ... عسوله يمعودة صدك كذب لتشغلين بالج ولو هو واحد مو بيده بس مادام الله موجود لتخافين اختي العزيزة واني اخوج صحيح بعدني اني ابغداد بس ان شاء الله عن قريب اسافر وان شاء الله احنا جيران بهيوستن واي شىء اكدر اساعدج بيه مرح اقصر بحيل الله ...
واللي بيه الخير ايقدمه الله ....
تحياتي
-
اخي العزيز ابو العباس
المنظمات هنا في هيوستن بنفس المستوى وأرجوا ان لاتعول عليها .. الانتر فيث هي نفس منظمتي تعبانة جدا خاصة من النواحي اللجوستية مثلا ليس لديهم دورات انكليزي او تعليم سياقة أو متابعة شؤون اللاجئين .. وكل عائلة لاجئة لديها كيس ووكر وهذا شخص يكون مسؤول على الاجئ وانا الى الان لا عرف الكيس ووكر مالتي بسبب اهمال المنظمة وحاليا وظفوا اثنين من العراقيين ليكونوا مشرفين على اللاجئين العراقيين لكن بسبب كثرة اللاجئين صعوبة الحصول عليهم لكن في نفس الوقت هذه المنظمة سوف يستقبلونك في المطار ويهيأون لك شقة ويذهب معك الكيس ووكر ويعمل لك الفود ستامب والسوشيل سيكورتي ويعطون مبلغ سبعين دولار بدل طعام كل اسبوع لشخصين لحين مجيئ الفود ستامب وايجار لمدة اربع اشهر فقط زائدا 400 دولار لشخصين لمدة اربع اشهر وحين تنقضي هذه الاشهر يرفعون ايديهم عنك .. سوف تعتمد على نفسك اما العمل الى الان المنظمة لم توظف شخص واحد وسوف يكون الاعتماد على الشخص .. المدكييت لمدة ثمانية اشهر .. الفود ستامب لمدة اربعة اشهر قابلة للتجديد .. حزم امرك اخي من الان ولا تعتمد على المنظمة ويوميا هنالك مشاكل بين العراقيين والمنظمة بسبب اهمالهم .. اعتمد على نفسك واذا كنت من اصحاب الانكليزية الجيدة فهذا مناسب لك وستكون فرصك اوسع .. اجلب معك نقود احتياطية واهم شيئ فلوس السيارة لآن بهيوستن العمل اولا والسيارة ثانيا فور وصولك امتحن نظري وعملي ومن ثم اشتري سيارة وابحث عن عمل اما المنظمة يااخي العزيز لا تعول عليها ابدا وانا حاضر لاي سؤال
اخوك اوركي
-
الاخ العزيز ..انا على نفس المنظمة المذكورة ..
انا اسكن في هيوستن لكن استغرب جدا على تصريحات بعض الاخوة في موضوعك الكريم ..
اتصور من الصعب على البعض فهم كلمة منظمة ...ولا يعرف كيف يفصل بين كلمة منظمة وبين كلمة حكومة ..
اخي الحبيب ..راح تجي لهنا وتشوف المنظمة ..راح تنطيك مثل ماذكره الاخ اعلاه من فوائد ..اما العمل فالمنظمة من الممكن وليس الاكيد ان تجد لك عملا ..او تحاول ان تجد لك عملا ..لكن اولا و اخرا العمل انت الذي تجده ..المنظمة ممكن ان تقدم لك النصح .اما عن اجازة السوق فاالامتحان سهل جدا جدا جدا ولا تحتاج الى منظمة ولا دعم من الاف بي اي ولا السي اي ايه ولا البنتاكون ..
المنظمة تقيم دورات تعرفك بيه عن طبيعة المنظقة وشلون تقدم على الشغل و دورات انكليزي ...وطبعا في شخص مسوول عن الاثاث اذا ردت اي قطعة يجيبها الك او تكدر انت تروح للمنظمة تكلهم اريد تلفزيون واريد واريد ..ونصيحة اخرى لا تعمتد على الكيس وركر مالتك لان عراقي واسف لتسميته بالعراقي لان كالعادة راح بكسله يظلمك ...واكيد سختجي ...
حبي ...اتوكل على الله وخليك بواهسك ولا تعمتد على المنظمة بكل شي لان مثل ما كلت اني سابقا اسمها منظمة....
-
اوروكي وبلاك ووتر ....
اني ممنون منكم شباب وجزاكم الله كل الخير...
احنا اكيد منريد المنظمه ولا متوقعين منها انه كلشي اتسويلنه لكن بس اللي رايديه انه اتساعدنه من نوصل وهو هذا المهم ....
تحياتي وشكرا مرة ثانيه ....
-
بالنسبة لامتحان السياقة العملي لازم عندك سيارة تمتحن بيهة فلازم تشوف احد يجي وياك بسيارتة تمتحن او تشتري سيارة وتخلي احد عندة اجازة يوصلك