ankawa

منتدى الهجرة واللجوء => الهجرة و واللاجئين => الموضوع حرر بواسطة: أبن زيونة في 02:26 02/09/2009

العنوان: رجعتلكم يالربع بس مو من أمريكا بعدني بعمان
أرسل بواسطة: أبن زيونة في 02:26 02/09/2009: السلام عليكم
هلا بكل ورود منتدانا حديقة العراقيين العامرة رمضان كريم عليكم وكل عام وأنتوا بألف خير أن شاء الله الصحة والعافية للجميع بدون استثناء شلونكم مشتاق للكل وللمواضيع الحلوة.
طبعا اخر مشاركة الي كتلكم جتني الموافقة وانطوني موعد سفر يوم 20/8 طبعا أني من جماعة 4/7 المهم خابروني وراها بيومين على الدورة لهنا جنت متهيأ ومستعد كالأسد للذهاب ويايه زوجتي طبعا جانت متحمسه وأني جنت ممرتاح للسفر بصراحة لأن ماعندي فلوس على كولت أخوتنا بالدول العربية مصاري مافي وزوجتي جانت متحمسه اكثر مني وهاي فرصة ومن هالحجي المهم رحنه للدورة أول يوم جان رهيب بوري مرتب طبعا تهبيط للمعنويات تخويف تسويد للعيشة شحجيلكم شنو الي متشائمين منه سمعنه من أول يوم طبعا زوجتي بالبريك الأول مال الدورة (للكهوة والجاي والمي والي يريد يدخن) بدلت 180 درجة كتلها سبحان الله الي يسمعج البارحة ميسمعج اليوم طبعا هي حقها أول شي نسوان تعرفوهم يخافون مو مثلنه شايفين بلاوي وثاني شي الحجي جان مو طبيعي طبعا الكل راح يسألون شنو الحجي أول شي المساعدات تحطون بالكم شهر أذا أكثر من شهر زايد خير بس تحطون اسوء الأحتمالات المهم لازم تعتمدون على نفسكم مراح تلكون بالشقة تلفزيون او كناتير او راديو اول مروحة او تبريد هاي كلها كماليات ترفيهيه طبعا وبعدين شوفونه سي دي وانطونه كتيبات وملزمة توثق هذا الشي المهم ثاني يوم جان شويه اهون بيه تفاؤل بس همين بيه شوية منغصات ثالث يوم احسن تفائل وحياة حلوة ونماذج ناجحة من اللاجئين بأمريكا طبعا هذا كله بس دي يراونه اياه مثل مكتلكم طبعا الدورة على الحلال والحرام كلش كلش كلش مفيدة يعني رغم حجي هذا انصح الكل وهي نصيحة أخوية ان ترحون لأن راح تستفادون هوايه وشعدكم اسئلة تاخذون اجوبتها وأكو شي ثاني الي أنطتنه الدورة محترمة جدا"جدا"جدا" مو استهزاء بس هي تحجي الصراحة واول يوم شافتنه كلتنه راح انطيكم الحقائق كاملة حلوة هاي مال الحقائق عجبتني بس تنطيكم الشغلات الزينة ومو زينه بس هي ملجوعه من جماعتنه لأن جماعتنه العراقيين الي رايحين قبلنه ومنطتهم الدورة املبسيها تهم يابو تهم أنتي كلتينه راح ينطونه سيارة وراح ينطونه راتب طول العمر وبيوت حلوة وحمامات سباحة بيها وجاكوزي ولهناك طبعا من واصله هناك مسوين عليها ندوة على هذا الحجي ليش تحجي هيج للعراقيين وشلون تكوليلهم هيجي المهم مطيحين حظها فهي من مبدا شوفتنه الموت حتى نرضى بالسخونه يعني حجيها منطقي اني شفته والحلو بيها صادقه يعني ماعدها نفاق لأن هي امريكيه عربيه طبعا انطتنه نصائح هوايه وفادتنه هوايه بس اني أجلت سفري لأن حقيقة خفت أروح ماعندي فلوس يعني مكدرت اجمع غير 500دولار وعلى حجيها اقل شي لازم الواحد يروح وياه فد3000الى 5000دولار طبعا هذا رأيي حتى اخاف ينضرب بوري هناك بالولاية ويريد يحول المهم اجلتها طبعا حبيبي اسووا بيها الiomوunدك تليفونات وين جوازك وليش مااجيت وليش متسافر من هالحجي والله مااعرف القرار اخذته صح دخت دوخه مو طبيعيه هي فرصة وفوك القهر اكو وحده من الي نعرفهم رايحه صارلها جم شهر بأمريكا داكولها طلعتلي اريزونا لك عينين لا لتروح مو خوش ولاية مساعدتها تعبانه ماكو شغل حارة نار جهنم صحراء حيات عكارب شنو هالولاية الكشرة الي طلعتلك صديقتي طلعتلها ومتورطة المهم ثبتتها عليه مال التأجيل هالمرة مرتي كالت مااروح لو تنكلب الدنيا اروح اتبهذل والي زاد الطين بله أمي وخواتي صارلي 3سنين ونص مشايفهم قدموا فيزا ومنطوهم على عمان وصدك من كال جانت عايزه والتمت طولت عليكم أني اسف بس حبيت اشاركم ويايه طبعا اكو هوايه راح يكولون هذا بطران وفايخ ونستله بس الي ياكل ميدري بلي يثرد اخوان واني متقبل كل كلام عليه حتى لو جارح لأن أنتوا اخوتي بس والله احنه العراقيين مصيبتنه مصيبه وراح اكولكم شغلة اني شفتها مااعرف صح او غلط بس اني صارت ويايه كل الي رايحين الا مارحم ربي من جماعتي عدهم فلوس ورايحين وعدهم ميزانية حلوة طبعا الله يزيدهم هذا مو حسد الله يوفقهم بس يعني متحضرين لو بايعين أملاك ومصفين بالعراق لو عدهم اهنا شركات ومصفيها لوعدهم احد اهناك راح يساندهم والله يوفق الجميع اسف مرة الخ على الأطالة وعندي طلب منكم مساعدة الي عنده معلومات على ولاية أريزونا مقاطعة توسان وخصوصا اخونا أريزونا يفيدنه بيها شلونها الولاية زينه اني سألت هذا السؤال بس أريد واحد اهناك شايف وعايش الحالة والشكر لكل الي راح يردون عليه والي عنده أي سؤال على الدورة وشنو الي بيها اني جاهز وبالخدمة تدللون
سلامي للكل والله يوفق الجميع
العنوان: رد: رجعتلكم يالربع بس مو من أمريكا بعدني بعمان
أرسل بواسطة: arizona في 03:58 02/09/2009: اخي العزيز قريت رسالتك على الخاص اني ساكن فينكس بس رجاء لا تقرر اي شئ على ماتسمعه مني او من غيري راح اكلك عن اريزونا فينكس اولا مو صحراء هواي بيها خضار ثاني شي حاره بس وين متروح اكو تبريد الشغل وراح اكون صادق معك شحيح مدينه توسان الي رايحلها مدينه صغيره وبيها جاليه عراقيه ملتزمه جدا يتراوح عدد العوائل بيها حوالي 160 عائله والكل يعرف الكل نوسان تمطر بيها هوايه بل الصيف وبيها منضمتين فقط هي اي ار سي والثانيه ما اعرفها خلي في بالك تعبر اريزونا من ارخص الولايات والايجارات ارخص من كل الولايات ممكن تحصل شقه من غرفتين جميله جدا وفي منطقه حلوه بين 500 و600 وهذا براي ارخص من هواي ولايات وممكن تدخل عل النت وتسوي مقارنات ومن هسه راح احاول اتصل بجماعتي بتوسان وانشاء عندي بيها عرف مراح يخلوك وحدك هذا كل اللي اكدر اخدمك بي ................ رمضان كريم
العنوان: رد: رجعتلكم يالربع بس مو من أمريكا بعدني بعمان
أرسل بواسطة: أبن زيونة في 14:10 02/09/2009: السلام عليكم
ممنون اخوية أريزونا ومقصرت والله انت أنسان محترم وبارك الله بيك والله يوفقك ويرزقك لأن جاوبت على الموضوع بسرعة طبعا مشكور لأن كلماتك حلوة وأكيد اني راح اخذ أكثر من رأي على هذا القرار وما خاب من أستشار من الله يبشرك بخير من ناحية الأيجارات ورخص الولاية شغلة زينه على حجيك أكيد أرخص من هوايه ولايات لأن أني همين يوميه داخل على المواقع وعندي ناس بغير ولايات ومن منتدانا داشوف قيم الأيجارات بالولايات البقية بس اهم شي الشغل شحيح بس أكو شغل؟
عادي هو بكل مكان الشغل صعب خاصة على الغريب وأكيد العافية درجات زين ولو راح أضوجك تكدر تنطيني أيميل الناس الي تعرفهم بتوسان بعد متاخذ أذنهم طبعا اذا يقبلون حتى اراسلهم واسألهم على توسان وأذا ميقبلون وهذا حقهم تكدر أنت تستفسرلي منهم على المقاطعة المساعدات وخاصة التعليم أذا الواحد يريد يدخل دورات؟ يعادل شهادته؟ يدربوه على الشغل يعني دورات تلتزمنه المنظمات الي هناك لو علينه لازم احنه ندفع والمنظمات الي كلت عليها توكف ويانه يعني تساعدنه على منلكه شغل لو تعوفنه وأسف طولت عليك وجزاك الله كل خير عنا وان شاء الله أذا الله كتبلنه نجي لازم أزورك وأتشرف بمعرفتك لأن معرفتك كنز
رمضان مبارك
سلامي
العنوان: رد: رجعتلكم يالربع بس مو من أمريكا بعدني بعمان
أرسل بواسطة: dodo micheal في 16:37 02/09/2009: اخوي العزيز ابن زيونة انشالله تكون اخذت القرار الصحيح بتأجيل سفرك وربنا يكون معك وين ما رحت سواءا بقيت بعمان او سافرت ل اريزونا ربنا ما ينسى احد اخوي العزيز
الله يوفقك ويباركك ويحميك

اختك دودو
عمان
العنوان: رد: رجعتلكم يالربع بس مو من أمريكا بعدني بعمان
أرسل بواسطة: عكعك التطوى في 16:43 02/09/2009: عليكم السلام ورحمه الله وبركاته ورمضان كريم عليك انشاءالله

اخي العزيز محد يلومك على اي قرار تتخذه لانها حياتك وتعرف تقدر ضروفك وتختار القرار الذي يناسب
وضعك وحالتك ولكن ارجوا منك ان تنطي مجال لنفسك باعاده حساباتك وتقوم بدراسه اخرى حول ولايتك
والمساعدات المقدمه بها وطبيعه العمل وغيرها من الامور وليس كل ما يقال وتسمع هو صحيح وبالنهايه
انت صاحب القرار واتمنالك التوفيق انشاءالله

(( ما من دابة على الارض إلا وعلى الله رزقها ))
العنوان: رد: رجعتلكم يالربع بس مو من أمريكا بعدني بعمان
أرسل بواسطة: arizona في 17:56 02/09/2009: اخي العزيز ابن زيونه اذا خلتك المنضمه عل الماجك كرانت فهذا برنامج تدفع المنضمه كل مصاريفك لمده 3 اشهر يعني 3 اشهر متصرف فلس واحد الدراسه بتوسان بيها حامعه وحده فقط هي جامعه بيما من تقدم على دراسه اللغه راح ينطوك 500 دولار على الموسم الدراسي الواحد يعني تقريبا متصرف فلس واحد ظول فتره الدراسه والي اصدقاء بتوسان عندي ارقامهم اذا وصلت بل السلامه راح اخليهم يتصلون بيك وثل مكتلك انشاء الله مراح تكون وحدك واي شي اني بل الخدمه
العنوان: رد: رجعتلكم يالربع بس مو من أمريكا بعدني بعمان
أرسل بواسطة: مازولا في 18:31 02/09/2009: اخويه العزيز اريزونا ... اخوية ابن زيونه الغاليه ... اخواني الاعزاء و الغاليين ... تسمحولي ادخل على الخط بفد سؤال ... انت تكلمت عن دراسة اللغة الانكليزي ... زين اذا الواحد يريد يدخل دورة مهنيه ... يعني حتى ياخذله اجازة عمل لمهنة معينة ... المنظمة ممكن تساعده بهذا الموضوع ... اخوك مازولا
العنوان: رد: رجعتلكم يالربع بس مو من أمريكا بعدني بعمان
أرسل بواسطة: ابو الحسن في 18:47 02/09/2009: عمي الله يساعدهم
عمي رب السماء موجود وين ماتروح بسوريا والاردن والعراق وامريكا
يعني عمي ربك رازقك وساتر عليك هسة بعمان وتصور راح يعوفك وانته بامريكا
توكل على الله والله هو خير كفيل ووكيل
عمي بس اتذكر جوازك العراقي واللي راح يعانون منه اولادك وبعدين قرر بالانسحاب
الله يوصلك لبر الامان
ابو الحسن
العنوان: رد: رجعتلكم يالربع بس مو من أمريكا بعدني بعمان
أرسل بواسطة: أبن زيونة في 00:33 03/09/2009: شكرا أختي دودو
وممنون على دعواتج الحلوة أكيد دعواتج مثل نفسيتج واخلاقج الحلوة والله يبارك بيج ويوفقج ويسرها عليج وعلى الكل وماقصرتي
العنوان: رد: رجعتلكم يالربع بس مو من أمريكا بعدني بعمان
أرسل بواسطة: أبن زيونة في 00:39 03/09/2009: اخوية العزيز أبو الحسن الورد
ممنون حبيبي على دعواتك والله يوصلك ويوصل كل العراقيين لبر الأمان والراحة
ونعم بالله أكيد الله أرحم الراحمين وان شاء الله يرحمنه ويرحم الكل وهو برحمته الله كاعد دنمشي ودتمشي الدنيا
ولا عاب حلكك على شغلة الجواز أكيد أني الي ديشجعني على الروحه هي شغلة الجواز العراقي مع الأسف الشديد صرنه مكروهين من الكل وصرنه عاله على كل الدول وخصوصا العربية لذلك هذا اكبر دافع على انه تروح وتسويلك جواز وجنسية امريكيه حتى محد يحجي وياك
العنوان: رد: رجعتلكم يالربع بس مو من أمريكا بعدني بعمان
أرسل بواسطة: أبن زيونة في 00:43 03/09/2009: حبيبي عكعك الفنان
دائما انت فنان بأجوبتك المرتبه مثلك ومشكور اخوية على نصيحتك ألي
أكيد الواحد لازم يفكر ويدرسها زين لأن هاي فرصة ومتجي كل يوم صارلي 3سنين مسجل يله طلعتلي وان شاء الله الله يجيب الخير النه وللكل وتسلم ياوردة
العنوان: رد: رجعتلكم يالربع بس مو من أمريكا بعدني بعمان
أرسل بواسطة: أبن زيونة في 00:50 03/09/2009: ممنون أخويه أريزونا والله ماقصرت
الله يبارك بيك ويوفقك وانت عالراس
ورحم الله والديك وأني أخوك اهنا بعمان أي شي تريد أي جاهز وتدلل
وضوجتك بالاسئلة اكو غير برنامج ماجك كرانت ورا ال3 اشهر اكو غير برنامج نكدر ندخله اذا الواحد اسوء الأحتمالات ملكه شغل مضبط اللغة اكو منظمات تساعدنه غير هاي المنظمة منظمات انسانية اكونلك ممنون اذا جاوبتني على هاي الاسئلة واعتذر منك على كثرة الاسئلة والله يبارك بيك ويوفقك على مساعدتنه
العنوان: رد: رجعتلكم يالربع بس مو من أمريكا بعدني بعمان
أرسل بواسطة: أبن زيونة في 00:52 03/09/2009: اخويه مازولا ادخل حبيبي على الخط ودش دش
هدد كسر حطم دمر
أنت وكل ورود المنتدى
سلامي
العنوان: رد: رجعتلكم يالربع بس مو من أمريكا بعدني بعمان
أرسل بواسطة: nana1972 في 03:27 03/09/2009: اخي العزيز ابن زيونه
اني هم كملت الدوره التثقيفيه بعمان بيوم8-6-2009 وره فتره طلبو مني كفيل بأميركا وطلبت من اعضاء المنتدى يكونلي كفيل والاخوان ما قصروا معي محاولات الاخت انجي مع الاخ بيرج الله يرضى عليه اتكفلني وانطاناني عنوانه والى هسه ماكو جواب
بس عفوا من تدخلي انت رايح الى بلاد الغرب يعني مصير مجهول ومدا نعرف شراح يصير هناك ويانه المفروض اتأمن نفسك بمبلغ على الاقل يكفيك لمده 6 شهور اما بهذا المبلغ اللي انت تكول عليه اني براي وهو مجرد رأي يعني لا تاخذ بيه . لا اتجازف بالسفر اذا متاخذ وياك مبلغ اتامن بيه نفسك على الاقل بالاشهر الاولى
بكل الاحوال نتمنا ان انشوف الامور بأحسن صوره هناك وربك يفرجها عليك وعلينا
اختك نانا من الاردن
العنوان: رد: رجعتلكم يالربع بس مو من أمريكا بعدني بعمان
أرسل بواسطة: أبن زيونة في 13:44 04/09/2009: اخوية ماجلان شلونك
أكيد أني متأني وعلى بس صارلي 3 سنين مسجلة بمال مفوضية اللاجئين بس مال أمريكا طلعتلي بشهر الرابع والله يفرجها علينا وعلى الكل
وهو العراق كله خرب بقت على زيونة
هي بس حفر بس نكر هو شارع الربيعي صاير كله دنك ومسدد ونص الشارع حفر مجاري الله يكرمكم صارلها سنة والنص الخ طسات
بس من وين أنت من زيونة (القديمة يم النادي والمصرف لو جماعة ال يم ثانوية الخنساء والمستوصف العسكري و الربيعي لو وره دار عرض الازياء لو جماعة سوق الثلاثاء و الحوانيت لو من جماعتنه الي يم ثانوية بدر الكبرى والملجأ لو من جماعة الي مقابل شارع الغدير لو قريبين من الشقق)
سويتلك خريطة مال زيونة
سلامي
العنوان: رد: رجعتلكم يالربع بس مو من أمريكا بعدني بعمان
أرسل بواسطة: أبن زيونة في 14:03 04/09/2009: أختي العزيزة نانا
شكرا جزيلا" على دعواتج والله يفرجها عليج وعلينه وعلى الكل وبارك الله بيج
طبعا كلامج صحيح ووجهة نظرج مقبولة100%وهي نفس فكرتي انه الواحد رايح للمجهول مثل مكلتي اقل شي لازم يدبرله مبلغ مناسب حتى يمشي نفسه وبالعكس معظم الي راحوا والعلم عند الله ورجعوا جانوا ممحسبين هذا الشي وجانوا معتمدين على مساعدات المنظمة لذلك مخاطرة الواحد يروح بدون مبلغ مناسب يأمن نفسه وعائلته خصوصا الي عنده عائلة أم الشاب فيكدر يدبر نفسه ويتحمل وهذا طبع رأيي الخاص ووجهة نظري وكل أنسان عنده قناعة وحسب ظروفه
الله يسهلها عليج ويخابروج وتضبط شغلة الكفيل والله يوفق الي ساعدوج من ورود منتدانا الي ميقصرون والله يوفقج
سلامي
العنوان: رد: رجعتلكم يالربع بس مو من أمريكا بعدني بعمان
أرسل بواسطة: ماكو حظ في 16:41 04/09/2009: السلام عليكم ورحمه الله وبركاته اخي العزيز ابن زيونه اني عندي اصدقاء اتنين راحوا الى اريزونا وهمه حاليا واحد اب سوريا وواحد بالاردن يمنا اهنا اريزونا غير جيده بالنسبه للاجئين المساعدات تعبانه وشغل ماكو وقرار تاجيل السفر ممتاز وعاشت ايدك بس اكو شغله الي اعرفه وصارت هاي الشله ويه كم واحد انه الواحد لمن اياجل خط الرحله مالته اول مره ما يحقله اياجل لتاني مره صح المهم عندي اصدقاء اهواي اجل اول مره وتاني لمن اجه خط الرحله اجاهم على ولايه تانيه انش اء الله ايصير وياك هذا الشي واله ولي التوفيق تحياتي لك اخوك بالاردن