ankawa
منتدى الهجرة واللجوء => الهجرة و واللاجئين => الموضوع حرر بواسطة: angie-dawood في 01:18 12/09/2009
-
مرحبا اختي أنجي
رجاءا يا اختي اتمنى تردين على رسالتي بأي شي يفيدني لأن اني كلش محتارة وتعبانة واريد بأي طريقة اطلع من بغداد واسافر
ما اريد اطيل عليج
اني عراقية مقيمة حاليا في بغداد وكلش تعبانة وحايرة وعدنة اقامة اني وزوجي واطفالي في سلطنة عمان محافظين على الاقامة للطوارئ لكن ما نكدر نعيش هناك لان جربنة وفشلنة ورجعنة لبغداد مضطرين لان عدنة وظائف
قدمنة لليو ان في الاردن ومن البداية رفضو تسجيلنة كون عندنا اقامة في مسقط كالو اذا تسقطون الاقامة تعالو قدمو واحنة ما نريد نجازف نسقط اقامتنة لان فايدتنة بلدخول للأردن وسوريا وتفيد بلطوارئ
واحنة تعبانين بلعراق بلرغم انه عندنا وظائف
زوجي كان في السابق يعمل مع الامريكان
فأريد أسأل شلون اقدم لأستراليا وما عندي كفيل هناك؟
وهل ال I O M هية نفسهة اليو ان او غيرهة؟
واخو زوجي في امريكا واحنة ما نريد امريكا كوننا مقتنعين انه الحالة اللي احنة بيهة في بغداد بعدهة يرادلنة راحة ومكان يسوة التضحية بوظيفتنة لأن امريكا لازم واحد يبدي بيها من الصفر واحنة كلش تعبنة بلعراق وما بينة بعد حيل نعيد مآسي من جديد وخصوصا رحنة سابقا لمسقط وجربنة بدينة من الصفر وتعبنة فنريد نرتاح بس بكل الاحوال اذا ما ترهم استراليا فأكيد أمريكا هم ميخالف أي شي أهون من بغداد
آسفة لأن اطلت عليج ارجوج ارجوج الرد ولك تحياتي ويا رب اي احد يجاوبني وشاركي موضوعي بلمواضيع لان ما اعرف شلون اعرض هاي رسالتي للكل عسى ان أسمع نصيحة تفيدني وشكرا جزيلا للكل جزاكم الله خيرا
تحياتي
علوشة
-
المهم هو اذا هي ضامنه وضعها يصير زين باسترااليا ,,طبعا اذا اليو ان وافقت على طلبهم لانوا اذا الزوج مشتغل مع الامريكان راح يكون اول بلد للتوطين هو امريكا , لازم تسقط الاقامه مع اني الي اعرفه ان الاقامه ما الها اي دخل بالتقديم لانوا هوايه ناس كانت عده اقامه بعمان الاردن وهسه هيه بامريكا
و المشكله هي ان احنا كلاجئين ما النا حق نحدد بلد اللجوء
-
والله ياختي اذا انتي مستقره بالعراق وماكو عليج اي تهديد وموظفه انتي وزوجك بعد شكو ادورين غربه واعادة توطين والابتداء من الصفر!!!!!!! ومثل ميكول المثل العراقي كعدي وسكتي
دعائي للجميع بالموفقيه
اخوكم الخالدي الاصيل
-
والله اختي انجي هاي الاخت امبينه كلش محتارة بس ترة ماكو شئ يجي بالسهل ولازم اكو تضحية بالامر يعني اول شئ هي كاعد اتكول انه امورة تعبانه في العراق و في مسقط و مااتريد تبدا من الصفر في امريكا ؟؟؟؟
قولي لها ماكو هيك شئ ثاني بحكم عمل زوجها واخو زوجها في امريكا يعني 90 % راح يكون التوجه للتوطين لامريكا
قولي لها لازم مادام هنالك سفر الى غير دولة فلازم تبدا من الصفر نعم الاردن أي الامم المتحدة لاقبل من عنده اقامه في دولة ثالثة لان هذا يفسر اانه غير مهدد بأعتبار اكو دولة ثالثه كاعد بها فأختي انجي هذا القرار هو بيدها يعني لازم تقرر مسقط او بغداد او امريكا لان بصراحة املها ضعيف في استراليا هذا رأيي
ال IOM هي منظمة الهجرة و الامم المتحدة هي التي ترفع الملف مال الشخص طالب التوطين الى الهجرة اذا كان يستحق ذلك
اما أذا أريد زوجها يقدم مباشر الى الهجرة فلازم يكوم مشتغل مع المريكان وهذا متوفر عند زوجها و لازم يكون عنده كتاب تزكية يثبت عمله مع الامريكان و يكون منسق مع الجهه الامريكية حتى يتاكدون من عمله مع الامريكان
رأي الشخصي ولو كنت في مكانها اسقط اقامة مسقط لان الدول العربية مادايمه لاحد وأبدأ حياة من جديد اي من الصفر في امريكا والله الموفق
اخوك رافد
-
اني اتفق وية اخوية الخالدي
مبين من كلام الاخت طافرة روحهة وهي مفكرة بااستراليا لان تتصور مراح تبدي من الصفر
اختي العزيزة اي بلد غير العراق من اتروحيلة لازم تبدين من الصفر لو حتة جزر الواق ويق
اني وياج لان دا اعرف الظروف صعبة ابلدنا
بس مااكو حل الج اختي اذا اتضحين باي بلد غير العراق فلازم تبدين من الصفر هاي الحقيقة اللي ماكو اي هروب منهة
-
ياريت لو اكدر اساعد الاخت علوشه ماكو شي بيدي غير ان ادعليها الله يسهل عليها وبوفقها ويخلصها من كل اذى,,,,وانشالله تسافر باقرب وقت ,,,وشكرا لاخت ا
-
الله يسهل امر الاخت علوشه والف شكر لسعه صدر الاخت انجي بالرد على تساؤلات الاعضاء ,,,,,
-
والله اختي اكو مثل عراقي يكول (الحلو مايكمل ) انت عليج ان تختارين ياما الوضيفة ياما اللجوء
في حالة اختاريتي اللجوء مو الضروري ان تروحين لمسقط تكدرين تروحين لبنان او سوريا او اردن وواضح من كلامك انت ما عندك مشاكل مادية يعني تكدرين ان تعيشين بهاي الدول وايضا تاخذين اقامة سنويه بيها وتحصلين مساعدات من اليو ئن .
اما عن سفرك الى استراليا .. مو بالضرورة ان يسفوج المنضمة لاستراليا وخصوصا انت ما عندك احد هناك على حسب قولك
في النهايه القرار الك واتمنالك الموفقية والقرار السليم
اخوكم ذاكر ابو فابيان
-
اختي العزيزة انتي تكدرين تقدمين على الاي او ام عمان دايركت اكسس اي تقديم مباشر وبدون ما تقدمين على اليو ان وحتة تكدرين تبقين بغداد وتجين على المقابلات فقط وتبقين موضوع الاقامة مالتج لي حد ما تسافرين لامريكا لان دخولج لعمان مابي اي مشكلة مدام عندج اقامة مسقط
وانتي ضلي عايشة حياتج طبيعي لحد ما تسافرين بأدن اللهبس هنا اكولج انو انتي رح يكون تقديمج على امريكا لان تقديم مباشر
-
انجي .... السلام عليكم
شكرا للاخت انجي لطرحها هذا الموضوع على المنتدى. لدي مداخلة و هي رد على ما كتبه زميلنا السيد جعفر ميسم بخصوص دخول السيدة المذكورة الى الاردن ... اخي الكريم ، السيدة المذكورة لديها اقامة في مسقط ، و ليست لديها اقامة في الاردن ، و من المعروف لكي يدخل العراقي الى عمان / الاردن ، عليه ان يحصل على تاشيرة دخول الى الاراضي الاردنية حتى لو كان لديه اقامة في دولة اخرى ، و ان قدم في السفارة الاردنية في البلد الذي لديه فيه اقامة فيجب ان لا تقل ما تبقى في اقامته عن ثلاثة اشهر ، هذا ما حدث مع اخي ، عندما اراد ان يذهب الى الاردن من مصر و هو مقيم في مصر و لديه اقامة مثبتة في جواز سفره .... ارجوا ان تكون الفكرة واضحة.
-
الاخ فيت المحترم
ارجو العلم انني عند دخولي الى الارد قد حصلت على الفيزا مباشرتا من المطار بدون الحاجة الى مساعدة الاي او ام تعرف لمادا لان كان عندي اقامة مال دبي وقد كان لدي فقط شهرين قبل تجديدها وقد قامو بلاستفسار لان كان لدي فقط شهرين باقي على الاقامة ولكنهم كانو متعاونين جدا معي واعطوني فيزا لمدة شهر ومن ثم جددت الى شهرين اضافيين
فأن كانت الاخت لديها اقامة بمسقط في تستطيع الدخول والخروج بدون اي مشاكل وليس شرط ان يكون عندها اقامة في عمان
اخوكم جعفر من عمان حاليا
-
عزيزتي الاخت علوشة
تحية طيبة
اولا انتي ذكرتي انه بالعراق العراق كنتم تشتغلون مع الامرياكان هذي نفقطة جدا مهمة بانه بقائكم في العراق راح تتعبون بي لانه ماضيكم امريكي او مهما اتحسنت اوضاع العراق راح تتعبون اكثر لانه ويا الوكت راح يرحلون القواتي الاجنبية والامريكية وبما انه لغتكم الانكليزية زينة يعني اتمشون حال او اتحبون ان تهاجرون الى استراليا فانه من الافضل ان ترجعون الى عمان او خاصة انتم عدكم اقامة اهناك او اشويا اتعدلون اموركم او انتم بديتو من الصفر مثل ما اتفضلتي لمولكم جم فلس او السفرة من عمان الى استراليا مو غالية او خلي واحد منكم ان يسافر الى استراليا اعتيادي لانه عندكم اقامة في عمان او تكدرون ان تحصلون فيزة الى استراليا او هم اتشوفون البلد او هم تتعرفون على ناس اهناك بلكي اتشوفون احد اهناك يشوفلكم وظيفة او شي حتى تكدرون اما تبقون او ترجعون الى عمان او تتواصلون مع الشركات هناك بلكي الله تتوفقون ان اتحصلون على عمل او استراليا بيها بعد خير او اتسافرون كلكم الها لانه اهوايا اصدقاء اهنا عدنا اب المانيا سوها او هسى قاعدين اهناك او مرتاحين.ـ
اختي العزيزة تعرفين اشلون عذاب قضية اللجوء لانه اني صارلي زمان دا اشتغل بمساعدة اللاجئيين او دا اشوف بنت الاميرة والسلطان جوي اهنانا او اتعذبو او لي حد الان نفسين متعذبين بالرغم من حصولهم على الجنسي, او اختي الاحجاية بيناتنا اني ماخذ الجنسية بدون لجوء او هم متعذب اكول احسن شي روحو اب زيارة اتكونون محترمين اكثر مع احترامي للقدمو لجوء الى الدول الاخرى او ابوج الله يرحما او موفقين او الله يفرجها اب وجكم او يخفف من تعبكم لانه نحنا كلنا العراقيين تعبنا بعد مابينا حيل نقضنا الداعي الجي اخوج جوسي البغدادي ناشط في حقوق اللاجئين المانيا
-
اخي جعفر .... السلام عليكم
فيما يخص الذهاب للاردن : اخي الكريم في مطلع الشهر الثالث اي قبل ستة اشهر ، عندما تحسنت الاوضاع نسبيا ، عندما اوعز الملك عبد الله للداخلية بتسهيل دخول العراقين و منحهم الاقامات ، سافرت بدون فيزا من مصر عبر ميناء العقبة الى الاردن ، و قد منحت تاشيرة الدخول في العقبة , بعد ان اقمت بضعة ايام في عمان ذهبت الى العراق برا و عدت الى القاهرة جوا. نعم كانت الامور سهلة انذاك. و لي اخ هنا في مصر ، اراد ان يسافر الى الاردن ، و ذهب للسفارة الاردنية هنا في القاهرة ، و لكن الموظف المسؤول قال له يجب ان تقدم على تاشيرة دخول من السفارة الاردنية في القاهرة و تنتظر شهر ، شرط ان يكون لديك اقامة لا تقل عن ثلاثة اشهر. هذا اللي حصل معنا بامانة .
vet2009
-
الى الاخت علوشة ما اعرف بس اريد اسال سئال يعني من تروحين لاستراليا مراح تبدين من الصفر لو باستراليا الحكومة دتوزع فلوس بالشارع وكلمن يروح للشارع وياخذ حصتة من الفلوس ويرجع للبيت . اختي العزيزة وين متروحين لاي بلد بالعالم لازم تبدين من الصفر ماكو هيجي منطق مع احترامي لحضرتج لانه كل العالم ديمر بازمة اقتصادية ومالية بس اني اعرف ليش انتو تخافون من امريكا لانه امريكا شوية طلعت سمعتها اكثر من استراليا او كندا لانه الناس ديروحون الها اكثر من الدول الاخرى فمن هيجي الناس تحجي وتكول امريكا موزينة علة كل الله يوفقكم وانشاء الله متبدون من الصفر مع تحياتي
-
مرحبا اخت انجي واللة اني انصح الاخت علوشة ان اتقدم على iom بغداد انت شتكولين مادام زوجها يشتغل وية الامريكان يعني شغلتها انشاللة محلولة واللة ايسهل عليها امرها ويسهل على العراقين اجمعين
-
في البداية جدا آسفة على تأخري بلرد عليكم لأن بصراحة اليوم يلة لكيت موضوعي اللي دزيتة للأخت أنجي جدا أشكرهة تعبتهة وياية وهية معروفة بلمنتدى ما تقصر وية أي شخص كان مشكورة جدا
وأيضا انطرح موضوعي من قبل ألأخت ميس ميساء لأن كنت جديدة بلمنتدى وما اعرف أتنقل وما اعرف وين ألكة الموضوع عذروني اخواني وخواتي
ما اطيل عليكم هم معلومات تفيدكم
أولا أقامة مسقط أكدر أدخل بيهة لعمان شوكت ما اريد وهاي اللي استفادينا من اقامة مسقط وجربنة الدخول للأردن بأقامتنة بلمطار وبلحدود البرية ودخلونة عادي واحترمونة جدا كون اقامتنة خليجية
ثانيا صح عندي اقامة مسقط ومحافظين عليهة كون بس زوجي يروح كل 6 اشهر يدخل ويطلع للسلطنة حتى يحافظ على الاقامة واني كل سنتين اروح اجددهة ولحد الآن ما رايحة بعد لا تزال اقامتي كون الاقامة العائلية ما يحتاج كل 6 اشهر للتجديد
ثالثا مو معناهة انه عدنة اقامة ومحافظين عليهة انه حالتنة المادية جيدة وتسمحلنة نقدم على فيزة لاستراليا او على غير مكان ونشوف الوضع هناك مثل ماكال الاخ جوسي البغدادي مشكور على ردة الي ومساعدتكم كلكم على العين والراس الكل مشكور
لان مثل ما تعرفون الطيران غالي ومكلف واني عندي اطفال 2 وصعب انه ابقى وحدي مع الاطفال او اسافر معاهم وحدي
وأيضا لو حالتنة المادية تسمح نعيش بهاي الدول العربية مثل ماذكر اخوية ذاكر ابو فوبيان مشكور جدا على ردة
جان ما رجعنة من مسقط واساسا جان جدا سهل بوكت اللي جنة هناك باسبوعين تطلعلنة فيزة للسويد على شرط نداور مبلغ مادي بلبنك
فخلصنة اخر فلس عدنة ورجعنةلبغداد
أيضا عندما كتبت الرسالة للأخت انجي كنت اتذكر ماصار بينة فكتبت هيج انه ما نريد نبدي من الصفر لكن لو تقرأون الرسالة مرة أخرى راح تلاحظون أنه كتبت اذا ما صارت استراليا فأكيد نريد امريكا لان أي دولة هسة اهون من بغداد مع الأسف
وحتى تجديد الاقامة بلنسبة لزوجي مصاريف ذهابة وايابة دتصير من لكمتنة مثل مانكول اللي نجمعة من الوظايف مالتنة بلسنة نذبة للطيارة مالتة مال كل 6 أشهر
وبلنسبة للأخ اللي ذكر انه ليش ما نبقى مادام عدنة وظايف فأيضا الحياة يا اخوية مو بس عدنة وظايف وناكل وانام وهاهية هاي هيج تعودنة بلعراق وأيضا دتصير وظايفنة لسد العيشة اليومية فقط والباقي لتذكرة الطيارة لتجديد الاقامة فشنو الفايدة من هلوظيفة صح الحمد لله بس الوضع ما يشجع بوضعيتنة
وأيضا افكر بلخروج خارج العراق أيضا لسبب آخر همة أولادي لأن ماكو مستقبل هنا الهم حتى التعليم بلعراق صار فاشل جدا
أخيرا آسفة طولت عليكم وتعبتكم بلقراءة
عموما ألف ألف شكر على ردكم الرائع وتعبتكم وياية وما قصرتو وأشكر الكل نفر نفر وردهم على العين والراس
وعذروني مرة ثانية لأن طولت بلاجابة عليكم والله جنت ما ادري وين الموضوع هسة اكتشفت اكو اكثر من صفحة
شكرا تحياتي علوشة
ملاحظة : حبيت أوضح كلشي هم للفائدة وهم جواب لردود أخواني الكرام والف شكر
-
اختي العزيزة انت ليش مدوخة نفسج تكدرين بكل بساطة تقدمين على iom ما دام زوجج مشتغل ويه الاميركان .. والقضية كلها ايميلات تصير وراها من يصير عندج موعد ماقبلة تكدرين تروحين لعمان علمود المقابلة وترجعين للعراق علمود العيشة غالية بعمان .. بس حطي بالج انه راح معامتلج تاخذ سنة وشوية الى ان تكدرين تطلعين من العراق مو قضية سهلة واتمنى اكون ساعدتج بشي
-
شكرا اختي سوزي على مساعدتج اكيد فادتني مساعدتج مجرد مرورج على موضوعي وصارلة فترة هذا يكفي دليل على حبج للمساعدة
أختي اللي محيرنة أنه ماعندة رسالة توصية ولا ايميل رسمي لأحد يكفلة فقط شهادة تقدير وباجات 2 وصورة
فما ادري هذا يفيدنة بلتقديم لل iom? او ال siv?
اذا عندج معلومة بهلخصوص ياريت تفيديني وشكرا الج مرة لخ
وأيضا بعثت قبل يومين ايميل لل siv
وايميل لل iom
وانتظر والله كريم ولو دزيتهة بلعربي راح احولهة انكليزي وادزهة مرة لخ الله يسهل على الكل
-
اخت علوشة الله بالخير:
اني قريت الموضوع وقريت الردود وطبعا اني اسف على سماعي لهيج اخبار واتنى لكم الاستقرار
ادناه ما اتوقع ان يكون الحل المناسب لكم واتمنى ان اكون فدتكم شوية:
بما انه وضعكم جدا صعب في بغداد فانتم من السهوله جدا ان تنتقلون الى محافظة اخرى داخل العراق وبهيج حاله مراح تبدون من الصفر يعني خلي انكول على الاقل 50% اذا مو 80% وطبعا هذا الشي يعتمد على موقع المحافظة شمال - جنوب - وسط وكذلك ديانتكم ومذهبكم و ديانة ومذهب المحافظة الي انتم رايحين الها.
ولو هاذي الكلمة تزعل بس اسمحيلي اكلج انه انتم وين جنتوا نايمين؟؟؟؟
لان برنامج ال iom وال siv موجودين من حوالي اعتقد ثلاث سنوات
وانا اكدر اعزو تاخركم بالتقديم الى سببين
الاول : امركم جانت طيبة جدا ومتريدون تفرطون بالعيشة بالعراق العظيم
الثاني : انتم ما تدرون اكو هيج برامج لجوء وهذا يدل على اهمالكم لقضية المستقبل لان لازم الواحد دائما يبحث عن الافضل.
اني يمكن نزلت عليكم شوية و اعتذر بس شسوي لان محترك عليكم تدرين ليش لان ما بقة احد ما قدم على ال iom
عموما الي فات مات وعلينا بالجاي شراح تسوون؟
بالنسبة لسوالج عن مسالة عناوين البريد الالكترونية مال اصدقاء زوجك هذا سؤال جدا حلو ومهم بنفس الوقت لان اذا مكدروا يتصلون بالشخص الي مسوي التزكية لزوجج فالعملية كلها فلسين متسوة... بس اكو حل شنو؟
تدخلون على ال facebook.com او myspace ومعظم الامريكان مشتركين بهاذي البرامج واني متاكد زوجج راح يلكي كل الناس الي مشتغل وياهم عن طريق الة البحث الموجودة بالموقع (وهاي المسالة عليكم)
اني سويت هذي الطريقة ولكيت حوالي اكثر من 40 واحد اني مشتغل وياهم و رجعت هلاقتي بيهم كلهم.
و حتى لو افترضنا انه زوجج محصل العنوان البريدي مال مسؤوله المباشر فاكيد يكدر يحصل شي او خبر من غيره.
اتمنى ان اكون ساعدتكم شوية
واكو ملاحظة مهمة انه مثل مذكر احد الاخوان انه ال iom تاخذ وقت طويل فانتم اذا كان التهديد قوي لا سامح الله فانصحكم انه تهاجرون بدخل البلد بالبداية انفا.
واسف على الازعاج
اخوكم زيوس
-
شكرا جزيلا أخوية زيوس أكيد فدتني شكرا جزيلا الك والله يا اخوية اللي مأخرنة ومبقينة بلعراق زوجي كان ما يرضى نطلع كون امورنة ماشية وماشية هم مو هواية يعني الحمد لله كون كان مقتنع انه عدنة بيت وسيارة وراتب شهري مال وظايفنة فجانت هاي كلش كافية عندة ومقتنع بيهة وخصوصا اقتنع بيهة بعد ان فشلنة في مسقط وجربنة صعوبة العيش بلأجارات وفواتير الكهرباء والمي والعيشة والصحة
المهم والحمد لله ماجنة ايضا نعرف بهاي البرامج
بشهر 8 من سنة 2009 هاي السنة يعني يلة عرفنة اكو هيج شي بس جنة نعرف على اليو ان ومن قدمنالهم رفضونة علمود اقامة مسقط
وايضا زوجي ماخبرهم انه كان يعمل مع الامريكان يمكن لو كايللهم جان حولونة همة على ال iom
المهم والحمد لله هسة اقتنع بلطلعة بعد ان شاف الامور صعبة وبصراحة تهديدنة مو هاي الدرجة الجبيرة تكدر تكول 50 بلمية بس هم تخوف وعايفيهة على الله لأن هو مؤمن انه نكعد ابيتنة ونسكت مانطلع مكان الة اذا صارت مال المنظمتين وحدة منهم لأن مؤمن انه قل لن يصيبنا الا ماكتب الله لنا
وعلى الله وعليكم ان شاء الله نبدي مشوارنة والله يسهل
هسة اريد ابدي الخطوة الاولى وهم لهسة ماكو شي
دزيت ايميلات وماكو جواب لل siv وال iom
تحياتي علوشة
-
شكرا جزيلا اخوية زيوس على اهتمامك بلموضوع وحركة دمك ان شاء الله يبقى دمك صافي وما يحترك
الله يسلمك من كل مكروه
نسيت أخبرك انه هو كان يعمل بلحلاقة مع الامريكان يعني ماعندة احد مسؤول عليه فقط اشراف وماجان شايف شكلة اصلا للمشرف بس اسمة بهويتة
وفعلا ياأخي كنة مهملين بقضية المستقبل كل يوم يتوقع ابو الجهال انه الوضع ديتحسن مع انه آني ماجنت اشوف اي تحسن لأن العراق بعد انتهى مع الاسف واي هدوء بيه يصير فهذا الهدوء اللي يسبق العاصفة
والله الستار
شكرا مرة ثانية وبارك الله بيك
تحياتي علوشة